“Mea puai to ˈu hinaaro e imi i te parau-tia”

Ua fanauhia vau i Eperera 1951 i Nairobi, Kenya. No Initia to ˈu mau metua e no roto raua i te haapaoraa Sikh. E piti vahine ta to ˈu papa. O to ˈu mama ta ˈna vahine matamua, aita râ ta ˈna e parau roto teie tupuraa. Pinepine to ˈu metua vahine e to ˈu metua hoovai i te fanau i te hoê â taime. No reira, ua paari au e e rave rahi taeae e tuahine, e hitu tamarii matou. I 1964, i te 13raa o to ˈu matahiti ua pohe to ˈu papa.

Te imiraa i te parau-tia

A paari ai, pinepine au i te ite i te tatamaˈiraa e te maitiitiraa. Mai ta ˈu i haapii i muri iho, e au to matou oraraa utuafare i te aamu o Lea e Rahela i roto i te Bibilia. Ua ite au i te hamani-ino-raa-hia i ta matou mau tavini no Kenya, e ua haapiihia mai ia faariro ia ratou ei mea haihai aˈe. Ua hinaaro to ˈu papa ia faahoa matou i to matou taata tapiri no Europa no te mea no ˈna mea rahi ta ratou e nehenehe e haapii mai. Tera râ, ua parau mai oia eiaha matou e faahoa i te feia no Afirika, no te mea aita matou e apîhia. Aita atoa matou e nehenehe e faahoa i te mau taata no Pakitana, ei enemi hoi ratou no matou. Mea puai to ˈu hinaaro e imi i te parau-tia, e ua ite au e ere te manaˈo o to ˈu papa i te mea tano.

Ua haamauhia te haapaoraa Sikh i te hopea matahiti 1400 na te aratai faaroo Initia Nanak. Ua farii au i ta Nanak mau haapiiraa mai te manaˈo hoê anaˈe Atua mau. Tera râ, ua ite au i te mau ohipa tano ore i roto i te haapaoraa Sikh.

E ere noa tera te mea i haapeapea ˈi au. I te mea ra hoi e ere te haapaoraa Sikh i te mea tahito, pinepine au i te uiui: “Mai te aha ra na mua aˈe? Eaha te huru haamoriraa ta te Atua i farii i te haamataraa?” I roto i te fare, ua faatautau matou te mau tarena, te vai ra te mau hohoˈa o na 10 aratai Sikh. Tera râ, ua manaˈo vau: “Mea nafea matou i ite ai eaha to ratou hohoˈa mau? Mai te peu hoê anaˈe Atua mau, mai ta te mau aratai haapaoraa i haapii, no te aha ïa matou e te tahi atu e tuturi ai i mua i teie mau hohoˈa?”

I 1965, i te 14raa o to ˈu matahiti, ua haere matou e faaea i Initia. Mea fifi roa te oraraa i ô no te mea mea iti roa ta matou moni. Fatata hoê matahiti i muri iho, ua haamata matou i te haere e faaea i Leicester, Beretane. Tera râ, e piti noa o matou te nehenehe e haere i te hoê â taime, aita e navai ta matou moni.

I te 16raa o to ˈu matahiti, ua haamata vau i te rave i te ohipa, e ere ra i te mea ohie. Ua haere atoa vau i te haapiiraa i te po, ta ˈu ïa i vaiiho i te hoê taime. Tera râ, ua ite au i te ohipa tano ore i roto i ta ˈu ohipa. Ei hiˈoraa, mea aufau maitai-aˈe-hia te mau rave ohipa Beretane i te feia ěê. No reira, ua faatupu matou te mau tamahine i te faaearaa ohipa no te titau ia aufauhia matou mai te mau rave ohipa Beretane. Ua tapi au i te parau-tia no te mau taata atoa.

Te iteraa i te ravea

I 1968, ua farerei au no te taime matamua i te mau Ite no Iehova. E piti tane tei patoto i to ˈu uputa. Ua au roa vau te parau fafau e na te Faatereraa arii e hopoi mai te parau-tia no te mau taata atoa. Ua hoˈi mai hoê o na Ite no Iehova e ta ˈna vahine. Ua haamata vau e to ˈu na tuahine Jaswinder raua Chani i te haapii i te Bibilia. I muri iho noa e ono haapiiraa, ua papu ia matou o Iehova te Atua mau, ta ˈna Parau o te Bibilia ïa e na te Faatereraa arii anaˈe e hopoi mai te parau-tia no te taatoaraa.

Teie nei râ, ua faaruru matou i te patoiraa a to matou utuafare. I muri iho i te poheraa o to ˈu papa ua riro to ˈu taeae te upoo o te utuafare. Na to ˈna mama, to ˈu ïa metua hoovai e turai ia ˈna ia patoi ia matou. Ua taparahi oia i to ˈu na tuahine apî aˈe ia ˈu, o Jaswinder e Chani e ua tue atoa ia raua i te tia ohipa, aita râ o ˈna i na reira i nia ia ˈu no te mea ua naeahia to ˈu matahiti. Ua haere matou i e piti putuputuraa ma te tapuni, e i te hoê mahana, ua rave to ˈu taeae i te Bibilia, ua tutui i te mau api e ua tuu i mua i to raua mata ma te parau atu: “A ani i ta outou Iehova ia tupohe i te auahi!” Noa ˈtu râ, ua hinaaro rahi matou e tavini i te Atua mau hoê roa o Iehova. Tera râ, ia hiˈohia mea fifi roa i roto i to matou tupuraa. No reira, ua opua matou i te horo ê no te imi i te hoê vahi papu aˈe. Ua nafea ïa matou?

Ma te huna, ua haamata matou i te faaherehere i te moni i nia i ta matou maa no te avatea, te pereoo mataeinaa e te hoê tuhaa iti o ta ˈu moni avaˈe. E titauhia ia horoa vau te toea o ta ˈu moni avaˈe no to ˈu metua hoovai. Ua hoo matou toru pute vairaa ahu, ta matou i huna i te tahi atu vahi o te oire a faaî iti noa ˈi te reira. I Me 1972, fatata e 18 matahiti to Jaswinder, ua haaputu matou 260 tara Marite e ua rave ïa matou i te pereoo auahi no te haere i Penzance, i te pae apatoa tooa o te râ o Beretane. I to matou tapaeraa ˈtu, ua niuniu matou i te hoê Ite no Iehova e ua farii maitaihia matou e te mau taeae. E rave rahi huru ohipa ta matou i rave mai te unahinahiraa iˈa. Ua nehenehe ïa matou e tarahu i te hoê fare.

Ua tamau matou i te haapii i te Bibilia e na hoa faaipoipo paari o Harry e Betty Briggs. I Tetepa 1972, a ora noa ˈi matou ma te huna, ua bapetizohia matou i te Piha a te Basileia i Truro. Ua haamata Chani i te taviniraa pionie e na maua Jaswinder e turu ia ˈna i te pae moni.

Te taviniraa i te vahi hinaaro-rahi-hia te tauturu

Noa ˈtu fatata 90 matahiti to Harry e Betty, pinepine raua i te haere e poro i te mau motu o Scilly i te pae apatoa tooa o te râ o Beretane. Ua turai to raua hiˈoraa ia na reira atoa matou. No reira ïa i 1973, i muri iho i ta matou aparauraa e o taeae Skinner, mai ta ˈu i faahiti i te omuaraa, ua ite ïa matou eaha te tia ia rave.

I Tenuare 1974, ua hoo matou i te titeti no te haere i New Delhi, i Initia. I reira, ua farii te taeae Dick Cotterill ia noho matou i roto i te fare mitionare. E pionie tamau o Chani e no maua Jaswinder, ua haa rahi atoa ïa i roto i te taviniraa.

I muri iho, ua haere matou i Pendjab, hoê tuhaa fenua i te pae apatoerau tooa o te râ o Initia. I reira, ua faaea matou tau taime noa i roto i te hoê fare mitionare, i te oire o Chandigarh e i muri iho ua tarahu matou i te hoê fare. I Tetepa 1974, ua haamata vau i te taviniraa pionie tamau e i 1975 ua titau-manihini-hia vau ia rave i te taviniraa pionie taa ê. Ua tauturu te pororaa ia ˈu ia taa e hinaaro-rahi-hia te mau papai na roto te reo Pendjabi ia nehenehe e rave rahi atu â taata e haapii no nia to Iehova here e ta ˈna parau-tia. I 1976, ua titau-manihini-hia matou e toru na te amaa no Initia ia tauturu i roto i te ohipa huriraa na roto i te reo Pendjabi. Aita ta matou matini patapata parau aore ra roro uira, e ere roa ïa i te mea ohie. Ua papai rima noa matou te huriraa e na matou atoa e imi aita anei e hape. I muri iho, ua ohipa matou e te tahi fare neneiraa. Mea tahito hoi te mau matini e e titauhia ia tuu matou hoê reta na muri i te tahi hou a nenei ai i te mau papai.

Ua oaoa noa noa ˈtu te maˈi

Ua taui oioi to matou tupuraa. Ua faaipoipo Jaswinder i te hoê taeae no Kanada e ua haere raua e faaea i ô. Ua faaipoipo Chani i te hoê taeae no Heremani, o te faaea ra i Marite e ua haere raua e faaea i reira. Ua roohia vau i te maˈi rahi e ua hoˈi au i Beretane i te avaˈe Atopa 1976. Ua farii maitai to ˈu mama e to ˈu taeae ia faaea vau ia raua ra i Leicester, aita hoi raua i patoi i te parau mau. E maˈi matau-ore-hia to ˈu i roto i te toto e e titauhia e rave rahi rapaauraa, oia atoa ia iritihia to ˈu ateroa. Ua faaea ïa vau i ta ˈu taviniraa pionie.

Ua taparuparu vau ia Iehova i roto i te pure e ia maitai mai au, e rave faahou ïa vau i te taviniraa pionie. E tera iho â tei tupu! Noa ˈtu ua maˈihia vau i te tahi taime, ua haere au e faaea i Wolverhampton i 1978 no te tavini ei pionie i roto i te hoê vahi tei paraparau-rahi-hia te reo Pendjabi. Ua papai rima matou i te mau titau-manihini-raa no te putuputuraa e ua nenei i te reira i roto i te hoê fare toa o taua vahi ra. I muri iho, ua opere matou te reira i te feia e paraparau ra te reo Pendjabi no te titau manihini ia ratou i te oreroraa parau no te taata atoa. I teie mahana i Beretane, te vai ra e pae amuiraa e e toru pǔpǔ na roto i te reo Pendjabi.

Ua ite te amaa no Beretane ta ˈu ohipa ei taata huri na roto te reo Pendjabi i Initia. I te hopea matahiti 1980, ua ani ïa te amaa ia ohipa vau i te Betela no Lonedona no te faaineine i te mau reta e te ravea roro uira ia neneihia i te mau papai ia au i te huru papairaa Gourmoukhî. Mea ohipa roa vau, mai te haapaoraa i to ˈu mama tei noho ra i te vahi atea, ta ˈu ohipa e ta ˈu taviniraa i te Betela. Mea oaoa roa râ na ˈu tera taviniraa.

I Tetepa 1991, ua titau-manihini-hia vau ia riro ei mero no te utuafare o te Betela e ia huri i te mau papai Bibilia na roto i te reo Pendjabi. Ua maere roa vau no te mea e ere au i te mea aravihi roa, e maˈi atoa to ˈu e ua hau roa to ˈu faito matahiti no te riro ei mero apî o te Betela. Ua horoa mai râ Iehova tera haamaitairaa faahiahia mau. Noa ˈtu mea oaoa ta ˈu taviniraa i te Betela, e maˈi noa to ˈu. E rave rahi taime ta ˈu faaruru-noa-raa i te fifi o te toto a rave noa ˈi i te chimio e te tahi atu ravea rapaauraa. Ua maere roa ta ˈu mau taote hiˈopoaraa toto no te mea ua maitaihia vau. Ua titau manihini mai ratou ia apiti au i te hoê rururaa e 40 tiahapa taote i te fare maˈi rahi no Lonedona. Ua paraparau vau 10 minuti no te faaite no te aha vau i ore ai i farii i te toto. I muri iho, na te hoê tia o te amaa e pahono i ta ratou mau uiraa.

I roto i tera mau taime fifi, ua tauturu to ˈu na tuahine o Jaswinder e Chani ia ˈu ma te here. Te mauruuru rahi atoa ra vau no te tauturu e te hamani maitai a te utuafare o te Betela e a te mau taeae e tuahine. I roto i to ˈu mau tupuraa atoa, ua horoa mai Iehova i te puai ia rave noa vau i ta ˈu taviniraa.—Salamo 73:26.

Maoti te haamaitairaa a Iehova e taoˈahia te taata

I te roaraa o ta ˈu taviniraa i te Betela a 33 matahiti i teie nei, ua nehenehe au e tamata e e ite i “te maitai o Iehova.” (Salamo 34:8; Maseli 10:22) Ua faufaahia vau i te mau hiˈoraa o te mau tavini paari taiva ore. Ia haamanaˈo anaˈe vau, mea oaoa roa te iteraa e ua riro ta ˈu mau piahi Bibilia Pendjabi ei tavini taiva ore a Iehova. Te vai ra te hau rotopu ia ˈu e to ˈu mau fetii piri. Noa ˈtu e ere to ˈu mama e to ˈu taeae i te Ite no Iehova, pinepine râ to ˈu mama i te parau: “Ua pûpû mau â oe i to oe ora i te Atua.” I te taime i hinaaro ai au e vaiiho i te Betela no te haapao i to matou mama tei ruhiruhia, ua na ô mai to ˈu taeae: “Mea maitai te ohipa ta oe e rave ra. A faaea noa i ô.” Noa ˈtu te ora ra to ˈu mama i roto i te hoê fare tei haapao i te feia ruhiruhia e e mea atea i te Betela, e imi iho â vau i te ravea no te haere pinepine e hiˈo ia ˈna.

I te mau taime tei mua vau i te fifi, e parau noa vau i roto ia ˈu: “Eiaha e mǎtaˈu Kamal. E paruru Iehova no oe. E rahi roa ta oe haamaitairaa.” (Genese 15:1) E haamauruuru vau ia Iehova, te “Atua parau-tia” i te tâuˈaraa mai ia ˈu i to ˈu apîraa e i te horoaraa mai i te tahi ohipa faahiahia mau na ˈu. (Isaia 30:18) Te tiai ru nei au i te taime “aita e taata e parau: “E maˈi to ˈu.””—Isaia 33:24.