E nafea ia ore e mǎtaˈu i te pohe?
Te pahonoraa a te Bibilia
E mǎtaˈu iho â tatou i te pohe mai ia tatou e mǎtaˈu i te hoê enemi ino, e e paruru tatou i to tatou ora. (Korinetia 1, 15:26) Tera râ, ia rahi roa anaˈe te mǎtaˈu i te pohe no te mau haapiiraa haavare i haapiihia, e “faatîtîhia” ïa te taata “i te roaraa o to ratou oraraa.” (Hebera 2:15) Ia ite outou i te parau mau, e faatiamâ te reira ia outou i te mǎtaˈu i te pohe a nehenehe atu ai outou e ora ma te oaoa.—Ioane 8:32.
Te parau mau no nia i te pohe
Aita te feia pohe i ite i te haapaoraa. (Salamo 146:4) Te faaau ra te Bibilia i te pohe i te taoto. Eiaha ïa e mǎtaˈu ia mauiui aore ra ia haamauiuihia tatou i roto i te pohe.—Salamo 13:3; Ioane 11:11-14.
Eita te feia pohe e nehenehe e haamauiui ia tatou. Te feia atoa tei hinaaro noa na e hamani ino ia tatou, te “parahi” ra ratou i roto i te “pohe” ma te puai ore. (Maseli 21:16) Te parau ra te Bibilia: “To ratou riri, e to ratou feii, ua mou anaˈe ïa.”—Koheleta 9:6.
E ere te pohe te hopea o te mau mea atoa. Maoti te tia-faahou-raa, e faahoˈi mai te Atua i te taata i te ora.—Ioane 5:28, 29; Ohipa 24:15.
Ua fafau te Atua i te hoê tau “e ore roa te pohe.” (Apokalupo 21:4) Te parau ra te Bibilia no nia i tera mahana: “E parahi te feia parau-tia i nia i te fenua, e parahi tamau â ratou i reira,” ma te ore e mǎtaˈu faahou i te pohe.—Salamo 37:29.