Ia aravihi tatou i roto i ta tatou taviniraa

¹ Te haarumaruma ra te raˈi, e te rahi noa ˈtura te hoê maniania riaria, e tae roa ˈtu i te uˈanaraa. Te pou maira te hoê ata mai te au auahi ra te huru. Eaha mau na te reira? Te hoê ïa nuu e rave rahi mirioni vivi o te faaano roa i te fenua! Te tupu nei taua hohoˈa ra, i faaitehia e te peropheta Ioela, i teie nei mahana na roto i te pororaa e faatupuhia ra e te mau tavini faatavaihia a te Atua apitihia mai e to ratou mau hoa o te nahoa rahi.

² Te na ô nei Te Pare Tiairaa o te 1 no Me 1998, i te api 11 e i te paratarapha 19, e: “Ua horoa te mau vivi a te Atua no teie nei tau i te faaiteraa taatoa i roto i ‘te oire’ o te Amuiraa faaroo Kerisetiano. (Ioe. 2:9) . . . Te tamau nei ratou i te faaruru i te mau faaapǐapǐraa atoa, te tomo nei ratou i roto i te mau mirioni utuafare, te paraparau nei ratou i te taata na roto i te aroâ, na roto i te niuniu paraparau, e na roto i te tahi atu mau ravea ta ratou e nehenehe e faaohipa no te faaite atu i te poroi a Iehova.” E ere anei i te haamaitairaa faahiahia te apitiraa ˈtu i roto i taua ohipa ra i faauehia mai e te Atua?

³ Taa ê atu i te mau vivi mau, o te tapitapi noa i te faatamaa ia ratou, tatou te mau tavini a Iehova, te haapeapea rahi nei tatou no te ora o te feia o ta tatou e poro nei. Te hinaaro nei tatou e tauturu ia ratou ia haapii i te mau parau mau hanahana a te Parau a te Atua e ia faaitoito ia ratou ia rave i te mau taahiraa avae e aratai i te ora mure ore. (Ioa. 17:3; Tim. 1, 4:16) No reira tatou e hinaaro ai e rave i ta tatou taviniraa ma te aravihi. Noa ˈtu te huru faaiteraa o ta tatou i maiti, e tia ia tatou ia uiui e te poro ra anei tatou ma te hoê ravea e i te hoê taime o te horoa i te mau faahopearaa maitatai. I te mea e “te [“taui,” MN] nei hoi te huru o teie nei ao,” e tia ïa ia tatou ia hiˈopoa maitai i ta tatou mau ravea e ta tatou huru paraparau i te mau taata ia papu ia tatou e te rave mau nei tatou i te mau tutavaraa ia rahi ta tatou mau hotu.—Kor. 1, 7:31.

⁴ Noa ˈtu e te tutava ra tatou i te farerei i te mau taata na roto i te mau ravea e rave rau, te riro noa nei te pororaa na te mau fare ei tuhaa faufaa no ta tatou taviniraa. Te ite ra anei tatou e, e pinepine aita e taata to te fare aore ra te taoto ra ratou a haere ai tatou e farerei ia ratou? Auê ïa te peapea e ia ore e faaite ia ratou i te parau apî maitai! Nafea ia haapaiuma i taua fifi ra?

⁵ Ia faaau ohie e ia faaite tatou i te manaˈo maitai: I te senekele matamua, i Iseraela, i haere na te feia ravaai e taiˈa i te po. No te aha hoi? Parau mau, e ere te reira i te taime maitai roa ˈˈe no ratou, e taime maitai roa ˈˈe râ tera e noaa rahi mai ai te iˈa. Mea manuïa roa ˈˈe i taua taime ra. No nia i taua raveraa ra, te na ô ra Te Pare Tiairaa o te 15 no Tiunu 1992 e: “E tia atoa ia tatou ia hiˈopoa i ta tatou tuhaa fenua no te haere atu e taiˈa, ei auraa parau, i te taime tei te fare te rahiraa o te taata e e faaroo mai ratou.” Na roto i te hiˈo-maitai-raa i te mau peu matauhia e te feia e ora nei i roto i te mau tuhaa oire e i te mau vahi faaearaa, te itehia ra paha e tei to ratou fare te mau taata e rave rahi i te mau poipoi Mahana maa e Sabati, aita râ ratou e hinaaro ra e faaroo i taua taime ra. Mai te peu e mai te reira iho â i to tatou fenua, eita anei ïa ta tatou e nehenehe e haere atu i muri iho rii i te poipoi, aore ra i te avatea? E ravea maitai te reira ia aravihi atu â ta tatou taviniraa e no te faatura i to tatou taata-tupu, o te reira hoi te here Kerisetiano mau.—Mat. 7:12.

⁶ I roto i te Philipi 4:5, te faahaamanaˈo maira te aposetolo Paulo e ‘ia iteahia to tatou mǎrû e te taata atoa ra.’ Ia au i teie aˈoraa faauruahia, te hinaaro nei tatou e ohipa ma te faito noa e te mǎrû a poro ai tatou ma te itoito e te anaanatae. Eita tatou ‘e tapea ia tatou i te haapii i te vahi taata e i tera fare e tera fare,’ te hinaaro nei râ tatou e papu e te rave nei tatou i ta tatou taviniraa i te mau taime tano e te manuïa. (Ohi. 20:20) Mai te feia ravaai ati Iseraela i te senekele matamua, e tia ia tatou ia ‘taiˈa’ i te taime e noaa ˈi ia tatou te mau faahopearaa maitai roa ˈˈe, eiaha râ i te taime e tano no tatou.

⁷ Eaha te mau tauiraa e titauhia ra no te reira? I te rahiraa o te taime, te faatupuhia nei te mau putuputuraa no te pororaa i te mau Mahana maa e te mau Sabati i te poipoi i te hora 8 aore ra i te hora 8 e te afa, e haere oioi atu ai te mau taata poro i roto i te pororaa. No reira ˈtura ïa, e rave vetahi mau tino matahiapo i te mau faanahoraa ia faaohipa te mau taata poro i te tahi atu mau huru pororaa, mai te pororaa i roto i te aroâ, i te mau vahi tapihoo, i te mau hoˈi-faahou-raa e farerei, hou a haere atu ai i roto i te pororaa i te mau vahi faaearaa. I roto i vetahi mau tuhaa fenua, mea maitai aˈe ia poro i te avatea eiaha i te poipoi. Peneiaˈe e tauturu taua mau tauiraa ra ia hotu roa ˈtu â te pororaa na te mau fare.

⁸ Ia noaa ia tatou te ite maite e ia faatano tatou i te parau: Mea taa ê te huru o te mau taata o ta tatou e farerei ra na te mau fare i mua i ta tatou poroi. Te faaroo maitai nei vetahi, aita te tahi e tâuˈa nei, e te mârô nei vetahi atu aore ra te riri nei ratou. No nia i te reira, te faahaamanaˈo maira te buka ra Comment raisonner à partir des Écritures i te api 7 e eiaha tatou e “imi i te tahi mau manaˈo no te feia aita e faatura ra i te parau mau.” Mai te peu e te haamata ra te taata e paraparauhia ra i te riri, mea au aˈe ia vaiiho ia ˈna. Eiaha roa ˈtu te taata ia inoino mai ia tatou no to tatou onoonoraa ia paraparau mai ratou ia tatou aore ra ia farii mai ratou i to tatou manaˈo. Eita tatou e faahepo i te hoê noa ˈˈe taata. E ere te reira i te mea tano e e nehenehe e faatupu mai i te tahi mau fifi no te tahi atu mau Ite, tae atoa hoi i te haafifi i te pororaa taatoa.

⁹ Hou te tuhaa fenua e porohia ˈi, mea maitai ia hiˈo e te vai ra anei te hoê nota i roto i te puohu iti o te faaite ra i te vahi nohoraa o te mau taata o te ore roa e hinaaro e farii faahou ia tatou. Mai te peu e te vai ra, e faaarahia ˈtu ïa i te taata poro tataitahi o te poro ra i roto i te aroâ. Eiaha roa ˈtu te hoê taata poro e faaoti i te haere e farerei i taua mau taata ra ma te ore e ani i te tiaau no te taviniraa.—Hiˈo Te taviniraa o te Basileia no Tiunu 1994, Pahonoraa i ta outou mau uiraa.

¹⁰ E aravihi roa ˈtu â tatou ia ohipa tatou ma te ite maite na te mau fare. Ia hiˈo maitai tatou ia haafatata ˈtu tatou i te hoê fare. Ua piri anei te mau haamaramarama e te mau paruru atoa? Aita anei hoê aˈe maniania? Te taoto ra paha te feia no reira. Peneiaˈe e manuïa ta tatou aparauraa i muri iho. Mea au aˈe paha, i taua taime ra, e vaiiho i taua fare ra e e tapao i to ˈna numera. E nehenehe tatou e hoˈi faahou mai hou tatou e faarue ai i te tuhaa fenua aore ra e tapao no te hoˈi faahou mai i muri iho.

¹¹ E nehenehe atoa râ tatou e faaara aore ra e haapeapea i te hoê taata ma te opua-ore-hia. E taahoa aore ra e riri mai paha te taata. E nafea ïa tatou? Te horoa mai nei te Maseli 17:27 (MN) i teie aˈoraa: “Te taata ite maite, e feruriraa hau to ˈna.” Eiaha tatou e faahapa ia tatou iho no to tatou raveraa i ta tatou taviniraa, e tia râ ia faˈi tatou e ua haere mai tatou i te hoê taime tano ore. E nehenehe tatou e ui ma te faatura e e nehenehe anei tatou e hoˈi faahou mai i te hoê taime tano aˈe. E pinepine te mau parau maitatai faahitihia ma te reo mǎrû i te tamǎrû i taua huru taata ra. (Mas. 15:1) Mai te peu e e parau mai te hoê taata ia tatou e te rave nei oia i te ohipa i te po, e nehenehe ïa tatou e tapao i taua haamaramaramaraa ra o ta tatou e vaiiho e te tabula o te tuhaa fenua, ia haere tatou e farerei ia ˈna a muri aˈe i te hoê taime e tano no ˈna.

¹² No te poro faahope roa i te tuhaa fenua, e titau-atoa-hia te ite maite. I te mea e aita te rahiraa o te taata i ô ratou i to tatou tere matamua, e tia ïa ia tatou ia tutava hau atu â no te faaite i te poroi faaora. (Roma 10:13) I te tahi taime, te tamata nei te tahi feia poro i te farerei i te mau taata e rave rahi taime i to ratou fare i taua noâ mahana ra. E huti te reira i te ara-maite-raa o te feia tapiri, o te nehenehe hoi e manaˈo ino mai e tei ‘mua noa [te mau Ite no Iehova] i te opani fare o te mau taata’ i roto i to ratou aroâ. Nafea ia ape i te reira?

¹³ E faaohipa anaˈe i te ite maite. Ia hoˈi faahou mai tatou i te opani o te hoê taata aita i te fare, te vai ra anei te tahi mea e faaite ra e ua hoˈi mai te taata no reira? Mai te peu e te itehia ra te vehî rata aore ra te tahi mau api parau i rapaeau rii i te afata rata, peneiaˈe aita iho â ïa e taata, e mea faufaa ore ia patoto noâ i te opani. Mai te peu e aitâ tatou i manuïa i te farerei i te taata i muri aˈe e rave rahi tamataraa i te mau taime ê atu o taua noâ mahana ra, tae noa ˈtu i te ahiahi, e nehenehe tatou e taniuniu atu ia ˈna. Aita anaˈe, e vaiiho omoe anaˈe i te hoê api parau iti, mai te peu iho â râ e te poro-pinepine-hia ra te tuhaa fenua. Peneiaˈe e farerei iho â tatou i te taata ia poro-faahou-hia te tuhaa fenua.

¹⁴ Ia titauhia mai tatou ia tomo atu, e ara anaˈe ia ore e faarepo i te tahua fare. E feruriraa maitai to tatou ia aoa mai te hoê urî ia tatou. Mai te peu e te poro nei tatou i roto i te hoê fare tahua, e paraparau mǎrû anaˈe e e ape anaˈe i te haamaniania, e nehenehe te reira e haapeapea i te feia no reira e e faaite e to reira tatou.

¹⁵ Ia vai nahonaho e ia vai tura tatou: Maoti te hoê faanahoraa maitai, e nehenehe e ape i te mau haaputuputuraa rarahi ite-maitai-hia i roto i te tuhaa fenua. E nehenehe te mau taata e haapeapea i te iteraa i te mau pereoo e te mau camionnette o te tapea ra i mua i to ratou fare e te hoê pǔpǔ rahi feia poro o te haaputuputu ra. Te hinaaro nei tatou e ape e ia manaˈohia e te “faaî” nei tatou i te mau vahi faaearaa. Mea tano aˈe ia faanahohia i te taime putuputuraa no te pororaa i te Piha no te Basileia. Eita te mau pǔpǔ iti feia poro, ia au i te faito o te hoê utuafare, e haamǎtaˈu i te feia e faaea ra i roto i te tuhaa fenua e e mea ohie roa ia faanaho faahou a poro-noa-hia ˈi te tuhaa fenua.

¹⁶ No te nahonaho maitai, e titauhia i te mau metua ia ara maitai i te haerea o ta ratou mau tamarii ia poro ratou. E tia i te mau tamarii ia faaite i te mau peu maitatai ia apiti atu ratou i te feia paari na te mau fare. Eiaha e vaiiho i te mau tamariirii ia hauti aore ra ia ori haere noa, a huti ai ma te au ore i te ara-maite-raa o te feia no taua vahi faaearaa ra aore ra o te feia e hahaere ra, i nia ia ratou.

¹⁷ E tia atoa ia vai faito noa no nia i te mau taime faafaaearaa. Te faahiti ra Te taviniraa o te Basileia no Tiunu 1995, i te api 3, e: “Ia apiti anaˈe tatou i roto i te pororaa, te erehia nei paha tatou i te hoê taime faufaa ma te faafaaea rii. Tera râ, mai te peu e mea ino roa te huru o te mahana, e nehenehe tatou e faafaaea no te faaoraora faahou e no te tamau â i ta tatou ohipa. Mea au aˈe na te rahiraa o te feia poro e poro e aita ratou e faaohipa nei i te taime ta ratou i faaherehere no te pororaa no te faafaaea e te tahi atu mau taeae e mau tuahine.” Noa ˈtu e e ohipa na te taata tataitahi te reira, te itehia ra e te farerei faahou nei te tahi mau pǔpǔ taeae e tuahine i te fare hoohooraa maa aore ra i te fare toa. Taa ê atu i te taime tiairaa e ia hopoihia mai te maa, e nehenehe te hoê pǔpǔ rahi taata e faaapǐapǐ i te tahi atu mau taata. I te tahi mau taime, e faatia te mau taeae ma te vaha rarahi i te mea o ta ratou i rave i roto i te pororaa i taua noâ poipoi ra, o te faaino hoi i te tura e te aravihi o ta tatou taviniraa. Ma te ara maite, e ape ïa te mau taata poro i te faaapǐapǐ i te hoê fare toa e i te haamâuˈa i te taime i roto i te pororaa.

¹⁸ Te manuïa maitai nei e rave rahi na roto i te aparauraa ˈtu i te mau taata i te mau vahi atoa tei reira ratou: i roto i te mau aroâ, i te mau vahi tapearaa pereoo e i te tahi atu mau vahi huiraatira. I reirâ, te hinaaro nei tatou e faaite i te hoê haerea maitai, eiaha ma te parau vaha noa, ma te manaˈo paari atoa râ. E tia i te mau taata poro a te amuiraa tataitahi ia ara i te faatura i te mau otia o ta ratou tuhaa fenua, ia ore e haapeapea i te mau taata. Ia papu ia tatou e te rave nei tatou i ta tatou taviniraa ma te nahonaho e te tura, eita ïa tatou e haere i ǒ mai i te mau otia o ta tatou tuhaa fenua, mai te peu e aita i ravehia te tahi mau faanahoraa taa ê e te tomite no te taviniraa o te tahi atu amuiraa e hinaaro ra i te tauturu.—Hiˈo Korinetia 2, 10:13-15.

¹⁹ E rave rahi mau vahi ta vetahi mau amuiraa i reira e nehenehe ai e faaohipa i te pororaa faanaho-ore-hia. No reira, ua tâpûpûhia ïa ei mau tuhaa fenua. E horoahia ïa te hoê tabula tuhaa fenua i te hoê taata poro aore ra i te hoê pǔpǔ, ia nehenehe e porohia ma te aravihi e eiaha te mau taata poro ia poro i te hoê â taime i te hoê â vahi, ia au i te faaueraa i faahitihia i roto i te Korinetia 1, 14:40 (MN): “Ia ravehia te mau mea atoa ma te tura e ma te nahonaho.”

²⁰ E tia i to tatou huru rapaeau ia vai tura noa e ia faaite e e mau tavini tatou o te amo ra i te iˈoa o Iehova. E parau mau atoa te reira no ta tatou mau tauihaa. E faaino te mau pute fatata i te mutu e te mau Bibilia miˈomiˈo aore ra marau i te poroi o te Basileia. Ua parau te hoê taata e “e faaite oioi mai [to tatou faaahuraa e to tatou pahereraa rouru] i te mau taata e haaati ra ia tatou o vai tatou, to tatou huru e to tatou tiaraa i roto i te faanahoraa o te mau mea.” No reira, eiaha to tatou huru faanehenehe e haapao-ore-hia aore ra e huru ê, “ia au [noa râ] i te parau apî maitai.”—Phil. 1:27, MN; hiˈo Timoteo 1, 2:9, 10.

²¹ Te na ô ra te aposetolo Paulo i roto i te Korinetia 1, 9:26, e: “E teie nei, te horo nei au, eiaha mai te mea e aore i itea; te moto nei au eiaha mai te mea e, e moto i te mataˈi.” Mai te hiˈoraa o Paulo, te hinaaro mau nei tatou ia aravihi tatou e ia rahi ta tatou mau hotu i roto i ta tatou taviniraa. A poro ai tatou ma te itoito i rotopu i te “nuu o te mau vivi” a Iehova, ia faaite ïa tatou i te poroi faaora i to tatou taata-tupu ma te mǎrû e ma te ite maite!