Te hoê ǒ faahiahia mau: Te tiamǎraa no te maiti

Eaha te mea au roa ˈˈe na outou? Ia noaa ia outou i te tiamâraa no te faatere i to outou oraraa? no te parau e no te rave mai ta outou e hinaaro? Aore ra mea au aˈe na outou ia faahepohia mai ta outou mau parau atoa e faahiti e ta outou mau ohipa atoa e rave, i te mau taime atoa, i roto i to outou oraraa taatoa?

Aita hoê taata tupuraa maitai e hinaaro ra ia erehia oia i te mana no te aratai i to ˈna oraraa e na te tahi atu taata e faatere i to ˈna oraraa taatoa. E oraraa haavî roa ïa te reira e te faatîtî. Inaha, te titau nei tatou i te tiamâraa.

Tera râ, nafea ia faataa i teie hiaai i te tiamâraa? Mea faufaa roa ia pahono i teie uiraa no te taa maitai e no hea mai te ino e te mauiui, e tae noa ˈtu i te mau tumu no reira te Atua i tiai ai e tae roa mai i teie nei hou oia e faaore ai i te reira.

Te natura taata nei

I to te Atua poieteraa i te taata, ua horoa ˈtu oia na ˈna, taa ê atu i te tahi atu mau ǒ faahiahia mau, i te tiamâraa ia maiti. Te faataa ra te Bibilia e ua poiete te Atua i te taata ‘ma to ˈna iho huru, ia au i to ˈna iho hohoˈa’; inaha, ua riro te tiamâraa ia maiti ei hoê o te mau huru o te Atua (Genese 1:26; Deuteronomi 7:6). Ua horoa ˈtura te Poiete na te mau taata i teie huru taa ê roa.

No reira ˈtura, mea au aˈe na tatou ia riro ei feia tiamâ maoti hoi i te riro ei mau tîtî na te mau faatere haavî. No reira atoa te mau faatereraa haavî e faatupu ai i te inoino e e aratai ai i te mau nunaa ia aro ia noaa mai to ratou tiamâraa.

E ere roa ˈtu teie hinaaro i te tiamâraa i te hoê manaˈo i tupu noa mai ma te tumu ore. Te faaite ra te Bibilia i te tumu mau o teie hinaaro i te na ôraa e: ‘Tei reira te varua o Iehova, tei reira atoa ïa te tiamâ.’ (Korinetia 2, 3:17). No reira, mea tano mau ïa ia hinaaro tatou i te tiamâ no te mea na te Atua i poiete ia tatou mai te reira te huru. Te hinaaro nei oia ia riro tatou ei taata tiamâ no te mea o o ˈna iho te Atua o te tiamâ. — Korinetia 2, 3:17.

Ua horoa atoa mai te Atua i te aravihi o te feruriraa, mai te iteraa, te feruriraa e te maramarama no te faataa i te mau ohipa, e mau aravihi anaˈe o te tuea maitai e te tiamâraa ia maiti e o te tauturu ia tatou ia feruri maite, ia faaau i te mau ohipa, ia rave i te mau faaotiraa e ia ite i te maitai e te ino (Hebera 5:14). Aita tatou i poietehia mai te mau matini taa ore aita to ratou e hinaaro, aore ra ma te arataihia e te hoê hiaai matapo, mai te mau animala ra te huru.

Taa ê atu i te tiamâraa ia maiti, ua noaa atoa i to tatou mau metua matamua i te mau mea atoa ta te hoê taata e nehenehe e titau: ua tuuhia raua i roto i te hoê paradaiso; ua ora raua i roto i te taoˈa rahi; ua fanaˈo raua i te hoê feruriraa e te hoê tino tia roa eita roa ˈtu e roohia i te maˈi, te ruhiruhiaraa e te pohe; e nehenehe ta raua e fanau i te tamarii o te tiaturi atoa e ora ma te oaoa; e inaha, a tupu noa ˈi oia i te rahi, e titauhia i te huitaata nei ia rave i teie ohipa anaanatae mau oia hoi te faariroraa i te fenua taatoa ei paradaiso. — Genese 1:26-30; 2:15.

No nia i te ohipa ta te Atua i faaineine, te na ô ra te Bibilia e: “Hiˈo aˈera te Atua i te mau mea atoa ta ˈna i hamani, e inaha, e mea maitai roa.” (Genese 1:31). No nia i te Poiete, te parau atoa ra oia e: “O tei tia roa ta ˈna ohipa ra.” (Deuteronomi 32:4). Oia mau, ua horoa oia na te fetii taata nei i te hoê haamataraa tia roa. Inaha, mea maitai roa te mau ohipa i te omuaraa.

Te tiamâraa taotiahia

Teie râ, aita anei e otia to teie ǒ faahiahia mau ra o te tiamâraa ia maiti? A feruri na. E oaoa anei outou i te faahoro i te hoê pereoo uira i rotopu i te mau tereraa pereoo apǐapǐ roa mai te peu e aita e faatureraa, e e nehenehe ta te taata tataitahi e maiti i to ˈna aveia, to ˈna haerea e to ˈna tere? Ahiri e e tiamâraa taotia-ore-hia i te pae no te tereraa pereoo uira, mea ino roa ïa.

Hoê â huru no te mau auraa i rotopu i te taata. Mai te peu e eita e taotiahia te tiamâraa o te tahi mau taata, e erehia ïa te tahi atu pae i to ratou tiamâraa. E aratai tia ˈtu hoi te tiamâraa taotia-ore-hia i te huenaneraa, o te faaino hoi i te tiamâraa o te taatoaraa. Mea titauhia te mau otia. No reira, mai te peu e ua horoa te Atua i te tiamâraa na te taata nei, e ere ïa ia rave oia mai ta ˈna e hinaaro ma te ore roa ˈtu e tâuˈa i te oaoa o vetahi ê.

Te na ô ra te Parau a te Atua no nia i teie parau e: “Ei feia tiamâ outou, eiaha râ taua tiamâ no outou ra e faarirohia ei tapoˈi parau ino.” (Petero 1, 2:16). No reira, te hinaaro ra te Atua e ia faaohipa te mau taata i to ratou tiamâraa ia maiti ma te haapao atoa i te maitairaa o vetahi ê. E ere teie tiamâraa o ta ratou e fanaˈo ra i te tiamâraa taatoa, e tiamâraa taotiahia râ, ia au maite i te tahi mau ture.

Teihea mau ture?

Ua poietehia tatou no te auraro i teihea mau ture? Eaha te mau ture maitatai roa ˈˈe no tatou nei? Te faahiti ra te irava a Petero 1, 2:16 i faahitihia ˈtu i nia nei, i te parau no te mau ‘tavini no te Atua’. E ere teie i te hoê faatîtîraa teimaha; te auraa râ o teie parau, oia hoi ua poietehia tatou no te haapao i te mau ture a te Atua. E oaoa noa tatou mai te peu e e auraro tatou i teie mau ture.

Mea teitei roa ˈˈe te mau ture a te Atua i te mau haapueraa ture atoa a te taata nei, e te horoa mai nei i te aratairaa maitatai roa ˈˈe no tatou paatoa nei. Te taiohia ra i roto i te Isaia 48:17 e: “O vau to Atua ra, o Iehova; o tei faaite ia oe i te mea e maitai ai oe ra; o tei aratai ia oe na te eˈatia maitai ia haere oe ra.” Tera râ, i roto i te mau otia o te mau ture a te Atua, te fanaˈo nei tatou i te hoê tiamâraa rahi. Ua vaiihohia te hoê tiamâraa rahi i te pae no te mau hinaaro o te taata tataitahi e te huru rau, e mau mea anaˈe e faaieie nei i te huru o te totaiete taata e o te faariro ra ia ˈna ei mea anaanatae roa no te manaˈo.

E tia atoa i te mau taata ia auraro i te mau ture materia ta te Atua i haamau. Ei hiˈoraa, te taata o te ore noa ˈtu e tâuˈa i te ture no te umeraa o te fenua, ia ouˈa noa ˈtu oia mai nia mai i te hoê vahi teitei, e pepe roa ïa o ˈna aore ra e pohe roa oia. Mai te peu e e faaea noa tatou i raro i te pape e aita ta tatou e taoˈa no te huti i te aho, e pohe tatou i roto i tau minuti. Mai te peu e eita roa ˈtu tatou e haapao i te mau ture a to tatou nei tino e e haapae tatou i te inu e i te amu i te maa, e pohe atoa ïa tatou.

No reira, ua poietehia to tatou mau metua matamua — e to raua huaai paatoa — ma te hinaaro e auraro, eiaha noa i te mau ture materia i haamauhia e te Atua, i te mau ture morare atoa râ e te mau ture totiale. E ere roa ˈtu te auraroraa i teie mau ture i te mea teimaha roa. Inaha, te tauturu ra te reira ia raua ia fanaˈo i te oaoa e tae noa ˈtu no te fetii taata nei. Ahiri e ua faaea noa o Adamu raua o Eva i roto i te mau otia o te mau ture a te Atua, e vai maitai noa ïa raua.

Na te aha râ i faaino roa i teie haamataraa maitatai roa? Mea nafea te ohipa ino e te mauiui i te uˈanaraa? E no te aha te Atua i vaiiho maoro ai i te ino e te mauiui?

[Hohoˈa i te api 7]

Te faataa ê ra te ǒ faahiahia roa o te tiamâraa ia maiti ia tatou i te mau matini taa ore, e tae noa ˈtu i te mau animala, o te pee nei i te hoê hinaaro feruri-ore-hia.