Uiraa 3: No te aha te Atua e faatia ˈi ia mauiui au?

MEA inu ava te papa o Ian. Ua fanaˈo Ian i ta ˈna i hinaaro i te pae materia, aita râ i fanaˈo i te here o to ˈna papa. Te parau ra o ˈna: “Aita vau i here roa ia ˈna, mea inu hoi oia e mea ino atoa i nia i to ˈu mama.” A paari mai ai o Ian, ua uiui atura oia e te vai mau ra anei te Atua. Ua feruri oia, “Mai te peu e te vai mau ra te Atua, no te aha oia e faatia ˈi ia mauiui te taata?”

No te aha teie uiraa?

Noa ˈtu e aita e fifi rahi roa ta oe, e riri paha oe i te ite i te feia hapa ore ia mauiui. E auraa taa ê râ to teie uiraa no oe mai te peu e, mai ia Ian, te mauiui nei oe aore ra ua maˈihia aore ra ua pohe te hoê taata ta oe e here ra.

Eaha ta vetahi e pahono?

Te tiaturi nei vetahi e te faatia nei te Atua i te mauiui no te tamata ia tatou e no te haapii ia tatou i te haehaa e te aroha. No te tahi atu, e mauiui te taata no te mau hara ta ratou i rave i roto i te hoê oraraa tahito. Te vai atoa ra te manaˈo ra e te faautua ra te Atua ia ratou no te hunaraa i ta ratou mau hara.

Eaha te auraa o teie mau pahonoraa?

Aita te Atua e tâuˈa ra i te mauiui o te taata, mea fifi roa ïa ia here ia ˈna. Mea aroha ore te Atua.

Eaha ta te Bibilia e haapii ra?

Te faaite maitai ra te Bibilia e e ere na te Atua te hape e mauiui ai te taata. “Eiaha roa ei taata faahemahia ra e parau e: ‘Na te Atua i faahema mai iaˈu.’ E ore hoi te Atua e faahemahia e te ino, ˈe e ore atoa oia e faahema i te taata ia rave i te ino.” (Iakobo 1:13, Te Faufaa Api) Aita roa ˈtu te manaˈo e o te Atua te tumu o te mauiui e tuati ra i to ˈna mau huru maitatai faataahia e te Bibilia.

Hoê o te mau huru maitatai matamua o te Atua, o te aroha ïa. (Ioane 1, 4:8) No te haapapu i te reira, te faataa ra te Bibilia e hoê â to te Atua huru aau i to te hoê mama i nia i ta ˈna aiû. “E moe anei te aiû i te metua vahine mau iho; e aitâ ˈtura e ite i te aroha i te tamaiti no to ˈna iho opu?” ta te Atua ïa e ui ra. “E, e moe â ïa ia ˈna; eita râ oe e moe ia ˈu.” (Isaia 49:15) Mea fifi roa ia feruri i te hoê mama î i te here e haamauiui ra i ta ˈna aiû ma te opua, e ere anei? E tamata te hoê metua here i te tamǎrû i te mauiui o ta ˈna aiû. Oia atoa, aita te Atua e haamauiui ra i te taata.—Genese 18:25.

Noa ˈtu râ, te mauiui nei te feia hapa ore. E ui paha oe, ‘Mai te peu e te tâuˈa maira te Atua e e mea puai hope oia, no te aha oia e ore ai e faaore i te mau tumu o te mauiui?’

E tumu maitai to te Atua e vaiiho ai oia i te mauiui. Teie hoê: E pinepine e na te taata e haamauiui i te tahi atu. Aita te taata haavî e rave rahi o te haamauiui ra ia vetahi ê e hinaaro ra e taui. Ia faaore te Atua i te hoê tumu rahi o te mauiui, e titauhia ia haamou oia i taua mau taata ra.

Ma te faataa no te aha aitâ te Atua i haamou i te feia ino, ua papai te aposetolo Petero: “Aore te Fatu i faaroaroa i ta ˈna i parau maira, mai ta te tahi pae i parau ra e, e faaroaroa; e faaoromai rahi râ to ˈna ia tatou, aita roa i hinaaro e ia pohe atu te hoê, ia noaa paatoa râ te tatarahapa.” (Petero 2, 3:9) E faaiteraa te faaoromai o te Atua ra o Iehova o to ˈna here e aroha hamani maitai.

Ua fatata râ Iehova i te ohipa. E haamauiui oia i te feia i haamauiui i te feia hapa ore. E o ‘te pohe mure ore te utua’ a te feia i haamauiui i te tahi atu ma te tano ore.—Tesalonia 2, 1:6-9.

No te ite hau atu â no te aha te Atua e faatia ˈi i te mauiui e eaha ta ˈna e rave, a hiˈo i te pene 11 o te buka Eaha ta te Bibilia e haapii mau ra? E nehenehe e rave mai i nia i te www.jw.org

Eaha ta Iesu i parau no nia i te mauiui?

Aita Iesu i faahape i te Atua no te mauiui i haaati na ia ˈna. Teie râ ta ˈna i rave.

Ua faaite Iesu e aita te Atua e faautua ra i te feia hapa ore ma te haamauiui ia ratou. Ua faaora Iesu i te feia maˈi, pirioi e matapo. (Mataio 15:30) E piti haapiiraa faufaa te huti mai i ta ˈna mau semeio: A tahi, ua faaohipa Iesu i to te Atua puai no te tamǎrû i te mauiui, eiaha no te haamauiui. Te piti, ua faaora Iesu i te feia maˈi no to ˈna “aroha” ia ratou a ite ai i to ratou mauiui. (Mataio 20:29-34) Ua faaite Iesu ma te tia roa i te huru aau o to ˈna Metua i mua i te mauiui. Maoti te huru paraparau a Iesu e ta ˈna i rave, ua ite tatou e te oto nei te Atua i te ite i te mauiui e te hinaaro nei Oia e tamǎrû i te reira.—Ioane 14:7, 9.

Ua faaite Iesu o vai mau te tumu o te mauiui e rave rahi o te taata: Satani te Diabolo. “E taparahi taata oia mai te matamua mai â,” ta Iesu ïa i parau. (Ioane 8:44) Ua faataa atoa Iesu ia Satani te Diabolo mai “te arii o teie nei ao” e mai “tei haavare i to te ao atoa nei.”—Ioane 12:31; Apokalupo 12:9.

Ua horoa mai Iesu i te hoê tiaturiraa o te hoê tau e ore roa ˈi te mauiui. Ua haapii oia i ta ˈna mau pǐpǐ ia pure: “E to matou Metua i te ao r[a], . . . ia tae to oe ra hau. Ia haapaohia to oe hinaaro i te fenua nei, mai tei te ao atoa na.” (Mataio 6:9, 10) Ia faatere mai te Basileia o te Atua i te fenua, aita e mauiui faahou i nia i te fenua mai tei te raˈi atoa.

I roto i te hoê orama ta ˈna i horoa i te aposetolo Ioane, ua faataa Iesu i te oraraa ta te feia faaterehia e te Basileia o te Atua e ite. I reira te Atua “e horoi [ai] i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito.”—Apokalupo 1:1; 21:3, 4.