Ru noa — Aita râ e tumu?

TE FAAHORO ra teie taata i to ˈna pereoo uira ma te hoê tere au noa no ˈna, oia hoi 130 kilometera i te hora! Te mau horo patete râ, tei matau hoi i te mau taotiaraa o te tere pereoo uira, ua maere roa ïa ratou i te vitiviti o to ratou tere i nia i te mau purumu rarahi no Helemani, i reira, aita te tereraa i taotiahia, maori râ hoi i nia anaˈe i te tahi mau tuhaa purumu taa maitai. Noa ˈtu â ïa e te tere ra ratou iho ma te 130 kilometera i te hora, te ite ra ratou i te mau pereoo uira e te mau pereoo e piti huira e mahemo mai i mua ia ratou ma te vitiviti mau! I te pae hopea, eita ta te hoê o te mau horo patete e nehenehe faahou e tapea i te ani atu e: “No te aha râ ratou paatoa e ru noa ˈi? Te haere nei râ ratou i hea?”

“Peneiaˈe aita ratou e haere ra i te hoê aˈe vahi”, ta te taata faahoro ïa i pahono mai ma te ataata, inaha, te hauti maira hoi oia. Oia mau, te haere ra taua mau pereoo uira ra i te hoê vahi — e ma te oioi mau hoi!

Teie râ, no te aha teie mau taata faahoro pereoo uira i ru noa ˈi? Ua moehia anei ia ratou e mea au aˈe ia tere ma te rave i te taime no te mataitai i te huru o te fenua? I to ratou hiˈoraa, ua riro anei te oraraa ei roaraa hoê hanere metera te tia ia horohia ma te paupau te aho?

Pereoo uira tere vitiviti, fare hooraa maa ineine oioi noa, manureva tere vitiviti roa, teie te mau tapao no te hoê anotau o te faatupu mai i te mau titauraa ru mau: Oioi aˈe! Tano maitai aˈe! Parau mau, mea iti roa te mau taata o te hinaaro e hoˈi faahou i te tau o te mau pereoo puaahorofenua. E e farii mau â te rahiraa i rotopu ia tatou e, e mea faufaa mau ia ohipa oioi noa mai te peu e tia mau iho â. No reira, ia taniuniu-anaˈe-hia i te hoê taote aore ra i te hoê mutoˈi, e hinaarohia iho â ïa ia tae oioi mai ratou.

Tera râ, te huru huehue e haaati ra ia tatou, mea titau-mau-hia anei aore ra mea faufaa mau anei? Te manaˈo nei vetahi pae e eita. Ei hiˈoraa, ua papai te hoê papai vea no te Los Angeles Times e: “Ma te onoonohia, te ru noa, te haapeapeahia, [e rave rahi] teie e ora nei i te hoê oraraa horohoro noa, e tîtî hoi ratou no te uati i roto i te senekele o te vitiviti.”

Ua faarahi atoa te titauraa ia haavitiviti i ta te Toronto Star i parau e “e maˈi pee o te ore roa ˈtu e nehenehe e faaorehia”: oia hoi, te stress! Mai te mea ra e te ohipa nei te stress i nia i te taata mai te hoê raau taero ra te huru. Tera paha te tumu no te mau maˈi huru rau: te raha o te rouru, te maiuu fatifati haere noa, te hypertension e te mau maˈi mafatu. Taa ê atu, te fifi atoa nei te mau auraa i rotopu i te mau taata no te fati ore te mau hora.

Teie râ, no te aha tatou e ora ˈi i roto i te “senekele o te vitiviti”? Mai te peu e te manaˈo nei outou i teie nei taime e te faahepohia ra outou aore ra te ru noa nei outou, eaha ˈtu pai ïa te huru o to outou oraraa i roto i te mau matahiti i mua nei? E nehenehe anei ta outou, na roto i te tahi ravea, e riro mai ei fatu no to outou oraraa — e e faaruru atu ai i te oraraa horohoro noa o teie nei mahana?