Tauturu ia tupu te ati natura i 2023: “Ua ite mata matou i to Iehova here”

Ua tohu te Bibilia “e aro . . . te tahi nunaa ite tahi atu nunaa” e e tupu te mau ati i te roaraa o “te anotau hopea o te ao nei.” (Mataio 24:3, 7) Ua ite mata roa tatou i teie mau parau tohu i te tupuraa i te roaraa o te matahiti taviniraa 2023.a Noa ˈtu ua tupu te tamaˈi e te ati natura i roto fatata 100 fenua, ua faaite te mau Ite no Iehova i to Iehova here. Mea nafea?

I te roaraa o te matahiti taviniraa 2023, ua faaruru to tatou mau taeae hau atu 200 ati natura aore ra faatupuhia na te taata. Ua haamâuˈa, te mau taatiraa e au i te ture e faaohipahia ra e te mau Ite no Iehova hau atu 1 118 750 000 moni farane no roto mai i te mau ô horoa noa o te ohipa na te ao nei no te tauturu i tei ati. Hau atu i te mau ô o te mau taeae e tuahine e rave rahi o to ratou vahi. A hiˈo mea nafea ta outou mau ô i te faaohiparaahia no te tauturu i tei ati, i roto noa e piti tupuraa ta to tatou mau taeae i faaruru.

“Te vai ra iho â te here mau”

I te tahi mau tuhaa fenua i Nigéria mea pinepine te pape pue. I Atopa 2022 râ, tera te pape pue ino roa ˈˈe tei tupu i tera fenua a ahuru matahiti i teie nei. Ua ino roa hau atu 676 000 tâ faaapu e ua faarue hau atu piti mirioni taata i to ratou fare. Oioi te amaa no Nigéria i te maiti i te mau Tomite tauturu i tei ati no te faanaho i te tauturu e no te horoa i te tauturu i te pae varua.

Tupuraa o to tatou mau taeae e tuahine

• Ua faarue 7 505 feia poro i to ratou fare

• Ua ino aore ra parari roa 860 fare

• Ua î 90 Piha a te Basileia e hoê Piha tairururaa i te pape

Faaohiparaa i te mau ô horoa noa

Ua haamâuˈahia hau atu 27 968 750 moni farane no tei ati, e ô mai:

• Te maa mai te raiti, te huero pǐpǐ e te ahoe sitona

• Te mau taihaa fare mai te mǎrû roˈi e te paruru naonao

• Ua tataî aore ra patu-faahou-hia te mau fare tei ino

Mea nafea to tatou mau taeae i te faaohipa-maitai-raa i te mau ô horoa noa? A tahi, ua hiˈopoa maite ratou e titauhia anei ia tataî te fare tahua tataitahi. Ia patu-faahou-hia te fare tahua, e ravehia te huru hamaniraa o tera vahi.

Ua mauruuru roa to tatou mau taeae e tuahine i te tauturu ta ratou i fanaˈo. Ua parau hoê tuahine: “Ua faahuehue roa te pape pue i to matou oraraa no te mea ua ino roa ta matou mau faaapu e aita faahou to matou fare. Ua topa roa to matou hau, i to te mau taeae e tuahine haereraa mai i tera noa mahana no te tauturu ia matou e no te horoa i te hoê nohoraa papu. Ua oaoa matou i to matou fanaˈoraa i te maa no ǒ mai i te amaa. Ua maere roa matou i te ite-mata-raa i te Ioane 13:34, 35 i te ohiparaa i roto i to matou oraraa. . . . Te vai ra iho â te here mau. Te haamauruuru nei au e to ˈu utuafare i te mau taeae tei haere mai e tauturu ia matou i te taime tano.”

Ua ite atoa te tahi atu mau taata i ta tatou ohipa. Ua parau te hoê aratai o te hoê oire iti i Sabagreia, Bayelsa: “Te vai ra e rave rahi faanahonahoraa aore ra haapaoraa na te ao nei, o te mau Ite no Iehova anaˈe râ tei rave i teie huru ohipa. . . . O ta [outou] faanahonahoraa te mea maitai roa ˈˈe na te ao nei.”

“Ua ite mata matou i to Iehova here”

I Fepuare 2023, ua tupu hau atu 400 ati auahi i Tireni. Ua ino roa hau atu 430 000 tâ fenua, oia atoa te tahi tuhaa o te mau faufaa i Tireni. Fatata 8 000 taata tei faarue i to ratou fare. I muri aˈe i teie ati, ua faanaho te amaa i te tauturu no tei ati.

Tupuraa o to tatou mau taeae e tuahine

• Ua faarue 222 feia poro i to ratou fare

• Ua ino roa 20 fare

Faaohiparaa i te mau ô horoa noa

Ua haamâuˈahia hau atu 22 375 000 moni farane no tei ati, e ô mai:

• Te maa e te pape

• Te mori, te mau taihaa tamâraa e te raau rapaauraa

• Te patu-faahou-raa i te mau fare tei ino

Ua oti roa hoê utuafare i to ratou iteraa ua ere ratou i ta ratou faufaa mai to ratou fare e ta ratou imiraa. Aita ïa e ohipa faahou ta ratou. I te mau mahana matamua, ua mauiui roa te utuafare i to ratou iteraa aita faahou to ratou fare i nia i to ratou iho fenua. I to ratou râ iteraa ua patu-faahou-hia hoê fare, ua iti mai to ratou haapeapearaa. Ua tauturu te here o te mau rima tauturu ia ratou ia haapauma i teie fifi. Ua turai teie tupuraa i teie utuafare ia apiti e te mau rima tauturu, no te patu faahou i te fare o te tahi atu taeae.

E rave rahi o to tatou mau taeae e tuahine, tei putapû i teie ohipa tauturu. Ua parau hoê taeae: “E faanahoraa maitai roa te mau Tomite tauturu i tei ati no ǒ mai ia Iehova ra. I te mahana i muri aˈe i te ati, ua ineine aˈena ratou i te horoa i te tauturu hinaarohia. Mea faaitoito mau ia taio no nia i te mau ohipa tauturu i roto i te tahi atu mau fenua na te ao nei. Mea taa ê râ ia roohia outou i te ati. E mauruuru rahi to outou i te faanahonahoraa, e nafea te mau taeae e pee ai i to Iehova huru maitatai e e to ratou haapeapearaa i te pae materia, varua e huru aau. Ua ite mata matou i to Iehova here i te ohiparaa.”

I roto i teie ao, e ite tatou e e rahi roa mai te mau ati. (Luka 21:10, 11) E faaohipa râ, to tatou Arii î i te here, Iesu Mesia, i te amuiraa Kerisetiano no te faaite mai to pihai iho oia ia tatou “i te mau mahana atoa e tae noa ˈtu i te anotau hopea o te ao nei.” (Mataio 28:20) Te faaite ra ta outou mau ô horoa noa no te turu i te ohipa na te ao nei, i nia donate.jw.org e te tahi atu mau ravea oia atoa to outou taime e puai i to outou turu i te Faatereraa arii e te Arii î i te here. Mauruuru no to outou turu-noa-raa mai.