Te hoê porotarama paturaa i muri aˈe i te hoê auahi

“AUAHI! Auahi! Te papaa ra te Piha Tairururaa a te mau Ite no Iehova i te auahi!” Ua paaina teie tuô peapea i te avatea o te hoê mahana pae no te avaˈe atopa 1989 i Heerenveen, te hoê oire no te pae apatoerau o te fenua Holane.

E 11 matahiti to te mau Ite no Iehova faaohiparaa i teie Piha Tairururaa nahonaho maitai. Fatata i te mau hopea hebedoma atoa, e mau hanere taata o te putuputu mai i reira no te hoê tairururaa haaati e piti mahana aore ra no te hoê mahana tairururaa taa ê. Ua riro oia ei vahi haapiiraa bibilia au maitai.

Ua tupu te fifi i te taime a ravehia ˈi te tahi tataˈiraa i nia i te tapoˈi fare. Tau minuti i muri iho, ua faariro teie fifi i te piha ei toetoea fare paapaa. Auaa râ, aita hoê taata i pepe.

Ua haapeapea teie ati i te mau Ite aita râ ratou i haaparuru, e ua hamani ihora ratou i te mau hohoˈa no te patu i te hoê piha apî i te tahi atu vahi. Ua ite maira ratou i te hoê vahi nahonaho maitai i Swifterbant, i te mataeinaa no Flevoland. E vahi vari rahi teie tei haamǎrôhia i te fenua tei parauhia Zuider Zee na mua ˈˈe, e 5 metera i raro mai i te faito o te miti.

I te avaˈe tenuare 1991, ua faaotohia te tapao no te haamata i te paturaa o te hoê Piha Tairururaa apî. E patuhia i rotopu te mau avaˈe me e setepa 1991. E mau hanere rahiraa Ite o tei haere mai e tauturu i te vahi paturaa fare, e ua riro teie opuaraa ei tapao faufaa roa no te tahi mau taurearea i roto i te taviniraa i te Atua ra o Iehova ma te taime taatoa. E mau ahuru rahiraa feia rave ohipa o tei haere mai na Beletita e na te fenua Beretane mai.

Ua patuhia ˈtura te hoê fare hohoˈa nehenehe roa. Ua faataa-ê-hia te piha oreroraa e te vahi tamaaraa e te hoê eˈa tapoˈihia i te hiˈo. E 1 008 parahiraa i roto i te piha rahi, e e 230 taata o te nehenehe e mataitai i te porotarama na roto i te afata teata i roto i te hoê piha tapiri mai.

I teie mahana, e rave rahi tausani feia o te parau nei: ‘E haere mai, e haere tatou i nia i te mouˈa o Iehova, e na ˈna e haapii mai i ta ˈna mau haerea.’ (Isaia 2:2, 3) Ua riro noa hoi teie Piha Tairururaa apî ei hoê o te mau vahi huru rau i reira e horoahia ˈi teie haapiiraa i te pae varua. Te vai atoa ra te Piha o te Basileia a te mau Ite no Iehova no to outou vahi. E farii-popou-hia outou i reira.