E atuatu anaˈe i te anaanatae na roto i te mau hoˈi-faahou-raa e farerei aravihi
1 I roto i te hoê oreroraa parau faaineine-maitai-hia, te vai ra te hoê omuaraa parau o te faaara i te anaanatae, te hoê tatararaa o te haapii mai e te hoê faaotiraa o te turai ia rave i te ohipa. E huti mai te omuaraa parau i te ara-maite-raa o te taata e faaroo maira, tera râ eita e hope te oreroraa parau mai te peu e aita e tatararaa e aita e faaotiraa. Hoê â huru atoa i roto i ta tatou taviniraa. E mea maitai ia faaara i te anaanatae o te hoê taata i te tauaparauraa matamua, tera râ e tia ia tatou ia tamau â i te atuatu i taua anaanatae ra na roto i te raveraa i te mau hoˈi-faahou-raa e farerei aravihi.
2 No te aha te Atua i faatia ˈi i te mauiui? Teie te hoê uiraa o te turai ia feruri. Aita anei oia e faahepohepo nei i te mau taata e rave rahi i teie mahana? No reira, i roto i te tumu parau i nia nei, te faahitihia maira ia vaiiho i teie uiraa i te hopearaa o te tauaparauraa matamua, no te pahonoraa ˈtu i te taime o te hoˈi-faahou-raa e farerei.
3 E nehenehe tatou e parau e:
◼ “Iaorana oe. I te taime i mairi aˈenei, ua faahiti mai tâua i te uiraa ‘No te aha te Atua e faatia ˈi i te mauiui’, e ua parau vau ia oe e e hoˈi mai au no te hopoi mai i te tahi mau manaˈo ê atu. Te manaˈo nei e rave rahi mau taata e mai te peu e te haapao maira te Atua ia tatou nei, e faaore ïa oia i te mauiui. Peneiaˈe paha te reira atoa to oe manaˈo? (A vaiiho i te taata ia pahono.) Te haapapu maira te Bibilia e te haapao mau ra te Atua ia tatou. [A taio Ioane 1, 4:8.] E mau tumu papu ta te Atua a faatia ˈi o ˈna i te mauiui e tae roa mai i teie mahana. Te faahitihia nei te hoê tumu i roto i te Petero 2, 3:9. [A taio.] Ua faahitihia te tahi atu â mau tumu i roto i teie vea iti.” E tatara anaˈe i te vea iti Te haapao mau ra anei te Atua ia tatou? i te mau api 12 e tae atu te 14 e e tuatapapa anaˈe i te hoê manaˈo anaanatae mau.
4 E hinaaro te tahi mau taata i te mau tatararaa hohonu aˈe; peneiaˈe paha e tia ia hoˈi faahou e farerei ia ratou e rave rahi taime hou a mauruuru maitai ai ratou. Te vai nei i roto i te mau buka e rave rau e 192 api a te Taiete, pûpûhia i te avaˈe tenuare, te hoê pene o ta tatou e nehenehe e faaohipa no te tuatapapa hohonu atu â i te uiraa.
5 I te taime tatou e faaoti ai, e vaiiho anaˈe i te tahi atu â uiraa e e parau anaˈe i te taata e e oaoa roa tatou ia hoˈi mai no te faaite ia ˈna i te tahi atu â mau manaˈo anaanatae mau. E rave rahi o te hinaaro nei e ite i te ohipa e tupu i muri aˈe i te pohe. No te aha eita outou e faataa i te hoê farereiraa no te tuatapapa i taua tumu parau ra i te hoê taime tano maitai?
6 E mea faufaa ia haamanaˈo e toru ture faufaa. Te vai- mǎrû-raa. Aita paha taua taata ra i matau i te faataa i te hoê taime taa maitai no te hoê tauaparauraa bibilia. Te haapotoraa. Eiaha tatou e faaea maoro roa aore ra eiaha tatou e faataa ˈtu e rave rahi mau manaˈo i te omuaraa. I roto i te rahiraa o te mau tupuraa, e au mai te taata i ta tatou mau farereiraa mai te peu e e faaite tatou i te tahi noa mau manaˈo, e te reira ma te haapoto-noa-raa. Te mahanahanaraa e te auhoaraa. E faaite anaˈe i te taata e te anaanatae mau nei tatou ia ˈna.
7 Ta tatou tapao matamua o te faaôraa ïa i te hoê tauaparauraa bibilia e te taata. I muri iho, e hinaaro tatou e haamata i te hoê haapiiraa bibilia hotu maitai i te fare o te taata i nia iho i te hoê buka tano maitai, mai te buka E ora e a muri noa ˈtu. E nehenehe tatou e ite i taua oaoa ra mai te peu e atuatu noa tatou ma te faaoromai i te anaanatae o te taata na roto i te faatupuraa i te mau hoˈi-faahou-raa e farerei aravihi.