Te papai mai nei te feia taio

Te ururaau haumi no Amazone Ua maere roa vau i te mau tumu parau ra “Te ururaau haumi no Amazone—Te mau aai e te mau aamu mau.” (8 no Mati 1997) Ei taata hiˈopoa raau tupu na te Tuhaa haapao Ururaau no Marite, e tia ia ˈu ia tuatapapa e rave rahi mau buka no nia i te natura. Teie râ, te manaˈo nei au e, ta outou te tumu parau maitai roa ˈˈe o ta ˈu i taio aˈenei no nia i teie tuhaa. Ua maimi-maitai-hia, ua horoa mai i te mau haamaramaramaraa papu e te tano, e mea au roa atoa ia taio. Ua putapû roa vau i te iteraa e te vauvauhia ra te mau tumu parau mai te mau mea ora huru rau, te ootiraa i te hotu o te ururaau, e te faaatea-ê-raa i te mau mea ora, i roto i te hoê vea e opere-rahi-hia ra na te ao nei. E ravea atoa te reira no te haamaitai i te mau ohipa.

D. S., Hau Amui no Marite

Hoê ahuru ma piti matahiti to ˈu, e te hinaaro nei au e haamauruuru rahi roa ia outou no te mau tumu parau. Ua taio vau i te ahiahi iho i tae mai ai te vea! I te mea e te tuatapapa ra matou i teie tumu parau i roto i te tuhaa teotarafia i te fare haapiiraa, ua horoa ˈtu vau i te hoê vea i ta ˈu orometua haapii teotarafia i te mahana i muri iho. Ua hinaaro iho â ïa te tahi atu mau tamarii haapii e ite i teie vea, e te opua nei au e opere â i te mau vea na ratou.

T. E., Helemani

Mea anaanatae mau â te mau tumu parau. Te mau huru manumanu i faahitihia, e mea rahi roa ïa, e tera huru manumanu ta ˈna ohipa e rave i raro aˈe i te mau rauere i nia i te repo o te ururaau. Te haapao nei Iehova e ia operehia te maa na te mau mea atoa e ora ra i reira. Te taa ra ia ˈu e no te aha oia ‘e haamou ai i te feia e faaino ra i te fenua nei.’—Apokalupo 11:18, MN.

D. K. H., Hau Amui no Marite

Eaha te ino ia haavî ia vetahi? Mauruuru no te tumu parau ra “Te uiui nei te mau taurearea . . . Eaha te ino ia haavî ia vetahi?” (8 no Mati 1997) I te fare haapiiraa, te faahaehaa nei te mau taata atoa i te feia paruparu aˈe, e ua faahepohia vau ia na reira atoa. Tera râ, ua tauturu rahi mai te aˈoraa i horoahia i roto i teie tumu parau, oia ia rave i te parahiraa o te tahi atu taata, ia ore au e haavî atu. Mauruuru â.

M. N., Farani

Hoê ahuru ma hitu matahiti to ˈu, e te haamauruuru rahi nei au ia outou no te tumu parau. E pahonoraa ïa i ta ˈu mau pure, e ua faaitoito rahi mau â te reira ia ˈu. I te mea e ua ite au e mea riri roa na Iehova i te peu haavî, ua tauturu rahi te reira ia ˈu ia rave i te mau tauiraa i titauhia i roto i to ˈu nei haerea. Ua putapû roa atoa vau i te Ture Auro e te hiˈoraa o Iesu, e ua tauturu mai te reira ia ˈu ia ohipa ma te tia.

V. T., Italia

Aita i maoro aˈenei, i roto i te hoê piha tiairaa, ua rave mai au i te hoê A ara mai na! e ua taio atura i teie tumu parau i papai-maitai-hia. Te taa maitai ra ia ˈu i te mau haamauiuiraa maoro ta te haavîraa e nehenehe e faatupu. Ua hamani ino to ˈu taeae na roto i te parau, te haamauiuiraa manaˈo, e i te pae tino, [ia ˈu, to ˈna tuahine]. I to ˈna faahaparaahia no teie mau peu, aita oia i tâuˈa mai, ua ata oia, e ua parau mai oia e e ohipa hauti noa! E parau mai na oia ia ˈu e o vau te fifi, no te mea aita vau i au i te hauti! I te 13raa o to ˈu matahiti, 15 matahiti ïa to ˈna, ua haamata ˈtura oia i te haamǎtaˈu mai ia ˈu i te hamani ino ia ˈu i te pae taatiraa. Ua ora noa vau ma te riaria ia ˈna, no te mea mea paari aˈe, mea rahi aˈe, e mea puai roa ˈˈe oia ia ˈu! Aita roa ˈtu to ˈu mau metua i paruru aˈe ia ˈu. Mauruuru, e A ara mai na! e, no te tuatapaparaa i te mau tumu parau teimaha o te oraraa. Ua ite au e e titauhia te itoito no te na reira. Te manaˈo nei au e e rave rahi mau mafatu o tei putapû i teie nei tumu parau.

B. S. M., Hau Amui no Marite