Te papai mai nei te feia taio
Maˈi Ua putapû vau i te tumu parau ra “Te uiui nei te mau taurearea . . . Nafea vau ia faaruru i te maˈi ino mau?” (8 no Tiunu 1997) Te haafaahiahia nei au ia Jason, Ashley, e ia Carmen no to ratou faarururaa ma te itoito i to ratou maˈi.
R. D., Farani
E mea ohie mau â ia faaohipa i te aˈoraa ta outou e horoa ra, mea faaitoito, e mea aravihi. O te aamu o Ashley tei faaitoito taa ê ia ˈu. E tavini Ite no Iehova vau ma te taime taatoa. Te manaˈo ra e te vai ra te mau taata o te hinaaro rahi ra e rave i te taviniraa ma te taime taatoa, eita râ ta ratou e nehenehe no te maˈi, ua faaitoito ïa ia ˈu ia tutava noa ˈtu to ˈu mau fifi.
D. I., Alabania
Mai to ˈu iteraa e ua roohia vau i te maˈi a Crohn, ua tapeahia na vau i te fare maˈi hau atu i te hoê ahuru taime e ua tâpûhia vau e piti taime. Tera râ, i roto i na matahiti e maha i mairi aˈenei, ua tavini au i roto i te hoê tuhaa fenua moemoe i ǒ nei i te hoê fenua ê. E noa ˈtu e e ere au i te mea oraora tia roa, ua maitai rahi mai au. Ua faaitoito rahi mai te tumu parau ia ˈu.
G. H., Equateur
Mouraa o te mau animala oviri Te tuatapapa nei au i te ihianimala, e ua putapû mau â vau i te mau tumu parau ra “Na vai e faaora i ta tatou mau animala?” (8 no Tiurai 1997) Mea maitai e e taa i te feia e taio i teie mau tumu parau e mea nafea te nounou e te ohipa ino i te faainoraa e rave rahi mau mea ora.
G. H., Hau Amui no Marite
Ei taata anaanatae roa i te mau animala oviri, ua oaoa vau i te taioraa i ta outou mau tumu parau. E tuhaa rahi ta te mau aua animala e rave ra no te paruru i te mau huru mea ora e fifihia ra. Tera râ, mai te peu e o te mau aua animala te ravea hopea, te fifi-mau-hia ra ïa te mau animala oviri. E ere hoi te tatararaa mai i te mau animala i to ratou nohoraa natura e te faaamuraa ia ratou i roto i te mau aua animala taa ê, i te ravea.
M. T., Kanada
Noa ˈtu e e mea maitai teie mau tutavaraa no te faaherehereraa, te manaˈo nei matou e te ravea maoro hoê roa, oia ïa te faatereraa te Basileia o te Atua i te mau faufaa o te fenua nei. (Isaia 11:9)—ED.
Arairaa i te ati e te urî Te hinaaro nei au e haamauruuru ia outou no te tumu parau ra “Ta outou urî—E hohoni anei i te tamarii?” (8 no Tiurai 1997) E taata haapii aravihi roa vau i te urî, 18 matahiti te maoro, e ua tutava noa na vau i te haafaufaa i te haapiiraa i te urî e te amoraa i ta ˈna iho hopoia. Ua maere au i te taioraa i teie tumu parau maramarama e ua oaoa vau i te iteraa e te faaohipa ra te taata haapii i uiuihia i te hoê â huru haapiiraa e ta matou. Mea maitai e e taio te mau fatu urî atoa e e faaohipa ratou i te mau aˈoraa.
B. C., Hau Amui no Marite
Te hinaaro nei au e faahiti i te tahi atu manaˈo: E ǎpu noa mai te mau urî ia ite ratou i te maa. E nehenehe te hoê tamarii o te faataueue ra i te hoê faraoa inaˈi aore ra te hoê monamona, e ǎpuhia e te hoê urî o te haere mai na pihai iho ia ˈna. Aita te urî e hinaaro ra e hohoni, e nehenehe râ oia e horo mai i nia i te maa e, e hohoni atu i te rima o te tamarii. Te faaara-maitai-hia ra te mau metua ia amo i ta ratou hopoia i roto i teie tuhaa.
K. S., Hau Amui no Marite
Te mauruuru nei matou i teie mau manaˈo ê atu.—ED.
Te mau huru oraraa iino Ua faahiahia vau i te tumu parau ra “Te mau huru oraraa iino—Ehia rahiraa haamâuˈaraa?” (8 no Tiurai 1997) Ei taurearea kerisetiano, te farerei nei au e rave rahi mau tamataraa. Ua faaite mau â mai teie tumu parau ia ˈu e na roto i te faaohiparaa i te mau faaueraa tumu a te Bibilia, e ape tatou i te mau maˈi e i te mau faainoraa.
R. K., Hau Amui no Marite
Te mau pahu tari parau I muri aˈe i to ˈu taioraa i te tumu parau faahiahia roa ra “E tari mau anei te mau pahu no Afirika i te parau?” (8 no Tiurai 1997), ua ani au i to ˈu papa ruau, hoê hanere matahiti to ˈna, ia tamata i te hiˈo e mea mau anei tera aamu. Ua haapapu mai oia i roto i te mau tuhaa iti haihai atoa e mea mau iho â, e ua maere au!
G. M. O., Nigeria