E faatere anaˈe i te mau haapiiraa bibilia maoti te buka E ora e a muri noa ˈtu
1 Ua parau te hoê vahine no nia i te buka E ora e a muri noa ˈtu e: “I muri aˈe i te Bibilia iho, te faariro nei au i teie buka ei mea tano roa ˈˈe e te faaitoito roa ˈˈe o ta ˈu i taio aˈenei!” E farii paatoa tatou e hoê teie o te mau buka maitatai roa ˈˈe o tei neneihia aˈenei no te tauturu i te mau taata ia taa i te Bibilia e no te turai iho â râ ia ratou ia riro mai ei feia haamori itoito no Iehova.
2 I te matahiti 1982, matahiti i matara mai ai te buka E ora e a muri noa ˈtu, e 2 361 896 feia poro o tei faatere e 1 475 177 haapiiraa bibilia i te ao atoa nei. I teie mahana, e 4 472 787 feia poro o te faatere nei e 4 278 086 haapiiraa bibilia. E tae mai i teie mahana, ua neneihia e 62 mirioni buka E ora e a muri noa ˈtu na roto e 115 reo. Oia mau, e tuhaa rahi ta ˈna e hauti ra i roto i te ohipa na te ao nei.
3 Ia haamau tatou i te tahi mau tapao: Na te haamaitairaa a Iehova e te hinaaro ru o ta ˈna mau tavini e tauturu i te taata aau haavare ore maoti te poroi a te Bibilia, o te tuea i te parau o te ora, i faatupu i teie maraaraa faahiahia (Roma 10:13-15; Tim. 1, 2:4). Ua ite tatou e te poto nei te taime e e tia ia tatou ia poro i te Basileia o te Atua ma te itoito.
4 A haere noa ˈi te faanahonahoraa i mua, eaha ta tatou tataitahi e rave ra? Ua faaoti anei tatou e apiti hua i roto i te ohipa faaoraraa oia hoi te faariroraa i te taata ei pǐpǐ? No te rave i te reira, e tia ia tatou ia haamau i te tahi mau tapao. E nehenehe anei ta tatou e atuatu i te anaanatae ma te itoito atu â? No te aha tatou e ore ai e haamau ei tapao te haamataraa i te hoê haapiiraa bibilia apî i te avaˈe febuare?
5 O vai te nehenehe e faatere i te hoê haapiiraa bibilia?: E rave rahi mau taata poro no roto mai i te mau nunaa huru rau o tei oaoa i te faatereraa i te hoê haapiiraa bibilia maoti te buka E ora e a muri noa ˈtu. No ta ˈna huru papairaa ohie, e ere ïa i te mea fifi ia faatere i te haapiiraa, e e nehenehe atoa te mau taata poro apî e apiti atoa i roto i teie ohipa faufaa. Hau atu, i te mea e ua haapii te rahiraa i rotopu ia tatou i teie buka, ua matau maitai ïa tatou i ta ˈna mau tumu parau. Ua papai te hoê taata poro, aita ta ˈna e haapiiraa bibilia hou oia e faaohipa ˈi i te buka E ora e a muri noa ˈtu, i roto i te hoê rata haamauruururaa e: “Te aratai nei au e toru haapiiraa e fatata roa vau i te haamata i te maharaa. Eita e navai ta ˈu mau parau haamauruururaa no to outou raveraa e ia ohie roa no matou ia faatere i te mau haapiiraa bibilia.”
6 Te apiti atoa ra te mau taurearea ma te itoito i roto i te ohipa haapiiraa bibilia maoti te buka E ora e a muri noa ˈtu. Te vaiiho nei te hoê taeae apî i te buka i nia i ta ˈna iri papairaa i te fare haapiiraa, e mea na reira to ˈna faatupuraa i te mau aparauraa maitatai roa e to ˈna haamataraa e rave rahi mau haapiiraa bibilia. Te faaohipa nei te tahi mau tamarii i te ravea o te ani-roa-raa ˈtu i te mau metua o ta ratou e farerei nei i roto i te pororaa i te parau faatia no te haapii i te Bibilia e ta ratou mau tamarii. E ere ta tatou mau tamarii i te mea apî roa no te faaite i te mea ta Iehova e tǎpǔ ra: te ora mure ore i roto i te hoê paradaiso i nia i te fenua nei.
7 Noa ˈtu e e taurearea tatou aore ra e taata paari, hoê o te mau oaoaraa rahi roa ˈˈe o ta tatou e nehenehe e ite i roto i te taviniraa, o te faatereraa ïa i te mau haapiiraa bibilia i te fare o te taata. No reira, e ani anaˈe ia Iehova i ta ˈna tauturu e e faaohipa anaˈe i te mau taime tano atoa no te faaite i to tatou tiaturiraa i mua i te taata. E faaohipa anaˈe i te buka E ora e a muri noa ˈtu no te aratai i te taata ia arue i to tatou Atua, o Iehova. — Sal. 148:12, 13.