“Eita vau e mǎtaˈu i te pohe”

E ITE o Iehova o Christopher Heslop, 9 matahiti, mai to ˈna atoa tuaana o Matthew, 14 matahiti. I taua poipoi no atopa ra, ua haere raua i roto i te taviniraa na te mau utuafare tataitahi i pihai iho i te oire beretane ra no Manchester, e to raua fetii tane, to raua fetii vahine e e piti na tuaane fetii. I te avatea, ua haere pauroa ratou e mataitai ia Blackpool, te hoê vahi hopuraa miti fatata noa ˈtu. Tei roto ratou tooono atoa ra i na taata e hoê ahuru e ma piti tei pohe taue noa i roto i te hoê ati purumu, ati ta te mau mutoˈi i faaau mai “te hoê auahi ura” ra.

I te po na mua ˈtu, ua amui atu te utuafare fetii Heslop i roto i te hoê putuputuraa bibilia tei tupu i pihai iho i ǒ ratou e i reira te faahitiraahia i te parau no nia i te pohe. “E tamaiti feruriraa papu roa o Christopher, ta to ˈna ïa metua tane o David e parau ra. I taua po ra, ua faahiti mai oia ma te maramarama maitai, i te parau no nia i te ao apî e to ˈna tiaturiraa no a muri atu. I roto i te tauaparauraa, ua parau taue ihora oia e: ‘Te vahi au roa ia tatou, te mau Ite o Iehova oia ïa, ia faataa ê noa ˈtu te pohe ia tatou, ua ite ïa tatou e e farerei faahou tatou i nia i te fenua nei i te hoê mahana.’ Matou hoi te faaroo ra i taua mau parau ra, aita roa ˈtu ïa matou i manaˈo noa ˈˈe e e vai tamau noa te reira i roto i to matou feruriraa.”

I muri aˈe i te ati purumu, ua papai te Manchester Evening News e: “Eita vau e mǎtaˈu i te pohe, o ta te hoê taurearea i pohe i roto i te ati ïa i parau”, e te faahiti ra te vea i te mau parau iho a Christopher. Nafea te hoê tamarii e iva matahiti e nehenehe ai e faaite i teie huru manaˈo papu? Eaha hoi tei haapiihia ˈtu ia ˈna?

Te tia-faahou-raa: te hoê tiaturiraa papu

Te faataa ra te Titionare bibilia apî (beretane) e: “Te huru papu roa ˈˈe i roto i te pororaa a te mau kerisetiano matamua, o to ratou ïa onoono i te faahitiraa i te parau no nia i te tia-faahou-raa”. Te na ô faahou ra oia e: “Ua papu maitai i te mau kerisetiano matamua e ua faatia-faahou-hia mai o Iesu; inaha, ua papu atoa ia ratou e e faatia-atoa-hia mai te mau taata faaroo. E na roto i taua tiaturiraa ra ratou i taa ê roa ˈi i te feia haapii atoa o te tau tahito ra.”

Mea taa ê roa atoa te mau kerisetiano mau no teie nei tau, i te tahi atu mau taata. Eita roa ˈtu ratou e tiaturi noa ˈˈe i te haapiiraa philosopho heleni, o tei hape roa i te parauraa e e “varua pohe ore” to te taata. Area râ, te huti ra ratou i te puai i roto i te parau tǎpǔ a Iesu e na ô ra e “e faaroo ai te feia atoa i roto i te apoo ra i tana reo e e haere mai i rapae”. Tera te niu o te faaroo kerisetiano: te tia-faahou-raa o te mau taata i haapaohia e te Atua ra i roto i te paradaiso i nia i te fenua nei. — Ioane 5:28, 29; hiˈo atoa Ohipa 17:31; Korinetia 1, 15:14.

Ua haapii o David Heslop e o Ailene, ta ˈna vahine, i teie parau mau bibilia faufaa roa i ta raua na tamaiti. Inaha, te ite nei raua i te hoê tamahanahanaraa rahi. “Oia mau, te manaˈonaˈo rahi nei mâua i te tia-faahou-raa, ta David ïa e faataa ra, e ia paruparu anaˈe to mâua manaˈo, e manaˈo ïa mâua i te tau i mua nei e e haamanaˈo mâua e ua moe ta mâua na tamarii no te hoê tau poto noa.” Te parau atoa ra o Ailene e: “Mai te huru ra e ua ratere tei herehia e mâua i te fenua ěê. Aita mâua i ite e e hia maororaa raua e faaea ˈi i te atea ê, te tiai nei râ mâua i to raua hoˈiraa mai ma te ru.”

Te hoê titauraa haavare ore

Te hinaaro atoa ra anei outou i teie huru tiaturiraa? E ere roa ˈtu ïa i te mea fifi roa.

Ua faahiti te tumu parau matamua i te parau no nia i te hoê titorotororaa manaˈo i ravehia i te fenua Beretane. A anihia ˈi vetahi mau taata aita e faaohipa nei i te tahi haapaoraa, e eaha ta ratou e maiti mai te peu e e tia ia ratou ia haere i te tahi vahi haamoriraa, e 27 % (te tomaraa teitei roa ˈˈe) tei faahiti i te Piha o te Basileia a te mau Ite o Iehova.

Hau atu, a anihia ˈtu ai ratou e “Mai te peu e e hinaaro outou e haapii i te Bibilia, te haapiiraa kerisetiano, e te tahi atu â mau mea, e ani outou i te tauturu ia vai ra?”, 19 % tei pahono mai: I te mau Ite o Iehova.

Noa ˈtu eaha te vahi ta outou e faaea ra, e oaoa roa te mau Ite o Iehova i te tauturu ia outou ia haamau i to outou faaroo i nia i te mau haapiiraa a te Bibilia. Mea tamoni ore te mau putuputuraa atoa e tupu nei i roto i ta ratou mau Piha o te Basileia e te haapiiraa bibilia ta ratou e rave nei i te fare o te taata. No te aha outou e ore ai e haere atu e farerei i taua mau kerisetiano ra? Eita noa outou e ite oioi i te tamahanahanaraa na roto i te haapiiraa i te parau mau no nia i te pohe e te tia-faahou-raa, e noaa atoa râ ia outou i te tiaturiraa i roto i te hoê ao apî e te parau-tia i reira “e ore roa te pohe”. — Apokalupo 21:4.

[Tumu parau tarenihia i te api 26]

Ua faaora-faahou-hia anei ratou?

Ua ite-ê-na-hia vetahi mau taata o tei ora mai i muri aˈe i to ratou “poheraa”. A ara faahou mai ai ratou, ua parau mai vetahi e ua ite ratou i te tahi mau mea faahiahia roa i roto i ‘te hoê oraraa ê atu’. Te vai nei râ te hoê faataaraa i te pae no te rapaauraa no nia i teie ohipa huru ê mau. Ei haapapuraa, teie ta te vea lonedona ra “The Independent” e parau ra: “Ia fatata anaˈe te hoê taata i te pohe, e au ra e e ohipa te ravai-ore-raa i te mataˈi ora aore ra te rahi-roa-raa te dioxyde de carbone, i nia i te tahi mau tuhaa o te roro e e faatupu ïa te reira i te tahi mau aoaoaraa.” E nehenehe taua mau aoaoaraa ra e faatiaturi i te taata tei araara faahou mai e ua pohe oia e ua faaora-faahou-hia mai oia.