Ua haapao Iehova ia matou i te tau opaniraa—Tuhaa 2
I ROTO i te Piti o te Tamaˈi Rahi, ua papaihia i nia i te tamau hatua o to ˈu ahu faehau Nazi i te parau ra “Tei ia tatou ra te Atua.” Ua riro hoi te reira ei tapao haapapuraa no te faaôraa ˈtu te mau ekalesia i roto i te tamaˈi e te haamaniiraa toto. Ua faufau-roa-hia vau. No reira, i te taime a paraparau mai ai e piti Ite no Iehova ia ˈu i Limbach-Oberfrohna, i Helemani Hitia o te râ, ua riri roa vau i te haapaoraa e ua riro mai au ei taata tiaturi ore i te Atua e ei taata tiaturi e mea tupu noa mai te mau mea.
“Eiaha orua e manaˈo e e riro mai au ei kerisetiano,” o ta ˈu ïa i parau atu i na Ite o tei haere mai. Teie râ, ua haapapu mai ta raua mau parau e te vai ra te hoê Atua. No to ˈu hinaaro e ite, ua hoo maira vau i te hoê Bibilia e i muri aˈe, ua haamata ˈtura vau i te haapii i te Bibilia na muri ia raua. Ua tupu te reira i te tau uaaraa tiare o te matahiti 1953, ua opani-ê-na-hia te mau ohipa a te mau Ite i Helemani Hitia o te râ e te mau Communistes a toru atura matahiti.
Te faataa ra Te Pare Tiairaa o te 15 no atete 1953 i te huru o te mau Ite no Iehova i taua tau ra, i te na ôraa e: “Noa ˈtu e e hiˈopoahia e e haamǎtaˈu-tamau-hia ratou, noa ˈtu eita ta ratou e nehenehe e farerei te tahi e te tahi ma te ore e hiˈopoa na mua ahiri e aita ratou e apeehia ra, noa ˈtu e ia noaahia ratou e te tahi buka a te Taiete Watchtower e nehenehe ratou e mau e piti aore ra e toru matahiti i roto i te fare tapearaa no te mea ‘ua opere ratou i te mau buka faahuehue,’ e noa ˈtu e ua tapeahia te mau hanere taeae paari roa ˈˈe, te feia o tei rave i te upoo, i roto i te fare auri, te tamau noa nei te mau tavini a Iehova i Helemani Hitia o te râ i te poro.”
I te matahiti 1955 ua haere atu mâua ta ˈu vahine o Regina i te tairururaa no te mau fenua atoa a te mau Ite no Iehova i Nuremberg, Helemani Tooa o te râ, e i te matahiti i muri iho, ua bapetizohia mâua i Berlin Tooa o te râ. Ua tupu iho â ïa te reira na mua ˈˈe i te faatiaraahia te Patu no Berlin i te matahiti 1961, ma te faataa ê ia Helemani Hitia o te râ e o Helemani Tooa o te râ. Teie râ, na mua ˈˈe i to ˈu bapetizoraahia, ua tamatahia to ˈu taiva ore i te Atua ra o Iehova.
Te fariiraa i te hopoia
Ua titau te amuiraa a te mau Ite no Iehova o ta mâua i tahoê atu i Limbach-Oberfrohna i te tahi taata no te haere e tii i te mau buka bibilia i Berlin Tooa o te râ. E ohipa tapihooraa iti ta mâua e e piti tamarii ta mâua, teie râ, ua riro ê na te taviniraa a Iehova ei pu no to matou oraraa. Ua taui matou i te huru o to matou pereoo tahito, ia nehenehe matou e huna e 60 buka. E ohipa atâta roa ia riro ei vea, teie râ, ua haapii mai te reira ia ˈu ia tiaturi ia Iehova.
E ere i te mea ohie ia haere atu na nia i te pereoo uira mai Berlin Hitia o te râ mai e tae atu i te pae Tooa o te râ, e mea pinepine to ˈu anianiraa e mea nafea to matou manuïaraa. Ia tapae anaˈe matou i roto i te tuhaa tiamâ, e rave mai matou i te mau buka e e huna ˈtu matou i roto i te pereoo hou e haere faahou atu ai na roto i te otia no te hoˈi atu i Helemani Hitia o te râ.
I te hoê taime, no oti noa ˈtura matou i te faatapuni i te mau buka a haere mai ai te hoê taata ê na roto mai i te hoê fare. Ua tuô maira o ˈna: “E mea ma.” Ua mau taue noa ˈtura to ˈu mafatu. Ua hiˈopoa mai anei oia ia matou? “Mea maitai aˈe ia haere outou i te tahi atu vahi i te taime i mua nei. E tapea te mau pereoo radio a te mau mutoi helemani Hitia o te râ i tera poro aroâ, e e nehenehe outou e noaa.” Topa roa ˈˈera to ˈu hau. Ua haere atu matou na roto i te otia ma te peapea ore, e ua himene matou toomaha atoa ra i to matou hoˈiraa ˈtu i te fare.
Faaineineraa no te faataa-ê-raa
I te mau matahiti 1950, ua tiaturi te mau taeae no Helemani Hitia o te râ i te mau taeae no te pae Tooa o te râ ia noaa mai te mau buka e te aratairaa. Teie râ, i te matahiti 1960, ua ravehia te tahi mau tauiraa no te tauturu i te Ite tataitahi i Helemani Hitia o te râ ia tahoê maite e te mau Ite o te vahi o ta ˈna e ora ra. I muri aˈe, i te avaˈe tiunu 1961, ua faatupuhia ˈtura te pǔpǔ matamua a te Haapiiraa no te Taviniraa o te Basileia i Berlin. Ua haere atu vau i teie haapiiraa matamua e maha hebedoma. E ono hebedoma i muri iho, ua tâpû-ê-hia ˈtura matou i te pae Tooa o te râ i te taime a faatiahia ˈi te Patu no Berlin. Aita noa ta matou ohipa i rave-huna-hia, o matou anaˈe râ i to matou pae.
Ua mǎtaˈu vetahi e ia iti roa te ohipa a te mau Ite no Iehova i Helemani Hitia o te râ e a mau roa ˈtu ai. Teie râ, na roto i te mau tauiraa i te pae no te faanahonahoraa i ravehia aita i naeahia i te hoê matahiti na mua ˈtu, ua tauturuhia matou ia tapea i te autahoêraa e te puai i te pae varua. Hau atu, ua faaineine te haapiiraa i noaa mai e te mau matahiapo o tei tae atu i te piha haapiiraa matamua a te Haapiiraa no te taviniraa o te Basileia, ia ratou ia horoa atoa ˈtu i teie haapiiraa i te tahi atu mau matahiapo. No reira, ua faaineine Iehova ia matou no te taime e faataa-ê-hia ˈi matou, mai ta ˈna i faaineine ia matou no te opaniraa i te matahiti 1950 na roto i te mau tairururaa mataeinaa o te matahiti 1949.
I te mea e ua tâpû-ê-hia matou i te pae Tooa o te râ, mea maramarama maitai ïa e e tia ia matou ia imi i te ravea no te faahaere i te faanahonahoraa i mua. Ua papai atu matou i to matou taeae kerisetiano i Berlin Tooa o te râ e ua ani atu matou e ia farerei matou i nia i te hoê purumu rahi i te pae Hitia o te râ o te nehenehe e terehia e te mau ratere na te pae Tooa o te râ mai. Ua rave matou mai te mea e ua ino to matou pereoo i te vahi i faataahia. Tau minuti i muri iho, ua tae mai te mau taeae ma te afai mai i te mau buka bibilia. Ma te oaoa, ua afai atoa mai ratou i ta ˈu buka o te Haapiiraa no te Tavinira o te Basileia, oia hoi te mau nota o ta ˈu i papai, e te Bibilia o ta ˈu i vaiiho atu i Berlin ia ore au ia roohia i te fifi. Ua oaoa roa vau i te noaa-faahou-raa mai teie mau buka! Aita hoi au i feruri i reira e e titau rahi au i teie mau buka i roto i te mau matahiti i muri iho.
Te hoê haapiiraa rave-huna-hia
Tau mahana i muri aˈe, ua faauehia ˈtura matou e faanaho i te tahi mau pǔpǔ a te Haapiiraa no te Taviniraa o te Basileia i roto i te mau vahi atoa no Helemani Hitia o te râ. E maha orometua haapii tei nominohia, e o vau atoa nei. I to ˈu râ manaˈoraa, eita e maraa ia matou ia faaineine i teie rahiraa mau matahiapo inaha ua opanihia ta matou ohipa. No te huna i te ohipa o ta matou e rave ra, ua opua aˈera vau e faanaho i te mau pǔpǔ haapiiraa i roto i te tahi puhaparaa no te tau faafaaearaa.
E maha feia haapii i roto i te pǔpǔ tataitahi e o vau iho nei te orometua haapii, e te onoraa o te taeae, o tei riro ei taata tunu maa. Ua haere atoa mai te mau vahine e te mau tamarii. No reira, e naeahia ta matou pǔpǔ e 15 e tae atu i te 20 taata. Eita e nehenehe e haere atu i te hoê vahi puhaparaa matauhia e te taata, no reira ua imi aˈera to ˈu utuafare i te tahi atu vahi nahonaho maitai.
I te hoê taime, a haere ai matou na roto i te hoê oire iti, ua ite atura matou i te hoê purumu e aratai tia ˈtu i te hoê ururaau tei atea ê i te purumu rahi. E vahi tano roa teie, no reira, ua haere atura vau e farerei i te tavana oire. “Te imi nei matou i te hoê vahi no te faaea tau hebedoma e no te puhapa i reira e te tahi atu mau utuafare,” o ta ˈu ïa i faataa ˈtu. “Te hinaaro nei matou e faaea o matou anaˈe ia nehenehe te mau tamarii e hauti haere. E nehenehe anei matou e puhapa i roto i te ururaau i pihai iho mai?” Ua farii oia, e ua faanaho ihora matou i te mau ohipa.
I taua vahi ra, ua faanaho matou i te mau fare ie e to ˈu pereoo nohoraa ia noaa mai te hoê vahi i ropu o te ore e itehia mai na rapaeau mai. Ua faaohipa matou i te pereoo nohoraa ei piha haapiiraa na matou. Ua putuputu matou i reira e 8 hora haapiiraa tuutuu ore i te mahana i roto e 14 mahana. I roto i te vahi ropu ra, ua faanaho matou i te mau parahiraa e te hoê amuraa maa, mai te peu noa ˈtu e e haere mai te mau taata manaˈo-ore-hia. E ua haere mai iho â ratou! I taua mau taime ra, ua mauruuru roa matou i te tauturu i horoahia mai e to matou mau utuafare.
I te taime a faatere ai matou i te mau haapiiraa, na to matou mau utuafare e tiai i rapae. I te hoê taime, ua ite atu ratou i te tavana oire, e papai parau atoa hoi oia no te Pǔpǔ Communiste no taua vahi ra, i te haereraa mai i ta matou ururaau na nia i te purumu. Ua taumi te taata tiai i te hoê pitopito o tei taaihia na roto i te tahi niuniu uira i te tahi pu faaara i roto i te pereoo nohoraa. I reira iho, ua horo atura matou i rapae i te pereoo nohoraa e ua parahi ihora i nia i te mau parahiraa o tei faanaho-ê-na-hia na te hiti i te amuraa maa e ua haamata ˈtura matou i te hauti pere. Ua tuu-atoa-hia te hoê mohina ava schnapps ia au iho â i te hoê tupuraa mau. E tere auhoa to te tavana oire i rotopu ia matou nei e ua hoˈi atu o ˈna ma te ore roa ˈtu e manaˈo i te ohipa e tupu mau ra.
Ua faatupuhia te mau pǔpǔ Haapiiraa no te Taviniraa o te Basileia na roto i te fenua taatoa mai te tau uaaraa tiare o te matahiti 1962 e tae roa ˈtu i te hopea o te matahiti 1965. Ua faaineine te haapiiraa hohonu o tei horoahia i reira, e tae noa ˈtu te mau haamaramaramaraa no te faaruru i ta matou huru tupuraa taa ê i Helemani Hitia o te râ, i te mau matahiapo no te aratai i te ohipa pororaa. No te tae atu i taua mau tau haapiiraa ra, aita noa te mau matahiapo i haapae i ta ratou mau taime faafaaearaa, ua faaruru atoa râ ratou i te atâtaraa ia tapeahia ratou i te fare auri.
Te mau haamaitairaa o te haapiiraa
Te hiˈopoa maite ra te mau tia mana i ta matou mau ohipa, e i te hopea o te matahiti 1965, i muri aˈe to te rahiraa o te mau matahiapo fanaˈoraa i te haapiiraa, ua tamata ratou i te tapea i te ohipa a te faanahonahoraa. Ua haru ratou e 15 Ite o tei faarirohia ei feia aratai i te ohipa. Ua faaineine maitai ratou i ta ratou ohipa, ma te parare na roto i te fenua taatoa. I reirâ, e rave rahi o tei manaˈo e e mou roa te ohipa a te mau Ite. Teie râ, na roto i te tauturu a Iehova, ua faaruru matou i teie huru tupuraa e ua tamau noa matou i te ohipa mai te matamua ra.
Te mea i tauturu rahi mai ia matou, o te faaineineraa ïa ta te mau matahiapo i fanaˈo i te Haapiiraa no te Taviniraa o te Basileia e te tiaturi hohonu o tei haapaarihia na roto i te autahoêraa o ta matou i fanaˈo i roto i teie mau pǔpǔ haapiiraa. No reira, ua faaite te faanahonahoraa i to ˈna puai. Ua itehia te faufaaraa o to matou pee-maite-raa i te mau faaueraa a te faanahonahoraa!—Isaia 48:17.
Ua papuhia ˈtura i roto i te mau avaˈe i muri iho e aita te haavîraa puai a te mau tia mana a te hau i faaotohe noa ˈˈe i ta matou ohipa. Tau taime i muri aˈe, ua oti atura ta matou mau pǔpǔ faaineineraa a te Haapiiraa no te Taviniraa o te Basileia. I to te feia mana toroa iteraa i to matou itoito, ua faahepohia ˈtura ratou ia taui i ta ratou mau huru raveraa. Auê ïa upootiaraa no Iehova e!
Te itoito i roto i te taviniraa
I taua tau ra, e pae noa paha taata i roto i te mau pǔpǔ haapiiraa buka o ta matou amuiraa. E noaa mai ta matou mau buka bibilia na roto i te arai o teie mau pǔpǔ haapiiraa buka, e ua faanahohia te ohipa pororaa na roto i teie mau pǔpǔ haapii iti. Mai te omuaraa mai â, ua haamaitai Iehova ia mâua Regina na roto i te mau rahiraa taata o tei hinaaro e haapii i te Bibilia.
Ua faatanohia te taviniraa na te mau fare no te paruru ia matou ia ore matou ia itehia aore ra ia tapeahia. E haere atu matou i te hoê fare, e e ouˈa ˈtu matou i te tahi mau fare hou e patoto atu ai i te tahi atu opani. I te hoê fare, ua titau maira te hoê vahine ia mâua Regina ia tomo mai. Te tauaparau ra matou no nia i te hoê tumu parau bibilia a haere mai ai ta ˈna tamaiti i roto i te piha. Aita o ˈna i huna i ta ˈna parau.
“Ua ite ê na anei orua i te Atua?” o ta ˈna ïa i ani mai. “Ua ite orua, e tiaturi noa vau i te ohipa o ta ˈu e ite mata. Area te toea ra, aita ïa e faufaa.”
“Aita vau e tiaturi ra i ta oe parau,” o ta ˈu ïa i pahono atu. “Ua ite ê na anei oe i to oe roro? Te faaite ra te mau ohipa atoa o ta oe e rave ra e e roro to oe.”
Ua faataa ˈtu mâua o Regina i te mau hiˈoraa no nia i te tahi atu mau ohipa o ta tatou e tiaturi nei noa ˈtu e aita tatou e ite ra, mai te uira ra te huru. Ua faaroo maira taua taurearea ra, e ua haamata ˈtura mâua i te hoê haapiiraa bibilia na muri ia ˈna e to ˈna metua vahine. Ua riro mai raua toopiti atoa ei mau Ite no Iehova. Inaha, e 14 taata o ta mâua i haapii o tei riro mai ei Ite. Te afaraa, ua farerei ïa mâua na roto i te mau tere na te mau fare, e te tahi afaraa, ua farerei ïa mâua no te taime matamua na roto i te pororaa i te taime faanaho-ore-hia.
Ia arataihia te hoê haapiiraa bibilia i te fare o te taata ma te tamau e ia manaˈo matou e e nehenehe teie taata e tiaturihia, e titau atu matou ia ˈna i ta matou mau putuputuraa. Teie râ te mea matamua o ta matou e hiˈopoa, ahiri e mea atâta anei taua taata haapii ra no te paruru-maitai-raa o te nunaa o te Atua. I te tahi mau taime, e tiai ïa matou i te area e hoê matahiti hou matou e titau ai i te hoê taata haapii bibilia ia haere mai i te hoê putuputuraa, e i te tahi taime e tiai maoro atu â matou. Te haamanaˈo ra vau i te hoê taata o tei fanaˈo i te tahi tiaraa teitei; ua matau maitai oia i te mau tia mana i roto i te Pǔpǔ Communiste. E iva matahiti to ˈna haapiiraa i te Bibilia hou oia e faatiahia ˈi ia haere mai i te mau putuputuraa! I teie mahana, ua riro teie taata ei taeae kerisetiano.
Ua tapapa noa te feia mana toroa ia matou
I muri aˈe i te matahiti 1965, aita matou i tapea-faahou-hia, aita atoa râ matou i vaiiho-noa-hia. Ua tamau noa te feia mana toroa i te hiˈopoa maite ia matou. I taua tau ra, e tuhaa rahi ta ˈu i roto i te tereraa o ta matou faanahonahoraa, no reira, ua hiˈopoa taa ê mai te mau tia mana ia ˈu. E rave rahi taime to ratou tapearaa ia ˈu no te aniani ia ˈu, ma te faahoro atu ia ˈu i te fare a te mau mutoi e ma te uiui mai ia ˈu. Teie hoi ta ratou e parau ia ˈu: “Eita oe e ora faahou. E mau oe i te auri.” Teie râ, i te pae hopea, ua tuu iho â ratou ia ˈu.
I te matahiti 1972, ua haere mai e piti tia mana e farerei ia ˈu e ma te ore e tâua, ua faahiti raua i te tahi parau haapopou i ta tatou faanahonahoraa. Ua faaroo raua i te haapiiraa Pare Tiairaa o ta matou amuiraa. “Mea faaino roa teie tumu parau,” o ta raua ïa i patoi mai. Te haapeapea ra hoi raua i ta vetahi pae e manaˈo no nia i te huru feruriraa Communiste ahiri e e taio ratou i te tumu parau e tuatapapahia ra. Ua na ô maira raua: “Inaha, te neneihia ra Te Pare Tiairaa na roto e pae aore ra e ono mirioni vea, e te taiohia ra i roto i te mau fenua ona. E ere ïa i te tahi vea faufaa iti haihai.” Ua manaˈo atura vau, ‘Ua tano roa oe!’
I te matahiti 1972, e 22 atura matahiti te opaniraahia ta matou ohipa, e ua aratai noa Iehova ia matou ma te here e te paari. Ua pee matou i ta ˈna mau faaueraa ma te ara maite, teie râ e tia ia tiai faahou â tau 18 matahiti hou te mau Ite i Helemani Hitia o te râ e tiamâ ˈi i mua i te ture. Ua mauruuru roa matou i te mau tiamâraa faahiahia mau ta matou e fanaˈo nei i teie nei no te haamori i to tatou Atua, o Iehova!—Faatiahia e Helmut Martin.