“Ua taui outou i to ˈu huru hiˈoraa i te mau Ite no Iehova”
O TA te hoê ïa taata Polonia haapao i te fare tapearaa i pahono i mua i te hoê tumu parau no nia i te ohipa a te mau Ite no Iehova, tei faataahia i roto i ta tatou vea o te 15 no Atopa 1998. Ua faataa maitai te tumu parau ra “Ia riro te mau mafatu ofai ei mau mafatu farii maitai,” i te manuïa ta te mau Ite no Iehova i fanaˈo na roto i te raveraa i te ohipa e te feia i tapeahia i te fare tapearaa no Wołów, i Polonia.
Hou a matara mai ai te vea ra Te Pare Tiairaa i faahitihia ˈtu na i nia nei i mua i te taata, ua faanahohia te hoê apooraa taa ê no te horoa i te reira na te feia i tapeahia, i te 13 no Setepa 1998 i te fare tapearaa no Wołów. Te feia i titau-manihini-hia ia haere mai, o te mau Ite no reira ïa, te feia i tapeahia tei bapetizohia e te tahi atu feia anaanatae i tapeahia e e rave rahi taata i haapao i te fare tapearaa. Teie te tahi mau faahitiraa parau a te feia i haere mai.
Te na ô ra o Jerzy, te hoê Ite no Iehova i bapetizohia i te fare tapearaa hau atu i te pae matahiti, e: “E rahi roa to ˈu oaoa, no te mea e nehenehe au e taio i teie mahana i te mau tutavaraa a te mau taeae no te mau amuiraa tapiri no te tauturu ia matou.” Te na ô faahou ra oia e: “Te rohi nei au no te haamaitai ia ˈu, e e nehenehe au e ite nafea Iehova e tarai ai ia ˈu.”
Te parau ra te tahi atu taata i tapeahia, o Zdzisław te iˈoa, no nia i te ohipa pororaa i te fare tapearaa e: “I teie nei, te faaineine nei e maha taata i tapeahia no te bapetizoraa, e te tamau noa ra te mau taata e anaanatae apî ra i te haere mai i te mau putuputuraa i ta matou piha. Ua riro teie tumu parau ei tumu puai no matou no te ohipa hau atu â i roto i teie aua.” Auê ïa haerea maitai, ia ferurihia e faaea noâ o Zdzisław 19 matahiti i roto i te fare tapearaa!
I muri aˈe i te taioraa i te tumu parau no te fare tapearaa no Wołów, ua parau te hoê taata haapao i te fare tapearaa e: “Ua haamaitaihia iho â matou. Aita roa ˈtu vau i manaˈo e e fanaˈo teie fare tapearaa i teie faaiteraa maitai na roto 130 reo i te ao nei. Mea au na ˈu ia outou, e te haapopou nei au i ta outou mau tutavaraa e haapao i te feia i tapeahia.” Te na ô atoa ra te tahi atu â taata haapao e: “Ua taui outou i to ˈu huru hiˈoraa i te mau Ite no Iehova. I mutaa iho, i faariro na vau ia outou ei feia faaroo maamaa. I teie nei, te ite ra vau e e feia faatura outou i te mau faaueraa tumu.”
Ua ata e ua parau te taata faatere o te fare tapearaa no Wołów, o Marek Gajos e: “I te omuaraa, ua manaˈo matou e mea iti roa ta outou e rave. Ua manaˈo matou e o te tahi haapaoraa ê noa outou e hiaai ra e faatitiaifaro i te feia i tapeahia maoti te Bibilia. Ma te ite râ i te mau faahopearaa o ta outou ohipa matamua, ua faaoti aˈera matou e tahoê maite ia outou. A iva aˈenei matahiti to outou haereraa mai ma te rohirohi ore i ǒ nei, e te mauruuru roa ra vau i te mea ta outou i rave e tae roa aˈenei i teie mahana.”
Tera râ, mea nafea te tumu parau i te fariiraahia e te rahiraa taata e tapeahia nei i Wołów? No te anaanatae rahi o te feia i tapeahia i pau ai te mau vea a te mau Ite i roto i te fare tapearaa. Ua anaanatae atoa te feia haapao i te fare tapearaa i ani ai ratou e 40 vea hau na ratou iho. No te pahono i te rahiraa aniraa, ua tauturu e ua horoa te mau amuiraa no reira 100 vea hau na te mau taeae i te fare tapearaa. I te hoê â taime, ua rahi noa ˈtura te feia e haere mai i te putuputuraa i te fare tapearaa.
Te na ô ra o Piotr Choduń, te hoê taata haapao i te fare tapearaa o tei tahoê maite i te mau Ite no Iehova e: “Ua opua aˈera matou e ia tuuhia teie vea i roto i te mau afata hiˈo atoa o ta matou fare tapearaa. Te tiaturi nei matou e e taio te feia atoa i tapeahia o te ore â e haapii i te Bibilia e o outou i te vea.”
Te faatupu noa ra te hiˈoraa maitai o te mau Ite e ta ratou mau tutavaraa papu e poro i te mau faahopearaa maitatai. Taa ê atu i na feia 15 i tapeahia o tei haere mua e tae roa ˈtu i te bapetizoraa, ua pûpû e 2 taata haapao i te fare tapearaa i to raua oraraa no Iehova e ua ani te tahi atu taata haapao i te fare tapearaa i te hoê haapiiraa Bibilia. Oia mau, te faahanahana ra te mau taeae e poro ra i roto i te fare tapearaa no Wołów i te Atua ra o Iehova no to ratou manuïa.—A faaau e te Korinetia 1, 3:6, 7.
[Hohoˈa i te api 28]
Na Ite e toru e te hoê taata i tapeahia i te faaiteiteraa vea i te piha taioraa o te fare tapearaa