Ua haere mai ratou noa ˈtu te fifi e te atâta

TEI te 2 no tenuare 1992 tatou. Te vahi—o Maxixe ïa, i te mataeinaa no Inhambane. Ua mau taue noa te mau maniania afirika matauhia i te po i Mozambique i te taime a tuamahia ˈi te radio. “Te faatupu nei te mau Ite no Iehova i ta ratou tairururaa ‘Te mau hoa o te tiamâraa’ i roto i ta tatou mataeinaa,” o ta te taata orero ïa i faaite. “Ta ratou tapao, o te haapiiraa ïa i te taata e mea nafea te tiamâraa mau e noaa mai ai i roto i teie nei ao. Te titauhia nei outou paatoa ia haere mai.”

I taua vahi atea ra no Afirika, ua tupu te hoê ohipa aore e moehia! No te taime matamua, ua faatupuhia te hoê tairururaa mataeinaa a te mau Ite no Iehova, e e 1 024 taata o tei haere mai e fanaˈo i teie rururaa. Tau matahiti na mua ˈˈe, eita teie huru ohipa e nehenehe e tupu ma te tiamâ i Mozambique, no te mea ua opanihia te ohipa a te mau Ite no Iehova i taua tau ra. Te hinaaro ra anei outou e faaroo i vetahi o te mau haapaeraa itoito o ta vetahi i rave no te haere atu i teie tairururaa?

Mea nehenehe roa te mataeinaa no Inhambane, mai te tahi atu mau vahi no Afirika. E fano atu te mau pahi taiˈa e te mau iˈe e toru poro na te hiti fenua. Mea rahi te mau tumu haari. Tera râ, te vai ra te hoê ohipa hairiiri o te faaino nei i te unauna o te fenua: te tamaˈi tivila!

Mea pinepine te feia e taoto ra i roto i te fare niau i te faaarahia i te aahiata e te maniania o te mau paainaraa pupuhi na te mataeinaa i pihai iho mai a uˈana noa ˈi te mau aroraa i roto i te mau ururaau i te po. Mea pinepine o te feia tivila hapa ore o te mauiui nei. I te tahi mau taime, te itehia ra te mau tamarii e ouˈauˈa noa ra e aita to ratou e avae faahou aore ra ua motu. Te ite-atoa-hia nei i nia i te tahi mau Ite no Iehova i te mau rifa i nia i to ratou mata e to ratou tino no te mau hamani-ino-raa o ta ratou i faaruru.

Ia au i teie mau huru tupuraa, ua oaoa roa te feia atoa o tei putuputu mai i te tairururaa “Te mau hoa o te tiamâraa.” Noa ˈtu te mau tupuraa atâta e nehenehe e tupu mai i roto i to ratou tere i te tairururaa, e rave rahi mau pǔpǔ utuafare no te mau mataeinaa o tei opua e haere atu iho â i te tairururaa. E ere atoa te tere i te mea nahonaho, inaha, te faurao, o te mau pereoo rarahi ïa aita i tapoˈihia. I te tahi mau taime, e naeahia e 400 horopatete o te piripiri i roto i te hoê anaˈe pereoo! E apapa teie mau pereoo te tahi i muri aˈe i te tahi ma te apeehia e te mau faehau e ta ratou mau mauhaa.

Tei roto o Nora e ta ˈna e toru tamahine, hoê, e toru, e e ono matahiti, i te mau utuafare o tei haamǎtaˈuhia to ratou ora na roto i teie huru tere. Ua haaputu oia i te moni e rave rahi avaˈe na mua ˈtu no te aufau i te tere. Aita oia i haaparuparu no te mea e aita e vahi faaearaa i te tairururaa. E te tahi atu mau taata, ua tunu o Nora e to ˈna utuafare i te maa, ua tamaa, e ua taoto noa ratou i nia i te hoê mahora i te vahi tairururaa iho.

Aita atoa te veavea rahi e i muri iho te uâ puai i faaiti i te oaoa faito ore o te mau taeae o tei fanaˈo amui i te hoê tamaaraa i te pae varua. Ua taa ia ratou e aita ˈtu mea faufaa roa ˈˈe maoti râ te taeraa mai i taua tairururaa nei. E 17 taata o tei faataipe i to ratou pûpûraa ia ratou i te Atua i roto i te mau pape mahanahana o te Moana Inidia. I te taime a tupu ai te bapetizoraa, ua himene ihora te hoê nahoa rahi o te feia mataitai oaoa i te mau himene arueraa ia Iehova.

Ua ite mau â teie pǔpǔ feia haamori e eaha te auraa ia riro mai ei mau hoa no te tiamâraa. Ua parau o Hans, te hoê tia no te oire pu o Maputo, e: “Ua ite matou i te omuaraa o te hoê pene apî i roto i te ohipa a te mau Ite no Iehova i roto i teie tuhaa no Afirika.”