Te veveraa, te faufaa moni, e te haapaoraa

I roto i te roaraa o te mau senekele, ua feaa roa te manaˈo o te mau taata e rave rahi no te mau faufaa rahi a te mau haapaoraa faahua kerisetiano. Ua ora noa na te mau pâpa, te mau epikopo e vetahi mau faatere haapaoraa i roto i te unauna rahi, i nia i te tua o ta ratou mau mamoe, mea veve roa hoi te rahiraa. Aita teie huru tupuraa i taui.

Aita i maoro aˈenei, ua faaite mai te vea ra U.S.News & World Report e: “E taata haehaa te Mesia, aita oia i farii i te haapueraa i te faufaa i te pae materia.” Ma te faaau i to ˈna hiˈoraa e te huru oraraa o te mau taata poro evanelia na roto i te afata teata marite, te na ô faahou ra teie vea e: “Area râ, te fatu ra o Bakker ma i te hoê pereoo Mercedes e te hoê pereoo Rolls-Royce. Te fatu nei o Oral Roberts e rave rahi mau fare nohoraa i California, i Beverly Hills [Los Angeles] e i Rancho Mirage, e i roto i te fenua Oklahoma. Te tamau nei o Jimmy Swaggart i te hoê uati Rolex aufauhia e 5 000 dala marite e te noho nei oia i nia iho i te hoê fenua e 8 ta, tei faaauhia i te tino moni ra e 2,4 mirioni dala marite, e tei haaati-roa-hia e te hoê patu tima e te mau pata hohoˈa hunahia. Te parauhia ra e, te vai ra te hoê piha hopuraa pape unauna e te tahi mau tauihaa taurumi ma te faaohipa i te pape, i roto i te fare rahi.” — 7 no mati 1988, api 63.

Ia farii te mau aratai haapaoraa faahua kerisetiano, i te hoê huru oraraa moni rahi, eita anei to tatou manaˈo e feaa ia parau ratou e e pǐpǐ mau ratou na te Mesia? Aita anei te aposetolo Petero i parau e ‘ua vaiiho mai te Mesia i te hoê hiˈoraa maitai, ia pee maite tatou i to ˈna taahiraa avae’? — Petero 1, 2:21.