Nafea ia faaherehere maite i te taime
1 I te mea e mea rahi te ohipa i roto i te taviniraa a Iehova, ua î maitai ïa to tatou taime. (Kor. 1, 15:58) Ua taa ia tatou i te faufaaraa ia haapii tataitahi e i roto i te utuafare, ia taio i te Bibilia i te mau mahana atoa, ia faaineine e ia haere i te mau putuputuraa, e ia rohi tamau i roto i te pororaa. Te amo nei te mau tiaau i te hopoia tiai mamoe e te haapao nei ratou i te tahi atu mau ohipa a te amuiraa. Te amo nei vetahi i te mau hopoia utuafare teimaha aore ra i te tahi mau hopoia ê atu. E mea titauhia ia vai aifaito noa tatou tataitahi e te nahonaho maitai, ia nehenehe tatou e rave i te mau ohipa atoa.
2 A faataa i te mau ohipa faufaa roa ˈˈe: E titauhia te ite maite e te feruriraa papu no te manuïa i “te faaherehere maite i te taime.” (Eph. 5:15, 16) E tia ia tatou ia faataa e eaha “te mau mea i hau i te maitai” e ia tuu i te reira i te omuaraa o ta tatou tabula ohipa faufaa roa ˈˈe. (Phil. 1:10) Teie ta te hoê tane e ta ˈna vahine i faataa no nia i to raua utuafare teotaratia: “Ua faaî matou i to matou oraraa i te parau mau. . . . E ere noa te parau mau i te hoê tuhaa no to matou oraraa, o to matou râ te reira oraraa. Na mua te parau mau, i muri iho e faanahohia ˈtu ai te toea.” E mea faufaa roa ia tuu tatou i te haamoriraa a Iehova e Ta ˈna taviniraa i nia i te parahiraa matamua i roto i to tatou oraraa.
3 Ia ite tatou e eaha te mea e haamâuˈa ra i to tatou taime: I roto i te hoê hebedoma, te vai ra 168 hora, e e tia ia tatou ia faaohipa maitai i to tatou taime. Ia navai maitai te taime no te mau ohipa teotaratia, e tia ia tatou ia ite i te mau mea e haamâuˈa ra i to tatou taime e ia faaiti mai i te reira. Ua faaite mai te hoê maimiraa e, i roto i te faito au noa, te mataitaihia nei te tele hau atu i te 30 hora i te hebedoma! Te haamâuˈa rahi nei vetahi i to ratou taime no te taio i te mau buka a teie nei ao. Peneiaˈe e ite vetahi e te horoa nei ratou hau atu i te taime i tei matauhia no te mau ohipa amui, te mau ohipa ravehia i te taime vata, i te faaanaanataeraa aore ra i mua i te hoê matini roro uira. Peneiaˈe e tia ia tatou ia hiˈopoa maitai i ta tatou tabula ohipa tamahana no te ite e nafea ia faaohipa maitai aˈe i to tatou taime. Mai te peu e e ohipa tatou ma te paari, e taotia ïa tatou i te taime e horoahia no te mau ohipa faufaa iti aˈe.
4 Ei tabula ohipa maitai ta tatou e tia ˈi: Noa ˈtu eaha to tatou huru tupuraa, e tia ia tatou pauroa ia faaherehere i te taime ia naeahia ta tatou mau fa pae varua. Ua ite mai vetahi e ia haamata oioi aˈe ratou i te mau poipoi atoa, e mea rahi aˈe te mau ohipa o ta ratou e nehenehe e rave. Mai te peu e e mea rahi te taime e pau no te haere i te ohipa aore ra no te tiai ia vetahi ê, e nehenehe tatou e rave i tera taime no te taio i te Bibilia, no te faaineine i te mau putuputuraa aore ra no te faaroo i te mau ripene ta te Taiete i faaineine na tatou. E mea maitai roa ia faataa te mau utuafare i te hoê taime papu e te tamau no te haapii amui. Mai te peu e e tae mai te mau melo atoa o te utuafare i te hora no te haapiiraa utuafare, e hau atu ïa te taime ta te melo tataitahi e fanaˈo no ˈna iho.
5 A mairi noa ˈi te taime, e papu aˈe tatou e “te poto nei te taime.” (Kor. 1, 7:29) Ua taaihia to tatou ora i ta tatou huru faaohiparaa i teie taime faufaa roa. E haamaitaihia tatou mai te peu e e faaherehere maite tatou i te taime no te tuu i te mau faufaa o te Basileia i nia i te parahiraa matamua.—Mat. 6:33.