Ia au i te Bibilia

Te au ra anei te Atua i te iteraa ia tatou ia mauiui?

I RARO aˈe i te teiaha o te hoê satauro rahi hamanihia e te raau, te tutava noa ra te hoê taata, ma te hiˈa i rotopu i te nahoa taata a tahe noa ˈi te toto na roto mai i te hoê hei taratara i nia i to ˈna upoo. I to ˈna tapaeraa ˈtu i te vahi “haapoheraa,” faataravahia oia i nia i te satauro; e ua patǐtǐhia te mau naero rarahi i nia i to ˈna rima. Fefe roa oia i te mauiui a puta ai to ˈna iˈo i te naero. I te faatiaraahia te satauro, ua uˈana roa ˈtu â te mauiui. Ia au i te Panorama, te hoê vea no Philipino, e rave-pinepine-hia taua mau peu mauiui ra ia tupu anaˈe te mau oroa o te Hebedoma Moˈa i Philipino.

E faahohoˈaraa o te mau mauiuiraa o Iesu no teie nei mau mahana tei faahitihia i nia ˈtu. Tera râ, aita teie taata e hauti ra i te hoê tuhaa o te hoê hautiraa taata ora. E mea mau iho â te reira—te mau naero, te toto, te mauiui.

I te mau vahi ê atu, e nehenehe e itehia te mau taata faaroo katolika no Roma i te ruturaa ia ratou iho i mua i te huiraatira no to ratou hinaaro ia roohia i te mau mauiui o te Mesia. No te aha? Te na reira nei te tahi mau taata no to ratou tiaturiraa e e faatupu to ratou mau mauiui i te semeio, mai te faaoraraa i te maˈi o te feia i herehia e ratou. Te na reira ra vetahi ê atu no te hoo i te mau hara ei taraehara, ta ratou e mǎtaˈu ra e, aita e faaoreraa hara maoti te faataheraa i to ratou iho toto. Te faataa ra te buka ra The Filipinos e: “E tamâ maitai te mauiui i te feruriraa e te nephe taata. . . . Te manaˈohia ra e e matara mai te taata hara mai roto mai i te mau hara i tamâhia e e haamamahia oia i te mau hopoia.”

Aita roa ˈtu râ te haamauiuiraa ia ˈna iho e ite-noa-hia ra i rotopu i te mau katolika no Philipino. Te tiaturi nei te mau taata no roto mai i te mau faaroo ěê e te mau fenua ěê e e faufaa to te mau haamauiuiraa ia ˈna iho i mua i te aro o te Atua.

Ei hiˈoraa, i to ˈna imiraa i te parau mau, ua faarue te Bouddha ra o Siddhārtha Gautama, i ta ˈna vahine e ta ˈna tamaiti e reva ê atura i te medebara, i reira to ˈna oraraa e ono matahiti ma te haapaeraa ia ˈna iho i te mau mea oaoa o te oraraa. Ua parahi tufene noa oia tau hora te maoro ma te fifi e te mauiui atoa hoi e ua parau oia i muri iho e ua ora o ˈna i te hoê taime roa ma te amu-noa-raa i te hoê huero raiti i te mahana, ua pararai roa hoi no reira oia i parau ai e: “Ua piri roa te iri o to ˈu opu i te ivi o to ˈu tua.” Tera râ, aita roa ˈtu te haamauiuiraa ia ˈna iho i afai mai i te haamaramaramaraa ta ˈna i maimi noa na.

Oia atoa, ua roohia te mau fakir hindou no Inidia i te mau haamauiuiraa fifi mau e i te tahi mau taime ua uˈana roa hoi—te taravaraa i rotopu i te auahi, te hiˈo-tamau-noa-raa i te mahana e tae noa ˈtu i te taime e po roa ˈi to ratou mata, te tia-noa-raa i nia i te hoê avae aore ra i nia i te hoê tiaraa fifi mau e no te hoê area taime roa. Ua manaˈohia e no te faufaa rahi o te maitai o te tahi mau taata tei haapae i te oaoa o te oraraa, e nehenehe te oire e paruruhia i te aroraa a te mau enemi.

Oia atoa, te faahiti ra te Bibilia i te parau o te mau taata haamori ia Baala tei tâpûpû ia ratou iho “ta ratou ïa peu, i te tipi e te mahae, e ua ohî noa maira te toto i nia ia ratou” ma te tamata i te huti i te ara-maite-raa o to ratou atua ma te manuïa ore.—Te mau arii 1, 18:28.

‘Ia haapeapea outou ia outou iho’

E e parau mau ua aˈo o Iehova i to ˈna nunaa maitihia: “Ia faahaehaâ outou ia outou iho,” ua matauhia i te taa e o te haapaeraa maa ïa. (Levitiko 16:31) Ua riro teie huru haapaeraa maa i te hoê huru no te faaite i te oto e te tatarahapa no te mau hara aore ra ia roohia tatou i te mau huru tupuraa peapea mau. E no reira, e ere te haapaeraa maa i te hoê huru faautuaraa ia ˈna iho, ua riro râ ei faahohoˈaraa i te faahaehaaraa ia ˈna iho i mua i te aro o te Atua.—Ezera 8:21.

Tera râ, i taua tau ra te vai ra te tahi mau ati Iuda tei manaˈo hape e e faufaa to te fifi iho i faatupuhia na roto i te haapeapearaa i te nephe taata e e turai te reira ia horoa mau â te Atua i te tahi mea no te haamauruuru ia ratou. Ia ore anaˈe taua huru haamauruururaa ra e faataehia mai, e ani ratou ma te teoteo i te Atua ia horoa mai i te haamauruururaa ta ratou i manaˈo e e tia ia horoahia na ratou: “Eaha matou i haapae ai i te maa, e aore oe i hiˈo mai? E i faahaehaa ˈi i to matou [nephe], e aore oe i haapao mai?”—Isaia 58:3.

Teie râ ua hape ratou. Ia au i te auraa i te pae faaroo aita te haapaeraa maa e faahiti ra i te parau o te haapaeraa i te mau mea atoa e faaoaoa ra i te oraraa, o te hamani-ino-raa i te tino ma te ore e tamaa mai te huru ra e e haamaitairaa to te haamauiuiraa i te tino aore ra to te mau mea au-ore-hia. E nehenehe râ te manaˈo hohonu e te puai e tamârǔ i to ratou poia. Mai te peu e te peapea nei te feruriraa no te mau fifi ru, e nehenehe te tino e ore e hiaai i te maa. Na te reira e haapapu i te Atua i te hohonuraa o te mau manaˈo o te taata e haapae ra i te maa.

Te au ra anei te Atua i te haamauiui ia ˈna iho?

E huti anei ra te Poiete here i te tahi oaoa ia hiˈo o ˈna e te haamauiui ra te mau taata ia ratou iho? E parau mau e i te tahi taime, e faahepohia te mau kerisetiano ia riro ei ‘taata tei amui atoa mai i roto i te haamauiuiraa o te Mesia,’ aita te reira e faataa ra e ia haere ratou e imi i te haamauiuiraa aore ra ia imi i te tiaraa o te hoê taata i haapohehia no ta ˈna faaroo.—Petero 1, 4:13.

Mea papu, e ere roa ˈtu Iesu i te hoê taata i haapae i te mau mea oaoa o te oraraa. Ua amuamu te mau raatiraa faaroo no te mea aita te mau pîpî a Iesu i haapae i te maa, e ua pari roa ˈtu ratou ia Iesu e “e taata amu e te inu uaina.” (Mataio 9:14; 11:19) Ua faaite o Iesu i te aifaitoraa i roto i te mau tuhaa atoa e aita roa ˈtu oia i titau ia ˈna iho aore ra ia vetahi ê hau atu i te nehenehe e maraa.—Mareko 6:31; Ioane 4:6.

Aita roa ˈtu tatou e ite ra i te hoê noa ˈˈe niu o te haapaeraa i te mau mea oaoa o te oraraa i roto i te mau Papai, mai te huru ra e e mauruuru mai te Atua ia haapaehia te mau mea faufaa aore ra te mau mea au atoa o te oraraa. A tapao na i te mau parau a Paulo no nia i taua mau huru raveraa ra mauiui mau: “E mea huru au maitai â hoi taua mau peu ra i te haamori a te hinaaro o te taata nei, e te faahaehaa ra, e te faaherehere ore i te tino nei; eita râ e haamaitaihia ˈtu e mea faarearea taata nei ïa.”—Kolosa 2:23.

I to ˈna vai-noa-raa ei monahi, ua haamauiui ino roa o Martin Luther ia ˈna iho. Noa ˈtu râ te reira, i muri aˈe, ua patoi oia i taua mau huru raveraa ra, ma te parau e e faaitoito te reira i te manaˈo e e piti eˈa e aratai i te Atua ra, te eˈa teitei aˈe e te eˈa haehaa aˈe, area te Bibilia te haapii ra oia e hoê anaˈe eˈa e aratai atu i te ora—te tuuraa i te tiaturiraa i roto ia Iesu Mesia e to ˈna Metua, o Iehova. (Ioane 17:3) I te tahi aˈe pae, te hiˈo nei te tahi atu mau taata i te mau peu mauiui mai te hoê huru faaoraraa ia ˈna iho.

Te na ô nei te buka ra Church History in Plain Language no nia i te haapaeraa i te mau mea oaoa o te oraraa e: “Ua riro te tururaa i te faanahonahoraa a te mau monahi ei manaˈo hape no nia i te taata. Te parau ra te monahi e, ua taaihia te nephe i te tino mai te hoê mau auri i taaihia i te hoê tino pohe. E ere te reira i te manaˈo o te Bibilia no te oraraa o te taata.” Oia mau, tei rapae roa i te Bibilia te manaˈo e e au te Atua i te taata e haamauiui ra ia ˈna iho. No ô mai teie manaˈo i te feruriraa hape o te feia ite rahi parauhia Gnostique, oia hoi mea ino te mau mea atoa i taaihia i te tino e e tia ia rave-uˈana-hia e roaa mai ai te ora.

I te mea e te hinaaro nei Iehova ia oaoa tatou, eita roa ˈtu te haamoriraa i te hoê Atua oaoa e riro ei ohipa e aratai tia ˈtu i te haapaeraa i te mau mea oaoa o te oraraa. (Koheleta 7:16) Hau atu â, i roto i te taatoaraa o te Bibilia aita roa ˈtu tatou i parauhia mai e e aratai taua huru hamani-ino-raa ra ia ˈna iho i te faaoraraa. Te haapapu maitai nei râ te Parau a te Atua e na te toto o Iesu, apitihia e to tatou faaroo ia ˈna, e tamâ i ta tatou mau hara atoa.—Roma 5:1; Ioane 1, 1:7.