E faaohipa maitai anaˈe i to tatou taime
1 Te tâuˈa nei Iehova i te taime. Te hinaaro ra o ˈna ia haapao atoa tatou i te reira e te tauturu nei o ˈna ia tatou na roto i te arai o ta ˈna faanahonahoraa. Te faaitoitohia nei tatou ia “rahi â te rave i te ohipa a te Fatu.” (Kor. 1, 15:58.) E rahi ïa tatou i te aravihi i roto i te taviniraa a Iehova.
2 Te fanaˈo nei tatou paatoa e 168 hora i te hebedoma tataitahi. Te faaohipa ra anei tatou i taua taime ra ma te paari? Te faaite ra anei tatou e ua ite mau tatou e teihea roa tatou i roto i te kalena a Iehova? Te vaiiho ra anei tatou ia haafariu-ê-hia tatou e te mau ohipa faufaa iti?
3 E mea faufaa ia faanaho-maitai-hia. E rave rahi kerisetiano o te tutava nei i te faatura i te hoê tabula o te mau ohipa faufaa roa ˈˈe. E tatuhaahia te ohipa tataitahi ia au i to ˈna faufaaraa. Nafea ia faaoti i te mea faufaa roa? Te parau nei te Bibilia e e tia i te hoê taata ia ‘rave i te maitai no ta ˈna ra ohipa.’ (Koh. 3:13.) E mea hotu aˈe te tahi mau ohipa i te tahi atu. E hiˈo tatou i te mau faahopearaa ta tatou e nehenehe e ite. Te faufaa-mau-hia ra anei tatou i te tupuraa o tera aore ra te tahi atu ohipa? Te ‘rave ra anei [tatou] i te maitai’ no ta tatou ohipa puai? Mai te peu e aita, e ere paha ïa te reira i te hoê ohipa faufaa roa.
4 I roto i ta tatou taviniraa: Te haafaahiahia nei matou i te feia poro e tae mai nei i te mau putuputuraa no te pororaa i te hora tia, o te faaroo maitai ra i te mau faaueraa e o te haere oioi nei i roto i te tuhaa fenua. Maoti râ i te tiai, mea hinaaro aˈe na tatou ia horoa i to tatou taime i roto i te pororaa. E au ra e ua taa ia Paulo i te faufaaraa ia ohipa ma te nahonaho, i te mea hoi e ua papai oia e: “E rave râ i te mau mea atoa ra ma te tia e te ma te [nahonaho].”—Kor. 1, 14:40.
5 Ia apiti anaˈe tatou i roto i te pororaa, te erehia nei paha tatou i te hoê taime faufaa ma te faafaaea rii. Tera râ, mai te peu e mea ino roa te huru o te mahana, e nehenehe tatou e faafaaea no te faaoraora faahou e no te tamau â i ta tatou ohipa. Mea au aˈe na te rahiraa o te feia poro e poro e aita ratou e faaohipa nei i te taime ta ratou i faaherehere no te pororaa no te faafaaea e te tahi atu mau taeae e mau tuahine. Ia tapea mai tatou i te manaˈo aifaito i roto i taua tuhaa ra.
6 “Ua ite hoi te heside o te raˈi ra i to ˈna mau tau” no te reva i te fenua ê; e te ro, ‘te faaineine ra ïa o ˈna i ta ˈna maa i te tau veavea ra’ ia ineine o ˈna i te faaruru i te tau toetoe, o ta te Bibilia ïa e parau ra (Ier. 8:7; Mas. 6:6-8). Te reira hoi te parau omoe o te hoê faanahoraa maitai o to tatou taime. E tia atoa ia tatou ia ‘ite maitai i to tatou mau taime faataahia.’ Ma te ore e faahepo rahi roa, e tia ia tatou ia haapao i te taime. E tia ia tatou eiaha ia ite noa i te ohipa ta tatou e rave, i te taime atoa râ e tia ia ravehia te reira. E tia ia tatou ia haamatau i te faanaho i ta tatou mau ohipa a haapao noa atoa ai i te mau fifi e nehenehe e tupu mai. Ia ineine atoa tatou i te vaiiho i te tahi mau ohipa no te horoa i te taime no te tahi atu mau ohipa faufaa roa ˈˈe, mai te faaineineraa i te mau putuputuraa, te pororaa e te tahi atu mau ohipa teotaratia.
7 Te hinaaro nei tatou e pee i te hiˈoraa o to tatou Metua i nia i te raˈi, te Atua ra o Iehova, o te haapii ra ia tatou e “e tau to te mau mea atoa nei.” (Koh. 3:1.) Ma te faaohipa maitai i to tatou taime, e nehenehe tatou e ‘rave faahope i ta tatou taviniraa.’—Tim. 2, 4:5.