Afirika Apatoa: te ati

Te tuatapapa nei to matou taata papai no Afirika Apatoa i te ati i taua fenua ra e to ˈna ravea i roto i te mau tumu parau e toru i mua nei.

“TE MAU faahuehueraa i roto i te oire ereere: 26 taata pohe.” “Mau manaˈo feaa i te hunaraa o te 15 feia pohe i roto i te mau faahuehueraa.” “Te rahi noa ˈtura te taparahiraa taata.” “Afirika Apatoa: 13 taata i pohe i roto i te mau totoaraa e te mau topitaraa i roto 10 mahana.” Te faaite nei te mau upoo parau e te mau tumu parau o te vea i teie ohipa peapea, tei turai i te hoê auvaha parau ia faaite e: “Te roohia nei o Afirika Apatoa i te ati rahi roa ˈˈe o to ˈna aamu, te hoê ati no roto ia ˈna iho e no rapae atoa mai.”

Na roto i te mau hohoˈa e te mau parau apî peapea te operehia ra i roto i te mau mirioni utuafare o te ao nei, e rave rahi ïa tei manaˈo e ua huehue roa o Afirika Apatoa taatoa. E ere râ mai te reira. I roto râ i te rahiraa o te mau vahi e faaeahia ra e te mau taata Uouo e i roto i te mau mataeinaa e faaeahia ra e te mau taata Ereere, mea maitai roa te oraraa.

Te itehia ra râ te mau ohipa hairiiri i roto i te tahi mau oire o te ereere. Ua riaria roa te mau taata mataitai tele i te iteraa i te taparahiraahia, te taataahiraahia e te tutui-oraora-roa-raahia te hoê vahine ereere tei parihia e na ˈna i tihotiho. Te riri pinepine nei te nahoa i te feia e rave ra i te ohipa na te hau aore ra tei tauturu ia ˈna. Ua haapohehia te mau mutoi ereere e ua tutuihia aore ra ua tupararihia to ratou mau fare.

Te rahiraa o te feia faahuehue e mau taurearea ïa aore ra mau tamarii. Ua riro te taparahiraa taata ei huru oraraa no ratou. Hau atu â, ua riro te mau faahuehueraa ei taime tano no te feia peu ino no te mau eiâraa.

E haafifi teie mau faahuehueraa i te pae faanavairaa faufaa o Afirika Apatoa. Ua topa roa te taui o te moni o taua fenua ra. Ua topatari e rave rahi mau fare hamaniraa tauihaa, e e rave rahi ïa mau taata aita ta ratou e ohipa faahou. E roo ino roa to Afirika Apatoa i mua i te ao taatoa nei. Te haamataˈuhia ra o Afirika Apatoa i te mau faautuaraa e i te oreraa e horoa faahou i te moni no te tauturu ia ˈna.

Te fifi atoa nei te mau nunaa tapiri mai — Swaziland, Botswana, Lesotho e Namibie (te pae Apatoa-Tooa o te râ no Afirika) — ua taaihia hoi ratou e o Afirika Apatoa i te pae faanavairaa faufaa. E rave rahi matahiti i teie nei te iteraa e piti na fenua rarahi fatata ia Afirika Apatoa, Mozambique e Angola, i te ati ino roa ˈtu â. Ua farerei raua i te mau aroraa puai e i te mau fifi rahi i te pae faanavairaa faufaa.

E fenua nehenehe hoi o Afirika Apatoa e rave rahi hoi ta ˈna mau faufaa: te mau repo maitai, te mau eruraa auro, taiamani, arahu, veo e te tahi atu â mau taoˈa faufaa. Hau atu â, e rave rahi mau taata marû e te maitai i roto i te mau taura taata huru rau e ora ra i reira, oia hoi, te Ereere, te Uouo, te afa e te Inidia.

E fenua faaroo atoa o Afirika Apatoa. Te tiaturi nei te rahiraa o to ˈna mau taata i te Atua, noa ˈtu e e ereere aore ra uouo. Ua amahamaha râ taua fenua ra. E tuhaa anei ta te haapaoraa i roto i taua ohipa ra? Eaha te tumu o taua huru tupuraa riaria mau ra? E, te uiraa faufaa roa ˈtu â, te vai ra anei hoê ravea?