Te mau porotarama tairururaa e toru mahana o ta tatou ‘e faaroo e e ite’

Hau atu 130 matahiti i teie nei to te mau Ite no Iehova faatupuraa i te mau tairururaa e toru mahana i te mau matahiti atoa. I teie mahana, i roto i te porotarama e itehia hau atu 40 oreroraa parau, te upaupa, te mau uiuiraa manaˈo e te mau video. Ia faufaahia e ia itoitohia te feia e putuputu mai e titauhia ia ratou ia “faaroo e [ia] ite.” (Luka 2:20) E nafea ta outou mau ô e faaohipahia ˈi ia nehenehe te taatoaraa e faufaahia i teie mau tairururaa noa ˈtu te vahi e ora ˈi ratou?

Te mau tauihaa haruharuraa e video e tano no te mau tairururaa faatupuhia i te mau vahi atoa

I te mau fenua no Europa tooa o te râ, e rave rahi tahua aore ra vahi putuputuraa e mau tauihaa haruharuraa e video tei tamauhia. Ia tarahu râ tatou i te hoê tahua no te hoê tairururaa, no te aha tatou e tamaumau pinepine ai i ta tatou iho mau tauihaa? Te faataa ra David o te ohipa ra e te pu rahi o te haapao i te Tuhaa Haapurororaa teata: “Mea iti roa te mau tahua aore ra vahi ta matou e tarahu, e mau tauihaa tano no te faatere i te hoê porotarama hau atu ono hora te maoro. Ei hiˈoraa, i te mau tahua tuaro, e faaohipahia te mau tauihaa haruharuraa e video no te horoa i te mau parau faaite e no te faataˈi poto noa i te himene. Hau atu, e faaohipahia te mau paruai no te faaite o vai te upootia, te faaararaa e no te pata faahou i tei tupu. Ua hinaaro râ matou ia mataitai te taatoaraa o te taata i te mau video roroa e ia taa maitai ia ratou eaha tei parauhia mai nia mai i te tahua.”

Inaha mea taa ê te mau tairururaa tataitahi, ua titauhia ïa ia faatano tatou i te mau tauihaa. Ia maiti tatou i te hoê tahua aore ra vahi, na te Tuhaa haapao i te haapurororaa teata o ta tatou amaa e faaoti ihea e parahi ai te taata. E faaoti ratou ia au i te rahiraa taata e putuputu mai e te rahiraa taata e nehenehe e ô atu i roto. I reira ïa te mau taeae e faaoti ai ihea e tuuhia ˈi te mau matini faataˈiraa reo e te mau paruai. I muri iho, e tapao ratou eaha te mau tauihaa titauhia a nehenehe atu ai te taatoaraa o te taata e faaroo maitai i te porotarama.

Mea fifi atu â râ no te tuhaa haapao i te haruharuraa e video mai te peu i te tairururaa e hurihia te porotarama na roto e rave rahi reo. No reira, e titauhia i te mau taeae huri ia pee maite i te mau haruharuraa e video. I muri iho, e haapurorohia na roto i te radio no te feia e paraparau ra i teie reo. Auaˈe teie mau ravea haapurororaa, e faaroo ïa te taatoaraa i te mau video i te hoê â taime, noa ˈtu ua haapurorohia te porotarama na roto e vaˈu reo. Te parau faahou ra David: “Mea fifi roa teie mau faanahoraa e e titauhia ia faaineine-maitai-hia te rima tauturu o te ohipa ra i roto i tera tuhaa.”

No te rahiraa o te mau amaa e tauihaa haruharuraa e video ta ratou e faaohipa nei i te mau matahiti atoa. No reira, e faaineine te mau taeae i te mau tauihaa no te afai i te mau vahi e faatupuhia te tairururaa. No te amaa no Marite, ua hau atu 22 000 000 moni farane haamâuˈaraa i te mau matahiti atoa no te hapono i te mau tauihaa i te vahi tairururaa. Mea iti aˈe râ te haamâuˈaraa i te hoo mai e te atuatu i te tahi atu mau tauihaa. Te parau ra Steven o tei tiaau i te tuhaa haapao i te haruharuraa e video i te tairururaa i Kanada: “Te rave maitai ra ta matou pǔpǔ haapao i te tuhaa haruharuraa e video i ta ratou ohipa. E hiˈopoa maitai ratou i te mau ponao farero, te mau farero tamau, te taura uira e te mau tuhaa tataitahi mai te peu aita hoê aˈe mauhaa tei ino. E puohu maitai ratou i te reira a nehenehe atu ai e faaohipa no te tahi atu tairururaa.”

Te hooraa mai e te atuaturaa i te mau tauihaa

Mea moni roa ia tarahu i te mau tauihaa haruharuraa e video. Hau atu, aita i atuatu maitaihia te rahiraa o te mau tauihaa. Te tumu ïa tatou i hoo mai ai i ta tatou iho mau tauihaa. Ia faitohia, no te hoê noa mauhaa video parauhia panneaux LED, 16 metera i nia i te 10 metera ua hau ïa 2 600 000 moni farane. E no te hoê noa taura uira 15 metera te roa, ua hau atu ïa i te 2 000 moni farane. No reira, hou a hoo mai ai i te mau tauihaa, e ohipa amui te Tuhaa haapao i te haapurororaa teata e te Tuhaa o te hooraa no te ‘numera i te haamâuˈaraa.’ (Luka 14:28) Ei hiˈoraa, e ui ratou: Ehia rahiraa taata te faufaahia i teie mau tauihaa? E ravea maitai anei te hooraa mai i taua mau tauihaa apî ra? E vahi anei ta tatou no te haaputu i te reira? Te vai ra anei te mau rima tauturu faaineinehia no te atuatu i te reira?

Ia ore teie mau tauihaa ia ino oioi e ia ore atoa ia mâuˈa ta tatou mau ô, e tamau tatou i te tataî e i te atuatu maitai i te reira. Hau atu, e afai tatou i teie mau tauihaa i roto i te mau afata rarahi no te paruru maitai.

Te hoê hiˈoraa maitai e te hoê porotarama ohie ia pee

Ua putapû roa te feia o teie nei ao a faaroo ai i te mau haruharuraa e a mataitai ai i te video i te mau tairururaa. Ei hiˈoraa, ua faahiahia roa te hoê taata e ohipa ra i roto i te hoê totaiete rarahi haruharuraa e video. Te faatia ra Jonathan tei ohipa ei rima tauturu i taua tairururaa ra i ta teie taata i parau: “Ua maere roa o ˈna i te iteraa e rima tauturu anaˈe matou o te ohipa ra i roto i te tuhaa haruharuraa e video. E ere hoi matou i te mea aravihi roa i roto i tera tuhaa. E titauhia pae mahana i ta ˈna totaiete no te tamaumau i teie mau huru tauihaa. Area râ matou, aita ïa. Hoê noa mahana e te afa e ua oti ta matou ohipa tamaumauraa.” I te tahi atu tairururaa, ua parau te hoê tiaau haapao i te tahua: “Ua ite au e rave rahi mau taata aravihi i roto i te tuhaa himene e video. Aita râ vau i ite aˈenei i tera faito aravihi i roto i tera tuhaa, mai ia outou!”

Eaha te mau haamaitairaa ta outou i ite mai maoti te tuhaa haruharuraa e video i te mau tairururaa? Peneiaˈe e manaˈo outou mai ia David o te ora ra i Beretane. Ua parau oia: “E 88 matahiti to ˈu e ua haere au i te mau tairururaa i tera rahiraa matahiti. I teie mahana, auê hoi i te mea ohie ia pee maite i te porotarama. E video nehenehe mau te patahia mai, e au ra e e tere vitiviti te hora, era ua oti te porotarama. Hau atu, e taa maitai ia oe te mau haapiiraa horoahia mai.” Ua parau Micheal no Nigéria: “I te mea e e nehenehe te mau taeae e faaroo maitai e e mataitai i te mau video, e nehenehe ïa ratou e pee maite i te porotarama.”

Ia haere outou i te tairururaa e toru mahana “A faaite i te parau apî oaoa!” aore ra i te tairururaa taa ê o teie matahiti, a rave i te taime no te feruri i te mau faanahoraa ravehia ia nehenehe outou e fanaˈo i te porotarama. Te haamauruuru nei matou ia outou no ta outou mau ô, oia atoa râ te mau ô horoahia i nia i te reni donate.jw.org. Maoti hoi teie ravea e nehenehe ai te mau tairururaa e faatupuhia. Mauruuru roa ia outou paatoa.