Tuhaa 1

Te haapao mau ra anei te Atua ia tatou?

1, 2. Eaha te uiraa ta te taata e ui nei no nia i te Atua, e no te aha?

I TE TAHI taime o to outou oraraa, peneiaˈe ua uiui outou e: ‘Ahiri e te vai ra te hoê Atua o te haapao mau ra ia tatou, no te aha ïa oia e faatia noa ˈi i teie mau mauiui atoa?’ Ua roohia tatou paatoa i te mauiui aore ra ua matau tatou i te hoê taata o tei mauiui.

² Oia mau, i roto i te roaraa o te aamu, ua faaruru te taata i te mauiui e te oto i roto i te tamaˈi, te peu taehae, te taparahiraa taata, te parau-tia ore, te veve, te maˈi, e te poheraa o te feia herehia. I to tatou noa senekele e 20, ua haapohe te mau tamaˈi hau atu i te 100 mirioni taata. E mau hanere mirioni feia ê atu o tei pepe aore ra o tei erehia i to ratou fare e ta ratou mau faufaa. E rave rahi mau ohipa hairiiri atu â o tei itehia i to tatou nei tau, o tei faatupu i te oto rahi, te roimata, e te tahi tiaturi-ore-raa i rotopu i te mau taata e rave rahi.

3, 4. Eaha ta vetahi pae e manaˈo ra no nia i to te Atua faatiaraa i te mauiui?

³ Ua inoino roa vetahi e te manaˈo nei ratou e ahiri e te vai ra te hoê Atua, aita ïa o ˈna e haapao maira ia tatou nei. Aore ra, ua tae roa ratou i te manaˈo e aita e Atua. Ei hiˈoraa, ua ani te hoê taata o tei mauiui na roto i te hamani-ino-raa i te feia o te nunaa ěê o tei haapohe i to ˈna mau hoa e to ˈna mau fetii i roto i te Tamaˈi Rahi Matamua e: “Teihea roa te Atua i to matou titauraa ia ˈna?” Te tahi atu taata, o tei ora mai i te taparahiraahia te mau mirioni taata e te mau Nazis i roto i te Piti o te Tamaˈi Rahi, ua oto rahi roa ïa oia i te mauiui o ta ˈna i ite e ua parau oia e: “Ahiri e e nehenehe outou e miti i to ˈu mafatu, e pohe outou i to ˈna taero.”

⁴ Inaha, e rave rahi mau taata aita ratou e taa ra e no te aha te hoê Atua maitai e farii noa ˈi e ia tupu te mau ohipa iino. Te uiui nei ratou ahiri e te haapao maira anei oia ia tatou aore ra mai te peu e te vai mau ra oia. E e rave rahi i rotopu ia ratou o te manaˈo nei e e riro noâ te mauiui ei tuhaa no te oraraa o te taata.

[Hohoˈa i te mau api 2, 3]

Ua fatata mai anei te hoê ao apî aore e mauiui faahou?