Aita ratou e haamarirau ra i te horoa i te faaiteraa
1 Te faaite ra to tatou iˈoa, Ite no Iehova, o vai mau na tatou e eaha ta tatou e rave nei. Te faaite ra tatou i te mau haerea tura o to tatou Atua ra o Iehova (Isa. 43:10, 12). E tia i te taata tataitahi ia horoa i teie faaiteraa mai te peu e te hinaaro ra oia e riro mai ei melo no te amuiraa. Te ravehia ra te faaiteraa na mua na roto i ta tatou taviniraa i mua i te aro o te taata, mai te ohipa i tera e tera fare, te pororaa faanaho-ore-hia e te amuiraa, te mau hoˈi-faahou-raa e farerei e te mau haapiiraa bibilia. Te faaitoitohia ra tatou paatoa ma te tano maitai ia faarahi atu â i ta tatou apitiraa i roto i te taviniraa.—Kor. 1, 15:58.
2 Teie râ, ua taotiahia te mau ravea a te tahi mau melo o te amuiraa. E nehenehe te hoê maˈi aore ra te hoê hapepa fifi mau e faahepo ia ratou ia faaea i te fare. Ua riro paha te patoiraa a te utuafare fetii ei haafifiraa rahi. E nehenehe te hoê taurearea e tapeapeahia e te hoê metua aita i roto i te parau mau. Eita paha te feia e ora ra i te mau tuhaa fenua moemoe aita e faurao e tae mai. E haamarirau paha vetahi i te horoa i te faaiteraa no to ratou mamahu. Te manaˈo ra paha te feia o te farerei ra i teie mau huru tupuraa, aore ra te tahi atu, e eita e maraa ia ratou, no te mea e mea iti roa ta ratou e rave i ta vetahi ê e mea iti atoa i te mea o ta ratou e hinaaro mau ra e rave. Aita e tumu ta ratou no te faaiti mai i ta ratou mau tutavaraa (Gal. 6:4). E ite ratou i te tamahanahanaraa na roto i te iteraa e te oaoa ra o Iehova ia ohipa ratou i ta ratou e nehenehe i roto i te mau huru tupuraa atoa ta ratou e farerei nei.—Luka 21:1-4.
3 E imi anaˈe i te hoê ravea no te apiti atu: Ua faatiahia tau tausani tupuraa o te faaite ra e aita te mau taata i roto i te mau tupuraa fifi mau i vaiiho i te mau haapeapearaa ia haafifi ia ratou ia horoa i te faaiteraa. Ma te opua, ua imi ratou i te ravea e rave rau no te poro ma te faanaho-ore-hia e te amuiraa. Ua faaohipa te feia tei faaea noa i ǒ ratou i te niuniu no te neheneheraa e horoa ˈtu i te faaiteraa. E faariro ratou i te feia farerei tataitahi ei taata o te faatupu iho â i te aparauraa. Noa ˈtu e eita te hoê vahine, e te patoi ra to ˈna utuafare ia ˈna, e nehenehe e horoa i te faaiteraa i ǒ na ra, e nehenehe oia e rave mai i te mau taime atoa no te paraparau i to ˈna mau taata tapiri aore ra i te tahi atu mau taata o ta ˈna e farerei i te roaraa o ta ˈna mau ohipa i te mau mahana atoa.
4 E opani-roa-hia paha te hoê taurearea kerisetiano ia horoa i te faaiteraa i mua i te aro o te taata na te hoê metua aita i roto i te parau mau. Maoti râ i te faariro i te reira mai te hoê haafifiraa eita e nehenehe e haapaiumahia, e nehenehe oia e faariro i to ˈna mau hoa haere haapiiraa e ta ˈna mau orometua haapii ei “tuhaa fenua” iho na ˈna, e horoa i te hoê faaiteraa maitai e peneiaˈe e aratai i te mau haapiiraa bibilia. Ua nehenehe e rave rahi o te noho ra i te mau vahi moemoe e horoa i te faaiteraa na roto i te mau rata. E ite iho â te feia o te turaihia ra e te itoito kerisetiano i te hoê ravea ia ore ia “toaruaru e te hotu ore i te ite i to tatou Fatu ia Iesu Mesia ra”.—Petero 2, 1:8.
5 No nia i ta tatou apitiraa i roto i te ohipa faaiteraa, te horoa mai ra o Iehova ia tatou nei i te hoê huru haerea, oia hoi te raveraa i taua ohipa ra ‘ma to tatou [nephe] atoa’. (Kol. 3:23.) Te tauiui nei te taime o ta tatou e horoa ˈtu no te reira e te mea ta tatou e rave ra, hoê â noa râ ohipa faufaa e turai ra: te hoê here rotahi no roto mai i te hoê ‘mafatu taatoa’. (Par. 1, 28:9; Kor. 1, 16:14.) Mai te peu e te rave ra tatou i ta tatou e nehenehe, aita e tumu no tatou ia manaˈo e, i te mea hoi e mea iti ta tatou e rave nei, te erehia ra tatou i te faaroo aore ra e mea faufaa ore tatou i roto i te amuiraa. Mai ia Paulo, e nehenehe tatou e parau ma te aau rotahi e ‘aore roa e mea e maitai ai i vaiihohia e tatou; aita atoa i tuutuu i te haapii i te vahi taata’.—Ohipa 20:20.