Iosua 1:9: “E faaetaeta, e ia itoito roa”

“E ere anei na ˈu i faaue ia oe? Ia itoito e ia puai oe. Eiaha e riaria aore ra e mǎtaˈu, tei ia oe ra hoi Iehova to Atua i te mau vahi atoa ta oe e haere.”—Iosua 1:9, Huriraa o te ao apî.

“E ere au te faaue atu na ia oe? e faaetaeta, e ia itoito roa; eiaha e mǎtaˈu, eiaha hoi e amiami; tei pihai-atoa-iho hoi to Atua o Iehova ia oe i to mau haerea atoa ra.”—Iosua 1:9, Te Bibilia Moˈa ra.

Auraa o te Iosua 1:9

Na roto i teie mau parau, ua haapapu te Atua ra o Iehovaa ia Iosua, ta ˈna tavini taiva ore “ia itoito e ia puai” noa o ˈna noa ˈtu te mau tupuraa e mau fifi teimaha ia hiˈohia, ta ˈna e faaruru atu. Ia auraro noa Iosua i te mau faaueraa a te Atua, aita ïa e tumu no ˈna ia mǎtaˈu i te mau mea e tiai mai ra ia ˈna. Inaha tei pihai iho noa Iehova ia ˈna a horoa noa ˈi i te mau aratairaa ia upootia o ˈna i nia i to ˈna mau enemi.

Ua nafea ïa Iosua “ia itoito e ia puai” noa o ˈna? Maoti te mau papai ta Iehova i horoa i taua taime ra. Tei roto atoa te “Ture taatoa ta Mose ta [Iehova] tavini i faaue ia [Iosua].”b (Iosua 1:7) Ua parau Iehova ia Iosua ia “taio maitai [“feruriruri,” nota] oe i te reira i te po e te ao.” (Iosua 1:8) A na reira ˈi, ua itoitohia to Iosua feruriraa e aau no te rave i to te Atua hinaaro. Ua titauhia ia ˈna ia haa ia au i ta ˈna i haapii i roto i te Parau a te Atua, e “ia haapao maitai . . . i te mau parau atoa i papaihia i roto.” Ei faahopearaa, e haa oia ma te paari e e manuïa oia. Tera iho â tei tupu. Noa ˈtu te mau fifi ta ˈna i faaruru, ua ora maoro Iosua e ua ite o ˈna i te oaoa mau ei tavini taiva ore a Iehova.—Iosua 23:14; 24:15.

E nehenehe te mau parau ta Iehova i faahiti ia Iosua e faaitoito atoa ia tatou i teie mahana. Te faaite ra te reira e te aupuru ra Iehova i ta ˈna mau tavini, i te taime iho â râ a faaruru ai ratou i te mau fifi. Te hinaaro ra te Atua ia manuïa atoa ratou mai ia Iosua, ia itoito e ia puaihia maoti te taio-tamau-raa e te feruriruriraa i nia i ta ˈna Parau, te Bibilia e ia haa ratou ia au i ta ˈna aratairaa.

Irava tapiri o te Iosua 1:9

I muri aˈe i to Mose poheraa, ua maiti Iehova ia Iosua no te aratai i te nunaa Iseraela. (Iosua 1:1, 2) I tera taime, te faaineine ra ratou i te tomo i te Fenua tǎpǔhia i Kanaana. Tera râ, e tia ia ratou ia aro i to ratou enemi puai mau e faaea ra i taua vahi ra. Ei hiˈoraa, ua titauhia ia Iosua ia aro i te ati Kanaana matauhia no to ratou ino.c (Deuteronomi 9:5; 20:17, 18) E nunaa rahi e te puai te ati Kanaana e mea navai atoa ta ratou mauhaa tamaˈi ia faaauhia i to Iseraela. (Iosua 9:1, 2; 17:18) Ua pee noa râ Iosua i ta Iehova mau aratairaa ma te itoito mau. I roto noa e ono matahiti, ua upootia Iseraela i nia i to ratou mau enemi. Ua haapapu te reira e tei pihai iho noa te Atua ia Iosua.—Iosua 21:43, 44.