Ua farii ta ˈu tane i te parau mau “eiaha maoti te parau,” maoti râ to ˈu taiva-ore-raa ia Iehova

Ua fanauhia vau i 1952 i Rumania. Ua bapetizohia to ˈu metua vahine ei Ite no Iehova. Aita râ o ˈna i tamau i te rave i ta ˈna taviniraa. Aita ïa vau i haere i te mau putuputuraa. Hau atu, tei raro aˈe Rumania i te faatereraa Communiste. Ua opanihia te ohipa pororaa a te mau Ite no Iehova, oia atoa te neneiraa o ta ratou mau papai. No reira aita vau i ite o vai Iehova e eaha ta te Bibilia e haapii mau ra, tae atu i te 36raa o to ˈu matahiti. I 1988 râ, ua ora mâua ta ˈu tane o István i te oire o Satu-Mare. I taua taime ra, ua tupu hoê ohipa tei taui roa i to ˈu oraraa.

Hoê aniraa ta ˈu i farii oioi

I te hoê mahana, ua haere mai ta ˈu metua vahine e farerei ia ˈu. Ua parau mai o ˈna: “E haere au e hiˈo ia Tati. Haere mai na muri ia ˈu. I muri iho, e haere tâua na te mau vahi hoohooraa.” Inaha aita e ohipa ta ˈu, ua farii au i te haere na muri ia ˈna.

I to mâua tapaeraa i te fare o to ˈu Tati, ite atura vau e e tupu te putuputuraa a te mau Ite no Iehova i ǒ o ˈna, e e iva ˈtu â taata tei apiti mai. Taa ˈtura ia ˈu e ua rave faahou mama i ta ˈna taviniraa ei Ite no Iehova ma te itoito rahi. Ua putapû roa vau i ta ˈu i faaroo i taua poipoi ra.

I te otiraa o te putuputuraa, ua haere mai te taeae aratai e farerei ia ˈu a parau atu ai: “O vau o János. Ua tapao vau e ua faaroo maite oe i tei parauhia. Ua au anei ia oe ta oe i faaroo i teie mahana?” Ua parau vau ia ˈna e aita vau i haere aˈenei i te hoê putuputuraa mai teie te huru e ua hinaaro vau e hoˈi mai. Ani atura o ˈna: “Hinaaro anei oe e haapii i te Bibilia?” E aniraa tera ta ˈu i farii oioi. Ua taa ia ˈu e na te Atua i aratai ia ˈu i taua mau taata ra.

I te mahana i muri iho, ua haafarerei János ia ˈu ia Ida e na ˈna i faatere i ta ˈu haapiiraa Bibilia. Ua riaria râ vau i te huru o István a ite ai o ˈna e te haapii ra vau i te Bibilia na muri i te mau Ite no Iehova. Ua tamata vau e rave rahi taime i te paraparau ia ˈna no nia i te Bibilia. Aita râ o ˈna i anaanatae aˈe. Ua taa ia ˈu e aita o ˈna i au i ta ˈu e rave ra.

Noa ˈtu râ, ua tamau vau i te haapii i te Bibilia e ua bapetizohia vau i Atete 1989. E maha matahiti i muri iho, ua topa te faatereraa Communiste i Rumania e ua haapohehia ta ratou tia faatere.

Ua rahi atu â te patoiraa

Ua taui te faatereraa o te fenua e ua fanaˈo te mau Ite noa Iehova rahi atu â tiamâraa, inaha ua nehenehe matou e putuputu faahou e e poro faahou i tera e tera fare. No ˈu râ, ua rahi atu â te patoiraa. Ua parau mai o István: “Nehenehe oe e tiaturi i ta oe e hinaaro. Aita râ vau e hinaaro ia haere oe e poro i tera e tera fare.”

Papu, aita vau i faaea i te poro. (Ohipa 4:20) Ua tutava ïa vau i te rave i ta ˈu taviniraa ma te haapao maitai. I te hoê râ mahana, ua ite te mau hoa o István ia ˈu i te pororaa i tera e tera fare e ua haere ratou e faaite i te reira ia István. I to ˈu hoˈiraa ˈtu i te fare, ua tuô mai ta ˈu tane ma te parau: “Te faahaama ra oe ia ˈu e i to tâua utuafare taatoa!” Ua tuu o ˈna i te hoê tipi i to ˈu arapoa e ua parau mai e haapohe o ˈna ia ˈu ia ore au e faaea i te poro.

Ua tamata vau i te haaferuri ia István e ua haapapu atu vau i to ˈu here ia ˈna. E au ra e ua tamǎrû ta ˈu mau parau ia ˈna. I te hoê râ mahana, aita vau i farii i te apiti i te hoê peu haapaoraa i te faaipoiporaa o te hoê fetii. Riri rahi atura o ˈna e ua taora parau noa mai o ˈna i te mau parau mauiui mau.

Ma te peapea, ua titauhia ia ˈu ia faaoromai i to István riri 13 matahiti i te maoro. I taua taime ra, ua parau mai o ˈna e ua hinaaro o ˈna ia faataa ê mâua. I te tahi mau taime, e ponao o ˈna i te uputa e aita o ˈna i hinaaro ia tomo vau i roto i te fare. I te tahi atu taime, ua parau mai o ˈna ia rave au i ta ˈu mau tauihaa e ia haere ê.

Eaha tei tauturu ia ˈu ia faaoromai i tera mau tupuraa fifi mau? Ua pure au ia Iehova no te tauturu mai ia faaite noa i te mǎrû e ua ite iho â vau i ta ˈna turu. (Salamo 55:22) Ua tauturu atoa mai te amuiraa. Ua faaitoito atoa mai te mau matahiapo e te tahi mau tuahine feruriraa paari ia ore au e faarue i ta ˈu taviniraa. Ua haamanaˈo mai ratou i ta te Bibilia e parau ra no nia i te mau vahine tei ite i to ratou tane i te tauiraa “eiaha maoti te parau,” maoti râ i to ratou taiva-ore-raa ia Iehova. (Petero 1, 3:1) A mairi ai te tau, ua tupu tera mau parau i roto i to ˈu oraraa.

Hoê tauiraa rahi

I 2001, ua roohia István i te hoê maˈi o te roro e aita o ˈna i nehenehe e hahaere faahou. Ua mau o ˈna i te fare maˈi hoê avaˈe i te maoro e ua vai o ˈna e rave rahi hebedoma i te hoê pu o te tauturu i te taata ia taahi faahou. I taua area taime ra, ua faaea noa vau i pihai iho ia ˈna. Ua faatamaa e ua paraparau vau ia ˈna. Ua haapao maite atoa vau ia fanaˈo o ˈna i ta ˈna e hinaaro mau ra.

Ua haere mai atoa te mau taeae e tuahine e farerei ia ˈna. Ite atura István i te here e te aroha hamani maitai o te mau taeae. E rave rahi tei tauturu mai no te ohipa i te fare. E ua ineine noa te mau matahiapo i te tamahanahana e i te turu ia mâua.

Ua putapû roa István i tera mau farereiraa e ua haamata o ˈna i te haama i to ˈna huru i nia ia ˈu i na mua ˈtu. Ua tapao atoa o ˈna e aita hoê aˈe hoa to ˈna tei haere mai e hiˈo ia ˈna. No reira, i to ˈna faarueraa i te fare maˈi, ua parau István: “Hinaaro vau e haapii i te Bibilia e e riro ei Ite no Iehova.” Taˈi atura vau no to ˈu oaoa rahi.

I Me 2005, ua bapetizohia o István. Inaha aita o ˈna i nehenehe e hahaere, ua tuuhia o ˈna i nia i te hoê parahiraa turairai e ua aratai te mau taeae ia ˈna i te vahi bapetizoraa. Ua amo mǎrû mai ratou ia ˈna i roto i te pape a bapetizo atu ai ia ˈna. Ua riro István ei taata poro itoito rahi. Te haamanaˈo ra vau i te mau taime i poro ai au na muri ia ˈna. Auê ïa taime oaoa! Ia feruri au i te tau i patoi noa na o ˈna ia ˈu i te pororaa i te parau mau Bibilia. I teie nei, te poro ra o ˈna i te parau apî oaoa ia vetahi ê na muri ia ˈu!

Ua here roa István ia Iehova e ua faaohipa o ˈna i to ˈna taime no te haapii e no te tamau aau i te mau irava Bibilia. Mea au roa na ˈna e paraparau no nia i tera mau irava Bibilia e te tahi atu mau taeae e tuahine. Ua faaohipa o ˈna i tera mau taime no te faaitoito ia ratou.

Ua ino roa ˈtu â râ to István ea. Ua tupu e rave rahi fifi i roto i to ˈna roro. Aita o ˈna i nehenehe faahou e paraparau e i muri iho, aita o ˈna i hauti faahou. Aita roa ˈtu râ o ˈna i faaea i te tavini ia Iehova. Ua tamau o ˈna i te taio e i te haapii i te Bibilia ia au i tei maraa ia ˈna. Ia haere mai te mau taeae e tuahine e farerei ia ˈna, e faaohipa o ˈna i te hoê matini roro uira no te tauaparau e o ratou e no te faaitoito atu. Ua parau hoê taeae: “Mea au roa na ˈu e haere e hiˈo ia István. E faaitoito noa o ˈna ia ˈu.”

Tera râ, i Titema 2015, ua pohe o István. Ua mauiui roa vau. Tera râ, ua fanaˈo vau i te hau o te feruriraa no te mea maa taime hou o ˈna a pohe ai, ua riro o István ei hoa no Iehova. Ua oaoa roa vau i te iteraa i te reira. Aita ta ˈu tane e to ˈu mama e moˈehia ia Iehova no te mea tei roto raua i to ˈna mehara. Auê i te oaoa ia tauahi faahou ia raua e ia farii ia raua i roto i te ao apî parau-tia o Iehova!

Ua haere mâua to ˈu mama e hiˈo i to ˈu Tati a 35 matahiti i teie nei. Aita roa ˈtu te reira e moehia ia ˈu. Ua hau atu vau i te 70 matahiti e te tavini nei au ei pionie tamau. No ˈu, e ravea tera no te haamauruuru ia Iehova no te mau mea atoa ta ˈna i horoa mai. (Salamo 116:12) Ua tauturu o ˈna ia ˈu ia vai taiva ore e ia vai hau noa noa ˈtu te patoiraa. E noa ˈtu te mau fifi, ua taa ia ˈu e e nehenehe te mau tupuraa o te oraraa e taui. Aita vau i manaˈo aˈe e e farii ta ˈu tane i te parau mau “eiaha maoti te parau,” maoti râ to ˈu taiva-ore-raa ia Iehova.