Te rahi noa ˈtura te taa ore

I MUA i te roˈi o te hoê taata pohe tatou e taa ˈi i te tupuraa mau o te mau mea. Mea riaria mau â ia hiˈo atu i te hoê taata e pohe ra. I roto i taua mau huru tupuraa ra, eita ïa e maerehia e ia rahi atu te feaaraa no nia i te pohe e ia tupu mai te mau uiraa huru rau. Mea poto roa hoi te oraraa e, ia au i te parau a Shakespeare, “e hinaaro iho â te pohe i to ˈna mahana”.

Eaha mau na ïa te pohe? Tera te uiraa matamua ta tatou e tuatapapa.

Te hoê ohipa fifi roa ia farii

Ia au i te Encyclopédie britannique, te pohe o “te ereraa ïa i te ora”. Te farii nei te taata e e pohe iho â te mau iˈa, te mau animala e te mau manu, te taa nei râ ia ˈna e ua riro te pohe ei enemi no ˈna, mai ta te Bibilia hoi e faaite raa.

I roto i te mau mea ora atoa, o te taata anaˈe te nehenehe e feruri i nia i to ˈna poheraa. O ˈna anaˈe atoa te huna i te feia pohe. Ia au i te Encyclopédie britannique, te mau peu e ravehia i te taime hunaraa i te feia pohe “[mea pinepine] no roto mai ïa, i te oreraa te taata e farii i te pohe mai te hopea-roa-raa o te oraraa. Noa ˈtu te haapapuraa hairiiri mau e horoahia maira e te tino pohe e pe ra, te tamau noa nei â te taata i te tiaturi e e ora noâ te hoê tuhaa o te taata i muri aˈe i te poheraa”.

Ei faahopearaa, e pinepine i te itehia i roto i te mau peu e taaihia i te pohe, i te tapao no te tahi mau peu tahito e te mau tiaturiraa tupapau huru ê roa.

Mau peu e mau tiaturiraa

Ei hiˈoraa, te vai ra i roto i te mau apoo hunaraa maˈi tahito, eiaha te mau ivi taata pohe anaˈe, te mau toetoea maa e te inu atoa râ, i tuuhia ˈtu i reira no te mea e tiaturihia na e e hinaaro te feia pohe i taua mau mea nei i muri aˈe i to ratou poheraa. E nanaˈo na to Aiphiti i te mau hohoˈa fenua e te mata i nia i te mau afata raau no te aratai i te mau taata pohe. I roto i te apoo o te taata pohe, e vaiiho-atoa-hia na te tahi mau tauihaa e ta ˈna iho mau taoˈa, mai te mau taoˈa rii faanehenehe, inaha, te manaˈohia ra e e oaoa roa te feia pohe i te faaohipa i teie mau taoˈa i te vahi i reira ratou e haere ai.

Ua itehia mai te mau ivi tino pohe e tifene noa ra, mai te huru o te aiû i roto i te opu o te vahine. Te manaˈo ra te mau taata aravihi e e haapapuraa te reira no nia i te tiaturiraa i te fanau-faahou-raa o te taata pohe. E manaˈo na to Heleni e to Roma e e tia i te feia pohe ia tapae i te tahi aˈe pae o te Styx, te anavai rahi roa ˈˈe o te po auahi. Na te paireti o Charon, te hoê demoni, e aratai atu ia ratou i te tahi aˈe pae, e e aufauhia ˈtu i te tahi moni e tuuhia ˈtu i roto i te vaha o te feia pohe. Te rave-noa-hia râ teie peu i teie mahana i roto e rave rahi mau vahi o te ao nei.

Te taiohia ra i roto i te Titionare no te haapiiraa faaroo (beretane) e: “Mea papu maitai e te vai nei iho â ta te mau haapaoraa rarahi atoa i ta ˈna iho mau tiaturiraa no nia i te poheraa, i te pohe iho e te oraraa i muri aˈe i te poheraa”. Oia mau, eaha râ te tumu? No te mea, eita roa ta te taata e nehenehe e farii i te hopearaa o te oraraa nei. “E ore hoi te taata e tiaturi i to ˈna iho pohe”, ta te taote maimi i te pae no te feruriraa ïa o Sigmund Freud i faahiti, e “i roto i te hohonu-roa-raa o to ˈna feruriraa, te papu nei i te taata tataitahi i to ˈna iho pohe-ore-raa”.

Inaha, ua faatupu mai taua mau huru manaˈo ra, e rave rahi mau tiaturiraa i fariihia e te rahiraa o te taata. E hiˈopoa anaˈe na vetahi o taua mau tiaturiraa ra tei parare roa ˈˈe.

Te vahi tamâraa hara e te po auahi

Mai te peu e te ora noa ra te feia pohe, te ora nei ïa ratou i te tahi vahi, i hea roa ïa? Te faatupu nei te reira i te tahi fifi, no te mea e ere te feia i pohe i te mea maitai roa aore ra i te mea ino roa. No to ˈna hoi hinaaro i te parau-tia, ua faatapu noa na te taata i te hoê taa-ê-raa i roto i te feia pohe maitatai e te feia pohe iino.

Te faataa nei te Encyclopédie juive (beretane) i te feruriraa ati iuda i te na ôraa e: “I te mahana o te haavaraa hopea, e iteahia e toru pǔpǔ taata: te feia parau-tia, o te tapaohia i reira iho â no te ora mure ore; te feia iino, e tapaohia no te Gehena; area te feia tei aifaito noa ta ratou mau peu maitatai e ta ratou mau hara, e haere atu ïa ratou i roto i te Gehena, e e na reira noa ratou i te paiuma mai e a pou faahou atu ai e tae noa ˈtu i te taime ratou e tamâ-roa-hia ˈi.” E rave rahi o te ite i roto i teie parau hopea nei, i te faataaraa no nia i te vahi tamâraa hara.

Te horoa ra te Nouvelle Encyclopédie catholique (beretane) i te tahi manaˈo i haamanahia no nia i te haapiiraa o te vahi tamâraa hara. Te na ô ra oia e: “I te hiˈopoaraa hopea, ua niuhia te haapiiraa katolika o te vahi tamâraa hara i nia i te tutuu, eiaha râ i nia i te Papai moˈa.” Eita hoi e maerehia, inaha, aita te parau ra “vahi tamâraa hara” e aita atoa te manaˈo iho no nia i teie parau, e itehia ra i roto i te Bibilia. Teie râ, eaha mau na te Gehena, oia hoi te vahi i reira te feia iino e haere ai ia au i te Encyclopédie juive?

Te parau ra Gehena, o te parau heleni ïa no roto mai i te parau hebera ra gé Hinnom, e te auraa ra, te peho no Hinoma e vai ra i te pae apatoa-tooa o te râ no Ierusalema. I mutaa ihora, e pûpûhia na te mau tamarii ei tusia i taua vahi nei no te faahanahana i te atua ra o Moloha. Ia au i te Encyclopédie juive, no “taua tumu nei i faainohia ˈi taua peho ra, e ua faaauhia ˈtura te ‘Gehena’ i te ‘po auahi’”.

Te parau ra te World Book Encyclopedia e: “No te rahiraa o te mau haapaoraa, ua riro te po auahi ei vahi tei î roa i te demoni, i reira te feia iino e faautuahia ˈi i muri aˈe i to ratou poheraa.” Te haapii-noa-hia ra teie haapiiraa i roto i te mau Ekalesia o te amuiraa faaroo kerisetiano e i roto atoa i te tahi atu mau haapaoraa. No reira, mai mutaa ihora mai â, ua paari te rahiraa o te taata i roto i te mǎtaˈu ia haere atu ratou i roto i te po auahi.

“I to ˈu nainairaa, ta te papai aamu beretane ra ïa o Jerome K. Jerome i papai i te matahiti 1926 ra, e tiaturi noa na te rahiraa o te feia paieti e te vai mau ra te hoê po auahi. Mea fifi roa ia faataa i te ino ta teie tiaturiraa i faatupu i nia i te hoê tamarii tei araara maitai te feruriraa. Ua aratai taua haapiiraa ra ia ˈu ia riri roa i te Atua, e i muri aˈe, a maramarama ˈi au e a faarue atu ai au i taua manaˈo maamaa ra, ua tae roa ˈˈera vau i te hiˈo ino i te haapaoraa tei haapii i te reira.”

Noa ˈtu e eaha to outou manaˈo no nia i te po auahi (no te haamaramarama roa ˈtu â i nia i taua haapiiraa ra, a hiˈo i te tabula i pihai iho mai oia hoi “Po auahi e Gehena: te taa-ê-raa”), e farii iho â outou e mea hau aˈe na te rahiraa o te taata ia haere atu i nia i te raˈi aore ra i te nirvāna.

Te raˈi e te nirvāna

Te na ô ra te buka ra Te haapaoraa katolika: buka haapiiraa na te mau melo o te Ekalesia anglicane (beretane) e: “Te raˈi, o te vahi ïa i reira te feia maitatai e fanaˈo ai i te oaoa mure ore i pihai iho i te Atua, i Ta ˈna mau melahi e te feia moˈa.” Te parau faahou ra teie buka e: “E haere tatou i nia i te raˈi no te tahoê atu e a muri noa ˈtu i te taatoaraa o te feia i herehia e tatou i raro nei e tei pohe i roto i te maitai. I reira tatou e ite atu ai e a muri noa ˈtu i te maitai e te moˈaraa tia roa.”

Area te nirvāna ra, ua riro ïa te reira no te mau bouddhistes, ei huru “hau mau e te oaoa faito ore”, te nehenehe noa e noaa ia oti te “tau mauiui mau o te feia pohe e o te mau fanau-faahou-raa”. Inaha, na roto i te tiaturiraa i te paradaiso aore ra i te nirvāna, te faataa nei te haapaoraa e e hope te mau mauiui o te oraraa nei e e nehenehe atu ai e ora i roto i te hoê ao faahiahia roa.

E tauturu mai anei taua mau haapiiraa papu ore ra ia tatou ia pahono i te uiraa ra “Eaha te ohipa e tupu i muri aˈe i te pohe?”, aore ra te papu ore noa ˈtura teie tumu parau? Nafea tatou e papu ai i te tanoraa mau o ta tatou tiaturiraa? Mea tano anei aore ra mea hape anei ta te haapaoraa e haapii ra?

Eaha te roohia i nia ia tatou i muri aˈe i te pohe, o te hoê noâ ïa ohipa taa-ore-hia. Na te pahonoraa anaˈe i te uiraa faufaa roa e “Eaha te varua?” o te nehenehe e haamaramarama mai ia tatou. O ta tatou ïa e hiˈopoa i roto i te tumu parau i muri nei.

[Nota i raro i te api]

[Tumu parau tarenihia i te api 21]

Cryogénisation e te pohe-ore-raa

Te cryogénisation, o te hoê ïa ravea no te tapearaa i te mau tino pohe i te hoê faito toetoe haehaa roa. E tuuhia te tino i roto i te hoê afata e faahopuhia i roto i te tahi pape azote i nia i te faito ra -232 °C. E nehenehe te taata e maiti e ia riro ratou ei “neuropatients”, te auraa ra, o to ratou noa ïa upoo te tapeahia mai. Te parau ra te faatere o te taiete beretane e faaau nei i te cryogénisation e: “Eita vau e tiaturi i te oraraa i muri aˈe i te poheraa ia au i te hiˈoraa faaroo, mea au roa râ na ˈu te ora e te manaˈo nei au e mea oto roa te hopearaa o te oraraa.” I muri mai i te parau faatianiani, te vai ra te tiaturiraa e e manuïa te ite aravihi i te hoê mahana, i te horoa faahou mai i te ora, e oia atoa, i te taai faahou atu i te mau tino apî i nia i te mau upoo i tâpûhia. Ia au i te “Sunday Times” no Lonedona, o te hoê ïa ravea teie, e “roaa ˈi te pohe-ore-raa”.

[Tumu parau tarenihia i te api 22]

Po auahi e Gehena: te taa-ê-raa

No roto mai te manaˈo o te auahi e ama ra i roto i te po auahi, i te hoê faahuru-ê-raahia te auraa o te Gehena, te faarueraa pehu o te tau tahito e vai ra i rapae noa ˈˈe i te mau patu no Ierusalema. Ua rave Iesu i te parau ra “Gehena” ei taipe no te haamouraa mure ore (Mataio 10:28). Eaha mau ïa te po auahi (na roto i te reo hebera she’ôl e te reo heleni haïdês)? Mai te peu e o te hoê vahi haamauiuiraa, e hinaaro anei ïa vetahi e haere atu i reira? Eita iho â ïa. Teie râ, ua ani te patereareha ra o Ioba i te Atua ia tapuni ia ˈna i reira (Ioba 14:13). E nehenehe atoa e parau e ua haere o Iona i roto i te po auahi i to ˈna momiraahia e te hoê iˈa rahi, e i reira ua pure aˈera oia i te Atua ia faaora mai ia ˈna (Iona 2:1, 2). I roto i te Bibilia, te po auahi, o te apoo tanuraa taata pohe ïa, i reira te feia pohe ta te Atua e haamanaˈo ra, e tiai ai i te tia-faahou-raa. — Ioane 5:28, 29.

[Hohoˈa i te api 22]

Ua penihia te mata i nia i teie afata vairaa taata pohe no Aiphiti, ia nehenehe ‘te varua o te taata pohe e ite’.

[Faaiteraa i te tumu]

Ma te parau faatia a te British Museum, Lonedona