Te hinaaro nei te Betela i te rima tauturu

¹ Te faaite nei te Salamo 110:3 i te mea e itehia ˈi e tera te nunaa o te Atua i teie mau mahana hopea nei o to ˈna ïa huru feruriraa tauturu. Na te fenua taatoa, te horoa nei te mau tavini o Iehova ia ratou no te pororaa o te parau apî maitai o te Basileia. Tei rotopu atoa te mau melo o te utuafare o te Betela ia ratou. Ua rau e e rave rahi ohipa tei horoahia i te mau melo o te utuafare o te Betela.

² Te aravihi e te mau titauraa: Te hinaarohia ra i teie nei na mua roa i te mau taurearea tane faaea taa noa oraora maitai, no te mea te titau ra te ohipa i te Betela i te puai e te itoito i te pae tino. Mai te peu e e hinaaro o ˈna e faaî i te hoê parau aniraa e faaô i roto i te Betela, e taata bapetizohia ïa te taurearea tane ra e hoê aˈe matahiti te maoro e tia ˈi. E tia ia ˈna ia riro ei taata maitai i te pae varua, ineine i te rave puai i te ohipa, e pinepine te mau ohipa rave rima. Tei roto anei to oe matahiti i te 19 e te 35? E mea oraora maitai anei oe i te pae tino e i te pae o te mau manaˈo horuhoru? E taata maitai i te pae varua anei oe? Mai te peu e e pii atu te Betela ia oe, e faaea anei oe e hoê aˈe matahiti te maoro ma te taiva ore, ma te farii i te mau huru ohipa atoa o te horoahia ˈtu na oe? Mai te peu e e pahono oe e e i taua mau uiraa ra, e mea maitai ia feruri oe i te haamaitairaa taa ê otahi ia tavini i te Betela.

³ Te tabula ohipa a te melo o te Betela: Te rave taatoa nei te ohipa i taaihia i te Basileia i te taime o te melo o te Betela. Mai te monire e tae atu i te mahana maa, i te hora 7 i te poipoi, e haere o ˈna i te piha tamaaraa no te haamoriraa poipoi. E tuatapapa te mau melo o te utuafare o te Betela i te irava o te mahana. I muri iho, e hohora te hoê taeae aravihi i te hoê oreroraa poto apeehia i te hoê pure. E faaitoitohia ïa te utuafare i te pae varua hou a haamata ˈi te mahana ohiparaa. I muri aˈe i te hoê inuraa taofe paia maitai, e rave ïa te taata tataitahi i te ohipa tei horoahia na ˈna, mai te monire e tae atu i te mahana pae, mai te hora 8 i te poipoi e tae atu i te hora 5 e 10 minuti mairi i te ahiahi, e te hoê taime faafaaearaa e hoê hora te maoro i te avatea no te tamaa, e i te mahana maa mai te hora 8 e tae atu i te hora 11 e 55 minuti mairi. E faaohipa ïa te melo o te Betela i ta ˈna mau po, ta ˈna mau mahana maa avatea e ta ˈna mau sabati no te haere i te mau putuputuraa, i te pororaa, no te haapiiraa e no ta ˈna mau hopoia e rave rau. E nehenehe o ˈna e haere i te vairaa buka a te Betela no te haapii e no te faaineine i ta ˈna mau putuputuraa. Hau atu, te fanaˈo nei ratou i te haapiiraa o Te Pare Tiairaa e te utuafare o te Betela. Ua niuhia te tabula ohipa i te Betela i nia i te mau ohipa i te pae varua. E tupu mai ïa te hoê oraraa oaoa no te taviniraa a Iehova (Kor. 1, 15:58). Parau mau, e rave atoa o ˈna i te taime no te faafaaea e no te faaanaanatae ia ˈna (Mareko 6:31, 34). E nehenehe o ˈna e horoa i te rahiraa o to ˈna taime i te taviniraa moˈa i te Betela.

⁴ Nafea ia faaineine ia ˈna iho no te tavini i te Betela: Mai te peu e te hinaaro nei oe e tavini ma te aravihi i te Betela, a haapuai i to oe huru i te pae varua e a faatupu i te mau taairaa piri roa e o Iehova. No te maiti i te mau melo apî o te Betela, e ravehia na mua te mau pionie. Aita râ teie taviniraa i faanaho-noa-hia no te mau pionie anaˈe. E nehenehe te feia atoa e faaî ra i te mau titauraa e ani i te faaô i roto i te Betela. I te pae hopea, e tia i te hoê taata, te vai ra to ˈna mau aravihi taa ê aore ra aita, ia au maitai ia vetahi ê no te rave amui i te ohipa. E tia i te manaˈo faatitiauaraa e te faatiamâ ia vaiiho i te parahiraa i te rave-amui-raa i te ohipa e i te here, e i te hinaaro atoa e auraro i te aratairaa teotaratia.—Hiˈo Ephesia 4:16.

⁵ E farii-popou-hia te mau taeae e te mau tuahine aravihi i nia i te mau matini uira aore ra te haamauraa i te mau porotarama i te Betela. Te haapao nei te Taiete i te atuaturaa o te matini nenei hohoˈa, i te mau matini nenei api parau e te mau matini roro uira. Te hinaaro atoa nei matou i te mau taata haapao i te mau faataheraa pape, te mau taata tamaumau uira e te mau taata haapao i te atuaturaa. I roto e rave rau tuhaa, te tuhaa huriraa parau atoa, e mea faufaa no matou te mau taeae ite maitai i te reo marite e te papu maitai iho â râ i te reo tahiti, matuita, paumotu e te maareva. No te faaiti mai i te mau haamâuˈaraa o te faautaraa i te mau buka, te faaohipa nei te Taiete i to ˈna iho mau pereoo. No reira e hinaarohia ˈi i te mau taata faahoro pereoo rarahi e te mau taata tataˈi pereoo aravihi i te Betela. E hinaaro rahi atoa to matou i roto i te tuhaa atuaturaa e te neneiraa. Te hinaaro iho â nei râ matou i te mau taeae faaea taa noa, e titau-manihini-hia râ te mau taeae e aravihi taa ê to ratou i te Betela noa ˈtu e ua faaipoipohia ratou. E nehenehe oe e ani atu i te mau parau aniraa e faaô i roto i te Betela i te tiaau haaati aore ra i te mau tairururaa mataeinaa, aore ra a papai roa ˈtu i te piha a te amaa. Mai te peu e e taeae faaipoipo oe, a haamanaˈo e e tia atoa i ta oe vahine ia faatupu i te mau huru maitatai i te pae varua e mea oraora maitai i te pae tino e i te pae o te mau manaˈo horuhoru. Mai te peu e ua faaineinehia oe aore ra ua noaa ia oe i te aravihi i roto i te hoê o te mau tuhaa faahitihia i nia, a apiti atoa i ta oe parau aniraa i te hoê parau faaiteraa tatara maitai i to oe toroa, ta oe mau haapiiraa, mau aravihi.

⁶ E nehenehe anei oe e pahono i te piiraa? Te hinaaro noa nei te Betela i te rima tauturu i Tahiti aore ra i te fenua Matuita, i roto i ta matou mau fare apî. Mai te peu e te faaî ra oe i te mau titauraa no te tavini i te Betela, te faaitoito oioi nei matou ia oe ia faaî i te hoê parau aniraa. Eiaha oe e haaparuparu mai te peu e eita oe e titau-manihini-oioi-hia. E nehenehe oe e faaapî faahou i ta oe parau aniraa i te matahiti tataitahi, o te haapapu ïa i to oe hinaaro. I to Iehova parauraa e: “O vai ta ˈu e tono; o vai te haere no tatou?” Ua pahono o Isaia ma te haamarirau ore e: “Inaha, teie au; o vau ta oe e tono.” Te tiai ra e rave rahi mau haamaitairaa ia oe mai te peu e e piihia oe no te tavini i roto i te “fare o te Atua,” te Betela.—Isa. 6:8, 9.