Te rohi ra anei tatou i roto i te mau ohipa pohe aore ra i roto i te taviniraa a Iehova?

“EIAHA e inoino, e ohipa ta ˈu.” Teie hoê o te mau patoiraa ta te mau Ite no Iehova e farerei nei ia poro haere ratou i te parau apî oaoa o te Basileia (Mataio 24:14) E noa ˈtu e, i te tahi taime, e riro te parau ra “E ohipa ta ˈu” ei patoiraa ohie noa, e parau mau iho â e mea ohipa roa te rahiraa o te taata. Te pau nei to ratou taime i roto i ‘te haapeapearaa o teie faanahoraa o te mau mea’—te mau faaheporaa ia imi i te oraraa, ia aufau i te mau tarahu, ia haere e ia hoˈi mai i te ohipa, ia aupuru i te tamarii, ia haapao i te fare, te pereoo, e te tahi atu mau taoˈa.—Mataio 13:22.

Teie râ, noa ˈtu e mea ohipa roa te taata, mea iti o te tutava nei i te rave i te mau ohipa e faufaa mau to ratou aore ra o te horoa mai i te hotu. Ua riro ïa mai ta te taata paari ra o Solomona i papai na: “Eaha ihora ta te taata i ta ˈna atoa ra mau ohipa, e i te taiâ o to ˈna ra aau, i rave noa ˈi oia i te ohipa i raro aˈe i te mahana nei? E oto anaˈe tei to ˈna atoa ra mau mahana, e te taiâ i ta ˈna ra mau ohipa, e i te po atoa ra e ore to ˈna aau e maitai i te taoto. Te ite nei hoi au, e faufaa ore atoa tei te reira.”—Koheleta 2:22, 23.

Te pii atoa ra te Bibilia i teie mau ohipa faufaa ore, te mau “ohipa pohe.” (Hebera 9:14) Te faatere ra anei teie mau huru ohipa i to outou oraraa? E tia ia outou ei kerisetiano ia ara maite i te reira, inaha, ‘e tahoo mai te Atua i te taata atoa i ta ˈna ra ohipa i rave ra.’ (Salamo 62:12) E i te mea e “te poto nei te taime,” e tia ia tatou ia haapao maitai ia ore tatou ia haamâuˈa i te taime i roto i te mau ohipa pohe. (Korinetia 1, 7:29) Eaha mau na râ te mau ohipa pohe? Eaha to tatou manaˈo no nia i teie mau ohipa? E nafea tatou e papu ai e te rave ra tatou i te mau ohipa faufaa mau?

Te iteraa e eaha te mau ohipa pohe

I roto i te Hebera 6:1, 2, ua papai o Paulo e: “E teie nei, e vaiiho noa ˈˈe na i te parau matamua o te Mesia ra, e haere â tatou i mua i te paari mau ra; eiaha râ ma te haamau faahou i te tumu ra i te tatarahapa i te ohipa pohe, e te faaroo i te Atua ra, e te parau no te mau bapetizo, e no te tuuraa rima ra, e te tia-faahou-raa o tei pohe ra, e te haavaraa utua raveraa mure ore ra.” A tapao na e i roto i “te parau matamua” te vai ra “te tatarahapa i te ohipa pohe.” Ei mau kerisetiano, ua tatarahapa ê na te feia taio i te rata a Paulo i te mau ohipa pohe. Mea nafea ïa?

Hou ratou e farii ai i te Mesia, e rave na vetahi i te senekele matamua i te mau ‘ohipa pohe o te tino,’ oia hoi, “te poreneia, te mau peu faufau ra, te taiata, te haamori idolo, te tahutahu,” e te tahi atu mau ohipa faufau. (Galatia 5:19-21) Mai te peu e eita e arahia, e aratai tia ˈtu teie mau ohipa ia ratou i te pohe i te pae varua. Auaa râ hoi, ua faarue teie mau kerisetiano i to ratou haerea ino, ua tatarahapa, e ua “horoihia” ratou. Ua fanaˈo atura ratou i te hoê tiaraa mâ i mua ia Iehova.—Korinetia 1, 6:9-11.

Eita te mau kerisetiano atoa e titauhia ia tatarahapa i te mau ohipa iino aore ra faufau. Inaha, ua faataehia ˈtu na mua te rata a Paulo i te feia faaroo ati Iuda, e rave rahi hoi o tei pee maite i te Ture a Mose hou ratou e farii ai i te Mesia. Eaha ïa te mau ohipa pohe o ta ratou i tatarahapa? Parau mau, e ere i te mea hape ia pee ratou i te mau oroa e te mau titauraa a te Ture no nia i te maa. Inaha hoi e ere anei te Ture i te mea ‘moˈa, te hapa ore, e te maitai’? (Roma 7:12) Oia, tera râ, i roto i te Roma 10:2, 3, ua parau o Paulo no nia i te mau ati Iuda e: “O vau te ite ia ratou, e itoito to ratou i ta te Atua, e ere râ i te itoito ite. No to ratou ite ore i te parau-tia a te Atua, o ratou hoi i titau ia tupu ta ratou iho parau-tia, aita aˈenei ratou i auraro maite i te parau-tia a te Atua ra.”

Oia mau, e tiaturi hape na te mau ati Iuda e ia pee maite ratou i te Ture, e ora ïa ratou. Ua faataa râ o Paulo e “aore te taata nei i tiahia i te ohipa a te ture, i te faaroo râ ia Iesu Mesia ra.” (Galatia 2:16) I muri aˈe i te pûpûraahia te hoo o te Mesia, ua riro maira te mau ohipa a te Ture—noa ˈtu e mea faaroo aore ra mea tura—ei mau ohipa pohe e te faufaa ore ia noaa mai te ora. Ua imi aˈera te mau ati Iuda aau rotahi i te farii maitai o te Atua na roto i te tatarahaparaa i teie mau ohipa pohe e te bapetizoraa ia ratou no te faataipe i to ratou tatarahapa.—Ohipa 2:38.

Eaha ïa te haapiiraa ta tatou e huti mai? Oia hoi, e ere noa te mau ohipa pohe i te mau ohipa iino aore ra faufau; te vai ra i roto te mau huru ohipa atoa e mea pohe i te pae varua, mea faufaa ore, aore ra mea hotu ore. Teie râ, eita anei te mau kerisetiano atoa e tatarahapa i teie mau ohipa pohe hou ratou e bapetizo ai? Parau mau, tera râ, ua topa faahou vetahi mau kerisetiano o te senekele matamua i roto i te haerea faufau i muri iho. (Korinetia 1, 5:1) I rotopu i te mau kerisetiano ati Iuda, mea pinepine vetahi i te topa faahou i roto i te mau ohipa pohe o te Ture a Mose. E tia ˈtura ia Paulo ia faahaamanaˈo i teie mau taata e eiaha roa ˈtu e hoˈi atu i te mau ohipa pohe.—Galatia 4:21; 5:1.

Te araraa i te mau ohipa pohe

E tia i te nunaa o Iehova i teie mahana ia haapao maitai ia ore ratou ia topa faahou i roto i te marei o te mau ohipa pohe. Te faahemahia nei tatou na te mau vahi atoa ia ofati i to tatou tiaraa i te pae morare, ia haavare, e ia rave i te hoê haerea tia ore i te pae no te taatiraa o te tino. Mea peapea ia parau e e mau tausani kerisetiano i te mau matahiti atoa o te topa nei i roto i teie mau faahemaraa, e, mai te peu e eita ratou e tatarahapa, e tiavaruhia ratou mai roto mai i te amuiraa kerisetiano. Hau atu i na mua ˈˈenei, e tia i te kerisetiano ia pee i te aˈoraa a Paulo i roto i te Ephesia 4:22-24: “E haapao outou i ta outou parau i mutaa ihora, i te taata tahito i tei ino i te hinaaro haavare ra; . . . e ia faataata apî hoi outou, o tei hamanihia ia au i te Atua ra, i te parau-tia e te maitai mau ra.”

Parau mau, ua ahu ê na to Ephesia ta Paulo i papai atu i te huru taata apî i roto i te hoê faito rahi. Teie râ, ua tauturu o Paulo ia ratou ia papu maitai e e tia ia ratou ia na reira ma te ore e faaea! Ia ore noa ˈtu ratou e tutava ma te tuutuu ore, e otohe ïa te mau kerisetiano a rave atu ai i te mau ohipa pohe na roto i te mau hinaaro haavare o te riro noa ra ei mana ino. Hoê â huru no tatou i teie mahana. E tia ia tatou ia tamau noa i te tutava no te ahu i te huru taata apî, ma te haapao e ia ore oia e poraohia e te tahi mau huru no roto mai i to tatou huru oraraa tahito. E tia ia tatou ia haapae—ia riri atu—i te mau huru ohipa iino atoa o te tino. “O outou o tei [here] ia Iehova ra, ia riaria outou i te ino,” o ta te papai salamo ïa e faaitoito maira.—Salamo 97:10.

Auaa râ, ua pee maite te rahiraa o te nunaa o Iehova i teie mahana i teie aˈoraa e ua vai mâ noa ratou i te pae morare. Area vetahi ra, ua faaatea-ê-hia ratou e te mau ohipa e ere iho â ïa i te mea ino, tera râ, mea faufaa ore e te hotu ore. Ei hiˈoraa, ua horoa vetahi ia ratou taatoa no te tahi mau opuaraa ia noaa mai te moni aore ra i roto i te imiraa i te mau taoˈa materia. Te faaara nei râ te Bibilia e: “Area te feia e mârô e ia rahi te taoˈa, e roohia ïa i te ati, e te marei, e te nounou maamaa e rave rahi, e ino ai te taata ra, e topa taue ai te taata i roto i te ino rahi faarue roa ra, e te pohe mure ore ra.” (Timoteo 1, 6:9) No vetahi pae, ua riro te haereraa i te haapiiraa teitei ei marei. Parau mau, mea titauhia te tahi faito ite ia noaa mai te hoê toroa. Tera râ, i to ratou horoaraa i to ratou taime ia noaa mai te ite teitei o teie nei ao, ua faaino vetahi ia ratou i te pae varua.

Parau mau, e rave rahi mau ohipa e ere iho â i te mea ino. Tera râ, e ohipa pohe te reira mai te peu e aita to ratou e faufaa no to tatou oraraa i teie nei aore ra eita te reira e horoa mai i te farii maitai o te Atua ra o Iehova. E haapau teie mau ohipa i te taime e te puai aita râ hoê aˈe maitai i te pae varua, aita e tamǎrûraa o te vai tamau.—A faaau e te Koheleta 2:11.

Eita e ore e te tutava puai nei outou no te rohi i roto i te mau ohipa faufaa i te pae varua. Mea maitai atoa râ ia hiˈopoa tamau ia outou iho. I te tahi mau taime, e nehenehe outou e uiui ia outou iho: ‘Te topa ra anei ta ˈu ohipa pororaa e te taeraa ˈtu i te mau putuputuraa no te mea ua hau atu ta ˈu ohipa e rave ra i rapaeau?’ ‘Mea rahi anei ta ˈu taime no te faaanaanataeraa manaˈo e mea iti roa no te haapiiraa tataitahi e te haapiiraa utuafare?’ ‘Te horoa rahi ra anei au i te taime e te puai no te atuatu i te mau taoˈa materia, aita râ vau e aupuru ra i te feia e fifihia ra i roto i te amuiraa, mai te feia maˈi e te feia ruhiruhia?’ E nehenehe te mau pahonoraa i teie mau uiraa e faaite mai e e tia anei ia outou ia horoa i te hoê parahiraa faufaa aˈe no te mau ohipa i te pae varua.

A rohi i roto i te taviniraa a Iehova

Mai ta te Korinetia 1, 15:58 e faaite ra, ‘mea rahi te ohipa i roto i te ohipa a te Fatu.’ Te ohipa faufaa roa ˈˈe, o te pororaa ïa i te Basileia e te faariroraa i te taata ei pǐpǐ. I roto i te Timoteo 2, 4:5, te faaitoito ra o Paulo e: “A faariro i te pororaa i te Parau Apî Maitai ei ohipa tumu i roto i to outou oraraa, ma te haapao maitai i ta outou taviniraa.” (Bibilia no Ierusalema) Mea rahi te ohipa a te mau matahiapo e te mau tavini tauturu no te haapao i te mau titauraa a te nǎnǎ. (Timoteo 1, 3:1, 5, 13; Petero 1, 5:2) Te vai atoa ra te mau upoo utuafare—e rave rahi e metua faaea taa noa ratou—te mau hopoia teiaha no te haapao i to ratou mau utuafare e no te tauturu i ta ratou mau tamarii ia faarahi i to ratou mau taairaa e te Atua. E nehenehe teie mau ohipa e faarohirohi ia tatou, e peneiaˈe e faateimaha roa ia tatou, i te tahi mau taime. Tera râ, maoti hoi i te riro ei ohipa pohe, e hopoi mai ratou i te mauruuru mau!

Teie te fifi: Nafea ia itea mai i te taime no te rave i teie mau ohipa faufaa titauhia atoa? Mea faufaa roa te aˈoraa ia ˈna iho e te faanaho-maitai-raa i ta ˈna mau ohipa. I roto i te Korinetia 1, 9:26, 27, ua papai o Paulo e: “E teie nei, te horo nei au, eiaha mai te mea e aore i itea; te moto nei au eiaha mai te mea e, e moto i te mataˈi. Te moto nei râ vau i tau tino ia vi; o te riro noa ˈtu hoi au o tei aˈo ia vetahi ê ra, ei taata ite-ore-hia mai.” Hoê ravea no te faaohipa i te faaueraa tumu o teie irava, o te hiˈopoa-tamau-raa ïa i ta outou mau peu matauhia e to outou huru oraraa. Peneiaˈe e ite outou e e tia ia outou ia haapae i te tahi mau faaheporaa faufaa ore i nia i to outou taime e to outou puai.

Ei hiˈoraa, te horoa ra anei outou i te hoê pae rahi o to outou puai e to outou taime i mua i te afata teata, i roto i te faafaaearaa, te taioraa i te mau buka o teie nei ao, aore ra te mau peu faaanaanatae manaˈo? Ia au i te hoê tumu parau i roto i te vea The New York Times, te faito au noa no te hoê taata paari i te mau Hau amui no Marite, “ua hau rii atu ïa i te 30 hora i te hebedoma” i mua i te afata teata. Oia mau, e nehenehe teie taime e faaohipahia ma te faufaa aˈe! Te faataa ra te vahine a te hoê tiaau ratere e: “Ua haapae roa vau i te mau peu haamâuˈa taime atoa, mai te mataitairaa i te afata teata.” Eaha te faahopearaa? Ua nehenehe oia e taio i na buka taatoa e piti o te buka parau paari no nia i te Bibilia ra Te aravihi maoti te mau Papai!

Mea maitai atoa paha ia hiˈopoa outou e eita anei ta outou e nehenehe e faaohie mai i to outou oraraa. Ua parau o Solomona e: “E maitai te taoto o te taata rave ohipa ra, ia amu rahi i te maa ra e ia iti noa ˈtu te amu; no te î ra o te opu o te feia taoˈa rahi ra i ere ai ratou i te taoto.” (Koheleta 5:12) Te horoa rahi ra anei outou i to outou taime e to outou puai no te haapao i te mau faufaa materia faufaa ore? Oia mau, rahi noa ˈtu ta tatou mau taoˈa, rahi atu ta tatou mau taoˈa no te haapaoraa, te aufauraa no te haapapuraa, te tataˈiraa, e te parururaa. Eita anei outou e maitaihia mai te peu e e haapae outou i te tahi mau taoˈa ta outou?

Ua riro te faanahoraa i te hoê tabula ohipa nahonaho maitai ei ravea ê atu no te faaohipa maitai i to outou taime. E tia i teie tabula ohipa ia faataa i te taime no te tamǎrû i te rohirohi e te faaanaanatae i te manaˈo. Tera râ, e tia ia tuu i te mau faufaa i te pae varua i nia i te parahiraa matamua. E tia ia faaherehere i te taime no te haere tamau i te mau putuputuraa atoa o te amuiraa. E tia atoa ia faataa na mua roa ˈˈe eaha te mau mahana aore ra te mau ahiahi e nehenehe e horoahia no te ohipa pororaa. Ma te tatuhaa maitai i to outou taime, e nehenehe outou e faarahi i ta outou tuhaa i roto i te taviniraa, peneiaˈe ma te rave i te taviniraa pionie tauturu i te tahi mau taime. A ara atoa ia faanaho i te taime no te haapiiraa tataitahi e te haapiiraa utuafare, e tae noa ˈtu te faaineineraa i te taatoaraa o te mau putuputuraa. Ia faaineine outou, eita noa outou e fanaˈo rahi i te mau putuputuraa, e riro atoa râ outou i te ‘faaitoito i te here e te mau ohipa maitatai’ na roto i ta outou mau pahonoraa.—Hebera 10:24.

No te faataa i te taime no te haapiiraa, e titauhia ia rave i te mau haapaeraa. Ei hiˈoraa, te tia oioi nei te mau utuafare o te Betela na te ao atoa nei i te mau poipoi atoa no te tuatapapa i te irava mahana. E nehenehe anei ta outou e faaherehere maite i te taime i te mau poipoi atoa no ta outou haapiiraa tataitahi? Ua parau te papai salamo e: “E tia vau i nia aore â i ao, e ua pii atu: te tiaturi nei au i ta oe parau.” (Salamo 119:147) Parau mau, mai te peu e e tia oioi outou i te poipoi, e tia ïa ia outou ia haere e taoto i te hoê hora au noa i te po ia nehenehe outou e tia mai i te poipoi aˈe ma te araara maitai e te mâha te rohirohi.

Te mau haamaitairaa o te rohiraa i roto i te taviniraa a Iehova

‘Ia rahi ta tatou ohipa i roto i te ohipa a te Fatu,’ mea titauhia te faanahoraa i te hoê tabula ohipa, te aˈoraa ia tatou iho, e te haapaeraa i te tahi mau mea. Teie râ, e fanaˈo outou i te mau haamaitairaa aita e faaauraa. No reira, a faaitoito, eiaha i roto i te mau ohipa pohe aore ra hotu ore o te faatupu noa i te faufaa ore e te oto, i roto râ i te taviniraa a Iehova. Mea na roto hoi i teie mau ohipa outou e faaite ai i to outou faaroo, e noaa mai ai te farii maitai o te Atua, e, i te pae hopea, te haamauruururaa o te ora mure ore!

[Hohoˈa i te api 28]

Ia faataa oia i te hoê tabula ohipa nahonaho maitai, e faaohipa te hoê kerisetiano i to ˈna taime ma te paari aˈe