Te papai mai nei te feia taio

Te mau fifi o te tamaaraa Mauruuru roa no ta outou mau tumu parau no nia i te mau fifi o te tamaaraa. (8 no titema 1990) Ua roohia vau i te fifi o te patoiraa i te tamaa e piti matahiti i teie nei, e i teie nei atoa, te topa faahou nei vau i roto i te mau peu e te mau haerea tahito. Ua riro mau â te haafatataraa ˈtu ia Iehova ei tauturu no ˈu. Mea oaoa roa ia ite e mea nafea o A ara mai na! ia horoa i te tauturu e te tamǎrûraa i te feia e fifi nei ma te here e te maramarama maitai.

L. H., Beretane

Mea pinepine roa vau i te roohia i te maˈi hepohepo e te fifi o te patoiraa i te tamaa, no reira, ua oaoa roa vau i te mea e ua tuatapapa te Taiete i teie mau fifi na roto i te mau parau ohie roa, ma te faaite e e nehenehe te mau vahine e ora mai i teie mau fifi o te tamaaraa. (8 no titema 1990) Mauruuru no to outou tuatapaparaa i teie mau fifi paraparau-ore-hia.

C. L., Farani

Mea faahiahia roa na ˈu ia tuatapapa anaˈe ta outou vea i te mau tumu parau aimârôraa ta matou, te mau katolika, e ore e hiˈopoa nei. Teie râ, ua feaa roa vau i ta outou tumu parau no nia i te mau fifi o te tamaaraa. A 11 matahiti i teie nei, ua roohia vau i te fifi o te patoiraa i te tamaa. Te parau nei outou e e paruparu noa teie e te faaitoito nei outou ia fariu atu i nia i te Atua ia faaore mai oia i teie hapa; e maˈi ino mau râ teie. Ua hau atu ïa i te hoê noa hinaaro e ia au mai vetahi ê ia oe; e titauraa teie no te faaruru i te mǎtaˈu ia ore oe e herehia mai.

J. W., Helemani

Aita matou i faaiti i te inoraa o te mau fifi o te tamaaraa, ua faaite râ matou e no roto mai ratou i te tahi ‘ahoahoraa hohonu.’ Ei hiˈoraa, mea pinepine ‘te mǎtaˈu ia ore oe e herehia mai’ i te faahohoˈa i te manaˈo haafaufaa ore ta te taata maˈi e faatupu ra. No reira, ua faaitoito ta matou tumu parau ia faatupu i te faatura ia ˈna iho ia au i te mau faufaa e faahitihia ra e te Bibilia e ia atuatu i te auhoaraa e te Atua. Ia paruparu noa ˈtu te hoê taata i roto i ta ˈna aroraa i teie maˈi, e nehenehe oia e tamǎrûhia ia ite oia e te faaore nei te Atua i ta ˈna mau hape e te taa maitai ra ia ˈna i te tumu o to ˈna mau paruparu.—Te feia nenei.

No te aha te Atua i farii ai i te mauiui Ua taio vau i te A ara mai na! mai te haamataraa e tae atu i te hopea mai te matahiti 1985 mai â, aitâ râ vau i ite aˈenei i teie huru pahonoraa maramarama maitai i te uiraa ra e no te aha te Atua i farii noa ˈi i te mauiui mai tei horoahia mai i roto i ta outou vea no te 8 no atopa 1990. E noaa mai i te taata e feruri maite i te mau pahonoraa papu maitai ia taio oia i teie mau tumu parau o te ore roa ˈtu e nehenehe e faahapahia.

E. T. V., Beresilia

Te ravea parururaa o te tino No oti noa ˈtura vau i te taio i te tumu parau ra “Te ravea parururaa o te tino—Te hoê semeio o te poieteraa.” (8 no novema 1990) I te omuaraa ra, ua mǎtaˈu rii vau i te taio i teie vea, i to ˈu râ haamataraa i te taio, ua taa ˈtura ia ˈu i te puai mana hope o te Atua!

L. Z., Fenua Marite

Ua hitimahuta roa vau i ta outou tumu parau. Te faahohoˈa ra outou i te ravea parururaa o te tino mai te mau faehau e mauhaa tamaˈi ta ratou, e e ere roa ˈtu i te mea maitai. Na nia i to tatou tiaraa kerisetiano, te patoi nei tatou i te tamaˈi. Aore ra, no te faaarearea noa paha teie mau hohoˈa?

D. C., Helemani

Aita teie hohoˈa i ravehia no te turu i te mau tamaˈi a te taata. Ua rave-noa-hia râ no te tauturu i te feia taio ia taa i teie tumu parau fifi roa. Inaha, ua faaohipa atoa te Bibilia iho i te tamaˈi ei niu no ta ˈna mau faahohoˈaraa, ma te faaau i te mau kerisetiano i te mau faehau e mauhaa ta ratou. (Ephesia 6:10-17)—Te feia nenei.