Te hoê faaohiparaa maitai i te mau mauhaa faufaa
1 Ia poro anaˈe tatou i tera e tera fare, ta tatou tapao o te haamataraa ïa i te mau tauaparauraa itoito maoti te Bibilia e te mau mauhaa faufaa e vai ra ia tatou nei. (Hiˈo Korinetia 2, 6:1; Timoteo 2, 2:15.) Eaha te haapeapea nei i te mau taata o ta tatou tuhaa fenua? Te haapeapea ra anei ratou i te tupuraa i te pae faanavairaa faufaa e te inoraa o te oraraa utuafare? Na roto i te horoaraa ˈtu i te tahi mau manaˈo no nia i teie tumu parau i roto i ta outou omuaraa parau, peneiaˈe e nehenehe outou e haamata i te hoê tauaparauraa bibilia faahiahia mau.
2 E nehenehe outou e parau e:
◼ “I to tatou tau, e mea fifi mau te mau hopea avaˈe no te mau taata e rave rahi. Ia manaˈo anaˈe oe, e horoa anei te mau faatereraa taata nei i te hoê ravea tia no te mau haafifiraa i te pae moni? [A faaroo i te pahonoraa.] No ˈu iho nei, ua faaitoito mau â te mau manaˈo i muri nei ia ˈu . . . ”
3 E nehenehe outou e taio i muri iho i te Salamo 72:12-14 e e tamau noa i te tauaparauraa ma te faaohipa i te hoê o te mau irava i faahitihia i te mau api 174, 175 o te buka Haaferuriraa. Aore ra, i muri aˈe i te taioraa i te hoê irava o te mau Papai, e nehenehe outou e faahaere atu i nia i te hoê paratarapha o te api parau iti Te hoê oraraa hau i roto i te hoê ao apî. E rave rahi feia poro, te mau taurearea atoa, o tei haamata i te mau haapiiraa bibilia maoti te hoê api parau iti. E taio ratou i te hoê paratarapha, e i muri iho, e ani ratou i te taata i to ˈna manaˈo.
4 I roto i te tahi mau tuhaa fenua, e hinaaro paha outou e rave mai teie te huru:
◼ “E rave rahi feia o te hinaaro nei e hoˈi faahou i te mau faufaa o te utuafare no tahito ra. Ia manaˈo anaˈe oe, tei te taata tataitahi anei te faaotiraa eaha mau na teie mau faufaa, aore ra e mea maitai aˈe ia rave mai i te hoê noa haerea e tano no te taatoaraa? [A vaiiho ia pahono.] E rave rahi o te manaˈo nei e ia faaohipahia i te mau aˈoraa paari a te Bibilia, e maitai mai te oraraa utuafare.”
5 Ia tae anaˈe i taua faito ra o te tauaparauraa, e nehenehe outou e aparau no nia i te mau manaˈo faahitihia e te aposetolo Paulo i roto i te Kolosa 3:12-14, aore ra e tutava i te haamata i te hoê haapiiraa bibilia i reira iho na roto i te hiˈopoaraa i te tahi mau manaˈo i roto i te api parau iti A fanaˈo i te hoê oraraa utuafare oaoa, i raro aˈe i te upoo parau “Eaha te ravea e manuïa ˈi?”
6 I muri aˈe i te faaararaa i te anaanatae, a faataa maitai i te faufaa o te hoê o te mau buka e 192 api a te Taiete o ta outou e pûpû nei i teie avaˈe. Mai te peu e e nehenehe e tatarahia te tahi atu â tumu parau, a faaohipa ma te tano i te tahi atu â mau mauhaa faufaa. A faaite atu ia ˈna, ei hiˈoraa, i te hoê manaˈo i roto i te hoê api parau iti, te hoê vea aore ra te hoê vea iti.
7 Mai te peu e ua haamata outou i te hoê haapiiraa bibilia i te tauaparauraa matamua, a tapao i te hoê taime farereiraa no te tamau â i te aparauraa. E nehenehe outou e faaineine i te mau ohipa no to outou hoˈi-faahou-raa mai, ma te parau atu ia ˈna e, ia hoˈi anaˈe mai outou, e hopoi mai outou i te pahonoraa i te hoê uiraa o ta te mau taata e rave rahi e uiui nei: “No te aha te Atua i faatia ˈi i te mauiui?” Te horoa maira te tumu parau i raro aˈe mai i te tahi mau manaˈo no nia i te ravea ia omua i teie tumu parau i te hoˈi-faahou-raa e farerei.