Ia faaohipa anaˈe i te faaroo no te ora mure ore
‘Ia noaa ia tatou i te faaroo, e ora ˈtu ai te varua.’ — HEBERA 10:39.
1. Eaha ta te hoê buka parau paari katolika e farii ra no nia i te auraa bibilia o te parau ra “nephe”?
AITA hoê aˈe mea i roto i te Bibilia e horoa ra i te manaˈo e e nephe pohe ore to te mau taata, o te ora faahou mai i te poheraa o te tino e o te tamau â i te ora e a muri noa ˈtu i roto i te mau ao varua. Te farii atoa ra te Buka parau paari Apî katolika (beretane) i te reira. Te taiohia ra e: “Aita e ite-maitai-hia ra te manaˈo o te oraraa o te nephe i muri aˈe i te pohe, i roto i te Bibilia. (...) I roto i te F[aufaa] T[ahito], e ere te nephe i te hoê tuhaa o te taata, o te taata taatoa râ, oia hoi te taata mai te hoê mea ora. Oia atoa, i roto i te F[aufaa] A[pî], o te ora taata te nephe, te ora o te taata iho.” No reira, aita to te taata e nephe; e nephe râ oia.
2. a) No hea mai te tiaturiraa i te hoê nephe pohe ore? b) Eaha te parau mau no nia i te huru o te taata i muri aˈe i te pohe?
2 Mai ta te tumu parau na mua ˈtu i haapapu mai, no roto mai te tiaturiraa i te hoê nephe pohe ore i te hoê manaˈo etene o tei haamata i te omuaraa o te aamu taata nei. O tei patoi i te faahitiraa maramarama a te Atua, oia hoi ‘e pohe’ te taata mai te peu e e faaroo ore o ˈna, te tumu (Genese 2:17). O te enemi ïa, te Diabolo ra o Satani, o tei parau e: “E ore roa orua e pohe.” (Genese 3:4). O te hoê haavare te reira (Ioane 8:44). I muri iho, ua faatupu aˈera o Satani e ua turu atura i te haapiiraa o te pohe-ore-raa o te nephe taata. Teie nei râ, te parau mau no nia i te huru o te taata i muri aˈe i te pohe, o ta tatou ïa e taio i roto i te Parau i faauruahia e te Atua, i roto i te Koheleta 9:5, e na ô ra e: ‘Aita a te feia i pohe ra e parau itea’. — Hiˈo Roma 5:12.
Te tiaturiraa no te ora mure ore
3. Eaha te tiaturiraa e faahiti-pinepine-hia ra i roto i te Bibilia?
3 Mai te peu e te haapapu maitai ra te Bibilia e mea hape te manaˈo o te hoê nephe pohe ore, te faahiti rahi nei oia i te parau no te ora mure ore. Ua riro te tiaturiraa no te oraraa aita e hopea ei haapiiraa matamua a Iesu. Ua faahiti oia e: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3). Ua haapapu oia no te feia o te tiaturi i te Atua e ia ˈna e: “E horoa ˈtu â hoi au i te ora mure ore no ratou.” (Ioane 10:28). Ma te hoê tiaturiraa papu, ua parau oia e: “O tei faaroo (...) e ora mure ore to ˈna. (...) e tia ïa i te oraraa.” (Ioane 6:47, 51). Te parau faahou ra oia e: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” — Ioane 3:16.
4. Eaha te tiaturiraa ta Iesu i horoa no a muri aˈe?
4 No te mea e aita e nephe pohe ore o te ora faahou i muri aˈe i te pohe, nafea ïa te parau tohu bibilia no nia i te ora mure ore e tupu ai? Ua horoa o Iesu i te tahi mau haapapuraa no nia i taua tumu parau ra a haere ai oia e farerei ia Mareta e ia Maria i muri aˈe i te poheraa o to raua taeae o Lazaro. Ua parau o ˈna ia Mareta e: “Tei ia ˈu te tia-faahou-raa e te ora, o te faaroo mai ia ˈu ra, pohe noâ oia e ora â ïa.” Ua ani atura oia ia Mareta e: “Ua faaroo oe i te reira?” “E te Fatu, e, ta ˈna ïa i pahono atu, ua faaroo vau e o oe te Mesia te Tamaiti a te Atua.” — Ioane 11:25-27.
5, 6. Eaha ta Iesu i faaite na roto i te faaoraraa ia Lazaro?
5 No te horoa i te haapapuraa e e tei ia ˈna ra, te Tamaiti a te Atua, te mana no te faaora faahou mai te feia pohe, ua haere atura Iesu i te menema o Lazaro. Ua pohe o ˈna a maha mahana i teie nei, e ua haamata to ˈna tino i te ino. Noa ˈtu â, “ua faateitei aˈera [o Iesu] i tana reo, ua pii atura, E Lazaro, a haere mai i rapae. Ua haere maira taua taata i pohe ra i rapae, ua taamuhia na rima e na avae, i vehîhia hoi te mata i te ahu: ua parau atura Iesu ia ratou, A tatara, e tuu atu ia ˈna ia haere na.” (Ioane 11:43, 44.) Ua faahoˈihia te ora i te taata pohe ra o Lazaro!
6 Aita o Lazaro i hoˈi mai mai te raˈi mai aore ra na te tahi atu vahi o te mau ao varua. I to ˈna poheraa, aita oia i haere i roto i taua ao varua ra, ua vai ohipa ore noa râ oia, i roto i te menema i reira te feia pohe atoa e vai ai (Salamo 146:4; Ioane 3:13; Ohipa 2:34). Mea maamaa mau i te manaˈo e ua ite te nephe pohe ore o Lazaro i te oraraa maitai i nia i te raˈi e ua iritihia oia mai te raˈi mai no te tahoê faahou ia ˈna i to ˈna tino tia ore i nia i te fenua nei e no te ora faahou i roto i te hoê ao tei faateimahahia e te mauiui, te maˈi e te pohe. I te mea râ e aita oia i haere i nia i te raˈi, ua oaoa roa o Lazaro no to ˈna tia-faahou-raa mai, no te mea ua nehenehe o ˈna e haamaoro â i to ˈna oraraa e e ite faahou i te feia ta ˈna e here ra. I muri iho, ua pohe faahou oia.
7, 8. a) O vai te tahi atu mau taata ta Iesu i faatia mai? b) No te aha Iesu i faatupu ai i taua mau semeio ra?
7 A faatia faahou ai o Iesu i te hoê potii apî, ua “maere roa ˈtura” te mau metua o teie tamarii. (Mareko 5:42.) Tera râ, e pohe faahou â teie potii apî. A faaora faahou ai o Iesu i te tamaiti a te vahine ivi no Naina, “roohia paatoa ihora ratou i te mǎtaˈu, e haamaitai atura i te Atua”. (Luka 7:16.) Ua pohe atoa râ taua taurearea ra i muri iho. No nia i taua mau semeio ra, te parau ra te Titionare apî no te ao nei no nia i te tuatapaparaa i te parau faaroo o te Faufaa Apî (beretane) e: “Ua pohe faahou te feia ta Iesu i faatia i roto i te roaraa o ta ˈna taviniraa i nia i te fenua nei, no te mea aita taua mau faatia-faahou-raa i horoa i te pohe-ore-raa.”
8 No te aha o Iesu i faatia ˈi i taua mau taata ra, mai te pohe mai? Eiaha no te horoa ˈtu i te ora mure no ratou i taua tau ra, no te haapapu râ e o o ˈna mau te Mesia e no te faaite i te mana ta te Atua i horoa na ˈna. Ua turai te reira i te tahi mau taata ia atuatu i te faaroo i roto i te tiaturiraa no te tia-faahou-raa e no te ora mure ore i raro aˈe i te faatereraa no a muri atu o te Basileia no te raˈi a te Atua, arataihia e te Mesia. — Mataio 6:9, 10; Ioane 11:41, 42.
9. Eaha te ite papu e vai ra ia Mareta e ia Paulo ra no nia i te haapiiraa a Iesu no nia i te tiaturiraa i te tia-faahou-raa?
9 Ua faaroo o Mareta ia Iesu i te faahitiraa i taua tiaturiraa ra, no te mea ua farerei pinepine raua. Ua parau aˈena oia ia ˈna no Lazaro e: “Ua ite au e, e tia faahou mai â oia ia tae i te tia-faahou-raa i te mahana hopea ra.” (Ioane 11:24). Ua ite o ˈna e e tupu te tia-faahou-raa, eiaha i to ˈna mahana hopea (to Lazaro), “i te mahana hopea” râ, oia hoi i te Mahana o te Haavaraa, ia faatia-faahou-anaˈe-hia te feia pohe i raro aˈe i te Basileia o te Atua. Ua ite atoa te aposetolo Paulo i te reira, no te mea ua parau o ˈna e: “Ua haapaohia e [te Atua] te mahana e haava mai ai oia i to te ao atoa nei ma te parau-tia.” (Ohipa 17:31). Te parau faahou ra oia e: “E tia-faahou-raa to tei pohe, te feia parau-tia e te feia parau-tia ore.” (Ohipa 24:15). Aita oia e haapapu ra e ua tupu aˈena te tia-faahou-raa, ‘e tupu râ te reira’ i mua nei, i raro aˈe i te Basileia.
10. Eaha ta te hoê orometua haapii farani i papai no nia i te tahi mau tiaturiraa o te amuiraa faroo kerisetiano ia au i te tia-faahou-raa, ia faaau-anaˈe-hia i te mau haapiiraa maramarama maitai a te Bibilia?
10 I roto i ta ˈna buka Pohe-ore-raa te nephe aore ra Tia-faahou-raa o te feia pohe? te papai nei te orometua porotetani farani ra o Oscar Cullmann, e: “Te vai ra te hoê taa-ê-raa rahi i rotopu i te tiairaa kerisetiano o te tia-faahou-raa o te feia pohe e te tiaturiraa heleni i te pohe-ore-raa te nephe. (...) Noa ˈtu e, i muri iho, ua haamau te kerisetianoraa no muri roa ˈˈe i te hoê taairaa i rotopu i na tiaturiraa e piti, e noa ˈtu e te arepurepu nei te manaˈo o te kerisetiano i teie mahana i taua nau tiaturiraa, aita matou e ite ra i te hoê tumu no te mamû no nia i te mea ta matou e farii nei ei parau mau. (...) [Te] arataihia nei te ora e te manaˈo atoa o te Faufaa Apî na te tiaturiraa i roto i te tia-faahou-raa. (...) E faahoˈihia mai te taata taatoa, o tei pohe iho â, i te ora na roto i te hoê ohipa poieteraa apî a te Atua.”
Te tia-faahou-raa — No te ora ihea?
11, 12. a) Eaha te opuaraa a te Atua no te mau taata e no te fenua? b) Mea nafea to Iesu faaiteraa e aita te opuaraa a te Atua no nia i te fenua i taui?
11 A poiete ai te Atua i te mau taata, ua horoa o ˈna i te fenua nei ei nohoraa mure ore no ratou e ua manaˈo o ˈna e faaî i taua palaneta ra i te mau taata tia (Genese 1:26-28; Salamo 115:16). Te faataa nei te Bibilia ia Iehova mai “tei rave i te fenua e na ˈna i hamani; e na ˈna hoi i haamau: aita râ oia i hamani ia vaiiho-taata-ore-noa-hia, ua hamani râ oia ia taatahia.” — Isaia 45:18.
12 Noa ˈtu e te mana nei te tiaraa o te hara e te pohe i nia i te fenua nei mai te tahi tau tausani matahiti — mai te orureraa hau a te taata mai â —, o te opuaraa noâ a te Atua ia riro te reira ei nohoraa mure ore na te taata. Oia mau, te taiohia nei e: “E parahi te feia parau-tia i nia i te fenua, e parahi tamau â ratou i reira.” (Salamo 37:29). “E ao to tei mǎrû; e riro hoi ia ratou te fenua.” (Mataio 5:5). No reira, a faaora faahou ai Iesu i te feia pohe, ua faatia oia ia ratou i ǒ nei iho, i nia i te fenua nei, e ua taa-maitai-hia ratou i taua taime ra e te mau taata. Te faaite maira ïa te reira e, i raro aˈe i te Basileia, e faaora-faahou-hia mai te feia pohe i nia i te fenua nei ia noaa ia ratou i te ravea no te ora e a muri noa ˈtu (Apokalupo 20:12, 13). Mea na reira te opuaraa a te Atua no te mau taata e no te fenua e tupu mai ai. — Isaia 46:9-11; 55:11; Tito 1:1, 2.
13. Ua opanihia te mau Ekalesia o te amuiraa faaroo kerisetiano i roto i teihea fifi, e te imi ra ratou ia haere mai i rapae na roto i teihea ravea?
13 Teie nei râ, no te mea e te tiaturi nei te mau Ekalesia no te amuiraa faaroo kerisetiano i te pohe-ore-raa o te nephe, tei mua ïa ratou i te hoê fifi: Nafea e nehenehe ai e tahoê i te faatia-faahou-raa o “te taata taatoa”, faatia-faahou-raa faatupuhia e Iesu, e ta ratou tiaturiraa i te hoê nephe pohe ore o tei haere aˈena i nia i te raˈi aore ra i roto i te po auahi? Te parau ra te Buka parau paari katolika e: “Ua faaoti te maharaa o te apooraa no Latran e ‘e tia faahou mai’ te mau taata atoa, tei maitihia aore ra tei faautuahia, ‘i roto i to ratou iho tino no teie nei’.” Te parau faahou ra oia e: “I te mea e e rave amui te tino i te ohipa e te mau ohipa ino a te nephe, e o te hoa o to ˈna mau huru maitai, mai te huru ra ïa e te ani ra te parau-tia a te Atua e ia roo-atoa-hia te tino i te hoê â utua aore ra i te hoê â haamaitairaa i ta te nephe.” Ia au i taua tiaturiraa ra, e tahoê-faahou-hia te tino i te nephe i nia i te raˈi aore ra i roto i te po auahi. E hia ïa roaraa taime? Te haapapu ra taua iho buka ra e “e horoahia te pohe-ore-raa i te mau tino tei faatiahia, a te feia moˈa e a te feia hara”.
14. Eaha ta te hoê jésuite i papai no te tamata i te haamaramarama i te manaˈo o te amuiraa faaroo kerisetiano no nia i te tia-faahou-raa o te tino?
14 I roto i ta ˈna buka ra Te oraraa no a muri aˈe (beretane), te papai nei te jésuite ra o J. Sasia e: “E riro ïa te oraraa i nia i te raˈi ei oraraa anaanatae mau atoa maoti te mau tumu ite tei haamaitaihia [o te tino tahoêhia i te nephe].” No te mau tino tei tahoêhia i to ratou nephe i roto i te po auahi, te haapapu ra oia e: “I roto i te po auahi, i muri aˈe i te faatia-faahou-raahia [o te tino], e roohia te mau tumu ite atoa o te tino taata i to ˈna faautuaraa taa ê. (...) E haamauiui taa-ê-hia te tumu ite o te tapearaa, no te mea e no te mau hara o te tino iho â râ te feia tei faautuahia, i faaino ai i te Atua. (...) Ua riro ïa to ratou tahoêraa e to ratou tino ei tumu no te mau haamauiuiraa e no te mau hamani-ino-raa hau atu â.”
15. No te aha ua riro ei parau faaino i te haapii atu e te haamauiui mure ore nei te Atua i te mau taata i roto i te po auahi?
15 No reira, ua aratai te fariiraa i te manaˈo etene no te pohe-ore-raa te nephe, i te amuiraa faaroo kerisetiano ia farii i te tahi atu â manaˈo etene: te haamuiuiraa ino mau e mure ore o te mau nephe, e o te mau tino atoa, i roto i te po auahi. Tera râ, no te peu tahito, oia hoi te tutuiraa i te mau tamarii ei tusia na te mau atua haavare, ua parau Iehova e: ‘Ua tutui ratou i ta ratou mau tamarii i te auahi ei tusia taauahi na Baala; i tei ore i faauehia e au ra, aore i parau noa aˈe, aore i tupu noa ˈˈe i to ˈu nei manaˈo.’ (Ieremia 19:5). O te hoê ïa parau faaino te haapiiraa e te haamauiui nei te Atua i te mau taata e a muri atu, i te mea e te faaite maitai maira ta ˈna iho Parau e e haamouhia te feia hara o te ore e tatarahapa, e faaore-roa-hia ratou. “Te taata atoa e ore e faaroo i taua peropheta ra [Iesu], e mou roa ïa.” — Ohipa 3:23; hiˈo Mataio 10:28; Luka 17:27; Ioane 3:16; Petero 2, 2:12; Iuda 5.
Pohe-ore-raa
16. Eaha ta te Bibilia e haapii ra no nia i te pohe-ore-raa?
16 Teie nei râ, aita anei te Bibilia e haapii ra e e haere te tahi mau taata i nia i te raˈi e e horoahia na ratou te pohe-ore-raa? Oia mau. Aita râ ta te reira e taairaa e te oraraa o te mau nephe taata pohe ore. E horoahia te pohe-ore-raa i te hoê taata no te mea e faatiahia oia ei poieteraa varua (mai ia Iesu), e ere râ no te mea e nephe pohe ore to ˈna o te ora ˈtu i muri aˈe i te poheraa. Ua pûpûhia te haamaitairaa o te pohe-ore-raa i te tahi mau taata haapao maitai, te tahi feia e pee ra i te huru o te Mesia, e e fanaˈo ratou i te reira i te taime noa e faaariihia ˈi oia i nia i te raˈi, e eiaha râ i muri aˈe i to ˈna hoˈiraa i nia i te raˈi, i te senekele I. — Salamo 110:1; Korinetia 1, 15:53, 54.
17. Ehia rahiraa taata e roaa ia ratou te pohe-ore-raa, e eaha to ratou tiaraa i roto i te opuaraa a te atua no te fenua nei?
17 I te tahi atu pae, ua pûpûhia taua tiaturiraa ra i te hoê tuhaa iti o te mau melo o te utuafare taata. Ua faaau amui Iesu ia ratou mai te hoê “nǎnǎ iti”. (Luka 12:32.) E faatiahia taua pǔpǔ iti taata, oia hoi te numera e 144 000, i nia i te raˈi, ei mau poieteraa i te pae varua pohe ore no te faatere i te fenua e te Mesia i roto i to ˈna Basileia i te raˈi (Petero 2, 3:13; Apokalupo 7:4; 14:1, 4; 20:4). I te pae hopea, e taatahia ïa te fenua nei ta ratou e faatere atu, i te feia tei faatiahia i te huru tia, o te riro hoi ei miria. No roto mai e rave rahi i rotopu ia ratou, i te feia o te hoˈi faahou mai i nia i te fenua a tupu ai te “tia-faahou-raa to tei pohe, te feia parau-tia e te feia parau-tia ore”. (Ohipa 24:15.) Tera râ, taa ê atu i taua feia tei faatiahia, e roaa atoa i te tahi atu mau taata te ora i roto i te ao apî. O vai ïa ratou?
‘E ore roa ˈtu ratou e pohe’
18. Hau atu i te faahiti i te parau no nia i te tiaturiraa i te tia-faahou-raa, eaha te ohipa maere mau ta Iesu i faaite?
18 Mai te peu e o te tia-faahou-raa te tiaturiraa papu no te feia pohe, te vai ra ïa te tahi atu â tiaturiraa faahiahia teie e pûpûhia nei i te mau taata e ora nei i to tatou nei tau. Ua faahiti Iesu i te reira i muri iho, i to ˈna paraparauraa e o Mareta. Oia mau, i muri aˈe i to ˈna parauraa e: “O te faaroo mai ia ˈu ra, pohe noâ oia e ora â ïa [maoti te tia-faahou-raa]”, ua parau faahou Iesu e: “e te taata ora atoa nei e faaroo ia ˈu ra, e ore roa ˈtu ïa e pohe.” (Ioane 11:25, 26). Na roto i taua mau parau ra, ua faaite oia i te hoê ohipa maere mau: E tae mai te hoê tau i reira te feia e ora ra, e ore roa ˈi e pohe! Eaha râ taua tau ra?
19. a) I teihea tau te tiaturiraa no te ore roa ˈtu e pohe faahou e tupu ai? b) Mea nafea to te Bibilia faaiteraa i te feia e tiaturi ra e e ore roa ratou e pohe?
19 I teie nei ïa, i to tatou nei tau, taua parau tǎpǔ ra e tupu ai. Te faaite nei te mau tupuraa e ua fatata roa te hopea o te ao ino (Mataio 24:3-14; Timoteo 2, 3:1-5, 13). No reira, te feia e atuatu ra i te faaroo i te Atua e i ta ˈna Tamaiti i teie mahana, e tiaturiraa faahiahia mau to ratou no te ora ˈtu i te hopea o te amuiraa o te mau mea nei e no te tomo atu, ma te ore e pohe, i roto i te ao apî tei tǎpǔhia e te Atua, oia, no te ore roa ˈtu e pohe! I roto i te Apokalupo 7:9, 14, te parauhia ra e te faatupu nei ratou i te hoê “feia rahi roa, e ore roa e pau ia taio, no te mau fenua atoa, e te mau opu atoa, e te mau nunaa atoa, e te mau reo atoa”, o tei “haere mai mai roto mai i te ati rahi ra”, e e paruruhia ratou e te Atua no to ratou faaroo. Ua faahiti Iesu i te parau no te hopea fatata roa o te amuiraa iino o te mau mea nei mai te hoê “ati rahi hoi (...), aitâ ïa ati mai te matamehai mai o teie nei ao, e tae roa aˈenei i teie nei mahana, e e ore roa hoi a muri atu”. — Mataio 24:21; hiˈo Maseli 2:21, 22; Salamo 37:10, 11, 34.
20, 21. I to tatou nei mahana, mea nafea to te tahi tau mirioni taata faaiteraa e te faaohipa nei ratou i te faaroo i te Atua e i te Mesia, e aita e faufaa no te rahiraa o ratou, i te aha?
20 I roto i te ao atoa nei, ua tiaturi aˈena te tahi tau mirioni melo o te feia rahi roa o te hinaaro ra e ora e a muri noa ˈtu i nia i te fenua nei, i roto i te mau parau tǎpǔ a te Atua e i roto i tei haamauhia no te riro mai ei ‘tia-faahou-raa e ei ora’, oia hoi o Iesu Mesia. Ua pûpû te taatoaraa ia ratou no te Atua, e ua faaite ratou i te reira ma te bapetizo atu i roto i te pape (Mataio 28:19, 20). Te farii nei ratou e e roaa to ratou ora na roto noa i to ratou ‘Atua tei parahi i nia iho i te terono ra, e te Arenio’, oia hoi o Iesu Mesia. — Apokalupo 7:10.
21 Aita ïa e faufaa no te mau melo o te feia rahi roa o te ora ˈtu i te hopea o te ao nei, i te tia-faahou-raa, no te mea ‘e ore â ratou e pohe’. E rave anei outou i te mea te tia ia rave no te ô atu i roto i taua pǔpǔ ra? Mai te peu e, e, te tiai maira ïa te hoê haamaitairaa faahiahia e otahi roa ia outou: te oraraa ˈtu ïa i te hopea o te amuiraa iino o te mau mea nei faaterehia e Satani e te ôraa ˈtu i roto i te hoê tau apî parau-tia o te hopoi mai na outou i te hoê oraora-maitai-raa tia roa e te ora mure ore i nia i te hoê fenua tei riro mai ei paradaiso (Luka 23:43; Apokalupo 21:4, 5)! Ma te haapii e eaha mau na te hinaaro o te Atua e ma te faatupu tamau i te reira, e nehenehe outou e faaite e eita outou ‘e orai tia i muri e pohe atu’. Oia, outou atoa, e nehenehe outou e ‘faaroo, e ora ˈtu ai te [nephe]’. — Hebera 10:39; Ioane 1, 2:15-17; Apokalupo 7:15.
Hiˈo-faahou-raa
◻ Eaha te tiaturiraa mau no te feia pohe?
◻ No te aha te tia-faahou-raa o te tino mai tei haapiihia ra e te amuiraa faaroo kerisetiano e riro ai ei faainoraa i te Atua?
◻ Eaha ta te Bibilia e haapii ra no nia i te pohe-ore-raa?
◻ Eaha te tiaturiraa maere mau ta tatou e nehenehe e atuatu i to tatou nei mau mahana?