Ua haapao Iehova ia matou i te tau opaniraa—Tuhaa 3
TE 14 no mati 1990. I taua mahana rahi ra, tei reira vau i te taime a faatoro ai te hoê tia mana teitei a te Hau faatere no te mau Ohipa faaroo i Berlin Hitia o te râ i te papai o te haamana ra i te mau Ite no Iehova i mua i te ture i roto i te fenua tei parauhia i taua tau ra, te Repubilita Demotaratia no Helemani, aore ra Helemani Hitia o te râ. I te taime a ravehia ˈi te mau faaauraa ohipa i taua mahana ra, ua haamanaˈo atura vau i te tau i reira to ˈu riroraa mai ei Ite e ua manaˈonaˈo faahou vau i te mau tau fifi o ta matou i faaruru.
I te afaraa o te mau matahiti 1950, i to te Margarete, te hoê hoa ohipa e Ite no Iehova oia, paraparauraa mai no te taime matamua ia ˈu no nia i ta ˈna mau tiaturiraa niuhia i nia i te Bibilia, te uˈana ra ïa te hamani-ino-raa i nia i te mau Ite no Iehova i Helemani Hitia o te râ. Aita i maoro i muri iho, ua haere atura oia e rave i te ohipa i te hoê vahi ê, e ua haamata ˈtura vau i te haapii i te Bibilia e te tahi atu Ite. Ua bapetizohia vau i te matahiti 1956, e ua faaipoipo atura mâua o Margarete i taua matahiti atoa ra. Ua haere atu mâua i te amuiraa no Lichtenberg i Berlin. Fatata e 60 feia e poro ra i te Basileia i roto i teie amuiraa.
E piti matahiti i muri aˈe i to ˈu bapetizoraa, ua haere atura te mau tia a te hau i te fare o te hoê taeae e aratai ra i te ohipa i roto i ta matou amuiraa. Ua opua hoi ratou e haru ia ˈna, tera râ, te rave ra oia i te ohipa i Berlin Tooa o te râ i tera taime. Ua faaara ˈtura to ˈna utuafare fetii ia ˈna ia faaea ˈtu i reira, e tau avaˈe i muri iho, ua haere atoa ˈtu ratou ia ˈna ra i te pae Tooa o te râ. Noa ˈtu e e 24 matahiti noa to ˈu i reira, ua horoahia mai te mau hopoia teimaha i roto i te amuiraa. Te mauruuru nei au i te mea e ua horoa mai Iehova i te paari e te puai i titauhia no te haapao i taua mau ohipa ra.—Korinetia 2, 4:7.
Te horoaraa i te maa i te pae varua
I te taime a faatiahia ˈi te Patu no Berlin i te avaˈe atete 1961, ua taa ê taue noa ˈtura te mau Ite no Iehova no te pae Hitia o te râ i to ratou mau taeae no te pae Tooa o te râ. I reira ïa to matou haamataraa i te nenei i te mau hohoˈa o ta matou mau buka, i te omuaraa i nia i te matini patapata parau, e i muri iho, e te mau matini nenei hohoˈa. Mai te matahiti 1963, ua patu vau i roto e piti matahiti i te hoê vahi tapunihia i roto i to mâua fare no te rave i teie ohipa neneiraa parau. I muri aˈe i to ˈu raveraa i te ohipa i te mahana taatoa ei taata hamani tauihaa, e nenei au i te mau hohoˈa o Te Pare Tiairaa i te po taatoa ma te tauturuhia mai e te tahi atu mau taeae. Ua tamata te mau tia mana i te tamoemoe i ta matou faanahoraa neneiraa parau, ua tauturu mai râ Iehova ia matou ia matara ta matou maa, mai ta matou e parau ra, i te taime tano.
Ia navai te mau vea o ta matou e nenei ra, mea titauhia te mau pueraa papie rahi, e e ere i te mea ohie ia noaa mai te tahi. Ahiri e e afai tamau matou i te mau haapueraa papie rahi, e huti ïa te reira i te ara-maite-raa o te mau tia mana. Ua ani atura matou i te mau Ite tataitahi ia hoo mai i te mau pueraa papie iti e ia afai mai i ta matou pǔpǔ haapiiraa buka. I muri iho, e afaihia ˈtu i te vahi i reira matou e hamani ai i te mau vea. I muri iho, na te tahi atu mau Ite e opere i te mau vea tei oti.
I te mea e ua taa i te mau tia e te rave ra vau i te ohipa neneiraa buka, ua tamoemoe noa ratou ia ˈu. I te pae hopea o te matahiti 1965, ua ite atura vau ia ratou i te apeeraa ia ˈu hau atu i tei matauhia, e ua taa ia ˈu e te opua ra ratou i te tahi ohipa. Ua haere taue noa mai ratou i te hoê poipoi.
Te hoê hororaa atâta
Te haere ra vau i te ohipa i taua poipoi o te tau toetoe ra. Aita te mahana i hiti atura, e te faaruru ra vau i te toetoe rahi. Te haere noa ra vau na raro, ite atura vau e maha upoo i muri mai i te aua. Ua tipuu aˈera teie mau taata i te poro aroâ ma te haere tia mai i nia ia ˈu. Ua mehameha vau i to ˈu iteraa ˈtu e e mau tia teie na te hau. Nafea ïa vau?
Ua opehia te hiona i te hiti no te faaateatea i te tahi eˈa ǒaǒa. Ua haere noa vau. Ua piˈo atura vau i to ˈu upoo ma te haere vitiviti e ma te tiatonu noa i raro. Ua faahiti atura vau i te tahi pure oioi. Te piri noa maira ratou. Ua ite mai anei ratou ia ˈu? I to matou mahemoraa ma te piri roa te tahi e te tahi i nia i te eˈa apǐapǐ, eita ta ˈu e nehenehe e tiaturi i te ohipa e tupu ra. Ua haere oioi noa ˈtura vau. “Hey,” o ta te hoê ïa i tuô, “o ˈna tera. A faaea!”
Ua horo atura vau. Ua tipuu taue ihora vau i te poro aroâ, ouˈa ˈtura na nia i te aua a te hoê taata tapiri e tae roa ˈtu i roto i to ˈu iho aua. Ma te horo i roto i te fare, ua tamau e ua ponao atura vau i te opani. “A tia i nia!” o ta ˈu ïa i tuô. “Te haere maira ratou e haru ia ˈu.”
Ua pou ru noa maira o Margarete e ua tia ˈtura i mua i te opani. Aita vau i faataere no te pou atu i roto i te piha i raro no te tutui i te umu. Ua haaputu maira vau i te mau papai atoa a te amuiraa e vai ra ia ˈu nei e ua taora ˈtura i roto i te auahi.
“A iriti i te opani!” o ta te mau taata ïa i tuô. “A iriti i te opani! O te auvaha ture a te Repubilita teie.”
Aita o Margarete i aueue a tutui ai au i te mau parau atoa i te auahi. Ua haere atura vau ia Margarete ra e ua faaue atura vau ia ˈna ia iriti i te opani. Ua tomo taue maira te mau taata i roto i te fare.
“No te aha oe i horo ai?” o ta ratou ïa i ani mai.
Ua tae maira te tahi atu mau tia a te hau, e ua paheru ratou i te fare taatoa. Te haapeapea noa ra vau no te eˈa huna tei reira te vaiihoraahia ta matou matini neneiraa e e 40 000 api parau. Aita râ ratou i ite i te uputa huna. Noa ˈtu e ua uiuihia vau e rave rahi hora te maoro, ua tauturu Iehova ia ˈu ia tapea i to ˈu hau. Ua haafatata ˈtu â teie ohipa ia matou i to matou Metua here i te raˈi e ua faaitoito atoa ia matou ia faaoromai.
Ua mau matou i te auri, e feia tiamâ râ matou
I te hopea o te mau matahiti 1960, ua titauhia ˈtura vau i ta ˈu tau faehau. I te mea e eita e tia ia ˈu ia tavini i te nuu, ua tapeahia ˈtura vau e hitu avaˈe i te fare auri e i roto i te hoê aua raveraa ohipa. E 15 Ite i roto i te aua no Cottbus, i te pae apatoa hitia o te râ no Berlin. Ua mau matou paatoa i reira no to matou tiaraa amui ore kerisetiano. (Isaia 2:2-4; Ioane 17:16) Mea roa ta matou mahana raveraa ohipa e mea teimaha atoa te ohipa. E tia matou i nia i te hora 4 mairi i te 15 minuti i te aahiata e e afaihia matou i rapae i te aua no te rave i te ohipa i nia i te mau eˈa pereoo auahi. Tera râ, i te tau a mau ai matou i te auri, ua noaa ia matou te mau ravea no te faaite i te Basileia o te Atua ia vetahi ê.
Ei hiˈoraa, e piti taata hiˈohiˈo o tei tapeahia e o matou i Cottbus. I te hoê mahana, ua faaroo vau e te hinaaro ra te taata apî aˈe i roto ia raua e paraparau ia ˈu. Eaha râ ta ˈna e hinaaro ra. Ua faaite maira oia i te hohonuraa o to ˈna aau. Ua riro to ˈna mama ruau ei vahine hiˈohiˈo, e ua noaa atoa mai ia ˈna i teie mana i muri aˈe i to ˈna taioraa i ta ˈna mau buka. Noa ˈtu e te hinaaro ra teie taata e tiamâ mai i te mau mana e faatîtî ra ia ˈna, te mehameha ra oia i te mau faainoraa. Ua taˈi noa na oia. No te aha râ oia i haere mai ai e farerei ia ˈu?
I roto i ta mâua aparauraa, ua faataa maira oia e ua paruparu to ˈna mana no te tohu i te ohipa e tupu a muri aˈe ia piri anaˈe oia i te mau Ite no Iehova. Ua faataa ˈtura vau ia ˈna e te vai ra te mau varua iino, oia hoi te mau demoni, e te mau varua maitatai, oia hoi te mau melahi parau-tia. Ma te faaohipa i te hiˈoraa o te feia i riro mai ei kerisetiano i Ephesia tahito ra, ua faaite atura vau ia ˈna i te faufaaraa ia haapae i te mau taoˈa atoa i taaihia i te ohipa hiˈohiˈo aore ra te tahi atu mau peu tahutahu. (Ohipa 19:17-20) “I muri iho, e haere oe e farerei i te mau Ite,” o ta ˈu ïa i parau atu ia ˈna. “Te vai ra te mau Ite i te mau vahi atoa.”
Ua faarue mai te taurearea i te aua tau mahana i muri iho, e aita vau i faaroo faahou i to ˈna parau. Teie râ, ua faahohonu roa ˈtu â te hiˈoraa o taua taata mehameha e te peapea o tei imi i te tiamâraa, i to ˈu here ia Iehova. Ua tapeahia matou, e mau 15 Ite, i roto i teie aua no to matou faaroo, teie râ, e feia tiamâ matou i te pae varua. Ua tiamâ taua taurearea ra i te fare tapearaa, tera râ, te riro noa râ oia ei tîtî no te hoê “atua” o te haamǎtaˈu ra ia ˈna. (Korinetia 2, 4:4) E tia mau â ia tatou te mau Ite ia poihere i to tatou tiamâraa!
Ua tamatahia ta mâua mau tamarii
E ere noa matou te mau taata paari tei titauhia ia tapea i to matou tiaturiraa bibilia, te mau taurearea atoa râ. Ua faahepo-puai-hia ratou ia ofati i to ratou faaroo i te fare haapiiraa e i te vahi raveraa ohipa. Ua titauhia ta mâua e maha tamarii atoa ia tapea i ta ratou mau tiaturiraa.
E faatupuhia na te hoê oroa aroharaa i te reva i te fare haapiiraa i te mau monire atoa. E haere te mau tamarii na roto i te aua, e himene ratou i te tahi himene, e e rave ratou i te aroha Thälmann ia hutihia te reva. Teie taata o Ernst Thälmann, e taata communiste helemani ïa oia o tei haapohehia e te mau SS Nazi i te matahiti 1944. I muri aˈe i te piti o te tamaˈi rahi, ua riro maira o Thälmann ei aito i Helemani Hitia o te râ. No to matou tiaturiraa niuhia i nia i te Bibilia e e tia ia faataehia te taviniraa moˈa i te Atua anaˈe ra o Iehova, ua haapii atu mâua ta ˈu vahine i ta mâua mau tamarii ia tia i nia ma te faatura i taua mau oroa ra, eiaha râ e amui atu.
E haapii-atoa-hia na te mau tamarii i te mau himene communiste. Ua haere atu mâua o Margarete i te fare haapiiraa a ta matou mau tamarii e ua faataa ˈtura i te tumu eita ratou e himene i teie mau himene politita. Ua parau râ matou e e farii ratou i te haapii i te mau himene ê atu. No reira, mai to ratou nainairaa mai â, ua haapii ta mâua mau tamarii ia tapea i to ratou faaroo e ia faataa ê mai ia ratou i to ratou mau hoa.
I te pae hopea o te mau matahiti 1970, ua hinaaro aˈera ta mâua tamahine matahiapo e rave i te tahi toroa haapii i roto i te hoê piha ohipa. Teie râ, e tia na mua i te feia haapii tataitahi ia rave e 14 mahana faaineineraa faehau. I te mea e eita te haava manaˈo o Renate e faatia ia ˈna ia amui atu i roto i teie faaineineraa, ua rave aˈera oia i te hoê tiaraa aueue ore, e ua haapaehia ˈtura oia i te titauraa ia haere atu i taua faaineineraa ra.
I te tau a haapii ai oia i ta ˈna toroa, ua haere atu o Renate i te hoê pǔpǔ i reira to ˈna titauraahia ia haere i te hoê haapiiraa pupuhi. “E haere atoa mai oe e Renate i te pǔpǔ haapiiraa pupuhi,” o ta te orometua haapii ïa i parau. Aita oia i tâuˈa ˈtu i ta ˈna mau patoiraa. “Eita oe e pupuhi,” o ta ˈna ïa i tǎpǔ atu. “Na oe râ e haapao i te mau inuinuraa.”
I taua po ra, ua paraparau matou i roto i te utuafare. Ua manaˈo mâua e eita e tia ia haere atu o Renate i taua vahi pupuhiraa ra, noa ˈtu e aita o ˈna i rave roa ˈtu i teie ohipa. Ma te faaitoitohia na roto i ta matou aparauraa e na roto i te pure, aita o ˈna i mǎtaˈu faahou. Auê ïa faaitoitoraa no mâua i te iteraa ˈtu i ta mâua tamahine iti i te tururaa ˈtu i te mau faaueraa tumu tia!
Ua rahi atu ta matou pororaa i mua i te taata
I te mǎrûraa mai te patoiraa i ta matou ohipa i te hopea o te mau matahiti 1970, ua hopoihia maira te mau pueraa buka kerisetiano rahi na te pae Tooa o te râ mai. Noa ˈtu e e ohipa atâta te reira, ua farii te mau taeae itoito i te horoa i ta ratou tauturu. Ua mauruuru roa matou i teie mau rahiraa buka e te mau tutavaraa a te feia i manuïa ˈi teie ohipa. I te tau a uˈana ˈi te hamaniino-raa i te mau matahiti matamua o te opaniraa, ua riro mau â te pororaa na te mau fare ei ohipa atâta. Inaha, ua turai te mǎtaˈu i te faautuaraa i te tahi pae ia faaea i te poro. I muri aˈe râ, ua rahi roa ˈtu â ta matou ohipa pororaa. I te mau matahiti 1960, fatata e 25 % anaˈe o te feia poro o te Basileia o tei apiti tamau i te taviniraa na te mau fare. Teie râ, ua maraa te numera o te feia e apiti tamau ra i roto i teie tuhaa o te taviniraa i nia i te 66 % i te hopea o te mau matahiti 1980! Mai reira mai, aita ˈtura te mau mana toroa i haapao rahi roa i ta matou ohipa pororaa.
I te hoê taime, ua afai atoa mai te hoê taeae e poro ra na muri ia ˈu i ta ˈna tamahine. I to ˈna iteraa ˈtu i teie tamahine, ua putapû roa te hoê vahine ruhiruhia o ta matou e paraparau ra e ua titau aˈera oia ia matou ia tomo i roto i to ˈna ra fare. Ua oaoa roa oia i ta matou faataaraa no nia i te mau Papai e ua farii aˈera ia hoˈi faahou mai matou. Ua hoˈi atu vau na muri i ta ˈu vahine, e ua haamata oia i reira iho i te hoê haapiiraa bibilia e taua vahine ra. Noa ˈtu to ˈna paari e to ˈna paruparu, ua riro mai teie vahine ei tuahine no tatou e te faaitoito noa ra oia i roto i te taviniraa a Iehova.
Te mau tauiraa a fatata mai ai te tiamâraa
Ua faaineine Iehova ia matou no te tau i reira matou e fanaˈo ai i te tiamâraa rahi aˈe. Ei hiˈoraa: Na mua noa ˈˈe e iritihia ˈi te opaniraa, ua faaarahia matou ia taui i ta matou huru piiraa te tahi e te tahi i te mau putuputuraa. No te tahi mau tumu i te pae parururaa, ua titauhia hoi matou ia pii i te tahi e te tahi na nia i to matou iˈoa topa. Ua matau ïa te rahiraa ia vetahi ê e rave rahi matahiti te maoro, aita râ hoi ratou i ite i te paeraa o te hoê hoa faaroo. No te faaineine ia matou ia farii e rave rahi atu â mau taata anaanatae i ta matou mau putuputuraa, ua faaitoitohia matou ia pii ia matou na nia i to matou paeraa. Ua manaˈo vetahi e mea huru ê roa, teie râ, te feia o tei pee i teie faaueraa, mea ohie aˈe ïa na ratou ia faaau i te taime a noaa mai ai te tiamâraa.
Ua faaitoito-atoa-hia matou ia haamata i te mau putuputuraa na roto i te hoê himene. Mea na reira ïa matou e haamatau ai i te huru raveraa a te mau amuiraa i te tahi atu mau vahi. Ua taui-atoa-hia te rahiraa taata i roto i te mau pǔpǔ haapiiraa. Ua maraa tamau noa mai te 4 taata i te mau matahiti 1950 e tae atu i te 8. I muri iho, ua maraa atu i nia i te 10 e i te pae hopea, ua naeahia e 12. Oia atoa, ua hiˈopoahia te mau ohipa no te faataa ahiri e ua tano maitai te vahi putuputuraa a te mau amuiraa tataitahi no te rahiraa o te mau Ite.
I te tahi mau taime, ua ite matou i te paari o te hoê faaueraa i muri aˈe i te faaohiparaahia. Mea pinepine to Iehova faaiteraa i to ˈna tiaraa Metua paari e te hamani maitai! Ua aratai mǎrû noa oia ia matou i nia i te hoê â faito e te toea o ta ˈna faanahonahoraa i nia i te fenua, e ua ite matou e tei rotopu matou i te autaeaeraa o to ˈna nunaa na te ao atoa nei. Oia mau, ua paruru mau â te Atua ra o Iehova i to ˈna nunaa i roto fatata e 40 matahiti to ratou raveraa i te ohipa i te tau opaniraa i Helemani Hitia o te râ. Te oaoa nei matou i te mea e ua faatiamâhia matou i mua i te ture!
I teie mahana, ua hau atu paha i te 22 000 Ite no Iehova i te fenua tei parauhia na mua ˈˈe Helemani Hitia o te râ. Ua riro ratou ei haapapuraa no te aratairaa paari e te here o te Atua ra o Iehova. Te faaite ra to ˈna turu i roto i te mau matahiti opaniraa e e nehenehe ta ˈna e arai i te mau huru tupuraa atoa. Noa ˈtu eaha te mauhaa e faaohipahia i nia i to ˈna nunaa, eita roa ˈtu e manuïa. E haapao noa iho â Iehova i te feia o te tiaturi ia ˈna. (Isaia 54:17; Ieremia 17:7, 8)—Faataahia e Horst Schleussner.
[Hohoˈa i te api 31]
O Horst e o Margarete Schleussner i te Taiete i Berlin Hitia o te râ