Te mau haamaitairaa no roto mai i te rave-amui-raa i te ohipa
1 I to outou manaˈoraa, e huti mai anei tatou i te mau haamaitairaa no roto mai i te rave-amui-raa i te ohipa e to tatou mau hoa i roto i te pororaa? Ua manaˈo Iesu i te reira. Noa ˈtu e ua rahi te ootiraa e mea iti te feia rave ohipa, ua tono oia 70 pǐpǐ e poro “tatoopiti”. Auê ïa haamaitairaa taa ê no te taata taitahi e poro “i te mau oire e te mau vahi atoa ta ˈna i opua ra e e haere atoa oia i reira”!—Luka 10:1, 17; Mat. 9:37.
2 E mea itoito ia rave amui i te ohipa e to tatou mau hoa. Mea mamahu paha vetahi e mea fifi no ratou e tauaparau i te mau taata aita ratou i matau. E nehenehe te apeeraa mai te tahi atu taata poro ia tatou e horoa mai i te tiaturiraa no te faaite i te Parau a te Atua ma te itoito. E mea ohie aˈe paha no tatou ia rave i ta tatou ohipa mai tei haapiihia ia tatou mai te peu e e ere o tatou anaˈe (Mas. 27:17). Ua parau te taata paari e: “E maitai te taata toopiti i te taata hoê.”—Koh. 4:9.
3 Mea maitai ia poro e e rave rau taata poro e te mau pionie. O Baranaba, Sila, Timoteo, Ioane Mareko, e te tahi atu te mau hoa o te aposetolo Paulo, e ua huti mai ratou i te mau haamaitairaa e rave rahi no teie rave-amui-raa. Hoê â huru atoa i teie mahana. Ua poro aˈena anei tatou e te hoê taata e mea maoro o ˈna i roto i te parau mau? I muri aˈe i te hiˈopoaraa i to ˈna aravihi ia horoa i te faaiteraa, mea papu ua tapao mai tatou i te mau manaˈo maitatai tei tauturu ia haamaitai ia tatou. Ua apee anei tatou i te feia poro apî roa? Ua faaite paha tatou ia ratou i te mea ta tatou i haapii, o tei tauturu ia ratou ia aravihi atu â e ia ite rahi atu â i te oaoa i roto i te taviniraa.
4 E haapiiraa bibilia anei ta tatou? Mai te peu e e, no te aha e ore ai e ani i te hoê matahiapo aore ra i te tiaau haaati ia apee mai ia tatou? E mea maitai ia haamatau atoa te feia haapii i te Bibilia i te mau tiaau. Mai te peu e e haamarirau tatou i te faatere i te haapiiraa e to reira te hoê matahiapo, peneiaˈe e farii oia i te rave ia nehenehe tatou e hiˈo i ta ˈna huru haapiiraa. I muri aˈe i te reira, e ani tatou ia ˈna i te mau manaˈo ia nehenehe tatou e tauturu i te taata haapii ia haere oioi i mua.
5 Ia riro tatou ei feia faaitoito ia poro tatou e to tatou mau hoa. E feruriraa maitai to tatou ia tauaparau tatou no nia i te tuhaa fenua. Eiaha tatou e tauaparau no nia i to tatou mau hoa e eiaha tatou e amuamu no te mau faaotiraa ravehia i roto i te amuiraa. Ia haamanaˈo tatou i ta tatou taviniraa e te mau haamaitairaa ta Iehova e horoa nei na tatou. Ia na reira tatou, e puai-faahou-hia tatou i te pae varua, tatou e to tatou mau hoa atoa ia hoˈi tatou i te fare.
6 Peneiaˈe mea fifi no tatou e poro tamau e to tatou mau taeae e mau tuahine. Teie râ, mai te peu e e nehenehe ta tatou, no te aha e ore ai e faanaho ia tatou no te poro e te tahi atu taata poro? E huti mai tatou piti atoa ra i te mau haamaitairaa.—Roma 1:11, 12.