Ia haafaufaa rahi tatou i te putuputuraa huiraatira o ta tatou amuiraa
1 Tau matahiti i teie nei, ua itehia e te hoê taurearea i te hoê api titau-manihini-raa i te mau putuputuraa o te amuiraa i reira. I te mea e te imi ra oia i te parau mau, ua opua ihora o ˈna e haere i te putuputuraa huiraatira i te reira iho sabati. Ua tae oioi oia i te piha. Ua farii popou te hoê taata poro ia ˈna e, i te roaraa o te aparauraa, ua pûpû oia ia ˈna i te hoê haapiiraa bibilia, o ta ˈna i patoi. Tera râ, ua maere roa taua taurearea ra i te oreroraa parau huiraatira, o tei faaineine-maitai-hia, ua taui oia i to ˈna manaˈo: i muri aˈe i te putuputuraa, ua farii oia i te haapiiraa. Ua haere oioi oia i mua e ua bapetizo ia ˈna tau avaˈe i muri iho. E nehenehe tatou e huti mai e toru haapiiraa i roto i teie tupuraa.
2 A tahi, ua riro te putuputuraa huiraatira ei titau-manihini-raa. Te faaohipa ra anei tatou i te mau api titau-manihini-raa no te faaite i te mau putuputuraa o ta tatou amuiraa? Ia faaite te peretiteni i te tumu parau o te oreroraa parau huiraatira no te hebedoma i mua, e manaˈo tatou i te feia o ta tatou tuhaa fenua o te anaanatae i te tumu parau, ia taio ratou aore ra eita i ta tatou mau buka. Aita te tahi mau taata e au i te taio, aore ra e fifi rahi to ratou ia taio, tera râ, e hinaaro paha ratou e faaroo i te hoê oreroraa parau bibilia.
3 A piti, ua farii-popou-hia te taurearea. Ma te faanaho i te tae oioi i te piha, e nehenehe tatou e aroha i to tatou mau taeae e mau tuahine e te feia farii maitai atoa (Heb. 10:24). Mai te peu e te haere maira te hoê taata no te taime matamua, aita paha o ˈna i ite e eaha te ohipa e tupu. E faataa tatou ia ˈna e e haamata ta tatou mau putuputuraa na roto i te hoê himene e te hoê pure, e e parau tatou ia ˈna e nafea te tereraa o te reira. Mai te peu e e mea tano, e ani tatou ia ˈna ia parahi i pihai iho ia tatou ia fanaˈo o ˈna i ta tatou Bibilia e ta tatou buka himene. E titau tatou ia ˈna ia ui mai ia tatou ia oti te putuputuraa i te mau aniraa te ô mai i roto i to ˈna feruriraa.
4 A toru, ua faaineine-maitai-hia te oreroraa parau. Te horoa nei te feia e haamaitairaa ta ratou ia tia no te amuiraa ei feia orero parau huiraatira e rave rahi mau hora no te faaineine e no te faahiti faahou no te turai i te feia e faaroo ra ia faaite hau atu â i te here e ia rave i te mau ohipa nehenehe mau. Te farerei nei tatou paatoa i te mau faateimaharaa i to tatou nei mau mahana, e ua riro te mau parau mau tamǎrû o te Parau a te Atua i te mea tano no te tauturu ia tatou ia faaoromai. E parau mau, e nehenehe te oreroraa parau e horoa mai i te haapiiraa maitai, eita râ te reira i te mea faufaa mai te peu e eita tatou e faaroo. Te fifi ra anei tatou i te tahi mau taime ia haamau i to tatou feruriraa i te roaraa o te oreroraa parau? E mea faufaa ia rave i te mau nota, mai ta tatou e rave pinepine ra i te mau tairururaa. E ara tatou i te apee i te mau irava atoa taiohia e e faataahia i roto i ta tatou Bibilia.
5 Ua faanaho te Taiete i te mau oreroraa parau huiraatira i nia e rave rahi tumu parau bibilia. Na roto i te arai o te tiaau-peretiteni aore ra te hoê taeae o ta ˈna i maiti, e faatano te tino matahiapo i te porotarama o te putuputuraa huiraatira. E maitihia te mau oreroraa parau, e na te Taiete e horoa mai i te mau tino parau, ia au i te mau hinaaro o te amuiraa. Eiaha roa tatou e mairi i te hoê noa ˈˈe o teie mau oreroraa parau faufaa, e e haafaufaa rahi tatou i te putuputuraa huiraatira i te hebedoma.