A faaohipa i te mau api parau iti no te faaite i te buka Te taata rahi roa ˈˈe
1 I te roaraa o te avaˈe tiunu, e faaohipa e rave rahi taata poro i te mau api parau iti no te faaanaanatae i te mau taata i te buka Te taata rahi roa ˈˈe i ora aˈenei. Te tauturu ra teie ravea ia faaara i te anaanatae o te feia aita e hinaaro ra e farii i te buka i te farereiraa matamua.
2 E ora anei teie nei ao? E tauturu faufaa roa te mau api parau iti no te haamata i te mau aparauraa. Te huti ra ratou i te ara-maite-raa o te mau taata, no te mea te tatara nei ratou e rave rahi tumu parau hohonu e tano no ratou iho.
E nehenehe outou e parau ei hiˈoraa e:
◼ “Ma te tauaparauraa e te mau taata, ua ite matou e te hepohepo ra e rave rahi i... [a maiti i te hoê ohipa i tupu aˈenei i faahitihia i roto i te mau parau apî]. E au e te haere noa ˈtura te mau huru tupuraa na te ao i te inoraa. Te aniani ra vetahi e mai te peu e e ora anei teie nei ao. Eaha to oe manaˈo no nia i teie uiraa? [A vaiiho i te taata ia pahono. E manaˈo maitai to te rahiraa.] Ua taio vau i te mau parau itoito o ta ˈu e hinaaro ra e faaite ia oe. Tei roto ïa i teie api parau iti. [A horoa ˈtu i te taata te hoê api parau iti E ora anei teie nei ao? e a tapea hoê i roto i te rima.] A hiˈo eaha te mau parau ta Iesu i tohu e...” A taio i te hoê tuhaa o te hoê paratarapha api 4 aore ra e 5 o te tuea ra i te ohipa i tupu aita i maoro ta outou i faahiti i te omuaraa. Ma te faaararaa i te anaanatae, e faaite outou ia ˈna i te buka Te taata rahi roa ˈˈe. Mai te peu e te tano ra, a faaite atu ia ratou te tahi mau manaˈo no nia i te mau parau tohu a Iesu o tei haafaufaahia i roto i te pene 111. A vaiiho i te taata ia hurihuri i te mau api o te buka no te haafaahiahia i te mau mea i papaihia i roto. A feruri atoa ia faahiti i te hoê uiraa i nia i te hoê tumu parau o ta outou e tuatapapa i te taime i mua nei.
3 Te hoê oraraa hau i roto i te hoê ao apî: Eaha te auraa no outou te manaˈo e ora ma te hau i roto i te hoê ao apî? Te rahiraa o te taime, e manaˈonaˈo te mau taata i te mau hohoˈa fenua nehenehe, te mau peho maniania ore terehia e te mau anavai pape rahi e o te î i te mau animala nehenehe o te ora ra ma te hau i rotopu ia ratou. E ite paha te feia o te haapeapeahia nei e te mau huru tupuraa i roto i te ao nei i teie mahana, i te tiaturiraa o te hoê ao apî e te hau ei manaˈo tamǎrû roa ˈˈe.
4 Ua ineine anei outou, no te faahiti i te mau parau faaitoito e te au i te feia tapiri, i to outou mau hoa ohipa e i te feia ta outou e farerei i tera e tera fare?
E te api parau iti “Te hoê oraraa hau i roto i te hoê ao apî”, e parau outou e:
◼ “Ia manaˈo oe e ora anei te mau taata i te hoê mahana i roto i te hau, mai te itehia ra i nia i te hohoˈa o teie api parau iti? [A vaiiho i te taata ia pahono.] A hiˈo i te pereota hopea o te paratarapha matamua, api 2. Te ani ra oia e: ‘E moemoeâ anei ia tiaturi e tupu mau iho â taua mau huru tupuraa ra i te hoê mahana i nia i te fenua?’ [I muri iho a taio i te paratarapha i muri mai.] Ua hutihia teie faahitiraa no nia i te mau raˈi apî e te hoê fenua apî mai roto mai i te Bibilia, i roto i te Petero 2, 3:13. Mai te peu e e nehenehe oe e haere e tii i ta oe Bibilia, e taio ïa taua i te Salamo 104:5 o te haapii hau atu â ia tâua no nia i te oraraa no a muri aˈe o te fenua.” E nehenehe outou e taio noa i taua irava ra i roto i ta outou Bibilia. E i muri iho a faaite atu i te buka Te taata rahi roa ˈˈe e a aparau no nia i te pene 133.
5 E tia ia roaa mai te mau hoˈi-faahou-raa e farerei no te ‘pipi’ i te huero i tanuhia (Kor. 1, 3:6, 7). Te faataa maira te tumu parau i raro aˈe e nafea ia haamata i te hoê haapiiraa Bibilia i nia i te buka Te taata rahi roa ˈˈe, i te farereiraa matamua anei, aore ra i te hoê hoˈi-faahou-raa e farerei.