Ia au i te Bibilia

OVNI—E mau vea anei na te Atua?

A HOPE ai te senekele 20 e a ino noa ˈi te mau huru tupuraa i nia i te fenua nei, te parare noa ra te tiaturiraa i te mau taoˈa rere taa-ore-hia (OVNI oia hoi, objets volants non identifiés na roto i te reo Farani) e to ratou mau ratere, e feia no te reva mai. E parau feruri-noa-hia anei te mau OVNI, e haavare, e aamu noa i faaineinehia e te feia e hinaaro ra e faaooo i te tiaturi ohie o te taata?

I rotopu i te feia e parau nei e ua ite ratou i te mau OVNI aore ra to ratou mau horopatete no te reva mai, e feia ïa mai te tahi pae ratou ia hiˈohia, e feia hoi te nehenehe e tiaturihia; inaha, i rotopu i te feia e tiaturi nei i teie mau ratere no ǒ mai i te mau palaneta ěê, te vai atoa ra te mau orometua haapii e te mau aivanaa maramarama. Te tiaturi nei ratou e te hiˈo maira te feia no te reva mai i te taata e, i te tahi mau taime, e paraparau atoa mai ia ratou. Ua ineine te mau pǔpǔ turu i te feia tiaturi i te mau ratere no te reva mai, i te tauturu i te mau taata e parau nei e ua farerei aore ra ua paraparau ratou e te feia no te reva mai.a

Opuaraa a te feia no te reva no te faaora i te fenua

I roto i te buka ra Feia ěê i rotopu ia tatou (beretane), te uiui ra o Ruth Montgomery i te tahi o te feia e rahi noa ˈtura e tiaturi nei e e feia ratou no te reva mai i roto i te tino taata. Te tohu nei vetahi e parau ra e e feia ratou no te reva mai i roto i te tino taata e, i te matahiti 2000, e tupu “te hoê ohipa na te reva teitei ta te mau hui melahi e te feia mana i ineine i te faaruru.” Te tiaturi nei te tahi mau taata e te faaohipa nei te feia no te reva mai i te mau OVNI no te haaputu e no te paruru i te mau raau tupu e te mau animala aore ra e faaohipahia te mau OVNI ei pahi reva no te faaora i te mau mirioni taata i te haamouraa i nia i te fenua e fatata maira. I muri aˈe i te haamouraa rahi, e hoˈi atu te mau taata i nia i te fenua no te haamata i “te Anotau Apî e te Faanahoraa Apî” o te maramarama i te pae varua. Ua parau te hoê taurearea no Colorado, i te mau Hau Amui no Marite, e melo oia no te hoê pǔpǔ e pii ra ia ratou “Ui Apî Ěê,” ia A ara mai na! ma te manaˈo tiaturi e: “Te tiai nei vau e to ˈu mau hoa ia haere mai to matou mau tupuna no te reva mai e tii ia matou na roto i te hoê hihi.”

Te parau nei vetahi o te feia e tiaturi nei e e feia no te reva mai ratou e mea arataihia ratou e te Atua, e te parau nei vetahi atu e te paraparau noa nei ratou ia ˈna no te ani i te manaˈo no te tauturu i te huitaata nei. Te faaohipa ra anei te Atua i te mau ratere no te mau palaneta ěê no te faaora i te huitaata nei i te hoê ati e fatata maira i nia i te ao nei?

To te Atua paraparauraa mai i te taata

I te omuaraa o te aamu o te taata, ua paraparau mai te Atua e te taata. Te faatia ra te Bibilia i te mau aparauraa i rotopu i te Atua e Adamu raua Eva, Noa, Aberahama, e vetahi atu.b (Genese 3:8-10; 6:13; 15:1) Ua faaohipahia te moemoeâ, te reo, e te orama no te faaite mai i te hinaaro o te Atua e no te papai i te Bibilia. Teie râ, i te hoperaa te Bibilia, ua titauhia anei e ia tupu te taairaa i rotopu i te raˈi e te huitaata nei? Aita, inaha te na ô ra te Bibilia e, na roto i te mau Papai Moˈa, e “au roa te taata no te Atua i te mau ohipa maitatai atoa ra.” (Timoteo 2, 3:17) Ia au i te Bibilia, e noaa mai te aratairaa no te faaruru i teie mau tau arepurepu i roto i te Parau papaihia a te Atua. Noa ˈtu râ, e tia anei ia tiaturi e e faatae mai te Atua i te tahi poroi aore ra te tahi mau faaueraa taa ê na roto i te hoê auvaha no ǒ mai i te reva? Eita, inaha ua parau te aposetolo Paulo e: “O te tahi melahi no te raˈi mai, ia aˈo atu ia outou i te evanelia maori râ i tei aˈohia ˈtu e matou ia outou na, ia riro ïa oia ei anatema.”—Galatia 1:8.

Noa ˈtu e e au ra e te tuea ra te mau faatiaraa a te mau taata no te reva mai e te mau parau tohu a te Bibilia, oia hoi e fatata roa te fenua i te faaruru i te mau tauiraa rahi, te pûpû nei ratou i te ravea faaoraraa i niuhia i nia i te tahi feia ěê. Aita te Bibilia e faaitoito ra i te taata ia imi i te parururaa i roto i te tahi pahi reva ê aore ra i te tahi atu vahi. Teie râ, te faaue maira oia ia imi i te parururaa i roto i te hoê taairaa pûpûhia e te Atua, e pûpûraa tei faataipehia e te bapetizoraa i roto i te pape. (Petero 1, 3:21; a faaau e te Salamo 91:7; Mataio 28:19, 20; Ioane 17:3.) E ua parau Iesu e, o “te mau papu e tae noa ˈtu i te hopea ra, oia te ora.”—Mataio 24:13.

Aita anei teie mau irava e haafaufaa ra i te hoê taairaa pae varua e te Atua ia noaa te ora, eiaha râ te tahi vahi tapuniraa materia? No reira, eita te mau aamu no nia i te ‘feia e ere i te taata’ e tauturu nei i te huitaata ia ora, te faatioi nei râ i te manaˈo o te taata i te mea ta te Atua e titau ra ia noaa to ratou maitai mure ore.

O vai râ te tamata ra i te faaatea ê i te taata i te ravea faaoraraa a te Atua, ma te parau e e tia oia no te Atua? I roto i ta ˈna buka Report on Communion, te na ô ra o Ed Conroy e, i roto i te mau maimiraa a “[te feia tuatapapa i te mau OVNI] i noaa i te ite i te pae no te ihi feruriraa e te ihi totiale,” e itehia te tahi mau tuatapaparaa taaihia i “te ‘feia e haere mai e hauti i te po,’ te tupapau, te tupapau tupai, te tupapau e fa mai, te orama faaroo, e te tahi atu tei parauhia e demoni.” E rave rahi feia tuatapapa i te mau OVNI e te feia e parau nei e e feia no te reva mai ratou i roto i te tino taata, te na ô nei e eita e titauhia te mau pahi reva no te ratere. Te parau nei ratou e e nehenehe teie mau taata ěê e ratere ma te ite-ore-hia e e fa faahou mai i te mau vahi atoa ma te ore e tae mai na nia i te pahi reva.

Te faaara ra te Bibilia e te tapao a Satani e ta ˈna mau demoni, o te haavareraa ïa i te huitaata nei. Te faaohipa nei ratou i te hepohepo e te taa ore o te huitaata nei no te pûpû i te tahi ravea o te huti paha i te anaanatae, e mea haavare râ. (Korinetia 2, 11:14) Teie ïa te faaararaa a te Bibilia: “Ia tae i te mau tau a muri atu e faarue ai te tahi pae i te faaroo nei, i te faarooraa ˈtu i te mau varua haavare, e te parau o te mau demoni ra.”—Timoteo 1, 4:1.

Oia atoa i teie mahana, e tia ia haapae roa i te mau faraa mai e te mau aratairaa e parauhia ra e mea maitai no ǒ mai taua feia ěê ra, noa ˈtu eaha to ratou huru. Te mau taata e pee i te mau parau a “te feia no te reva mai” eiaha râ i te Parau a te Atua, te haavarehia ra ïa ratou—e hape rahi roa ïa i teie tau ati rahi.

[Nota i raro i te api]