E tahoê te kerisetianoraa mau i te mau taata no te mau huru iri atoa
I TE MATAHITI 1982, ua tapeahia o Mnguni, te hoê taata ereere no Afirika Apatoa, i te fare auri a maha ˈtura taime i teie nei no te mea ua faatupu oia i te mau faahuehueraa. Ua faatia te mau hui mana ia papai o ˈna i to ˈna fetii ia hapono mai ratou i te tahi mau buka. I te taeraa mai te buka, ite atura o ˈna i te hoê o ta ˈna i ore i ani. Teie te upoo parau o taua buka ra Te parau mau e aratai i te ora mure ore ra, neneihia e te mau Ite o Iehova.
Ua putapû roa o Mnguni i te mea o ta ˈna i taio. “Ua tiaturi noa vau e te turu ra te mau faahuehueraa o ta ˈu i rave i te hoê ohipa faauruahia mai e te Atua, o ta ˈna ïa e faatia ra. ‘Te Atua, tei te pae ïa o ˈna o te feia e haavîhia ra’ o te hoê ïa o ta matou mau piiraa no te aroraa. No roto mai au i te haapiiraa porotetani a Luthero, e aita roa ˈtu ta ˈu Ekalesia i faautua noa ˈˈe ia ˈu e aore ra i parau noa ˈtu ia ˈu a faaea i te rave i te reira mau ohipa. Ua patoi râ oia i te hau no ta ˈna mau faautuaraa i nia ia ˈu. Ua tahoê atoa te tahi mau Ekalesia no te tauturu ia ˈu e i to ˈu mau ‘hoa’ ia fariihia ta matou taatiraa e te hau.
“Na te buka ra Te parau mau i tauturu ia ˈu ia taa e aita ta ˈu mau ohipa e tuati ra i nia i te parau a te Atua. Te faahiti ra te buka i te Bibilia no te faaiteraa e te vai noa nei â te mau faatereraa atoa no te mea te faatia ra te Atua i te reira e e tia i te mau kerisetiano mau atoa ia auraro i te mau hui mana.” (Mataio 5:44; Ioane 1, 3:10-12; Roma 13:1-7). Ua faaea ihora o Mnguni i te rave i te mau faahuehueraa e i to ˈna matararaa mai mai te fare auri mai, riro maira oia ei Ite o Iehova.
Ua farii atoa, mai ia ˈna ra te huru, te mau ahuru tausani mau taata no Afirika Apatoa, te Ereere e te Uouo, i te kerisetianoraa mau mai tei haapiihia e te Bibilia. E ere mai te haapaoraa porotetani o tei riro mai ei puai no te amahamaharaa, area râ, te kerisetianoraa mau te tahoê nei ïa oia i te mau taata no te mau huru iri atoa. A hiˈo anaˈe na e mea nafea.
Te poroi a te Basileia
“E ere i to teie nei ao to ˈu basileia”, o ta Iesu Mesia ïa i faataa (Ioane 18:36). Ua riro te Basileia o ta Iesu i haapii ei tumu parau matamua a te kerisetianoraa mau. Aita teie Basileia i taaihia i te hoê noa ˈˈe mana politita o te ao nei, no te mea o te hoê ïa faatereraa e vai ra i nia i te raˈi tei hau aˈe i te puai taata nei. Fatata roa, ia au i te Bibilia, “e hope roa hoi taua mau basileia ra [politita i nia i te fenua nei] i te parari e e pau”. — Daniela 2:44; Luka 21:7-33.
E ere roa ˈtu teie Basileia mai ta te hoê taata ereere tuatapapa i te parau no nia i te Atua i faahua parau e e moemoeâ. Te itehia ra e te vai mau nei teie Basileia na roto hau atu i te toru mirioni mau Ite o Iehova i roto i te ao nei — e ua hau atu hoi i te 40000 i Afirika Apatoa anaˈe — e faˈi ra e ua riro ratou ei taata haapao maitai no te Basileia o te Atua. Te haapapu nei teie mau taata i to ratou haapao maitai i te Basileia na roto i te faatupuraa i teie faaueraa a Iesu: “E e parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.” — Mataio 24:14.
Na te poroi o te Bibilia no nia i te Basileia ta te mau Ite o Iehova e poro haere ra i huti mai i te mau tausani mau taata no Afirika Apatoa. No reira, eita ratou e faaô faahou ia ratou i roto i te mau faahuehueraa politita e te mau amahamaharaa i te pae no te iri, e te fanaˈo nei ratou i te tahi taoˈa taa ê mau i Afirika Apatoa: te au-maite-raa e vai ra i rotopu i te mau taata no te mau huru iri atoa. Ua ite papu o Gert, melo tahito no te NGK i te reira. Te faˈi ra oia e: “Aita roa ˈtu e itehia ra te faataa-ê-raa te taata iri ê aore ra reo taa ê i rotopu i te mau Ite o Iehova. No reira, e mea tahoê ratou i te ao taatoa nei. Mea faahiahia mau ia ite e ‘e ore te Atua e haapao i te huru o te taata. O tei mǎtaˈu râ ia ˈna e o tei rave i te parau-tia i te mau fenua atoa ra, o te itehia mai ïa e ana’.” — Ohipa 10:34, 35.
E ere i te mea maoro i teie nei, ua farii te hau no Afirika Apatoa ia tauihia te hoê ture o te apartheid i to ˈna faatiaraa ia faaea amui te mau taata iri taa ê e rave rau i roto i te tahi mau tuhaa fenua. Tae roa mai i te reira mahana, ua faatura te mau Ite o Iehova i te ture e opani ra ia faaea amui te mau taata e ere hoê â huru iri. I te mea râ e aita te ture e opani ra ia rave amui ratou i te ohipa e ia aroha te tahi e te tahi, ua horoa amui te mau Ite o Iehova i to ratou taime e ta ratou mau maitai no te paturaa i ta ratou mau fare haamoriraa piihia Piha o te Basileia.
I roto i na matahiti e ono hopea nei, ua rave atoa te mau tausani mau Ite, te mau taata Ereere e te mau taata Uouo, i te ohipa ma te tamoni ore no te hamaniraa i te mau piha raveraa ohipa apî e vai ra i te hiti o te oire no Krugersdorp. I muri aˈe i to ˈna tamaaraa i rotopu i te mau rave ohipa no roto mai i te mau huru iri taa ê atoa, ua faˈi te paoti no te hoê taiete tei tamau i te mau matini taa ê e: “E tia i te mau Hau amui ia haere mai i ǒ nei ia nehenehe ratou e pee i teie hiˈoraa.” I teie nei mahana, te faaohipahia nei teie mau piha no te tatararaa e no te neneiraa i te mau vea e te mau buka bibilia.
E putuputu atoa te mau Ite o Iehova no te haamori amui i te Atua i roto i te mau tairururaa rarahi. Te amuiraa mai te mau tausani mau Zoulous, mau Xhosas, mau Sothos, mau Afrikaners, mau Beretane e te tahi atu â mau taata no Afirika Apatoa i roto i te hoê anaˈe iho faanahonahoraa, e ohipa otahi roa ïa tera, te hoê tapao papu e te vai mau ra te kerisetianoraa mau i Afirika Apatoa (Ioane 13:35; 17:23). O te hoê atoa tapao taa ê teie e te ora nei tatou i te tau o ta te Bibilia e parau ra e “te mau mahana hopea”. — Isaia 2:2-4.
O to tatou nei ui, te ui tapaohia o te fatata i te ite atu i te oreraa te mau aroraa atoa. E i muri iho? Te tohu nei te Bibilia e e ora te feia parau-tia no roto i te mau nunaa atoa i roto i te hoê paradaiso i nia i te fenua nei, te mau taata e auraro ra i te hoê anaˈe iho faatereraa, te Basileia o te Atua. — Salamo 37:10, 11; Apokalupo 7:9, 14.
[Hohoˈa i te api 9]
I Afirika Apatoa, e putuputu pinepine te mau Ite o Iehova no te mau huru iri atoa i roto i te mau tairururaa rarahi.
[Hohoˈa i te api 10]
E anaanatae e rave rahi mau taata i te poroi no nia i te Basileia i to ratou iteraa ˈtu i te hau e vai ra i rotopu i te mau Ite o Iehova e ere hoê â huru iri.