Te mau uiraa fifi mau

I roto i te roaraa o to outou oraraa, ua ui paha outou i teie uiraa: ‘Mai te peu e te vai ra te hoê Atua, no te aha oia e faatia noa ˈi i teie mau huru mauiui atoa? Nafea oia e nehenehe ai e vaiiho i teie huru tupuraa ia tupu maoro noa? E hope anei te mau mauiui i te hoê mahana?’

No te mea aita ratou e ite ra i te hoê pahonoraa maramarama maitai, e rave rahi mau taata teie e inoino roa nei. Ua tae roa hoi vetahi i te parau e o te Atua te tumu o to ratou mau ati, aore ra eita ratou e tiaturi faahou ia ˈna.

Mai te reira hoi te huru inoino o tei haamauiui roa i teie taata i ora mai i te Taparahiraa rahi ta te mau nazis i rave i nia i te mau mirioni ati Iuda, i to ˈna parauraa e: “Mai te peu e e mitimiti outou i to ˈu nei mafatu, e taero roa ïa outou.” Teie te mau parau riaria mau a te tahi atu taata, ua pohe to ˈna mau hoa e to ˈna mau fetii i roto i te hamani-ino-raa i te nunaa taata i tupu i roto i te Tamaˈi rahi Matamua: “Teihea roa te Atua i to matou hinaaroraa i to ˈna tauturu?”

E rave rahi mau taata teie e feaa nei. I to ratou hiˈoraa, mea maamaa roa ia manaˈo e e nehenehe te hoê Atua aroha e te hamani maitai e vaiiho i te ati ia tairi noa i te taata i roto i teie rahiraa taime.

Te tuhaa a te taata

E tia ia farii e, i roto i te roaraa o te mau senekele, e tae noa ˈtu i te mau tausani matahiti, ua hamani ino mau â te mau taata i to ratou taata-tupu. Aita e nehenehe e faaauhia te rahiraa e te faito hairiiri i naeahia e teie mau mauiui.

Maoti te mau “haereraa i mua”, ua itea mai i te taata te mau ravea riaria roa ˈtu â no te taparahi e no te hamani ino i te taata: te mau pupuhi, te mau pupuhi haapurara, te mau manureva tamaˈi, te mau pereoo pâ auri, te mau topita, te mau pupuhi auahi, te mau mauhaa taero e atomi. I roto noa i te senekele XX, ua pohe tau hanere mirioni taata i roto i te mau tamaˈi i rotopu i te mau nunaa. E rave rahi hanere mirioni taata o tei pepe aore ra o tei mauiui na roto i te mau tupuraa taa ê. Area te mau pau i te pae materia ra, mai te vavahiraahia te mau fare e te mau tauihaa, eita ïa e nehenehe e taiohia.

A manaˈo na i te oto, te mauiui e te mau roimata i faatupuhia e te tamaˈi! Mea pinepine hoi, o te feia hapa ore — te feia ruhiruhia, te mau tamarii, te mau aiû iti — teie e haamauiuihia nei. Area te feia hamani ino ra, aita roa ˈtu ïa ratou i haapeapeahia.

I teie nei â mahana, ua î roa te ao nei i te mauiui. Eita te hoê mahana e mairi e aita e taata e taparahihia aore ra e hamani-ino-hia. Area vetahi ra, te pepe nei ïa aore ra te pohe nei i roto i te mau ati aore ra te mau ati natura mai te mau vero, te mau pue pape e te mau aueueraa fenua. Te roohia nei vetahi i te mau ohipa tia ore, te mau manaˈo paetahi, te veve, te poia, te maˈi aore ra te tahi atu mau mauiui.

Mea nafea to te hoê Atua hamani maitai poieteraa i te huitaata nei e i muri iho, e vaiiho noa ˈtu ai ia ˈna ia roo-noa-hia i te mau mauiui ino mau e rave rahi senekele te maoro?

Te tahi mea huru ê i te pae no te tino o te taata nei

Te itehia ra teie mea huru ê i roto i te tino o te taata nei. Te tuea nei te manaˈo o te feia atoa i tuatapapa i te tino no te haafaahiahia i to ˈna aravihi rahi.

Teie te tahi mau tuhaa maere mau o te tino: te mata, o te ore e naeahia e te hoê pata hohoˈa; te roro, mea haihai roa hoi te hoê matini roro uira aravihi roa ˈˈe i pihai iho ia ˈna; te huru fifi roa ia faataa ia tahoê anaˈe te mau vaehaa o te tino e eita hoi tatou e feruri noa ˈˈe i teie ohipa; te semeio o te fanauraa e inaha, i roto noa e iva avae, e fanauhia mai te hoê aiû haviti roa, hoê â hohoˈa e to ˈna mau metua. E rave rahi mau taata e manaˈo nei e, o te hoê mana teitei roa te tumu o teie ohipa faahiahia roa oia hoi te tino taata nei: te Poiete, te Atua Mana hope ra.

Teie râ, te paruparu nei teie tino faahiahia mau. I roto i te roaraa o te tau, e roohia oia i te mau fifi o te maˈi e te ruhiruhiaraa; ia pohe oia, e ino roa oia e e riro roa ˈtu ai ei rehu. Auê te aroha e! Ia naeahia ia tatou i te faito e nehenehe ai tatou e fanaˈo i te mau ahuru matahiti to tatou haapueraa i te aravihi e te ite, i reira ua naeahia ia tatou i te tahi paari, e faarue mai to tatou tino. E ite ïa tatou i te hoê taa-ê-raa hairiiri mau e te huru oraora maitai, te itoito e te haviti o ta tatou i fanaˈo i to tatou apîraa ra.

Nafea ia faataa e ua faatupu te hoê Poiete here mau i te hoê semeio mai te tino taata nei o te roohia i te hoê hopea ino mau? Eaha te faufaa ia poiete i te hoê tino aravihi roa i te omuaraa, e rave rahi mau ohipa o ta ˈna e nehenehe e rave, o te ite atu i muri iho i te hoê hopea peapea mau?

Te hoê tatararaa

Te parau nei vetahi e e mau ravea anaˈe te ohipa ino e te mauiui ta te Atua e faaohipa nei no te haapaari ia tatou na roto i te ati. O te parau ïa ta te hoê orometua méthodiste i faaite i te na ôraa e: “Te patoiraa ˈtu i te ino na roto i te maitai, o te tuhaa ïa o te tabula ta te Atua i opua no te tapae atu i te ora.” Ia au i teie ekalesiatiko, na te Atua ïa i opua ia haamauiui te feia ino i te feia maitai, no te haamaitai ia ratou e tae roa ˈtu i te ora.

Tera râ, e ô mai anei i roto i te feruriraa o te hoê metua tane mea here roa na ˈna ta ˈna mau tamarii ia faarue atu ia ratou i roto i te rima o te hoê taata hamani ino mau no te haamaitai i to ratou iho huru? Eaha te nehenehe e parau no teie mau taurearea e pohe nei i roto i te mau ati, e taparahihia nei, aore ra e pohe nei i te tamaˈi? Nafea ratou ia haamaitai i to ratou huru ia pohe anaˈe ratou? No reira, e ere roa ˈtu i te mea tano ia manaˈo e ua vaiiho noa te Atua i te mauiui no te haapaari i te taata.

Aita hoê metua tane manaˈo aifaito maitai e hinaaro e ite i te feia o ta ˈna e here ra ia mauiui aore ra ia roohia i te ati. Te taata e opua noa ˈtu e ia roohia to ˈna mau fetii i te mauiui no te haamataro ia ratou, e parauhia ïa oia e taata ino, e e taata maamaa atoa hoi.

No reira, e nehenehe anei e parau e, ua opua mau â te Atua, te Metua here e te Poiete paari mau o te ao nei, e faaô atoa mai i te mauiui i roto i ta ˈna ‘tabula e tapae atu ai te taata i te ora’? Ia na reira tatou i te parau, te faataa ra ïa tatou ia ˈna mai te hoê Atua taehae e te hairiiri mau, e mau huru anaˈe hoi o ta tatou e ore roa ˈtu e farii i roto i te mau taata ino roa ˈˈe.

Nafea tatou e ite ai?

E fariu tatou i nia ia vai e itea mai ai te pahonoraa i te mau uiraa atoa no nia i te farii-noa-raa te Atua i te mauiui e te ino? I te mea e o te Atua te faahapahia ra, e ere anei i te mea tano ia hiˈopoa i te parau o ta ˈna e faataa maira?

No reira, e tia ia tuatapapa i te buka ta te Atua e faataa maira mai te aratai o ta ˈna i haapapai na te taata nei: te Bibilia, te mau Papai Moˈa. Noa ˈtu eaha te manaˈo o te taata no nia i teie buka, e tia mau â ia tuatapapahia, no te mea, ia au i te aposetolo Paulo, “te mau parau moˈa atoa i papaihia ra e mea faaurua mai ïa e te Atua, e e mea maitai (...) ei faaiteraa hapa”. (Timoteo 2, 3:16.) Ua papai atoa oia e: “A farii mai ai outou i te parau a te Atua i ta outou i ite ia matou nei, aore outou i farii ei parau na te taata, ei parau râ na te Atuaa.” — Tesalonia 1, 2:13.

E ere noa te maimiraa i te mau tumu no reira te Atua e vaiiho noa ˈi i te mauiui i te hoê tuatapaparaa i te pae feruriraa. Mea titauhia ia itea mai i te pahonoraa i teie uiraa no te taa papu i te auraa o te mau ohipa e tupu nei i roto i te ao nei, te mau ohipa tei fatata roa i te tupu e no te aha te reira e tano ai no tatou tataitahi.

E tia ia vaiiho i te Bibilia ia faataa i ta ˈna parau, o o ˈna hoi te ravea e nehenehe ai te hoê taairaa e tupu i rotopu i te Atua e te fetii taata nei. Eaha ta ˈna e parau ra no nia i te tumu o te mau mauiui e te mau tumu no reira te Atua e farii noa ˈi i teie huru tupuraa?

Ua taaihia te pahonoraa i teie uiraa i to tatou huru i te pae feruriraa e i te pae no te here. Te faaite ra te Bibilia e ua tuu te Atua i roto i te taata nei i te hoê hinaaro faufaa roa, oia hoi te titauraa i te tiamâraa. E hiˈopoa anaˈe na e eaha te auraa o te parau ra te tiamâraa ia maiti e e hiˈo anaˈe na i te taairaa e vai ra i rotopu i teie tiamâraa e te mau tumu no reira te Atua i vaiiho noa ˈi i te mauiui.

[Nota i raro i te api]