A tamau i te hatua no te arai i te ati

◼ I te fenua Marite, o te ûraa faurao te tumu matamua e pohe ai te tamarii e te taurearea mai te 5 e tae atu i te 24 matahiti.

◼ I te fenua Tapone, o te mau ati purumu te haapohe nei i te taata e piti taime hau atu i te mariri o te tîtî e e maha taime hau aˈe i te mariri o te prostate.

◼ I Europa ma, o te mau ûraa pereoo uira te tumu e pohe ai te taata e maha taime hau atu i te mau taparahiraa taata.

TE FAAITE ra teie mau numera riaria mau i te hoê o te mau ati e nehenehe e roohia na nia i te faurao—e nehenehe te tere-puai-raa e haapohe i te taata. E ia anoihia e te ava, e nehenehe ïa e faaauhia i te taparahiraa taata. Auaa râ, e nehenehe te atâtaraa ia tupu te ati e te pepe, e faaitihia. Nafea?

Na mua roa, na roto ïa i te haapao-maitai-raa ia faahoro anaˈe i te pereoo. Te parau nei vetahi feia aravihi i te pae no te arairaa i te ati, e e 9 ati i nia i te 10 o te nehenehe e araihia aore ra e apehia. Teie vetahi mau hiˈoraa no te haapao ore i te pae no te faahororaa i te pereoo oia hoi, te oreraa e faatura i te otia i tapaohia no te tere pereoo, te tioioi-haere-raa no te hemo i te tahi atu mau pereoo, te tapiri-roa-raa i te pereoo i mua mai, te faahororaa i muri aˈe i te raveraa i te raau taero aore ra te ava, e te faahororaa i te hoê pereoo aita i atuatu-maitai-hia. E tia hoi te faatura i te ora e te here i to tatou taata-tupu ia turai ia tatou ia ara maitai e ia haapao i ta tatou hopoia i te pae no te faahororaa i te pereoo.—Mataio 7:12.

O te hatua te tahi atu ravea ohie roa, o te moe-pinepine-hia nei râ, no te arai i te ati. Ia au i te parau a Tim Hurd, auvaha no te Faatereraa hau Marite no te Faurao, “o te hatua te ravea manuïa roa ˈˈe no te faaora ia outou ia û noa ˈtu outou. E tataipiti oia i te manuïaraa ia ora mai outou.” No te mau tamarii nainai, e tataitoruhia ïa teie faito mai te peu e e tuuhia ratou i roto i te mau parahiraa i faataahia no te mau tamarii.a

Noa ˈtu teie mau ravea arairaa ati, te faaite ra te mau titorotororaa e, fatata 1 taata i nia i te 3 i roto i te mau pereoo uira i te fenua Marite, o te ore e tamau nei i to ratou hatua. E te mau metua, te ara ra anei outou e ia taamu-maitai-hia ta outou mau tamarii i nia i to ratou parahiraa hou outou e faahoro ai i to outou pereoo? Eita te taime e ravehia no te tamau i te hatua e mâuˈa, e mea hoona râ.

[Nota i raro i te api]