Te mauruuru ra anei outou no te mea ta te Atua i rave?

“Ia hinaaro te taata i te pee mai ia ˈu ra, e faarue oia ia ˈna iho, a rave ai i tana satauro i te mau mahana atoa, a pee mai ai ia ˈu.” — LUKA 9:23.

1. A faahiti na vetahi o te mau ô nehenehe mau ta te Atua i horoa mai?

O TE Atua te tumu o to tatou ora. Mai te peu e aita oia i poiete i te huitaata nei, eita roa ˈtu tatou e ora mai. Teie râ, aita te Atua i horoa noa mai i te ora. Ua poiete oia ia tatou ia nehenehe tatou e fanaˈo e rave rahi mau mea: te au o te maa, te mahanahana o te mahana, te taˈi o te upaupa, te haumǎrû o te hoê mahana o te tau tupuraa raau, te here. Hau atu, ua horoa te Atua na tatou i te hoê feruriraa e ua tuu mai i roto ia tatou i te hinaaro e haapii ia ite ia ˈna. Ua faaurua oia i te Bibilia, o te horoa mai na tatou i te hoê aratairaa paari mau, o te faaite ia tatou e nafea ia ora ma te oaoa aˈe, e o te horoa mai nei i te tiaturiraa no te hoê oraraa mure ore i roto i te ao apî e te parau-tia ta ˈna e haamau. Te horoa atoa ra te Atua i to ˈna varua moˈa, te turu o te hoê amuiraa, e i te mau tane e te mau vahine paari aˈe here mau o te nehenehe e tauturu mai ia tatou ia vai puai noa i roto i ta ˈna taviniraa. — Genese 1:1, 26-28; Timoteo 2, 3:15-17; Hebera 10:24, 25; Iakobo 5:14, 15.

2. a) Eaha te ohipa rahi roa ˈˈe ta te Atua i rave no tatou? b) E roaa anei ia tatou te ora na roto i te ohipa?

² Hau atu i te taatoaraa o taua mau mea ra, ua tono mai te Atua i ta ˈna Tamaiti fanau tahi no te haapii rahi atu â ia tatou no nia i te mea ta te Metua e hinaaro ra ia tatou, e no te horoa i te “ora [na roto i te hoo]” no te mau taata atoa e farii i taua faanahoraa ra (Ephesia 1:7; Roma 5:18). Ua parau taua tamaiti ra o Iesu Mesia e: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” (Ioane 3:16). I te mea e tei te hoê faito teitei roa te ora e nehenehe e noaa mai na roto i taua hoo ra, aita te hoê taata e nehenehe e fanaˈo i te reira na roto i te tahi mau ohipa, e papu maitai aita atoa na roto i te mau ohipa i ravehia i raro aˈe i te Ture a Mose. No reira Paulo i papai e: “Aore te taata nei i tiahia i te ohipa a te ture, i te faaroo râ ia Iesu Mesia ra.” — Galatia 2:16; Roma 3:20-24.

Te faaroo e te mau ohipa

3. Eaha ta Iakobo i parau no nia i te faaroo e te ohipa?

³ No roto mai te ora i te faaroo, tera râ, e tia e na te faaroo e te mauruuru no te mea ta te Atua i rave, e turai ia tatou ia ohipa. E tia ia tatou ia faaite i to tatou faaroo na roto i te mau ohipa. Ua papai te taetaeae a Iesu, o Iakobo, e: “Te faaroo, aore e ohipa ra, e mea pohe ïa.” Ua parau oia i muri iho e: “A faaite mai na oe i to oe faaroo, aore e ohipa ra, a faaite atu ai au ia oe i to ˈu faaroo i ta ˈu nei ohipa.” Mai ta Iakobo e haapapu ra, ‘te faaroo atoa ra e te rurutaina ra’ te mau demoni, tera râ, mea papu maitai e aita te mau demoni e rave ra i te mau ohipa e tano ra i te hinaaro o te Atua. Area râ, o Aberahama, e faaroo to ˈna e e ohipa atoa. “Na te faaroo i faatupu i ta ˈna ohipa, e no te ohipa i tia roa ˈi i te faaroo.” Ua parau faahou o Iakobo e: “Te faaroo aore e ohipa ra, e mea pohe atoa ïa.” — Iakobo 2:17-26.

4. Mai ta Iesu i faaite mai, eaha tei tia i te feia e hinaaro ra e pee ia ˈna, ia rave?

⁴ Ua faaite atoa o Iesu i te faufaaraa o te mau ohipa maitai, ma te parau e: “Oia atoa to outou maramarama, ia anaana ïa i mua i te aro o te taata nei, ia hiˈo ratou i ta outou parau maitai, e ia haamaitai i to outou Metua i te ao ra.” “Ia hinaaro te taata i te pee mai ia ˈu ra, e faarue oia ia ˈna iho, a rave ai i tana satauro i te mau mahana atoa, a pee mai ai ia ˈu.a” Mai te peu e e “faarue” tatou ia tatou iho, e vaiiho ïa tatou e rave rahi o ta tatou iho mau maitiraa. Ma te farii e na te Atua e horoa mai i te mau mea atoa na tatou, te pǔpǔ nei tatou ia tatou iho ei tavini no ˈna, e te imi nei tatou i te haapii e i te faatupu i to ˈna hinaaro, mai ia Iesu. — Mataio 5:16; Luka 9:23; Ioane 6:38.

Te hoê mauruuru e itehia i roto i to tatou oraraa

5. a) Ia au i te parau a Petero, eaha tei tia ia itehia i roto i te mau tuhaa atoa o to tatou oraraa? b) Eaha te mau ohipa maitai ta ˈna i faaitoito ia rave?

⁵ Ua faaite o Petero e e faito teitei roa to te “toto taoˈa” o te Mesia, tei horoahia no tatou, e e tia ïa ia itehia to tatou mauruuru no te reira i roto i te mau tuhaa atoa o to tatou oraraa. Te faaite nei te aposetolo e rave rahi mau mea ta to tatou mauruuru e tia ia turai ia tatou ia rave. Ua aˈo mai oia e: “E haapae hua ˈtu i te tairoiro.” “Ia hiaai maite outou (...) i te û anoi-ore-hia ra i te parau.” “Ia faaite hua outou i to ˈna maitai, tei parau ia outou i to roto i te pouri, ia tae i to ˈna ra maramarama umerehia.” “E haapae (...) i te ino, e rave i te maitai.” “Ia vai ineine â outou ia parau atu i te taata atoa ia ui mai ia outou i te tiaturi i roto ia outou na.” “Ia ore [outou] ia parahi i te toea o to [outou] maa taime i te tino nei ma te haapao i te hinaaro o te taata, ma te haapao râ i te hinaaro o te Atua.” — Petero 1, 1:19; 2:1, 2, 9; 3:11, 15; 4:2.

6. a) Mea nafea to te mau kerisetiano no te senekele matamua faaiteraa i to ratou faaroo? b) Eaha te hiˈoraa ta ratou i horoa mai no tatou?

⁶ Ua ora na te mau kerisetiano o te senekele matamua i to ratou faaroo. Ua faataui te reira i ta ratou huru hiˈoraa e to ratou huru iho, ma te turai ia ratou ia faaau i to ratou oraraa ia au maite i te hinaaro o te Atua. Ua faaoromai ratou i te hopoi-tîtî-raa, te pehiraa i te ofai, te taparahiraa, te tapearaa i roto i te mau fare auri, e oia atoa te pohe, maoti i te faarue i to ratou faaroo (Ohipa 7:58-60; 8:1; 14:19; 16:22; Korinetia 1, 6:9-11; Ephesia 4:22-24; Kolosa 4:3; Philemona 9, 10). Ua parau te taata papai aamu no Roma ra o Tacitus, tei fanauhia i te matahiti 56 o to tatou nei tau, e “ua tutuihia [te mau kerisetiano] no te turama i te po, ia topa anaˈe te mahana”. Aita râ ratou i topa! — Te mau buka tahito, buka XV, paratarapha 44.

7. Tei roto te tahi mau taata i teihea huru tupuraa?

⁷ I roto i te tahi mau amuiraa, e nehenehe outou e ite i te tahi mau taata o tei apiti mai i te mau putuputuraa e rave rahi matahiti i teie nei. Mea au na ratou te faanahonahoraa a Iehova, te manaˈo nei ratou e, ta ˈna mau melo, e mau taata maitatai roa ˈˈe ïa ta ratou i ore aˈenei i farerei, e parau maitai ratou no nia i te parau mau, e e paruru ratou i te reira i mua i te feia e ere i te Ite. Teie râ, te vai ra te hoê mea i nia i to ratou eˈa, te hoê mea e tapea ra ia ratou. Aita ratou i rave i te taahiraa faahiahia roa ta te 3 000 taata i rave i te mahana o te Penetekose, ta te taata faaroo no Etiopia i ani ia rave, aore ra ta Anania i faaitoito ia Saulo ia rave i muri aˈe i to taua taata ra, e taata hamani ino hoi i mutaa ihora, fariiraa e o Iesu mau te Mesia (Ohipa 2:41; 8:36; 22:16). Eaha ïa te mea e erehia nei e ratou? No te aha aita ratou i rave i te taahiraa ta te Bibilia e pii ra “te parau (...) i te aau hapa ore i te Atua”? (Petero 1, 3:21.) Mai te peu e tei roto outou i taua huru tupuraa ra — ua ite outou i te parau mau, teie râ, te haamarirau nei outou i te ohipa ia au i te reira — a tuatapapa i teie tumu parau; ua faaineine-taa-ê-hia te reira ma te here no outou.

A faaruru i te mau fifi no te bapetizoraa

8. Mai te peu e aita outou i au aˈenei i te haapiiraa, eaha ïa te tia ia outou ia rave ma te ore e tiai?

⁸ Eaha te mea e nehenehe e riro ei fifi no outou? Ua faaite te tumu parau na mua ˈtu e, no te tahi pae, ua riro te haapiiraa tataitahi ei fifi. Ua horoa mai te Atua no tatou i te mau ravea faahiahia mau no te feruri, e te hinaaro nei oia e ia faaohipa tatou i te reira no te tavini ia ˈna. Ua tutava te tahi mau taata aita i ite i te taio, no te haapii i te reira ia ite hau atu â no nia i te Atua e ta ˈna mau opuaraa. E o outou iho? Mai te peu e ua ite aˈena outou i te taio, te haapii mau ra anei outou, mai te feia no Berea, ‘ma te imi i te parau i papaihia ra i te mau mahana atoa hoi i taua parau ra’ no te ite e e parau mau anei te reira? Te faito ra anei outou i “te aano, e te maoro, e te hohonu, e te teitei” o te parau mau? Te heru hohonu mau ra anei outou i roto i te Parau a te Atua? Ua ite anei outou i te faahiahiaraa o taua buka ra? Ua atuatu anei outou i te hoê hinaaro mau no te ite i te hinaaro o te Atua? Te hiaai mau ra anei i te parau mau? — Ohipa 17:10, 11; Ephesia 3:18.

9. Eaha tei tia ia outou ia rave mai te peu e e fifi to outou e te hoê taata i roto i te amuiraa?

⁹ Te tapea nei te tahi pae ia ratou, no te mea te vai ra te hoê fifi mau aore ra mea feruri-noa-hia i rotopu ia ratou e te tahi atu taata i roto i te amuiraa. Ua haapeapea mau ra anei te hoê taata ia outou? I roto i taua huru tupuraa ra, a pee atu i te faaueraa i faaitehia i roto i te mau parau a Iesu, e: “E haere, e faaite atu ia ˈna i ta ˈna hapa o orua anaˈe ra.” (Mataio 18:15). Peneiaˈe e maere outou ia ite e aita te taata i ite e ua inoino outou. Teie râ, noa ˈtu e ua ite o ˈna, e nehenehe â ‘e roaa mai ia outou to outou taeae’, mai ta Iesu i parau. E nehenehe atoa outou e tauturu ia ˈna ia ore e faaturori ia vetahi ê. Hau atu, a feruri na: O vai ta outou e tavini mau ra: taua taata ra aore ra te Atua? Mea iti roa anei to outou here no te Atua e vaiiho atu ai outou i te hoê hapa ravehia e te hoê taata tia ore ia faaaueue i taua here ra?

10, 11. Eaha tei tia ia outou ia rave mai te peu e te tapea nei te hoê hara huna ia outou ia haere i mua?

¹⁰ E nehenehe te hoê hara tei hunahia e tapea i te hoê taata ia bapetizo ia ˈna. Peneiaˈe o te hoê hara tei tupu i mutaa ihora, aore ra te hoê haerea ino o te vai noa mai. Mai te peu e ua ite outou i taua huru fifi ra, e ere anei i te taime no te faatitiaifaro i te reira? (Korinetia 1, 7:29-31.) E rave rahi mau tavini a Iehova o tei tia ia faatupu i te tahi mau tauiraa i roto i to ratou oraraa. Te parau nei te Bibilia e: “E teie nei, e tatarahapa outou, e e fariu mai, ia paraihia ta outou hara, ia itea mai te anotau haumǎrû no ǒ mai i te aro o te Fatu [Iehova] ra.” — Ohipa 3:19.

¹¹ Noa ˈtu eaha te mau mea ta outou i rave i mutaa ihora, e nehenehe outou e tatarahapa, e taui i to outou haerea, e e ani i te Atua ia faaore i ta outou mau hara. “E tena na, uumi iho i to outou mau melo i te mau mea o teie nei ao, mai te faaturi, te parau faufau ra, te paia ra, te hinaaro tia ore ra (...). ua haapae hoi outou i te taata tahito e ta ˈna atoa ra mau parau; e ua faa-taata-apî, o tei faahouhia i te ite ra, mai te huru atoa o tei hamani ia ˈna ra.” E nehenehe outou e faaau i to outou oraraa i te mau faaueraa tumu a te Atua, e nehenehe atoa e noaa ia outou te hoê haava manaˈo viivii ore, e e atuatu i te tiaturiraa no te ora e a muri atu i roto i te ao apî e te parau-tia ta ˈna i tǎpǔ. Noa ˈtu eaha te mau tutavaraa tei tia ia rave, e ere anei te reira i te mea faufaa? — Kolosa 3:5-10; Isaia 1:16, 18; Korinetia 1, 6:9-11; Hebera 9:14.

12. Eaha tei tia ia outou ia rave mai te peu e te tapea nei te puhipuhiraa i te avaava, te inu-hua-raa i te ava aore ra te raveraa i te raau taero, ia outou ia roaa te hoê haava manaˈo viivii ore?

¹² Na te avaava anei, te inu-hua-raa i te ava, aore ra te faataeroraa i te raau taero, e tapea ra ia outou ia noaa te hoê haava manaˈo viivii ore? Aita anei taua mau peu ino ra e faaite nei i te faatura ore no te ô faahiahia mau o te ora ta te Atua i horoa mai? Mai te peu e ua riro te reira ei fifi no outou, peneiaˈe e taime tano teie no te faatitiaifaro i te reira. Mea faufaa aˈe anei taua mau peu ra i to outou oraraa? Ua parau o Paulo e: “E tamâhua tatou ia tatou iho i te mau viivii atoa o te tino e te varua, ma te faatupu hua i te maitai i te mǎtaˈuraa ˈtu i te Atua.” Mea navai anei to outou here no te mau eˈa viivii ore e te parau-tia a te Atua no te faaohipa i te reirab? — Korinetia 2, 7:1.

Te mau taoˈa materia

13, 14. a) Eaha ta te mau Papai e parau ra no nia i te mau hinaaro i te pae materia? b) No te aha e mea faufaa roa ia tuu i te mau taoˈa no te raˈi i te parahiraa matamua?

¹³ Te tuu ra te ao nei i te manuïaraa e “te ahaaha o te oraraa nei” i mua roa i te mau mea atoa aore ra fatata roa. Ua faaau râ o Iesu i “te haapaoraa i te peu o teie nei ao, e te haavare o te taoˈa” i te mau “aihere” o te faaapǐapǐ i te parau a te Atua. Ua ui atoa oia i teie nei uiraa e: “Eaha ta te taata faufaa i noaa, ia noaa ia ˈna te taoˈa atoa o teie nei ao, ia ere oia i te ora?” — Ioane 1, 2:16; Mareko 4:2-8, 18, 19; Mataio 16:26.

¹⁴ Ua faaite o Iesu e te haapao nei te Atua e ia nehenehe te mau manu e ite i te maa e ia faahotu te mau lili i te mau tiare nehenehe mau. E ua parau oia e: ‘E ere anei outou i te mea faufaa aˈe i te mau manu! Eaha ˈtu ïa no outou, eita anei te Atua e faaahu ia outou.’ E, ma te paari, ua horoa o Iesu i teie nei aˈoraa e: “Eiaha (...) e parahi ma te ahoaho” no te mau taoˈa materia. Ua parau oia e: “E titau râ outou i te basileia o te Atua, e amui-atoa-hia mai taua mau mea ra ia outou.” Ua faaite oia e e tia ia tatou ia tuu i te mau taoˈa no te raˈi ra i mua roa, no te mea ‘te vahi i vai ai ta tatou taoˈa ra, e riro atoa i reira to tatou aau.’ — Luka 12:22-31; Mataio 6:20, 21.

Ia tavini na tatou i te Atua na roto i ta ˈna tauturu

15. Eaha te faaitoitoraa nehenehe mau ta te hiˈoraa o te mau kerisetiano o te senekele matamua e horoa ra na tatou?

¹⁵ Ua riro anei te pororaa ia vetahi ê ei ohipa fifi no outou? Na te haama anei e tapea nei ia outou? Mai te peu e, e, e tia ïa ia haamanaˈo e hoê â mau huru manaˈo to te mau kerisetiano o te senekele matamua i to tatou. Aita te Atua i maiti e rave rahi taata e paari rahi to ratou e te mana, ua maiti râ oia i “te mea paruparu o te ao nei, ei faahaamaraa ˈtu i te feia puai.” (Korinetia 1, 1:26-29). Ua patoi te tahi mau taata mana i te pae faaroo i taua mau taata “itea ore” ra e ua faaue aˈera ia ratou ia faaea i te poro. Ua aha ˈtura ïa te mau kerisetiano? Ua pure aˈera ratou. Ua ani atura ratou i te Atua i te itoito, e ua horoa aˈera oia na ratou i te reira. I te pae hopea, ua î roa Ierusalema i ta ratou poroi e, i muri iho, ua faaaueue roa i te ao taatoa nei! — Ohipa 4:1-4, 13, 17, 23, 24, 29-31; 5:28, 29; Kolosa 1:23.

16. Eaha ta te “nahoa rahi i ite nei” tei faataahia i roto i te Hebera pene 11, e haapii ra ia tatou?

¹⁶ No reira, ia ore roa ˈtu na te mǎtaˈu i te taata e tapea ia tatou ia tavini i te Atua. I roto i te Hebera pene 11, te parauhia ra no te hoê “nahoa rahi i ite nei” o tei mǎtaˈu, eiaha te taata, i te Atua râ. E tia ia tatou ia faaite i te hoê â huru faaroo e to ratou. Ua papai te aposetolo e: “Ua haaatihia tatou e taua nahoa rahi i ite nei, e haapae tatou i te mau mea teimaha atoa, e te ino e hara ˈi tatou nei, a horo tamau maite ai i teie nei hororaa i mua ia tatou nei.” — Hebera 12:1.

17. Eaha te faaitoitoraa ta te Atua i horoa na roto i te arai o Isaia?

¹⁷ E nehenehe te Atua e horoa na ta ˈna mau tavini i te hoê tauturu faahiahia mau. Ua parau te Poiete o te ao atoa nei ia Isaia e: “O te feia (...) e tiaturi ia Iehova, e noaa ïa te etaeta apî; e pee ratou i nia mai tei nia i te pererau o te aeto ra; e horo ratou, e e ore e rohirohi; e haere â hoi ratou, e e ore e matapourihia.” — Isaia 40:31.

18. Mai te peu e na te mamahu e tapea ra ia outou ia apiti atu i roto i te pororaa i te Basileia, nafea outou e nehenehe atu ai e aro i te reira?

¹⁸ Ua riro te mau Ite itoito e te oaoa ta outou e ite ra i roto i te amuiraa o to outou vahi, ei tuhaa nainai noa o te toru milioni e te afa o te mau tane e te mau vahine e tavini nei i te Atua ma te ieie i roto i te ao atoa nei. Te oaoa nei ratou i te apiti atu i roto i te ohipa o ta Iesu iho i tohu na roto i teie mau parau: “E e parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.” Mai te peu e te haamarirau nei outou i te apiti atu i roto i te pororaa i te Basileia, noa ˈtu e te faaî nei outou i te mau huru e titauhia, no te aha e ore ai outou e ani atu i te hoê Ite o te manuïa ra i roto i te taviniraa no te apiti atu e o ˈna i roto i te pororaa? E horoa mau te Atua i “te mana rahi maitai ra”, e e maere paha outou ia ite atu outou i te oaoa o te noaa mai na roto i teie taviniraa no te Atua. — Mataio 24:14; Korinetia 2, 4:7; hiˈo atoa Salamo 56:11; Mataio 5:11, 12; Philipi 4:13.

19. Eaha te ohipa no nia i te haapiiraa ta Iesu i faaue atu i ta ˈna mau pǐpǐ ia rave?

¹⁹ Te tiai nei Iesu e ia ohipa te feia e au nei i te poroi o te Basileia, ia au i tei titauhia. Ua parau oia e: “E teie nei, e haere outou e faariro i te mau fenua atoa ei pǐpǐ, a bapetizo atu ai ia ratou i roto i te iˈoa o te Metua, e no te Tamaiti, e no te [v]arua [moˈa]; ma te haapii atu ia ratou i te haapao i te mau mea atoa ta ˈu i parau atu ia outou na.” — Mataio 28:19, 20.

20. Mai te peu e te haere nei outou i mua i te pae varua, eaha te uiraa tei tia paha ia outou ia uiui mai teie atu nei?

²⁰ Te turai ra anei to outou mauruuru no te mau haamaitairaa a te Atua, i te “toto taoˈa” a Iesu, e i te tiaturiraa faahiahia mau o te ora mure ore, ia outou ia ohipa (Petero 1, 1:19)? Ua faaau anei outou i to outou oraraa i te mau titauraa parau-tia a te Atua? Te apiti tamau ra anei outou i roto i te ohipa no te faariroraa ˈtu i te mau taata ei mau pǐpǐ? Ua faarue anei outou ia outou iho e ua pûpû anei outou i to outou ora no te Atua? Mai te peu e e nehenehe outou e pahono ma te ore e haamarirau i taua mau uiraa atoa ra e, e, peneiaˈe ua tae atura ïa i te taime no te ani atu i te hoê matahiapo o ta outou amuiraa i te hoê â uiraa ta te taata faaroo no Etiopia i ani atu ia Philipi, oia hoi: “Eaha te mea e ore e tia ˈi ia bapetizo ia ˈu?” — Ohipa 8:36.

[Nota i raro i te api]

Te haamanaˈo ra anei outou?

◻ Eaha te mau tumu taa ê e vai ra ia tatou no te haamauruuru i te Atua?

◻ Eaha ta te faaroo e ta te mauruuru e turai ia tatou ia rave?

◻ Eaha te mau fifi e nehenehe e tapea i te hoê taata ia auraro i te Atua, e nafea tatou e nehenehe ai e faatitiaifaro i te reira?

◻ Eaha te mau uiraa ta te mau taata tei ore â i bapetizohia e nehenehe e uiui atu?

[Tumu parau tarenihia i te api 18]

‘Ua riro au mai teihea huru “repo”’

Ua horoa Iesu i te hoê faahohoˈaraa o te hoê taata o tei haere e ueue i te huero. Ua topa te tahi mau huero i nia i te pae purumu e ua amuhia e te manu. Te tahi râ, ua topa ïa i nia i te vahi pǎpǎ e aita i rahi te repo i reira. Ua tupu taua mau huero ra, tera râ, a hiti mai ai te mahana, ua paapaa ïa te reira e ua pohe. Ua topa te tahi atu mau huero i roto i te aihere e ua apǐapǐ ihora te reira. Ua parau o Iesu e e faahohoˈa taua na pǔpǔ e toru i: te matamua, te taata e ‘faaroo ra i te parau o te basileia ra, e aore e haapao ra i taua parau ra’; te piti, te hoê o te farii i te parau e o te faarue râ i te reira no te veavea o ‘te ati e te hamani-ino-raa’; e te toru, o te taata ïa “tei hoene te parau i roto ia ˈna i te titau rahi i to teie nei ao ra, e te haavare o te taoˈa”.

Ua parau atoa Iesu no nia i te tahi atu mau huero tei topa i nia i te repo maitai. “Oia te taata i faaroo i te parau, e haapao maite atura i taua parau ra.” — Mataio 13:3-8, 18-23.

Mea tano maitai e ia aniani ia tatou iho e: ‘Ua riro au mai teihea huru “repo”’?

[Tumu parau tarenihia i te api 19]

Ua pohe ratou no to ratou faaroo

Ua ite anei outou i te hoê taata o te hinaaro e pohe maoti i te taiva i to ˈna faaroo? Ua na reira e rave rahi tausani Ite no Iehova. Ua papai te taote ra o Christine E. King i roto i ta ˈna buka ra Te Hau nazi e te mau haapaoraa apî: Tuatapaparaa no nia e pae hiˈoraa i te pae no te faaau-ore-raa i te haerea, e: “Hoê i nia e piti Ite no Helemani i tapeahia, hoê i nia i te maha i pohe.”

A hope ai te ohipa hairiiri o te mau aua tapearaa i te matahiti 1945 ra, “ua maraa te mau numera o te mau Ite e aita e parau faaau i ravehia.” Ua papai o J. S. Conway no nia i te mau Ite i roto i Te hamani-ino-raa nazi i te mau Ekalesia (beretane) e: “Aita ˈtu haapaoraa i faaite i te hoê mau-maite-raa mai te reira te huru i mua i te puai rahi o te hamani-ino-raa a te Gestapo.”

Aita te mau Ite no Iehova i hamani-ino-hia no te mau ohipa politita aore ra no te iri. Tera râ, ua hamani-ino-hia ratou no to ratou here i te Atua e no to ratou patoiraa i te taiva i to ratou haava manaˈo tei haapiihia e te Bibilia.