Te aratai nei te Parau a te Atua ia tatou
1 “Te farerei nei te ao nei e rave rahi mau ati, mea varavara roa râ hoi te mau ravea no te arai i te reira. E rave rahi mau mirioni taata teie e ora nei ma te pohe i te poia; area vetahi ra, te rahi noa ˈtura hoi, teie e riro nei ei tîtî na te raau taero. Te rahi noa ˈtura te mau utuafare amahamaha, a paraparau-rahi-noa-hia ˈi i te parau no te mau taatiraa i te pae tino i rotopu i te mau fetii iho e te haavîraa uˈana ‘e rave-moe-hia nei.’ Te haapue noa nei te mau mea taero i roto i te mataˈi ta tatou e hutihuti nei e i roto i te pape ta tatou e inu nei. Ma te ore e haamoe i te parau no te ohipa taparahi taata, teie e haapohe rahi noa ˈtura i te taata.”
2 O te mau parau matamua ïa a te buka ra Te Bibilia—Parau na te Atua aore ra na te taata? Ua tano roa ˈtu â ta ˈna omuaraa parau no teie nei tau, i te tau a matara ˈi teie buka a hitu matahiti i teie nei. Te titau nei te taata ia ite e te aratai nei te Parau a te Atua ia tatou e te horoa mai nei oia i te mau ravea no te arai i te mau fifi atoa o ta tatou e faaruru nei. I te avaˈe Titema, e tutava tatou i te tauturu ia ratou na roto i te pûpûraa ˈtu i te buka ra Te Bibilia—Parau na te Atua aore ra na te taata? Parau mau, e ere no te mea e e vaiiho tatou i te buka na te hoê taata, e farii ïa oia i te aratairaa a te Atua. E tia ia tatou ia hoˈi e farerei i te taata ma te tapao e haamata i te mau haapiiraa Bibilia. E nehenehe tatou e tiaturi e e tauturuhia mai tatou mai te peu e e rave tatou i teie tutavaraa. (Mat. 28:19, 20) Teie te tahi mau faahiˈoraa o ta matou e pûpû atu nei:
3 Mai te peu e e farerei tatou i te hoê taata ruhiruhia, e nehenehe tatou e tamata i teie omuaraa parau:
◼ “E nehenehe anei ta ˈu e ani ia oe i te hoê uiraa: I to oe apîraa ra, eaha te huru o te taata i nia i te tahi e te tahi? [A vaiiho i te taata ia pahono.] Mea taa ê roa te mau ohipa i teie nei tau, e ere anei? I to oe manaˈoraa, no te aha te mau ohipa i taui ai? [A vaiiho i te taata ia pahono.] Inaha, te ite nei tatou i te tupuraa o te hoê parau tohu a te Bibilia. [A taio i te Timoteo 2, 3:1-5.] Aita noa te Bibilia e faataa ra ma te tano mau i te ao e vai nei i teie mahana; te tǎpǔ atoa nei râ oia i te hoê ao maitai aˈe tei fatata roa mai. No reira matou e faaitoito ai i te mau taata atoa ia taio i te Bibilia.” A faaite i te buka ra Te Bibilia—Parau na te Atua aore ra na te taata? e a haamatara i te pene 10, o te tuatapapa huˈahuˈa ra i te tahi atu parau tohu o ta tatou e ite ra i te tupuraa. A pûpû atu i te buka.
4 Ia hoˈi atu tatou e farerei i te hoê taata ruhiruhia o tei rave i te buka, e nehenehe tatou e parau e:
◼ “I te taime i mairi aˈenei, ua farii tâua e ua ino roa te totaiete taata i teie nei tau i roto e rave rahi tuhaa, ia faaau tatou e te huru o te oraraa tau matahiti noa i teie nei. Teie râ, ua hoˈi mai au no te faaite ia oe e te tǎpǔ nei te Bibilia i te hoê ao maitai aˈe no a muri aˈe. [A taio i te Apokalupo 21:3, 4.] Ia ite tatou e te faaite ra te Parau a te Atua i te reira, e turaihia ïa tatou ia tuatapapa e eaha ˈtu â ta ˈna mau parau no tatou nei.” A tatara i te buka ra Parau na te Atua i te pene 14 e a taio i te mau par. 3-4. A pûpû atu i te hoê haapiiraa Bibilia tamoni ore.
5 Ia haamata tatou i te hoê tauaparauraa e te hoê taurearea, e nehenehe tatou e parau e:
◼ “Te hinaaro nei au e ani ia oe i te hoê uiraa: E taurearea oe, e te manaˈo ra anei oe e e tumu to tatou no te hiˈo i te tau i mua nei ma te oaoa? Eaha to oe manaˈo no nia i te tau i mua nei? [A vaiiho i te taurearea ia pahono.] Auaa râ, e tumu papu to tatou no te oaoa. [A taio i te Salamo 37:10, 11.] I te mea e e ere hoê â manaˈo to te taata no nia i te Bibilia e ta ˈna mau parau, ua nenei matou i teie buka, Te Bibilia—Parau na te Atua aore ra na te taata? A tapao na i te mau tumu no reira oia e tauturu ai ia tatou ia taio i te Bibilia. [A taio i te mau par. 16-17, api 10-11.] Ia tiaturi papu anaˈe tatou e e parau mau ta te Bibilia, e noaa ïa to tatou tiaturiraa papu no te tau i mua nei. Mai te peu e e hinaaro oe e taio, e oaoa roa vau i te vaiiho mai i teie buka na oe.”
6 Ia hoˈi atu tatou e farerei i te hoê taurearea o tei farii i te buka ra “Parau na te Atua,” e nehenehe tatou e parau atu e:
◼ “Ua oaoa roa vau i te iteraa e te tapitapi nei oe no te tau i mua nei. Te haamanaˈo ra oe, ua faaite atu vau i te hoê irava Bibilia o te tǎpǔ nei i te hoê oraraa oaoa e te papu no a muri aˈe. Teie te tahi atu irava. [A taio i te Apokalupo 21:3, 4.] Te horoa ra te buka o ta ˈu i vaiiho mai i te mau haapapuraa e e Parau na te Atua te Bibilia, e ere râ na te taata. E manaˈo faufaa roa te reira. A hiˈo na e eaha to ˈna auraa. [A taio i te mau par. 1-2, api 184-5.] Mai te peu e e hinaaro oe, e oaoa roa vau i te haapii i te Bibilia e o oe ma te tamoni ore.”
7 E putapû paha te hoê taata o tei ore i ite ihea râ e noaa mai ai te tauturu no te faatitiaifaro i to ˈna mau fifi, i teie parau:
◼ “I to tatou nei tau, te faaruru nei fatata te mau taata atoa i te mau fifi rahi. E rave rahi o te fariu nei i nia i te feia aˈo e rave rau. Te uiui nei vetahi i te feia hiˈohiˈo. I to oe manaˈoraa, ihea e noaa mai ai te mau aˈoraa papu o te tauturu mau ia tatou? [A vaiiho i te taata ia pahono.] Te faataa ra te Bibilia i te hoê manaˈo faufaa roa te tia i te taata tataitahi ia feruri.” A taio i te Ieremia 10:23. A tatara i te buka ra Te Bibilia—Parau na te Atua aore ra na te taata? i te api 187 e a taio i te par. 9. “E tauturu teie buka ia oe ia ite nafea to tatou mau fifi atoa e ore roa ˈi na roto i te Basileia o te Atua. E hinaaro anei oe e taio i teie buka?”
8 Mai te peu e, i te farereiraa matamua, ua parau tatou e te hinaaro nei te taata i te hoê aratai, i te hoˈi-faahou-raa e farerei, e nehenehe tatou e faahaere i te aparauraa i mua mai teie te huru:
◼ “I te taime i mairi aˈenei, ua farii tâua e te hinaaro nei tatou i te aratairaa a te Atua mai te peu e e hinaaro tatou e manuïa i te faatitiaifaro i te mau fifi o te oraraa. No reira, te manaˈo nei au e e oaoa oe i te mau parau faaotiraa e vai ra i roto i te buka o ta ˈu i vaiiho mai na oe. [A taio i te mau par. 12-13, api 189 o te buka ra Parau na te Atua.] E oaoa roa vau i te pûpû i te hoê haapiiraa Bibilia tamoni ore i to oe fare e te hinaaro nei au e faaite ia oe i teie nei e nafea teie haapiiraa ia ravehia.”
9 E haamaitai mai Iehova i te mau tutavaraa o ta tatou e rave nei no te tauturu i te mau taurearea e te feia paari ia ite i te faufaaraa o te Parau a te Atua, o tei riro ei aratai i roto i to tatou oraraa.—Sal. 119:105.