E imi anaˈe na i te aravihi i pihai iho ia Iehova

“E haapii atu vau ia oe, e faaite au ia oe i ta oe eˈa ia haere ra.” — SALAMO 32:8.

1. A faaite mai na vetahi mau tumu e haapapu mai e te mau opuaraa ta tatou e rave, e mau opuaraa paari anaˈe ïa (hiˈo Deuteronomi 32:7, 29).

PAUROA te mahana, e tia ia tatou ia rave i te tahi mau opuaraa. E riro vetahi pae ei mau opuaraa haihai roa, area vetahi ra e mau opuaraa faufaa roa ïa. E mau opuaraa maitai anei ta tatou e rave? Tei ia tatou noa ïa inaha: te ru noa ra anei tatou i te faatupu i ta tatou opuaraa aore ra e feruri anei tatou hou tatou e parau ai e e faatupu ai i ta tatou opuaraa? I roto e rave rahi mau tuhaa, e tia ia tatou ia feruri hohonu i nia i te mau mea ia nehenehe ta tatou e rave i te mau opuaraa paari mau. Mea maitai atoa ia ite e eaha te faahopearaa o te mau ohipa e tupu nei i roto i te ao nei, e eaha atoa te ohipa e tupu ra i roto i te raˈi. E nehenehe anei tatou e tapae na roto i te tahi atu ravea taa ê aˈe i te faatupu-noa-raa i te mau aroraa?

2. Eaha te tauturu ta tatou e hinaaro ra no te aratai maitai i to tatou taahiraa avae, e no te aha (Maseli 20:24)?

² Te vai ra i roto i te taata nei i te huru faahiahia mau o te aravihi i te pae feruriraa, aita râ hoi i tuuhia mai i roto ia ratou i te aravihi no te aratai maitai i to ratou mau taahiraa avae ma te ore e farii i te tauturu a te Atua ma te haehaa. No reira te peropheta Ieremia i papai ai ma te faauruahia mai e te Atua e: “Ua ite hoi au, e Iehova, e ere tei te taata iho to ˈna haerea; e ere hoi tei taua taata e haere ra i te haapao i to ˈna taahiraa.” — Ieremia 10:23.

3. Eaha ïa te roohia i nia ia tatou ia ore tatou e imi i te aratairaa a Iehova (hiˈo Genese 3:4-6, 16-24)?

³ Eaha ïa te ohipa e tupu mai mai te peu e, ma te ore e haapao i taua parau mau nei, e tiaturi noa tatou ia tatou iho, aore ra i te tahi atu mau taata, no te opua e eaha te mea paari aore ra te mea maamaa, aore ra eaha te mea maitai aore ra te mea ino? Ia vaiiho tatou i te tahi mau manaˈo taata ia aratai ia tatou, e nehenehe tatou e faariro i te tahi taime ei mea maitai ta te Atua e parau ra e e mea ino, e e faariro ei haerea maitai ta te Atua e faariro nei ei haerea maamaa (Isaia 5:20). E nehenehe atura ïa tatou e riro, noa ˈtu e aita tatou e hinaaro ra, ei mau tumu faaturoriraa no vetahi ê (hiˈo Korinetia 1, 8:9). Te haapapu maira te Parau a te Atua eaha te roohia i nia i te taata e ore roa ˈtu e imi i te aratairaa a Iehova: “E hape â te taata i te eˈa, e e mea tia ïa i to ˈna manaˈo, o te hopea râ o taua eˈa ra, o te pohe ïa.” — Maseli 14:12.

4. Eaha te tauturu maitai mau ta Iehova e tǎpǔ maira i ta ˈna mau tavini (hiˈo Ieremia 10:21)?

⁴ Eaha mau na hoi ta tatou e hinaaro ra? O te tauturu ïa a Iehova. Inaha, teie ta ˈna parau tǎpǔ e ta ˈna faaitoitoraa e horoa mai nei: “E haapii atu vau ia oe, e faaite au ia oe i ta oe eˈa ia haere ra; e aˈo atu vau ia oe, e ei nia ia oe tau mata vai ai.” — Salamo 32:8.

Eaha ta te aravihi e titau ra?

5. Eaha mau na te aravihi?

⁵ Eaha mau na te auraa o te parau ra aravihi i roto i te mau Papai? Te iteraa ïa eaha to muri mai i te ohipa e tupu, te iteraa i te auraa o te mau mea i roto i to ˈna hohonuraa. Ia au i te Lexique théologique de l’Ancien Testament (beretane), te auraa o te parau hebera i hurihia na roto i te parau ra “aravihi” o te hoê ïa “ite haamaramaramahia no nia i te tumu mau” te mau mea e tupu ai. O te huru ite hoi teie e tauturu ia tatou ia haa ma te paari e ia manuïa. Ia au i taua auraa tumu ra te Tatararaa a te ao apî e faaohipa ˈi i te parau ra “aravihi”. Ei haapapu-maitai-raa i te auraa o te iho parau haa o taua parau hebera nei, te faaohipa ra ïa oia i te mau parau ra mai ‘te faaiteraa i te aravihi’, ‘te haaraa ma te haapao maitai’ e te ‘manuïaraa’. — Salamo 14:2.

6. No te aha e nehenehe ai e parau e “te taata e tapea i to ˈna vaha” e taata aravihi ïa oia?

⁶ No reira e parauhia ˈi e “e paari [aore ra aravihi] to ˈna to tei tapea i to ˈna vaha”. (Maseli 10:19.) Hou aˈe oia e hamama ˈi i to ˈna vaha, e feruri oia e e haapao maitai o ˈna e nafea râ te taata ta ˈna e parau atura ia taa mai i ta ˈna mau parau. Ia faaineine o ˈna i te parau atu ia vetahi ê, e aniani ïa oia e e paraparau anei o ˈna ma te paari e te here, aore ra mea maitai anei ia na reira o ˈna i te parau (Maseli 12:18; Iakobo 1:19). I te mea hoi e na to ˈna here i te mau haerea o Iehova e te hinaaro mau e tauturu i to ˈna mau taata-tupu e faaitoito ra ia ˈna, e parau ïa o ˈna i te parau e maitai ai ra. — Maseli 16:23.

7. Mea nafea i te noaaraa ia Davida i te roo o te taata aravihi ra?

⁷ E taiohia no nia ia Davida, te tamaiti a Iese e: “E ua haere anaˈe ihora Davida i te mau vahi atoa ia tonohia e Saula ra, haapao maite atura oia”, inaha, ua haere oia ma te aravihi. Ua taa maitai ia Davida e aita oia e aro ra i roto i te hoê aroraa na te taata nei, te aro ra râ oia e to ˈna mau hoa i te mau aroraa a Iehova. Ua imi aˈera hoi oia i te aratairaa e te haamaitairaa a Iehova (Samuela 1, 17:45; 18:5; Samuela 2, 5:19). No reira ˈtura ïa ta ˈna mau aroraa i manuïa noa ˈi.

8. I roto i te mau Papai heleni kerisetiano, eaha ˈtu â vetahi mau auraa o te iho parau haa ra i hurihia na roto i te parau ra ‘riro ei taata aravihi’?

⁸ I roto i te mau Papai heleni kerisetiano, ua hurihia te iho parau haa ra i tatarahia na roto i te parau ra ‘riro ei taata aravihi’ i te tahi taime, na roto i te parau ra ‘ite i te auraa’ aore ra “ite”. (Roma 3:11; Mataio 13:13-15; Ephesia 5:17.) Tera te mau huru aravihi mau ta te Atua e tǎpǔ maira e e horoa mai oia no ta ˈna mau tavini. Eaha râ hoi te ravea ta ˈna e faaohipa?

Mea nafea to Iosua riroraa mai ei taata aravihi?

9. I Tahito ra, mea nafea to Iehova faaaravihiraa i te mau ati Iseraela?

⁹ I Iseraela tahito ra, ua horoa mai o Iehova i roto i te rima o te mau ati Levi i te hopoia no te haapii i te nunaa i roto i ta ˈna Ture (Levitiko 10:11; Deuteronomi 33:8, 10). Mea faauruahia te Ture e te Atua, e e ohipa mai na te varua o Iehova i nia i te mau faanahoraa i ravehia no taua haapiiraa ra (Malaki 2:7). Mea na reira hoi, mai ta tatou e nehenehe e taio i roto i te Nehemia 9:20, to Iehova ‘faariroraa i te mau ati Iseraela ei mau taata haapao maitai’, aore ra ei mau taata aravihi.

10, 11. a) Mai ta te Iosua 1:7, 8 e haapapu maira, na te aha e faaaravihi ia Iosua? b) Eaha te faanahoraa i ravehia i te pae no te haapiiraa te tia ia Iosua ia faatura? c) Eaha te tutavaraa te tia atoa ia Iosua iho ia horoa?

¹⁰ Teie râ, i te pae tataitahi, e haa anei te mau ati Iseraela ma te aravihi? No te reira ra, e tia ïa ia ratou ia ohipa. Oia mau, ia ˈna i horoa ˈtu ia Iosua ra i te hopoia no te aratai ia Iseraela i te Fenua i tǎpǔhia maira, ua parau atura Iehova ia ˈna e: “Ia etaeta râ oe, e ia rahi roa te itoito, ia haapao hua oe i te ture atoa a tau tavini a Mose i faaue ia oe ra: eiaha oe e fariu ê i te reira i te rima atau e te rima aui, ia manuïa hoi oe i to mau haerea atoa. Eiaha te buka ture na ia taa ê atu i roto i to vaha, ia haamanaˈo maite oe i te reira i te rui e te ao, ia haapao hua oe i tei papai-atoa-hia i roto ra, ei reira e maitai ai to oe haerea, ei reira oe e manuïa roa ˈi.” — Iosua 1:7, 8.

¹¹ Nafea hoi o Iehova ia faaaravihi ia Iosua? E ere ïa na roto i te tahi semeio, na roto râ i Ta ˈna Parau papaihia ra. E tia ia Iosua ia oomo maitai te reira i roto i to ˈna feruriraa e i roto i to ˈna mafatu ma te taio tamau e te feruri hohonu. Mai ta ˈna i ite, te titau ra oia e na te mau ati Levi e amo i te hopoia haapii i te Ture. E tia ˈtura ïa ia ˈna ia faatura i taua faanahoraa ra, eiaha roa ˈtu e faaatea ê i te manaˈoraa e e nehenehe o ˈna na nia i to ˈna iho ite e taa i te auraa, no te mea e tiaraa to ˈna i roto i te nunaa (Maseli 18:1). Mea faufaa roa ˈtura ïa ia tuatapapa tamau o Iosua i te Parau papaihia a te Atua. Ia na reira oia, ma te haapao maitai i te taatoaraa o taua Parau ra, e ia auraro oia, i reira noa ïa oia e ohipa ˈi ma te aravihi. — Hiˈo Mau arii 1, 2:3.

Nafea o Iehova ia faaaravihi ia tatou i teie mahana

12. Eaha na titauraa faufaa roa e toru te tia ia tatou ia faatupu e noaa mai ai ia tatou i te aravihi ta Iehova e faaau maira ia tatou?

¹² Mai reira mai to Iehova horoa-noa-raa mai na ta ˈna mau tavini i te aratairaa e au ia nehenehe ratou ia ohipa ma te paari. Mai te peu e e hinaaro tatou e fanaˈo i taua aratairaa ra, e tia ïa ia tatou iho ia faatupu e rave rahi mau ohipa faufaa roa: 1) Mai ia Iosua, e tia ia tatou ia faatura i te faanahonahoraa a Iehova. Oia hoi te auraa e tia ia tatou ia tahoê e te amuiraa o te mau kerisetiano faatavaihia, “te tavini haapao maitai e te paari” e ta ˈna Tino aratai (Mataio 24:45-47; hiˈo atoa Ohipa 16:4). Oia atoa hoi te auraa te apiti-tamau-raa ˈtu i roto i te mau putuputuraa kerisetiano (Hebera 10:24, 25). 2) I te pae tataitahi, e tia ia tatou ia tuatapapa tamau i te Parau a te Atua e te mau buka aore ra vea ta te pǔpǔ a te “tavini” e horoa mai nei no te tauturu ia tatou ia taa i to ˈna auraa. 3) Mea faufaa atoa ia rave tatou i te taime no te feruri hohonu e nafea râ tatou ia faaohipa i roto i to tatou oraraa i te mau mea ta tatou e haapii nei e a rave atu ai i te reira no te tauturu i to tatou mau taata-tupu.

13. Eaha te auraa o te parau tǎpǔ i faaitehia mai i roto i te Ieremia 3:15?

¹³ No nia i te maa e te mau faanahoraa i te pae varua ta ˈna e horoa mai i to tatou nei tau, teie ta Iehova i parau i roto i te Ieremia 3:15: “E horoa ˈtu vau i te orometua na outou i tei au i tau aau nei, o tei faaamu ia outou i te ite e te haapao maitai.” E nehenehe mau â taua haapiiraa i te pae varua ra e tauturu ia tatou e noaa mai ai ia tatou i te aravihi faahiahia mau e ite atu ai tatou eaha to muri mai i te mau ohipa e tupu e ia ite atoa e eaha te haerea te tia ia faatupu e manuïa ˈi tatou. O vai hoi te tumu o taua aravihi ra? Aita ˈtu ïa maoti râ o te Atua ra o Iehova.

14. No te aha te pǔpǔ o “te tavini haapao maitai” e riro ai ei pǔpǔ aravihi mau?

¹⁴ No te aha te pǔpǔ o “te tavini haapao maitai” e riro ai ei pǔpǔ aravihi mau? No te mea te tapitapi mau ra to ˈna mau melo i ta te Parau a te Atua e parau ra e te pee nei ratou i ta ˈna mau aˈoraa. Hau atu, i te mea hoi e te auraro nei ratou i ta ˈna aratairaa, ua tuu maira ïa Iehova i to ˈna varua i nia ia ratou e ua faaohipa ia ratou ia au maite i ta ˈna opuaraa (Luka 12:43, 44; Ohipa 5:32). Mea maoro i teie nei, teie ta te papai salamo i papai ma te faauruahia mai e te Atua: “Ite rahi to ˈu i to tau mau orometua atoa ra, no te mea te feruri nei au i ta oe i faaite maira.” — Salamo 119:99.

15. a) Ei haapoto-noa-raa, eaha ta te pǔpǔ o te “tavini” i aˈo noa mai na ia tatou? b) E rave rahi matahiti i teie nei, na te aha i tauturu i te pǔpǔ o “te tavini” ia horoa mai i “te paari e te aravihi” e au no nia i te manaˈo kerisetiano i te pae no te mau pâmuraa toto?

¹⁵ Ia anihia ˈtu i “te tavini haapao maitai e te paari” e eaha râ te haerea e tano ia rave, e horoa noa mai oia i teie nei aˈoraa: ‘A faaohipa i ta te Bibilia e parau ra e a tiaturi ia Iehova.’ (Salamo 119:105; Maseli 3:5, 6). A faaohipa-pinepine-hia ˈi te mau pâmuraa toto e a faaruru ai te mau Ite o Iehova i taua fifi ra, ua horoa mai Te Pare Tiairaa o te 1 no tiurai 1945 (beretane) i te manaˈo kerisetiano no nia i te moˈaraa o te toto. Ua faataa mai oia e e tano te opaniraa a te Atua no te toto animala e no te toto taata atoa (Genese 9:3, 4; Ohipa 15:28, 29). Aita taua vea nei i faahiti i te parau no te tahi mau fifi e tupu mai na roto i te mau pâmuraa toto, i matau-ore-hia hoi i taua tau ra. Te fifi mau, o te auraroraa ïa i te ture a te Atua. I teie nei mahana, te rahi noa ˈtura te taata teie e taa nei e mea maitai mau iho â ia patoi i te mau pâmuraa toto, e te patoi mau nei ratou. Area te mau Ite o Iehova ra, te haa nei ïa ratou ma te aravihi no te mea ua tuu ratou i to ratou tiaturiraa i nia i te Poiete, tei hau aˈe hoi te ite no nia i te toto i te tahi atu taata.

16. No te aha te mau aˈoraa i horoahia i roto i Te Pare Tiairaa no nia i te morare i te pae taatiraa, i te mau utuafare hoê anaˈe iho metua e rave ra i ta ˈna mau tamarii e no nia i te hepohepo, i riro ai ei mea faufaa mau?

¹⁶ A rahi noa ˈi te mau ohipa tia ore i te pae taatiraa i te faatiahia, ua horoa noa mai Te Pare Tiairaa na ta ˈna mau taata taio i te tahi mau aˈoraa i niuhia i nia i te mau Papai, maoti hoi i te turu i te eˈa o te rahiraa. Te tauturu ra ïa oia i to ˈna mau taata ia tapea maite i to ratou mau auraa faufaa mau e o Iehova e ia imi i te hoê oaoaraa e tia i te vairaa maoti hoi i te hoê noa oaoaraa poto roa. Te faaite atoa mai nei te mau tumu parau o Te Pare Tiairaa i faaineinehia no te mau fetii hoê anaˈe metua e rave ra i ta ˈna mau tamarii e no te mau taata e aro nei i te manaˈo hepohepo, i te hoê huru aravihi e noaa i te feia anaˈe ra e haafaufaa nei i te mau manaˈo o Iehova e e pure nei ia ˈna ma te aau tae i te na ôraa e: “E haapii mai oe ia ˈu ia rave au i to oe ra hinaaro; o oe hoi tau Atua.” — Salamo 143:10; 139:17.

17. a) Taua ahuru matahiti na mua ˈtu, eaha ta te mau tavini a Iehova i taa no nia i te matahiti 1914? b) Noa ˈtu â ïa e te vai pouri noa râ te tahi mau parau i roto i to ratou feruriraa i muri aˈe i te matahiti 1914, eaha te ite i tauturu i te mau tavini a te Atua ia aratai i to ratou oraraa ma te paari?

¹⁷ Na roto i te arai o “te tavini haapao maitai e te paari”, ua tauturu atoa mai Iehova i ta ˈna mau tavini ia ite tau ahuru matahiti na mua ˈtu e e tapao te matahiti 1914 i te hopea o te mau tau o te mau nunaa (Luka 21:24). I muri aˈe i te Tamaˈi rahi Matamua, te vai pouri noa râ te tahi mau tumu parau i roto i to ratou feruriraa, ua navai râ hoi ratou i te ite no te haa ma te paari. Ua papu maitai ia ratou e, ia au i te mau Papai, te fatata roa maira te tau i haapaohia e te Atua no te haamou i te amuiraa o te mau mea nei e mea maama ˈtura ia tiaturi i teie nei ao aore ra ia vaiiho i te mau mea materia ia faaapiapi i to ratou feruriraa. Ua ite atoa ratou e o te Basileia o Iehova anaˈe te ravea mau no te rapaau i te mau maˈi atoa o te huitaata nei (Daniela 2:44; Mataio 6:33). Ua papu maitai ia ratou e e hopoia na te mau kerisetiano mau atoa i te haereraa e faaite i te parau no nia ia Iesu Mesia, te Arii faatavaihia a Iehova, e oia atoa no nia i To ˈna Basileia (Isaia 61:1, 2; Mataio 24:14). I te matahiti 1925 ra, ua faaitoito mau â te tumu parau o Te Pare Tiairaa oia hoi “Te fanauraahia te nunaa”, ia ratou ma te horoa mai i te hoê maramarama rahi aˈe i nia i te pene 12 o te buka Apokalupo; ua taa maitai atura hoi ia ratou i te ohipa i tupu i roto i te mau raˈi, ma te ore e itehia e te mata taata nei. Ua tauturu taua aravihi nei ia ratou, ia aratai i to ratou mau taahiraa avae ma te paari.

18. Eaha te haamaitairaa e eaha te hopoia e vai ra ia tatou nei i teie nei, e eaha te tia ia tatou ia uiui?

¹⁸ Ma te faaroo, ua haaparare aˈera te tahi tau tausani taata e faaite na i te parau no nia ia Iehova i taua tau ra, i roto i te ao atoa nei, i te ohipa pororaa i te parau apî maitai o te Basileia o te Atua tei haamauhia i teie nei. Mea na reira ˈtura hoi e rave rahi milioni taata i te iteraa e o vai mau na o Iehova e i te here-atoa-raa ia ˈna, e i te iteraa i te tiaturiraa no te ora e a muri noa ˈtu ia hohora mai i mua ia ratou. Tatou paatoa ua itehia ia tatou i te parau mau maoti ta ratou mau tutavaraa here mau, te taa nei ia tatou e e faufaa atoa na tatou e e hopoia i te apitiraa i roto i taua ohipa ra ma te horoa i te hoê faaiteraa papu e te taatoa i te feia atoa e faaroo mai nei e na roto i te tamauraa i te rave i taua ohipa ra e tae roa ˈtu i te taime o Iehova e parau ai e ua oti (Apokalupo 22:17; hiˈo atoa Ohipa 20:26, 27). Te faaite ra anei to tatou huru oraraa e mea faahiahia mau na tatou i te aravihi ta Iehova e horoa mai nei no ta ˈna mau tavini na roto i ta ˈna faanahonahoraa?

19. a) A faataa mai na i te hiˈoraa o te hoê Ite, tei faaite mai hoi i roto i to ˈna oraraa i to ˈna mauruuru no te aravihi ta Iehova i horoa mai na roto i te ravea o ta ˈna faanahonahoraa. b) Eaha te haapiiraa ta tatou e nehenehe e huti mai i taua hiˈoraa ra?

¹⁹ Na roto i to ratou huru oraraa, te pahono nei te feia rahi roa i purara na nia i te fenua atoa nei e, e, i taua uiraa ra. E hiˈo anaˈe na i te hiˈoraa o John Cutforth. Fatata e 48 matahiti i teie nei, ua haafaufaa oia i te aˈoraa bibilia ta te pǔpǔ o “te tavini haapao maitai” i haafaufaa ê na, oia hoi: “E mata na râ outou i te imi i te basileia o te Atua, e te parau-tia na ˈna; e amui-atoa-hia mai taua mau mea ra ia outou. E teie nei, eiaha e tapitapi i to ananahi ra, na ananahi hoi e tapitapi i ta ˈna iho.” (Mataio 6:33, 34). I muri aˈe i to ˈna taviniraa ia Iehova e rave rahi matahiti, teie ta taeae Cutforth i parau: ‘Te hoê o te mau mea i mau maitai i roto i to ˈu feruriraa, teie ïa e faanahonahoraa ta Iehova ta ˈna e aratai ra i nia i te fenua nei, e e nehenehe ta ˈu e rave i te ohipa e taua faanahonahoraa ra, e mai te peu e hinaaro vau e pee maite i ta ˈna mau aratairaa, o te hau ïa ta te reira e faatupu mai i roto ia ˈu, te oaoa, e rave rahi mau hoa e e rave rahi atu â mau haamaitairaa.’ Ua haapapu-maitai-hia to ˈna manaˈo e rave rahi taime i roto i te roaraa o ta ˈna mau matahiti taviniraa i te mau Etats-Unis, i Canada, i Auteralia e i Papouasie-Nouvelle-Guinéea. Ma te papu maitai, no tatou paatoa, te eˈa o te paari te faaiteraa ïa i to tatou aau mehara no te ravea ta Iehova e faaohipa no te faaaravihi i to ˈna mau tavini. — Mataio 6:19-21.

E haapao maitai anaˈe na ia ore te aravihi ia mahere ia tatou

20, 21. a) Mea nafea vetahi pae i te ereraahia i te aravihi no ǒ mai i te Atua ra? b) Na te aha e tauturu ia tatou ia ore roa ˈtu tatou e faaô ia tatou i roto i te eˈa ino ra?

²⁰ Ua riro mau â te aravihi ta Iehova e horoa mai nei na ta ˈna mau tavini ei faufaa rahi te tia ia poiherehia. Ia ite na râ tatou e e nehenehe te reira e mahere ia tatou ia faarue tatou i te eˈa i tauturu mai ia tatou ia nehenehe teie aravihi e noaa mai ia tatou. Te vahi peapea râ hoi, inaha o te ohipa mau hoi e farereihia nei e vetahi pae (Maseli 21:16; Daniela 11:35). I muri aˈe i to ratou faarueraa i te aˈoraa e tano maitai ia ratou, ua tamata ratou i te faatitiaifaro i to ratou haerea. Ua topa roa ratou i roto i te marei o te teoteo. Ua faariro ratou ei mea maitai ta te Parau a te Atua e parau ra e mea ino, e ua tatara mai ratou ia ratou i te faanahonahoraa a Iehova. Auê hoi i te peapea e!

²¹ Ua faataa-maitai-hia te huru o te taata e na reira i roto i te Salamo 36:1-3, i reira tatou e taio ai e: “Te parau nei te hapa a te taata paieti ore i roto i [to ˈna] aau.” Oia hoi, o to ˈna iho mau manaˈo e mau hinaaro miimii te aratai ra ia ˈna ia rave i te hapa. Te na ô faahou ra te papai salamo e: “Aore roa e mǎtaˈu i te [Atua] i mua i to ˈna ra mata. Te tavaimanino noa ra oia ia ˈna iho, aore aˈera i imi i to ˈna iho ino a riaria ˈtu ai. E hapa hoi tei te parau a tana vaha e te haavare.” Eaha ihora ïa te faahopearaa? ‘E faaea oia i te faatupu i te aravihi no te rave i te maitai ra.’ E manaˈo papu maitai oia e te mea ta ˈna e rave ra e mea maitai ïa e e haavarevare oia i te tahi atu mau taata ia nehenehe ratou e pee mai i to ˈna huru. Mea faufaa roa ˈtura ïa, eiaha noa e ia riro tatou ei mau taata aravihi, ia vai taata aravihi noa râ tatou ma te haafaahiahia i te ravea ta Iehova i horoa mai e nehenehe ai tatou e na reira.

[Nota i raro i te api]

Te haamanaˈo ra anei outou?

◻ Na te aha e tauturu ia tatou ia rave i te mau opuaraa maitai?

◻ Eaha ta te aravihi e titau ra?

◻ Nafea o Iehova ia faaaravihi i to ˈna mau tavini i to tatou nei mau mahana?

◻ Eaha te tia ia tatou ia rave mai te peu e e hinaaro tatou e fanaˈo roa i te aravihi ta Iehova e horoa mai nei?

[Hohoˈa i te api 25]

Ia noaa mai ia tatou i te aravihi no ǒ mai ia Iehova ra, e tia ia tatou ia farii i ta ˈna faanahonahoraa, ia tuatapapa tamau i te pae tataitahi e ia feruri hohonu e nafea râ tatou ia faaohipa i te reira.