Aita te fare tapearaa i faaatea ê ia ˈu ia Iehova

I te matahiti 1966, ua hoˈi matou i Ukraine. Te haamanaˈo maitai ra vau i te maharaa o to ˈu matahiti, ua haere mâua mama e farerei i to ˈu papa ruau tei tapeahia. Ua rave mâua i te pereoo auahi mai te oire Kryvyï Rih i Ukraine no te haere i te fare tapearaa i Mordovie i Rusia no ropu. Ua faatiahia ia faaea mâua e piti noa hora e to ˈu papa ruau e te mau tiai. Ua farii râ ratou ia rave mai oia ia ˈu i nia i to ˈna avae!

Ua tapea noa i to ˈu faaroo a haere ai i te haapiiraa

A paari ai i Ukraine, e rave rahi taime te tamataraahia to ˈu faaroo ia Iehova. Ei hiˈoraa, ia haamata te tamarii i te haere i te haapiiraa, e titauhia ia pine ratou i nia i to ratou ahu haapiiraa i te hoê fetia te vai ra te hohoˈa o te faatere Lénine i to ˈna tamariiraa.a Tau matahiti i muri aˈe, ua faahepohia te tamarii ia taamu i te hoê ahu uteute i nia i to ratou aˈî ei faaiteraa te turu ra ratou i te faatere Lénine. Aita vau i farii i te rave i teie mau tapao here aiˈa no te mea o Iehova anaˈe ta ˈu e haamori.

Ua tauturu mai to ˈu na metua ia rave i ta ˈu iho faaotiraa e tavini ia Iehova. Ma te faaoromai, ua faataa e ua haaferuri raua ia ˈu i nia i te mau tumu parau faufaa mai te oreraa e faaô i roto i te mau ohipa poritita. Ua parau atoa mai raua ia faaitoito i roto i ta ˈu haapiiraa, e faahanahana hoi te reira ia Iehova.

Te vai ra te hoê vea no nia i te maimiraa aivanaa e te haapaoraa (Nauka i religiia). Te fa o tera vea, o te turairaa ïa i te taata ia ore e tiaturi i te Atua aore ra i te haapaoraa. I te hoê mahana, ua haere mai hoê o to ratou tia i ta matou fare haapiiraa. Ua orero mai oia no te haapapu i te mau piahi aita e Atua e ua tuu te mau orometua ia ˈu i mua roa.

I te hoperaa ta ˈna oreroraa, ua afaihia vau i muri e ua anihia i te tia o tera vea ia paraparau ia ˈu. Ua ani mai oia eaha ta ˈu haapaoraa. Ma te taiâ ore, pahono atura vau: “E Ite no Iehova vau.” Aita ˈtu â parau ta ˈna i faahiti, ua haamauruuru mai râ oia i te faaroo-maite-raa vau i ta ˈna oreroraa. Ua huru ê roa te mau orometua!

Ua tapea noa i to ˈu faaroo ia Iehova mai te toea o to ˈu utuafare

Ua turui te taatoaraa o to matou utuafare i nia ia Iehova no te nenei i te mau papai Kerisetiano i to matou fare e no te opere atoa i te reira. Hau atu â, ua tavini to ˈu papa ei tiaau ratere. Ua ratere oia na te mau amuiraa e pǔpǔ i Ukraine no ropu.

I te hoê avatea i Fepuare 1978, e piti noa mahana na mua ˈˈe to ˈu taeae Pavel e fanauhia ˈi, e ohipa tei tupu. Ua hoˈi mai au i te fare na te fare haapiiraa mai, ua ite au ua huehia ta matou mau taihaa atoa! Ua haere mai te mau mutoi e paheru i to matou fare e ua haru i ta matou mau papai atoa.

E atahia oe te ohipa i tupu! I te mahana i muri iho, ua haere mâua to ˈu taeae apî o Mykhailo i te haapiiraa e faaroo atura mâua te manaˈo ra te mau orometua e mata huna na te hau Marite to mâua na metua. I muri roa mai ratou i te taaraa mea hape te reira! Ua taui atoa te mau hoa haapiiraa i muri aˈe e ua riro mai vetahi ei Ite no Iehova.

I 1981, ua paheru-faahou-hia to matou fare. Noa ˈtu aita i tia ˈtu ra to ˈu matahiti, ua afaihia vau, to ˈu papa e te papa o to ˈu mama i te piha ohipa a te auvaha ture. Ua haamǎtaˈu mai to ratou taata rahi ma te parau mai e hurihia vau i roto i te fare tapearaa. I te hoê â taime, ua parau mai te tahi atu o ratou e ananahi maitai te tiai mai ra ia ˈu mai te peu e tauturu vau ia ratou. A hiˈo na paˈi, hoê taata no te haamǎtaˈu ia ˈu, e hoê no te peta ia ˈu! Ua haamanaˈo mai raua e piti atoa ra i te rahiraa matahiti i tapeahia ˈi to ˈu papa, te papa o to ˈu mama e te mau taeae o to ˈu mama e to to ˈu papa. Aita râ raua i ite, i te na reiraraa raua, ua haapapu atu â te reira e nehenehe ta ˈu e faaoromai tamau i roto i te fare tapearaa maoti te tauturu a Iehova!—Philipi 4:13.

Ua tapea noa i to ˈu faaroo ia Iehova i roto i te fare tapearaa

Hoê mahana i muri aˈe te tiaraa to ˈu 18 matahiti, ua tae mai te hoê parau titauraa no te rave i te tau faehau. I te mea aita vau i farii, ua afaihia vau i te fare tapearaa a tiai noa ˈtu ai i te taime haavaraa. Ua hurihia vau i roto i te hoê piha tapearaa rahi, 85 tane i roto o te tiai ra i te taime faataahia no ratou no te taoto i nia hoê o na 34 roˈi! Ua faatiahia matou ia hopu i te pape hoê anaˈe taime i te hebedoma!

A tomo ai au i roto i te piha tapearaa, ua tapirihia mai te opani e hiˈo pauroa mai nei te taata ia ˈu. Haamata ˈtura te tahi i roto i te poro i te aniani mai ia ˈu no nia i te tumu i tapeahia ˈi au. Ua mǎtaˈu rii au, ua haamanaˈo râ vau i te aamu Bibilia o Daniela tei paruruhia i roto i te apoo liona. Ua tauturu mai te reira ia horoa i to ˈu tiaturiraa taatoa ia Iehova e ia faaea hau noa.—Isaia 30:15; Daniela 6:21, 22.

I te paiaraa matou i tera po, ua haamata te tahi mau auri i te ui mai ia ˈu e rave rahi uiraa no nia i ta ˈu mau tiaturiraa. Na reira-noa-raa, aita ˈtura te tahi atu mau mau auri i paraparau faahou, ua faaroo râ i ta mâua aparauraa. Ua faataa vau ia ratou i ta ˈu mau tiaturiraa e maha aore ra e pae paha hora te maoro! E mauruuru iti rahi to ˈu ia Iehova no ta ˈna tauturu!

Hou vau a haavahia ˈi, ua taparu vau ia Iehova ia horoa mai i te paari e te itoito no te faataa i ta ˈu mau tiaturiraa. Ua imi te auvaha ture i te ravea no te haapapu e otoheraa noa ta ˈu tiaturiraa i te Atua no te ore e rave i te tau faehau. Area i to ˈu pae, ua faaitoito vau i te haapapu i mua i te tiripuna eita te Atua Manahope e mauruuru ia faaô vau i roto i te nuu faehau. Noa ˈtu râ, i te matahiti 1982, ua faaoti te tiripuna i te faahapa ia ˈu e ua faautuahia vau e piti matahiti fare tapearaa.

Ua oaoa roa vau i te iteraa e pae atu â Ite no Iehova to roto i tera fare tapearaa. Noa ˈtu e taime poto roa, i te tahi taime tau minuti noa, e oaoa roa matou i te paraparau no nia i te hoê irava Bibilia. Aita ta matou Bibilia, pinepine râ te fetii e te hoa i te faahiti i te irava Bibilia i roto i ta ratou mau rata. I te tahi taime, e ite atoa matou i te irava Bibilia i roto i te mau papai e ere na te mau Ite no Iehova!

Ua tapea noa i to ˈu faaroo ia Iehova i te fare maˈi

I te matahiti 1983, a rave ai au i te ohipa i roto i te fare tapearaa, te hivihia ra te tahi haaputuraa auri, e piti tǎne te teiaha. Marua mai nei te reira, ua tairi mai ia ˈu na muri, topa ihora vau i raro e to ˈu avae aui tei perehu maitai.

Ua pure au ia Iehova ia horoa mai i te puai no te faaoromai i te mauiui. Ua parau mai te utuutu maˈi o te fare tapearaa, mea maitai aˈe ia tuô ma te parau ino, ua maiti râ vau i te himene i te mau himene arueraa i te Atua a te mau Ite no Iehova.

No te afai ia ˈu i te fare maˈi, ua titauhia ia tere na nia i te pereoo, i te poti e te pereoo a te fare maˈi! E ono ïa hora, mea rahi te toto tei tahe! Ua papu maitai ia ˈu e tâpûhia vau. No reira, ua pure au ia Iehova ia horoa i te paari i te mau taote e ia faatura atoa ratou i ta ˈu faaotiraa eiaha e pâmu i te toto. Ua faataa vau i ta ˈu faaotiraa i te taote, aita râ o ˈna i hinaaro e faaroo. Ua taparuparu râ vau ia ˈna ia faatura i ta ˈu faaotiraa. Ua parau atu vau ua ineine au i te amo i te mau faahopearaa o tera faaotiraa. I te hopearaa, farii mai nei oia i te tâpû ia ˈu ma te ore e pâmu i te toto. Ua topa roa to ˈu hau! Tera râ, ua titauhia ia tâpû i te tahi tuhaa o to ˈu avae aui.

I muri mai i te tâpûraa, mea paruparu roa vau. E rave rahi hebedoma tei mairi, aita te mau taote i papu e ora mai anei au. I te hoê avatea, faaara mai nei te tahi tuati maˈi e maa taa ê tei faaineinehia na ˈu no te faaitoito i to ˈu tino, e maa maitai aˈe i te horoahia i roto i te fare tapearaa. E tuuhia te reira i roto i te faatoetoe tapiri mai. I te mau mahana atoa, e horoahia mai hoê punu taipu meri, te huero moa e maa pata. Ua faaineine to ˈu na metua i tera mau maa i to raua iteraa i te ati i tupu. Hoê anaˈe râ taime te fariiraahia ia afai mai raua i tera mau maa.

Aita te rima o Iehova i poto! (Isaia 59:1) Ua oti anaˈe ratou i te taui i te mau taamu o to ˈu avae, e horoa mai te mau tuati maˈi i te maa ta ratou i faaineine na ratou iho. E ua pau anaˈe te maa i roto i te faatoetoe, na ratou e faaî mai i te reira! Ua haamanaˈo mai te reira i te aamu Bibilia o te vahine ivi, aita te hinu i roto i ta ˈna farii i pau!—Te mau arii 1, 17:14-16.

Ua itoito mǎrû noa mai au. Ua fanaˈo vau i te faaitoitoraa e te tamahanahanaraa rahi na roto i na 107 rata ta to ˈu utuafare e hoa i hapono mai, e ua pahono vau i na rata tataitahi! Ua hapono mai atoa te mau taeae o te tahi atu fare tapearaa i te hoê afata na ˈu!

I muri aˈe e piti avaˈe te maoro, a tahi ra e nehenehe faahou ai e hopu i te pape! E ua hinaaro ru vau e hoˈi i te fare tapearaa no te farerei faahou i te mau taeae!

A faaineine ai te taote i ta ˈu mau papie hou a faarue ai au i te fare maˈi, ua ani mai oia ia haere i roto i ta ˈna piha ohipa. Mea rahi ta ˈna uiraa no nia i ta ˈu mau tiaturiraa. I te hopearaa, ua faaitoito mai oia ia mau maite i ta ˈu mau tiaturiraa. Mea maere roa ia faaroo i tera mau huru parau na roto mai i te vaha o te tahi taata e ohipa ra na te nuu faehau!

I Eperera 1984, ua haere au i te tahi putuputuraa i reira e faaotihia ˈi e matara mai anei au i te fare tapearaa. Ua ani mai te mau tia e faaô anei au i roto i te nuu. Pahono atura vau, i te mea hoê anaˈe avae to ˈu e e hinaaro vau i te turutootoo no te tia, e ere ïa i te mea tano ia ui mai i tera uiraa! Na ô mai nei ratou: “Ahani e piti avae to oe, e na reira anei oe?” Pahono atura vau, eita, ua faaoti papu hoi au i te ore e taiva i to ˈu Atua. Pahono mai nei ratou, e ara maitai ratou ia rave hope roa vau i ta ˈu tau tapearaa. Te mea maere râ, ua faatiahia ia matara mai au i te fare tapearaa e piti avaˈe e 12 mahana hou te taio mahana faataahia!

Ua tapea noa i to ˈu faaroo ia Iehova i rapae i te fare tapearaa

Hoê matahiti i muri aˈe i to ˈu matararaa mai i te fare tapearaa, ua tamauhia to ˈu avae haavare. I te mau poipoi atoa, e hora taatoa no te tamau i te reira! Mea ino roa ˈtu â ïa i te tau toˈetoˈe! Taa ê noa ˈtu i te reira, mea fifi roa ia haamahanahana i te niaraa o te avae i tâpûhia no te mea aita te toto e tere maitai ra. Mai te 19raa o to ˈu matahiti, aita vau i nehenehe faahou e horo, o ta ˈu ïa e tiai ru nei i te rave i roto i te ao apî!—Isaia 35:6.

Mea fifi roa no ˈu ia ite mai i te hoê ohipa, eita hoi te rahiraa e hinaaro e tihepu i te huma mero. Noa ˈtu e avae haavare to ˈu, e ere te ohipa i noaa mai i te mea parahi noa! Ua ohipa vau ei taata tataî pereoo e i muri aˈe, i roto atoa i te ohipa paturaa.

I te matahiti 1986, ua faaipoipo vau i te hoê tuahine nehenehe mau o Svitlana te iˈoa. Mai to ˈu pae, e Ite no Iehova te papa e te mama ruau o Svitlana, to ˈna na metua e o ˈna atoa hoi. Pinepine oia i te parau, oaoa roa o ˈna, i te omuaraa iho â, ua tu to mâua manaˈo no te haafaufaa na mua roa ia Iehova i roto i to mâua faaipoiporaa.

Ua haapii ta mâua tamahine matahiapo o Olia e ta mâua tamaroa o Volodia i te ohipa paturaa a tauturu mai ai ia ˈu ia tataî i te fare tahito i reira matou e ora ˈi. E ere ïa i te mea maere, i to raua paariraa mai, ua oaoa roa raua i te turu i te ohipa paturaa o te mau vahi putuputuraa a te mau Ite no Iehova. Ua rave atoa raua i te tahi taviniraa taa ê no te feia poro evanelia. I teie nei, te tavini ra Olia i roto i te tuhaa paturaa a te mau Ite no Iehova. Area Volodia, e tiaau ïa i roto i ta ˈna amuiraa.

Ua riro noa iho â o Svitlana ei tauturu rahi no ˈu, ua nehenehe ïa vau e haapao maite i ta ˈu mau hopoia i roto i te amuiraa. Ia hoˈi tatou 30 matahiti i muri, mea rahi te amuiraa i Ukraine ua hau atu i te 200 taata poro e hoê aore ra e piti anaˈe tiaau i roto i te amuiraa. Hoê taime i te avaˈe, e faataa na vau i te hopea hebedoma taatoa no te afai haere i te mau papai i te mau amuiraa e vai ra i Ukraine no ropu.

Ua tapea noa i to ˈu faaroo ia Iehova tae roa mai i teie nei

I 2022, ua faaoti mâua Svitlana i te faarue i te oire Kryvyï Rih. I teie nei, te tavini ra mâua i roto i te hoê amuiraa i Auteteria.

Mai to ˈu tamariiraa mai â, ua fanaˈo vau i te hiˈoraa maitai o to ˈu mau papa e mama ruau, e to to ˈu atoa na metua. Ua oaoa ratou noa ˈtu te mau fifi ta ratou i faaruru. E tauturu te Bibilia ia tatou ia haapii no nia i to tatou Atua poiete e mea na reira tatou e faatupu ai i te hoê auhoaraa piri e o ˈna. (Iakobo 4:8) E na tera auhoaraa piri e hopoi mai i te oaoa mau i roto i te oraraa! Te oaoa nei au no te mea i roto i te mau fifi atoa ta ˈu i faaruru, ua nehenehe au e horoa i te hanahana e au ia Iehova!