Te 101raa o te pǔpǔ no Gileada—Itoito no te mau ohipa maitatai
E ATUA itoito to tatou Poiete ra o Iehova no te mau ohipa maitatai, e ta ˈna atoa Tamaiti ra o Iesu Mesia. Ei hiˈoraa no tatou, ua faaite Iesu i te itoito na roto i te raveraa i ta ˈna ohipa i faauehia mai e te Atua, oia hoi te horoaraa “ia ˈna iho no tatou . . . ia tamâ oia ia tatou ei taata mau no ˈna iho, e te itoito i te mau ohipa maitatai ra.” (Tito 2:14) Papu maitai, ua faaite teie nau 48 melo o te 101raa o te pǔpǔ a te Haapiiraa Bibilia no Gileada a te Taiete Watchtower, i to ratou itoito no te mau ohipa maitatai. Ua tupu te porotarama faatuiteraa o teie mau mitionare i te 7 no Setepa 1996, i te Pu Haapiiraa a te Taiete Watchtower no Patterson, i New York.
Aˈoraa ohie ia faaohipa no te vai itoito noa
O Carey Barber te peretiteni o te porotarama faatuiteraa, e melo oia no te Tino Aratai, hau atu i te 70 matahiti i roto i te taviniraa ma te taime taatoa. I roto i ta ˈna mau omuaraa parau, ua huti o Taeae Barber i te ara-maite-raa i nia i te ohipa pororaa e haapiiraa a Iesu, o ˈna hoi “te maramarama o teie nei ao.” (Ioane 8:12) Ua haapapu oia e aita o Iesu i tapea i taua tiaraa hanahana ra na ˈna noa, ua faaitoito râ oia i ta ˈna mau pǐpǐ ia faaanaana atoa to ratou maramarama. (Mataio 5:14-16) Te horoa nei â teie haamaitairaa taa ê o te taviniraa i te auraa i roto i te oraraa o te hoê Kerisetiano e te tuu nei i te hoê hopoia teimaha i nia i te tapono o te feia atoa e ‘haere nei mai te tamarii maramarama.’—Ephesia 5:8.
I muri aˈe i teie mau omuaraa parau, ua tia mai o Don Adams no te mau Piha ohipa Faatereraa i te pu i Brooklyn. Ua paraparau oia no nia i te tumu parau ra “A haere i mua, eiaha i muri.” Ua tuu o Taeae Adams i te tapao i nia i te Haapiiraa no Gileada iho e ta ˈna mau fa—oia hoi te haaparareraa i te pororaa o te parau apî maitai na te mau fenua ěê. Ua paraparau oia no nia i te haereraa i mua a te faanahonahoraa a te Atua, o tei nenei i te mau papai Bibilia ati aˈe te ao nei na roto hau atu i te 300 reo. Te vai ra te buka ra Te ite e aratai i te ora mure ore, neneihia i te matahiti 1995, na roto 111 reo e te opuahia ra e nenei â na roto e rave rahi atu â reo. Ua riro aˈena oia ei mauhaa no te tauturu i te mau pǐpǐ apî a Iesu ia pûpû e ia bapetizo ia ratou i roto noa tau avaˈe. No reira, e fanaˈo te mau mitionare apî i te buka tauturu Bibilia hopea roa no ta ratou ohipa.
I muri iho, ua paraparau mai o Lyman Swingle, melo no te Tino Aratai, no nia i te tumu parau ra “A horoa tamau na Iehova ra i ta outou taviniraa moˈa,” niuhia i nia i te Apokalupo 7:15. I te mea e e Atua oaoa o Iehova iho, na te tavini-noa-raa ia ˈna e faaoaoa i te hoê taata. (Timoteo 1, 1:11) Ei faahopearaa o teie taviniraa oaoa, ua haere mai te hoê nahoa rahi na te mau vahi atoa o te fenua e haamori ia ˈna. I te roaraa o te mau matahiti, ua tauturu te feia i faaineinehia i te Haapiiraa no Gileada e rave rahi o teie mau taata ia noaa ia ratou te ite papu o te parau mau. E mau tumu atoa ïa ta tatou no te tiaturi e e haamaitai noa Iehova i te feia e tonohia nei i teie mahana no te haaputuputu e rave rahi atu â melo o te nahoa rahi o te maraa noa ra.
“A faaite i te oaoa o Iehova,” o te tumu parau ïa i hohorahia e Daniel Sydlik, melo atoa no te Tino Aratai. Ua faaite oia e e haamaitairaa taa ê ta te mau tavini atoa a te Atua, te mau mitionare apî atoa, e haapii i te taata i te eˈa o te ora mure ore e nafea ia fanaˈo i te hoê oraraa maitai aˈe i teie nei. “Te haapiiraa,” o ta Taeae Sydlik ïa i parau, “o te hoê ïa ohipa au roa no ˈna iho. Te itehia ra te reira i nia i te hohoˈa mata o te feia e horoa ra i te haapiiraa e i nia i to te feia e haapiihia nei.” (Salamo 16:8-11) Ua faahiti oia i te parau a te hoê mitionare i Estonia o tei na ô e, “Ta tatou te poroi rahi roa ˈˈe i nia i te fenua taatoa, e na to tatou iho hohoˈa mata e faaite ra i te reira.” E nehenehe to tatou hohoˈa mata e turai i te taata ia faaroo mai e e faaara i te anaanatae. Te hinaaro nei te taata e ite e na te aha e faaoaoa ra i te mau tavini a Iehova. “No reira, a haapao i to outou hohoˈa mata,” o te aˈoraa ïa a Taeae Sydlik. “Mea au na te taata te iteraa ˈtu i te taata oaoa.”
Ua hohora o Ulysses Glass, o tei apiti i roto i te haapiiraa i te feia haapii no Gileada mai te 12raa o te pǔpǔ i te matahiti 1949, i te tumu parau ra “Ma te faaoromai, a ara i to outou nephe” i mua i te feia i putuputu mai. Eaha te faaoromai? Te horoa ra oia i te manaˈo e tiai mǎrû i te tahi mea, e haavî ia ˈna iho i mua i te faatihaehaeraa aore ra te hepohepo. E faaea hau noa te taata faaoromai; area te taata faaoromai ore ra, e ru noa oia i te riri. “Te manaˈo nei e rave rahi taata e te faaite ra te faaoromai i te huru paruparu aore ra te taa ore te manaˈo,” o ta Taeae Glass ïa i parau, tera râ “no Iehova e tapao te reira no te puai e te opuaraa.” (Maseli 16:32) Eaha te mau haamaitairaa o te faaoromai? Te na ô ra te hoê parau paari Tinito e: “E paruru te faaoromai ia outou i te taime ririraa i na mahana haapeapearaa hoê hanere.” “E haamaitai te faaoromai i te huru o te hoê taata,” o ta Taeae Glass ïa i faataa. “Maoti te reira e vai tamau ai vetahi atu huru maitai roa. E faufaahia te faaroo, ia roa ˈtu â te hau, e ia ore te here ia aueue.”
“E haamaitairaa taa ê e fanaˈo i te hoê hopoia o ta te Atua ra o Iehova e horoa maira na roto i ta ˈna faanahonahoraa,” o ta Mark Noumair ïa i parau, o tei tavini na ei mitionare i Kenya 11 matahiti te maoro e i teie nei, e taata haapii oia no Gileada. I to ˈna hohoraraa i te tumu parau ra “Mai te peu e aita to outou e faaroo, eita ïa ta outou e nehenehe e faaoromai,” ua huti o Taeae Noumair i te ara-maite-raa i nia i te hiˈoraa o te Arii no Iuda, o Ahaza. Ua haapapu o Isaia i te arii e e turu mai Iehova ia ˈna i roto i ta ˈna hopoia, aita râ o Ahaza i tiaturi aˈe Ia ˈna. (Isaia 7:2-9) Ua faataa ˈtura o Taeae Noumair e e tia i te mau mitionare—oia mau, tatou paatoa—ia tiaturi ia Iehova no te neheneheraa e faaoromai i roto i ta ratou mau hopoia teotaratia. Te titau ra te mau fifi taa ê o te tuhaa taviniraa mitionare i te faaroo puai. “A haamanaˈo noa e aita e huru tupuraa tia roa i roto i teie faanahoraa o te mau mea,” o ta Taeae Noumair ïa i parau.
Mau ohipa i farereihia e turu ra i te ohipa itoito
I te roaraa o ta ratou haapiiraa no Gileada, ua haere te feia haapii i te hopea hebedoma tataitahi i roto i te taviniraa, e riro atoa te reira ei tapitapiraa matamua i roto i ta ratou mau tuhaa taviniraa mitionare. Ua uiui o Wallace Liverance, melo no te toroa haapii no Gileada, 15 feia haapii o tei faatia mai i te mau ohipa o ta ratou i farerei. I muri iho, ua uiui o Leon Weaver no te Tomite o te Taviniraa e o Lon Schilling no te Tomite hiˈopoa i te Betela, i te mau melo no te tomite a te amaa no Afirika e no Marite Latino, o tei faatia mai i te mau ohipa o ta ratou i farerei i roto i te taviniraa mitionare e e aˈoraa maitatai ta ratou i horoa na te mau mitionare e faatuitehia ra. I Sierra Leone, ua faaitehia e tau 90 % o te feia i bapetizo i te matahiti taviniraa 1995, ua tauturuhia ratou e te mau mitionare. Auê ïa faatiaraa maitai roa o te ohipa itoito!
I te pae hopea, ua paraparau o Milton Henschel, te peretiteni o te Taiete, i mua e 2 734 taata no nia i te tumu parau ra “E faanahonahoraa ite-mata-hia otahi ta Iehova.” Na te aha e faariro ra i te faanahonahoraa a te Atua ei mea otahi? E ere na to ˈna rahi, e ere atoa na to ˈna puai, tera râ, na te mea e te arataihia ra oia e te mau ture parau-tia e te mau faaotiraa tia a te Atua. I mutaa iho, ua horoa Iehova i to ˈna nunaa, te nunaa Iseraela, i ta ˈna mau parau moˈa, o tei faariro ia ˈna ei nunaa otahi. (Roma 3:1, 2) I teie mahana, te tahoê nei te faanahonahoraa a Iehova a ohipa noa ˈi oia i raro aˈe i te aratairaa a Iesu Mesia. (Mataio 28:19, 20) Te ruperupe nei e te maraa nei oia. Te vai ra anei te tahi atu faanahonahoraa i nia i te fenua nei, e hou a rave ai i te hoê faaotiraa faufaa, e hiˈo te Tino Aratai i te Parau a te Atua, te Bibilia? Na roto i teie mau ravea e te tahi atu, e faanahonahoraa ite-mata-hia otahi mau â ta Iehova.
Ua hope te porotarama au roa na roto i te horoaraa i te mau parau tuite e te taioraa i te hoê rata a te pǔpǔ e faaite ra i te mauruuru no te haapiiraa taa ê.
[Tumu parau tarenihia i te api 22]
Numera no nia i te pǔpǔ
Rahiraa fenua i tiahia mai: 9
Rahiraa fenua e terehia ˈtu: 12
Rahiraa feia haapii: 48
Faito matahiti au noa: 31,7
Faito matahiti au noa i roto i te parau mau: 13,8
Faito matahiti au noa i roto i te taviniraa taime taatoa: 9,8
[Hohoˈa i te api 23]
101raa o te pǔpǔ faatuitehia a te Haapiiraa Bibilia no Gileada a te Taiete Watchtower
I roto i te tabula i muri nei, ua numerahia te mau anairaa taata mai mua mai e haere atu ai i muri, e ua tapaohia te mau iˈoa na te pae aui mai e haere atu ai i te pae atau no te anairaa taitahi.
(1) Swint, H.; Zezenski, A.; Highfield, L.; Mercado, S.; Diehl, A.; Chavez, V.; Smith, J.; Selenius, S. (2) Kurtz, D.; Clark, C.; Leisborn, J.; Mortensen, W.; Bromiley, A.; Toikka, L.; Marten, A.; Smith, D. (3) Zezenski, D.; Bjerregaard, L.; Garafalo, B.; Kaldal, L.; Chavez, E.; Fröding, S.; Khan, R.; Selenius, R. (4) Swint, B.; Bjerregaard, M.; Garafalo, P.; Holmblad, L.; Keyzer, M.; Fröding, T.; Palfreyman, J.; Palfreyman, D. (5) Minguez, L.; Leisborn, M.; Mercado, M.; Kurtz, M.; Diehl, H.; Toikka, J.; Clark, S.; Khan, A. (6) Minguez, F.; Marten, B.; Highfield, L.; Holmblad, B.; Bromiley, K.; Kaldal, H.; Mortensen, P.; Keyzer, R.