E tamau Iehova i te faaineine i te faaoraraa

Ua mauruuru roa to ˈu utuafare i te farereiraa i te taeae o to ˈu metua vahine e ta ˈna vahine i 1976. Ua haapii te taeae o to ˈu metua vahine i te Bibilia na muri i te mau Ite no Iehova. Ua parau o ˈna i to ˈu na metua e ua haapii o ˈna i te hoê mea apî no nia i te Bibilia. Na mua roa, ua faahiti o ˈna i ta Iesu i parau no nia i te mau tia haapaoraa o to ˈna tau, i roto i te Mataio pene 23. I muri iho, ua haamahiti o ˈna i te mau tuearaa e vai ra i rotopu i te mau tia haapaoraa i to Iesu tau e i to matou tau. E Katolika to ˈu mama e mea turu roa o ˈna i ta ˈna haapaoraa. I to ˈna parauraahia e ua faahapa uˈana Iesu i te mau tia haapaoraa, mea fifi roa no ˈna ia tiaturi atu. Faaoti atura o ˈna i te imi roa atu i te mau haapapuraa i roto i te Bibilia.

I ora na matou i Lituanie. I taua taime ra, tei raro aˈe tera fenua i te faatereraa Rusia tahito. No te mau taotiaraa etaeta ta te faatereraa i haamau no nia i te haamoriraa, mea varavara roa te taata e Bibilia ta ratou. Ani atura to ˈu mama i te hoê Bibilia i te hoê ekalesia. Taio atura o ˈna i te reira e ua ite papu ia ˈna e ua faahapa iho â Iesu i te mau tia haapaoraa o to ˈna tau no to ratou huru haavarevare. Ua hinaaro to ˈu mama e ite hau atu â, a manaˈo ai eaha atu â ta te Bibilia e haapii mau ra. Ua noaa ia ˈna te tahi mau papai i te Ite no Iehova tei haapii i te Bibilia i to ˈna taeae.

Oioi to matou utuafare i te apiti i te mau putuputuraa a te mau Ite no Iehova. Inaha ua opanihia ta ratou ohipa, ua tauiui-noa-hia te vahi o te mau putuputuraa. I te tahi taime, e putuputu matou i te hoê uru raau na pihai iho. Ua bapetizohia to ˈu metua vahine ei Ite no Iehova i 1978, oia atoa to ˈu tuahine maehaa o Danguolė to ˈna iˈoa, e o vau. E 15 matahiti to mâua i taua taime ra. Ua bapetizohia to ˈu metua tane tau matahiti i muri iho.

Ua faaineine Iehova i te faaoraraa i to ˈu apîraa

Hoê avaˈe i muri iho i to mâua bapetizoraa, ua faaruru mâua Danguolė i te patoiraa i te fare haapiiraa. I te hoê putuputuraa taa ê i te fare haapiiraa, ua tapao te tahi mau orometua haapii e aita mâua Danguolė i tia no te himene aiˈa Rusia tahito. Aita mâua i na reira no to mâua tiaraa amui ore. Ua faatia tera mau orometua haapii i te reira i te tia faatere o te fare haapiiraa. Faaara atura o ˈna i te mau mutoi huna piihia KGB, tei oioi i te haere e hiˈo i to mâua utuafare e i te uiui atu.

Ua titau-atoa-hia ia mâua Danguolė ia faaite i te faaroo puai no te mea ua tamau te mau orometua haapii i te turai ia mâua ia tiaturi e aita e Atua. Ei hiˈoraa, i te 16raa o to mâua matahiti, ua anihia i te mau piahi ia papai i to ratou manaˈo no nia i teie tumu parau: “No te aha aita vau e tiaturi ra i te Atua?” Inaha aita to ˈu manaˈo e tu ra i te tumu parau, ua papai au i nia i te hoê papie: “Te tiaturi nei au i te Atua” e ua tuu vau i te reira i mua ia ˈu. Ite atura te orometua haapii i te papie e riri atura o ˈna a tuô atu ai: “A papai ïa no te aha oe e tiaturi i te reira!” Ua oaoa roa vau ua faatiahia vau ia papai no nia i ta ˈu mau tiaturiraa e ua na reira atoa to ˈu tuahine. Ua ite e piti â tamahine i ta mâua i papai. Faaoti atura raua i te papai no te aha raua e tiaturi ai i te Atua. Mea rahi te tupuraa mai teie te huru ua ite au ia Iehova tei “faaineine . . . i te faaoraraa” i te mau taime fifi mau.—Korinetia 1, 10:13.

Ua nenei te mau Ite no Iehova i te buka Du paradis perdu au paradis reconquis. E maha aore ra e pae noa neneiraa o tera buka i Lituanie. Ua farii te mau taeae e aratai ra i te taviniraa ia horoa mai ia mâua Danguolė i tera buka, no hoê noa râ avaˈe. Parau atura vau ia Danguolė: “Ahani na tâua roa tera buka!” Inaha ua titauhia ia faahoˈi atu, faaoti atura mâua i te papai rima i te buka taatoa! Ua mauiui roa mâua i te rima. Tera râ, ua oaoa roa mâua e te vai ra ia mâua hoê neneiraa o tera buka no te haapuai i to mâua faaroo.

I 1982, i te 19raa o to ˈu matahiti, ua faautuahia vau e piti matahiti i te fare tapearaa no to ˈu patoiraa i te rave i te tau faehau. Mea fifi roa no ˈu i te fare tapearaa no te mea ua haaatihia vau e te feia ino mau. Tera râ, ua oaoa vau no te mea i te tahi mau taime, ua nehenehe au e paraparau i te tahi atu Ite no Iehova tei tuuhia i te hoê â fare tapearaa e o vau. Ua tuuhia vau i rapae i te fare tapearaa i muri aˈe i na matahiti faautuaraa. E tapea-faahou-hia râ vau i muri iho.

Ua faaipoipo vau hoê tuahine e here ra ia Iehova

I 1984, ua tuuhia vau i rapae o te fare tapearaa. Farerei atura vau ia Lidija, hoê tuahine e ora ra i Ukraine. Mea nehenehe roa o ˈna e mea piri roa o ˈna ia Iehova. Faaipoipo atura mâua. I muri iho, ua vaiiho Lidija i to ˈna oraraa i Ukraine no te haere mai e ora ia ˈu nei i Lituanie. I te mea e Ite no Iehova o ˈna, oia atoa to ˈna utuafare, ua faaruru atoa o ˈna i te patoiraa uˈana i to ˈna tau haapiiraa. I taua mau taime fifi mau, ua itoitohia o ˈna maoti te aamu o te mau taeae tei faaruru i te aua haavîraa Nazi aore ra tei afaihia i Sibérie.

I te mau matahiti 1980, ua opani-noa-â-hia te ohipa a te mau Ite no Iehova i Lituanie. No reira, ia tupu te hoê faaipoiporaa Ite no Iehova, pinepine ratou i te rave atoa i tera taime no te faatupu e piti mahana tairururaa ma te huna. Tera tei tupu i ta mâua faaipoiporaa. Ua haere mai te mau manihini no te faaipoiporaa. Ua nehenehe atoa râ ratou e faaroo e rave rahi oreroraa parau, e himene e rave rau himene, oia atoa e mataitai i te mau taeae e tuahine tei faaineine e maha hautiraa aamu Bibilia. Ua tae mai 450 tiahapa taata, mai te mau fetii no Rusia tahito taatoa mai. Oia atoa te mau mutoi huna o te KGB, tei ore i titau-manihini-hia. Auaˈe râ ua taa ia vetahi mau taeae o vai ratou!

Ua tuu-faahou-hia vau i mua i te tiripuna

I te tahi taime, e tapea faahou te faatereraa o te fenua i te mau Ite no Iehova tei ore i turu ia ratou i muri aˈe i to ratou tuuraa i rapae i te fare tapearaa. Tau avaˈe i muri iho i to mâua faaipoiporaa, ua tuu-faahou-hia vau i mua i te tiripuna. Tei te tiripuna vau i te mahana taatoa. Area o Lidija, tei te fare maˈi ïa i pihai iho noa mai, no te mea ua hapû o ˈna. Aita vau i faatiahia ia haere e hiˈo ia ˈna i te roaraa o te haavaraa. Ua nehenehe râ vau e haere na avae i te fare maˈi i te hora faafaaearaa, a tia noa ai i rapae, i te haamaramarama o to ˈna piha. E tatara o ˈna i te haamaramarama a nehenehe atu ai mâua e faaitoito te tahi i te tahi. I te hopea o taua mahana ra, ua faautuahia vau e toru matahiti i te fare tapearaa.

Ma te peapea, e piti mahana i muri iho, ua marua te pêpe i roto i te opu o Lidija. Ua mauiui roa e ua oto o ˈna. Aita noa i titauhia ia ˈna ia faaruru i tera ati. Ua titau-atoa-hia ia ˈna ia haamatau i te hoê oraraa apî, i te hoê fenua apî e to ˈu na metua tei ore i ite roa i te paraparau i te reo Ukraine aore ra Rusia. Tera noa hoi te mau reo ta Lidija i paraparau. Noa ˈtu râ, ua turui noa Lidija i nia ia Iehova e ua horoa to ˈu na metua ia ˈna i te here ta ˈna i hinaaro mau no te faaruru i taua taime fifi roa.

Ua tamau Iehova i te faaineine i te faaoraraa

Maoti ta ˈu i haapii i te taime matamua i te fare tapearaa, ua ineine au no te faaruru i ta ˈu e ite i te piti o te faautuaraa. Hoê ohipa tei tauturu ia ˈu, o te pororaa ïa ia vetahi ê. Ei hiˈoraa, i to ˈu tereraa i te fare tapearaa, ua faautahia te mau faurao e te mau pereoo au auahi e te feia tapeahia. I te tahi taime, e tuuhia 15 tae atu 20 tane i roto i te hoê vahi faataahia no pae aore ra ono noa taata. I taua mau tere ra, ua poro vau i te feia tapeahia no nia i te poroi Bibilia. Ua faataa vau no te aha aita vau i faaô i roto i te ohipa tamaˈi e poritita e ua faaite atu vau e tera te tumu i tapeahia ai au. Ua parau atoa atu vau e no te aha mea tano ia tiaturi e te vai mau ra te Atua.

Ua tuuhia vau i te fare tapearaa i Marijampolė.a No ˈu, o vau aˈe paha te Ite no Iehova i rotopu i na 2 000 taata tei rave i te ohipa ino mau. Ua taparahihia vau hoê noa taime. Tera râ, mea pinepine te feia tapeahia i te faariariahia, taparahihia e haapohehia. Noa ˈtu e ere i te mea ohie, ua tutava vau i te faaitoito i tei hepohepo e ia faaite i te aumihi, hoê huru maitai mea varavara roa i te iteraahia i te fare tapearaa.

Ua tamata atoa te mau mutoi KGB i te haaparuparu ia matou i te pae o te feruriraa no te turai mai ia feaa. Ma te maere mau, ua faaroo ratou i ta te mau mero o to ˈu utuafare i faahiti i te fare e ua faatia mai te mau mutoi no nia i ta ratou mau paraparauraa. E taviri râ te mau mutoi i ta ratou mau parau, ia manaˈo vau e te tatamaˈi noa ra ratou e aita faahou e auhoêraa i rotopu ia ratou. Aita roa ˈtu vau i tiaturi i tera mau mutoi. I to ˈu noa râ faatiamâraahia i nehenehe ai au e faaau i ta te KGB i faatia mai e i ta to ˈu utuafare i parau iho â.—Mataio 10:16.

I te hoê taime, ua matau maitai te hoê tuahine i te hoê tiai o te fare tapearaa. E taata tapiri hoi o ˈna. Ua ani atu te tuahine ia horoa huna ia ˈu ra i te hoê Bibilia nainai na roto i te reo Rusia. I te po, e papai au maa irava Bibilia no ǒ mai i te Aˈoraa i nia i te mouˈa a Iesu i nia i te hoê papie nainai. E i te mahana i muri iho, a ohipa ai i te fare tapearaa, e nehenehe au e taio faahou i te reira i te taime aita e taata e ite mai. Mai te reira vau i tamau aau ai i te Aˈoraa i nia i te mouˈa a Iesu na roto i te reo Rusia, noa ˈtu e ere te Rusia i to ˈu reo tumu. Ua itehia râ i te mau tiai i ta ˈu Bibilia e ua tapea ratou i te reira. I taua taime ra, ua mau aˈena ïa ia ˈu ta Iesu mau parau.

Ua fanaˈo atoa vau i te turu faufaa mau no ǒ mai ia Lidija, tei papai mai i te mau rata faaitoito mau i te mau mahana atoa. Tera râ, ua faatiahia vau ia pahono ia ˈna e piti noa taime i roto i te avaˈe. Noa ˈtu râ, ua parau mai Lidija e maoti ta ˈu mau rata, ua papu ia ˈna e te ora noa ra vau, te vai taiva ore noa ra vau ia Iehova e te here noa ra vau ia ˈna.

Ua faaineine Iehova i te faaoraraa ma te pahono i ta ˈu mau pure

I te hoê taime, ua ani hoê pǔpǔ taata tapeahia i te mau tia o te fare tapearaa ia fanaˈo ratou i te huru tupuraa maitai aˈe i te ohipa. A tiai ai ia tupu te reira, ua faaea taua pǔpǔ taata tapeahia ra i te ohipa. Papu, ua faautuahia ratou ma te ino mau no to ratou orureraa hau. I muri iho, ua parau te mau tia o te fare tapearaa ia ˈu e i te tahi atu mau taata tapeahia e e tuuhia matou i roto i te hoê pǔpǔ ohipa apî o te mono i te pǔpǔ o te feia orure hau.

Ia ore au e farii i tera toroa apî, e faautuahia vau ma te ino mau. Ia farii râ vau, e hiˈo mai te tahi atu mau taata tapeahia ia ˈu mai te hoê taata taiva e e hinaaro ratou e tahoo atu. Te auraa ïa e e taparahi mai ratou aore ra e haapohe mai ratou ia ˈu. E faateimaharaa rahi ta ˈu i ite i tera taime, mai te huru ra e tei roto vau i te hoê afata e aita vau e nehenehe e hauti faahou. Aita vau i ite eaha te rave. (Paraleipomeno 2, 20:12) Ua tamau ïa vau i te taparu ia Iehova i ta ˈna tauturu.

Tae maira hoê taata tapeahia o to ˈu pǔpǔ ohipa matamua e ani maira o ˈna ia haere na muri ia ˈna no te farerei i te tia ohipa. Aita vau i matau maitai i tera taata, ua farerei noa mâua i te ohipa. Noa ˈtu râ, ua ani o ˈna ia vai noa vau i te pǔpǔ ohipa matamua. E ere hoi te tia ohipa i te hoê taata o te farii hanoa i te mau aniraa. Tatamaˈi atura raua. Tiahi atura te tia ohipa ia mâua i rapae o to ˈna piha ohipa e farii atura o ˈna ia vai au i to ˈu pǔpǔ ohipa matamua. Ua oaoa roa vau ua pahonohia ta ˈu mau pure. (Petero 2, 2:9) I te roaraa o to ˈu tau tapearaa, a tahi ra vau e ite ai hoê taata tapeahia i te tauturu i te tahi atu mai teie te huru. I taua tupuraa ra, ua taa ia ˈu e nehenehe Iehova e faaohipa i te mau taata atoa no te tauturu ia tatou e no te pahono i ta tatou mau pure.

Ua faaineine Iehova i te faaoraraa no Lidija

E faataa atu vau i ta Lidija i faaruru, a vai ai au i te fare tapearaa. Ua titauhia ia ˈna ia imi i te ohipa. Inaha râ tei te fare tapearaa vau, aita te rahiraa o te mau paoti i hinaaro e rave ia ˈna no te mea ua riaria ratou i te mau mutoi huna KGB. Ite atura ia ˈna hoê ohipa. Ua titauhia ia ˈna ia haapao 30 tamarii i te roaraa 12 hora i te mahana hoê. Auê ïa ohipa rohirohi! Ua horoa râ Iehova ia ˈna i te puai no te haere i te ohipa i te mau mahana atoa. Hau atu, ua tere te mau taeae e tuahine no Lituanie hanere kilometera no te haere e faaitoito ia ˈna, no te amuimui atu e no te hapono atu i te mau papai Bibilia reo Rusia. Aita o ˈna i moˈemoˈe aˈe!

Ua tavini to ˈu utuafare ia Iehova

I to ˈu faatiamâraahia, ua apiti au i roto i te faanahoraa i te hoê piha huna no te ohipa huriraa i ta tatou mau papai na roto i te reo Lituanie. Tau matahiti i muri iho, ua topa te faatereraa Rusia tahito e ua faaotihia e ere faahou ta matou ohipa i te mea opani i Lituanie. Haamau-atura-hia hoê piha huriraa reo Lituanie ma te ore e huna i te reira. Ua titauhia ia ˈu ia faahoro i te pereoo hoê hora e te afa no te tapae i te piha huriraa. Noa ˈtu râ, ua na reira vau ma te oaoa no te tauturu atu, i te mau hepetoma atoa e pae matahiti te maoro.

I Atete 1997, ua titau-manihini-hia mâua Lidija i te Betela a te mau Ite no Iehova i Lituanie. Ua oaoa roa mâua i tera titau-manihini-raa. E piti tamahine ta mâua. E iva matahiti to Osana e e pae matahiti to Svajūnė. E toru noa mahana ta matou no te haere e faaea i te hoê fare i pihai iho i te Betela e no te tapao ia Oksana i ta ˈna fare haapiiraa apî.

E nafea mâua i te amo i ta mâua mau hopoia ma te aifaito? I te mau poipoi atoa, e tere au i te Betela. E apiti mai Lidija i muri aˈe i to ˈna afairaa i te mau tamahine i te fare haapiiraa. I muri iho, e faarue Lidija i te Betela no te haere i te fare hou a hoˈi mai ai ta mâua na tamahine mai te fare haapiiraa mai.

Ua tiai ru te utuafare taatoa i te mau po Mahana pae. E tunu matou i te maa, e tamâ matou i te fare, e rave matou i te haamoriraa utuafare e e arearea matou. E faanaho atoa matou i te mau tere na te mouˈa, na tahatai aore ra i te tahi atu mau Betela i Europa. E nehenehe ïa ta mâua na tamahine e ite i ta Iehova poieteraa e i te auhoêraa i rotopu i te mau taeae na te ara. Auê ïa mâua Lidija i te oaoa i ta mâua na tamahine! Ua haamata raua toopiti i te ohipa pionie tamau i te 15raa o to raua matahiti. I teie mahana, te tavini ra o Oksana e ta ˈna tane o Jean-Benoit i te piha ohipa huriraa reo Lituanie. Area o Svajūnė e ta ˈna tane Nicolas, tei te Betela ïa i Farani.

Ei hoa faaipoipo, ua riro iho â mâua Lidija “ei hoê,” no te mea o te taviniraa ia Iehova te mea faufaa roa ˈˈe i roto i to mâua oraraa. (Ephesia 5:31; Koheleta 4:12) Noa ˈtu ua roohia mâua “i te mau huru ati atoa” e ua hamani-ino-hia mâua e rave rahi matahiti, aita roa ˈtu mâua i faaruehia, aita roa ˈtu mâua i “apǐapǐ roa.” (Korinetia 2, 4:8, 9) Ua ite tamau mâua ia Iehova i te faaineineraa i te faaoraraa e ua papu ia mâua e na reira noa o ˈna.