O Iehova to tatou Poiete
1 Te tiaturi nei te mau mirioni taata e ua poiete te Atua i te ora. E rave rahi atoa o te tiaturi nei e mea tupu noa te mau mea. E te vai ra te tahi aita to ratou e manaˈo. No te taatoaraa te buka ra La vie: comment est-elle apparue? Évolution ou création? Te hohora nei teie buka i te hoê faataaraa hohonu e mea nafea te ora i te faraa mai e eaha te auraa o te reira no to tatou oraraa no a muri aˈe. E pûpû tatou i teie buka faahiahia roa i te avaˈe tiunu.
2 E tae noa ˈtu i te mau taata tiaraa teitei no roto mai i te ao o te ite aivanaa o te farii nei i te maramarama e te taa maitai o teie buka. Ua papai te hoê taata rave ohipa i roto i te maimiraa no te pae aivanaa no te fenua Holane: “E buka faito ore mau teie. No te huru tatararaa aravihi roa o te mau pene e te mau faahohoˈaraa i te pae ite aivanaa, mea maramarama maitai te mau mea atoa, o te matapo anaˈe o te patoi atu.” Ua parau te hoê paruru e: “E maha taime to ˈu taioraa i te buka, ua maere noa vau no te hohonuraa o te mau maimiraa e te tuatapaparaa tei titauhia no te faaineine i te reira.” E nehenehe tatou e ite papu e haafaufaa atoa te tahi atu mau taata i teie buka.
3 Peneiaˈe e maiti tatou i te hoê faaiteraa poto mai teie e:
◼ E hohora tatou i te buka i te api 6 e e parau tatou e: “E rave rahi o te tiaturi nei e e mea tupu noa mai to tatou palaneta nehenehe e te ora. I to oe manaˈoraa, mea tano anei teie tatararaa? [E vaiiho tatou i te taata ia pahono.] E rave rahi tupuraa e haapapu ra i ta te Bibilia e parau ra no nia i te hoê Poiete puai roa, e te î i te here atoa. O o ˈna te Atua mau, e to ˈna iˈoa o Iehova.” E taio tatou i te Salamo 83:18, e e faataa poto noa tatou e te opuaraa a te Atua o te faariroraa ïa i te fenua taatoa nei ei paradaiso.
4 Mai te peu e e hinaaro tatou e parau tahaa roa ˈtu, e nehenehe ïa tatou e parau e:
◼ “Ua ani aˈena anei oe i teie uiraa?” E faaite tatou i te tumu parau o te buka, e hiˈo tatou i te api 7, e taio tatou i te mau uiraa i roto i te paratarapha 2 e e parau tatou e te horoa nei teie buka i te mau pahonoraa au no roto mai i te Bibilia.
5 Aore ra e na ô tatou e:
◼ “Ua ui aˈena anei oe e mea nafea te fenua i te faraa mai? E rave rahi o te hinaaro nei e haapapu e mea na roto i te hoê paainaraa rahi o te reva. Eaha to oe manaˈo? [E vaiiho tatou i te taata ia pahono.] Te haapii nei te Bibilia e ua poiete te Atua i te fenua ei faaearaa mure ore no tatou. Mea taa ê o ˈna i te tahi atu mau palaneta o te faanahoraa o te mahana. Ia au i ta tatou i ite, tei nia anaˈe i taua palaneta ra o te reva teitei e vai ai te mau mea faufaa no te ora.” E hohora tatou i te buka i te api 130, e hiˈo tatou i te paratarapha 5 e e faataa tatou e no te aha e parauhia ˈi e na te hoê Poiete rahi i hamani i te fenua.
6 Teie te tahi atu ravea:
◼ “Te manaˈo nei te tahi mau taata e no roto mai tatou i te mau urî-taata. Te faahohoˈa nei ratou i to tatou mau tupuna mai teie te huru. [E faaite tatou i te hohoˈa i te api 89]. Eaha to oe manaˈo?” E vaiiho tatou i te taata ia pahono. E haapapu tatou i te mea e parauhia ra i roto i te paratarapha 20, e e taio tatou i muri iho i te Ohipa 4:24, o te faataa ra ia Iehova mai te Poiete e te Taata horoa i te ora. “Te hiˈopoa ra teie buka i te haapiiraa e mea tupu noa mai te mau mea atoa ia au i te haamaramaramaraa a te Bibilia.” E hiˈo tatou i te tabula tumu parau i te api 5, e e taio tatou i te tahi mau tumu parau, mai te mau pene 1, 7, 15 e te 19.
7 E faufaahia te feia aau rotahi, o tei haavarehia e te feia aita i faatupu i te faaroo i nia ia Iehova e e i nia i ta ˈna Parau, na roto i te buka ra Création. E nehenehe te mau haamaramaramaraa turuhia e te mau haapapuraa i roto e tauturu i taua mau taata ra ia faaite i te aau mehara i to tatou Poiete, o te aupuru nei ia tatou ma te here.