Faaineineraa o te mau video o te tairururaa e toru mahana “A oaoa noa!” no 2020

E putapû to tatou aau i te mau video i ta tatou mau tairururaa e toru mahana e e taa maitai atu â ia tatou i te mau haapiiraa Bibilia. E 114 video tei faaineinehia no te tairururaa “A oaoa noa!”, e 43 oreroraa parau vauvauhia e te mau mero o te Tino aratai e ta ratou mau mero tauturu. Ua feruri ê na anei outou i te rahiraa taime e moni i faaohipahia no te faaineine i tera mau video?

Piri i te 900 taeae e tuahine ati aˈe te ao nei tei horoa i to ratou taime e ite no te tauturu i te faaineineraa o teie tairururaa. Piri i te 100 000 hora ohipa tei titauhia ia ratou i nia i te hoê area piti matahiti. I roto i tera rahiraa hora, e 70 000 hora tei titauhia no te faaineine i te aamu Bibilia hautihia e 76 minuti Nehemia: “Te oaoa no ǒ mai ia Iehova, to outou ïa puai.”

Mea rahi atoa te moni tei faaohipahia no te hoo mai i tei hinaarohia e te mau rima tauturu, oia atoa te mau taihaa, te mau matini haruharuraa e te mau vahi i tavirihia ˈi te mau video.

“E hinaaro te Tomite haapiiraa o te Tino aratai e rave rau fenua e peu tutuu i roto i ta tatou mau video. E faaite maitai te reira e utuafare fetii taeae tatou ati aˈe i te ao nei,” o ta Jared Gossman i parau, o te ohipa ra i te tuhaa haruharuraa video. “E 24 pǔpǔ no 11 fenua tei ohipa amui ia raea teie fa. E titauhia te moni, te faaineineraa e te faanahoraa maitai no te tiaau i te taata no te hoê ohipa rahi mai teie.”

E titauhia te taihaa taa maitai e te tahi mau hohoˈa hamanihia no e rave rahi o ta tatou mau video. No te mau hohoˈa i roto i te video Nehemia, ua hamanihia ïa i roto i te vahi taviriraa hohoˈa o Mouˈa Ebo pihai iho ia Patterson, New York, i Marite. Ia ore ia mâuˈa te moni i faataahia no teie video a nehenehe noa ˈi e faahohoˈa maitai i te mau tupuraa i tera ra tau, ua hamani te mau taeae te tahi mau tuhaa e au i te mau patu o Ierusalema na mua ˈˈe. Tera mau tuhaa, e iri ïa e ono metera te teitei e te rimu na nia iho faanehenehehia ia hohoˈa te reira i te ofai. E nehenehe e faaohipahia teie mau pǎpai no te taviri i te tahi atu mau hohoˈa o te video. Ia na reira, aita ïa e faufaa ia hamani faarahi i te pǎpai. Noa ˈtu râ, piri i te 100 000 tara Marite tei faaohipahia no te hamani i te mau hohoˈa no teie noa ˈˈe video.a

Papu ïa e rahi atu â to tatou mauruuru no te tairururaa e toru mahana o teie matahiti. Ua papu ia matou e riro te reira ei arueraa ia Iehova. Mauruuru no ta outou mau ô horoa noa no te tururaa i te ohipa ati aˈe te ao nei ta outou e pûpû nei i nia donate.jw.org e na roto i te tahi atu mau ravea.