Te auraa ia pohe te taata

‘Maitai aˈe to te urî ia ora ra i to te liona ia pohe. Ua ite te feia e ora nei, e pohe ratou, aita râ a te feia i pohe ra e parau itea. Aita hoi a ratou e utua toe; ua aramoina hoi ratou.’ —Koheleta 9:4, 5.

E RAVE rahi taata aita i papu roa ta ratou tiaturiraa no nia i te hoê nephe o te ora i muri aˈe i te pohe aore ra o te ô atu i roto i te mau faaohuraa o te fa-faahou-raa i roto i te tino ê. Te tiaturi atoa nei vetahi e e nehenehe te hoê taata e hoˈi faahou mai mai te pohe mai. Ua uihia iho nei o Thomas Lynch, e taata haapao oia i te hunaraa, e eaha to ˈna manaˈo no nia i te oraraa i muri aˈe i te pohe. Ua parau oia e: “Aita te feia tei ite i te mau aoaoaraa e te vai atu â, i hoˈi mai mai te pohe mai—ua na nia ˈˈe noa ratou i to tatou aravihi no te faito i ta ratou mau tapao o te ora. No te mea e taata ‘pohe’ outou ia ore outou e hoˈi faahou mai.”—The New York Times Magazine.

Ua faaite te Bibilia i te parau mau o te reira tau tausani matahiti te maoro. ‘Maitai aˈe to te urî ia ora ra i to te liona ia pohe. Ua ite te feia e ora nei, e pohe ratou, aita râ a te feia i pohe ra e parau itea. Aita hoi a ratou e utua toe; ua aramoina hoi ratou.’ (Koheleta 9:4, 5) E haapapu oioi mai te haereraa ˈtu maa taime iti e mataitai i te vahi hunaraa tahito e e parau mau iho â.

Te auraa anei ïa e aita roa ˈtu e tiaturiraa to te feia pohe? Papu maitai e aita te Bibilia e turu ra i te tiaturiraa i te hoê nephe pohe ore o te ora i te pohe. (Genese 2:7; Ezekiela 18:4, 20) Teie râ, ua poro o Iesu Mesia i te tia-faahou-raa i te ora i nia i te hoê fenua o te faarirohia ei paradaiso. Ua tiaturi ta ˈna pǐpǐ ati Iuda, o Mareta, ua pohe iho nei hoi to ˈna tuaana ra o Lazaro, i te tia-faahou-raa, no reira oia i parau ai no nia ia Lazaro e: “Ua ite au e, e tia faahou mai â oia ia tae i te tia-faahou-raa i te mahana hopea ra.” (Ioane 11:24) I reira, pahono atura o Iesu e: “Tei ia ˈu te tia-faahou-raa e te ora, o te faaroo mai ia ˈu ra, pohe noâ oia e ora â ïa. E te taata ora atoa nei e faaroo ia ˈu ra, e ore roa ˈtu ïa e pohe. Ua faaroo oe i te reira?” (Ioane 11:25-27) Na mua ˈtu, ua parau oia e: “Eiaha e maere i te reira; te fatata mai nei hoi te hora e faaroo ai te feia atoa i roto i te apoo [“haamanaˈoraa,” MN] ra i tana reo, e e haere mai i rapae; e te feia i mau na i te parau maitai ra, e tia mai ïa e rave i te ora; e te feia hoi i mau na i te parau ino ra, e tia mai ïa e rave i te pohe.” A tapao na râ, aita o Iesu i faahiti i te parau o te hoê nephe pohe ore!—Ioane 5:28, 29; Luka 23:43.

[Parau iti faaôhia i te api 31]

“E taata ‘pohe’ outou ia ore outou e hoˈi faahou mai.” Thomas Lynch, taata haapao i te hunaraa