Te haapiiraa i te oaoa i roto i te mǎtaˈuraa ia Iehova
“A haere mai na, e te mau tamarii na, e faaroo mai ia ˈu; e haapii au ia outou ia mǎtaˈu ia Iehova.”—SALAMO 34:11.
1. Nafea te mǎtaˈu e faaorehia ˈi e te Basileia o te Atua, te faataa râ anei te reira e e faaore-roa-hia te huru mǎtaˈu atoa?
TE HINAARO nei te mau taata no te mau vahi atoa i te tiamâraa mai i te mǎtaˈu—te mǎtaˈu i te taparahiraa taata e te haavîraa uˈana, te mǎtaˈu i te ereraa i te ohipa, te mǎtaˈu i te maˈi atâta. Auê ïa mahana rahi ia tupu mau â teie tiamâraa i raro aˈe i te Basileia o te Atua! (Isaia 33:24; 65:21-23; Mika 4:4) Teie râ, eita te mǎtaˈu atoa e faaorehia, eita atoa e tia ia tatou ia imi i te faaatea ê i te mǎtaˈu atoa i roto i to tatou oraraa i teie nei mahana. Te vai ra te mǎtaˈu maitai e te mǎtaˈu ino.
2. (a) Eaha te huru mǎtaˈu ino, e eaha te huru mǎtaˈu maitai? (b) Eaha te mǎtaˈu paieti, e nafea te mau irava faahitihia e faataa ˈi i te reira?
2 E nehenehe te mǎtaˈu e riro mai te hoê raau taero no te feruriraa, ma te haafifi i te aravihi o te hoê taata ia feruri. E nehenehe te reira e faaino i te itoito e e faaore i te tiaturiraa. Ua farereihia paha teie huru mǎtaˈu e te hoê taata o tei haamǎtaˈuhia i te pae tino e te hoê enemi. (Ieremia 51:30) Ua itehia paha te reira e te hoê taata o te haafaufaa rahi roa i te noaaraa mai ia ˈna te farii maitai o te tahi mau taata e mana to ratou. (Maseli 29:25) Te vai atoa nei râ te mǎtaˈu tia, inaha o te tapea ia tatou ia rave i te hoê mea ma te feruri ore, e o te haamauiui ia tatou iho. E titau te mǎtaˈu paieti hau atu â i te reira. O te mǎtaˈu ïa ia Iehova, te hoê faatura hohonu ia ˈna, apitihia e te hoê mǎtaˈuraa tia ia haapeapea ia ˈna. (Salamo 89:7) No roto mai teie mǎtaˈu i te haapeapearaa i te Atua i te mauruuru no to ˈna aroha e to ˈna hamani maitai. (Salamo 5:7; Hosea 3:5) E faaô atoa te reira i te hoê papuraa e, o Iehova te Haava Rahi e te Mana hope, e puai to ˈna no te faautua, tae roa ˈtu i te haapohe, i te feia o te patoi ra i te auraro ia ˈna.—Roma 14:10-12.
3. Nafea te mǎtaˈu ia Iehova e taa ê ai i tei taaihia e vetahi mau atua etene?
3 E mea tia te mǎtaˈu paieti, e ere râ i te hoê mehameha faito ore. E turai oia i te hoê taata ia faaite i te huru papu no te mea tia, eiaha ia faahapahia ma te raveraa i te mea hape. E ere mai te mǎtaˈu taaihia e te atua tahito Heleni ra o Phobos, faataahia mai te hoê atua riaria tei faatupu i te mehameha. E e ere atoa mai te mǎtaˈu taaihia e te ruahine Hindou ra o Kali, o tei faahohoˈahia i te tahi mau taime mai te hoê atua hiaai toto, o te faaohipa i te mau tino pohe, te mau ophi, e te mau apu upoo ei mau taoˈa faanehenehe. E faatupu te mǎtaˈu paieti i te anaanatae; eita oia e faaotohe. Ua anoihia oia e te here e te mauruuru. No reira, e haafatata te mǎtaˈu paieti ia tatou ia Iehova ra.—Deuteronomi 10:12, 13; Salamo 2:11.
No te aha ua noaa ia vetahi, area i te tahi pae ra aita ïa
4. Mai tei faataahia e te aposetolo Paulo, eaha te inoraa o te huitaata nei, e eaha te tumu o te reira?
4 Aita te huitaata i te taatoaraa i faatupu i te huru maitai o te mǎtaˈu paieti. I roto i te Roma 3:9-18, te faataa ra te aposetolo Paulo e ua atea ê roa te mau taata i te huru taata tia roa no te matamua ra. I muri aˈe i te faataaraa e tei raro aˈe te taatoaraa i te hara, te faahiti ra o Paulo i te mau Salamo, ma te parau e: “Aore roa e taata parau-tia e hoê iti aˈe.” (A hiˈo Salamo 14:1.) I muri iho te horoa ra oia i te tahi mau haapapuraa na roto i te faahitiraa i te tahi mau ohipa mai te haapao ore o te huitaata i roto i te imiraa i te Atua, to ratou ereraa i te rave i te parau maitai, ta ratou mau parau haavare, te tuhi, e te haamaniiraa toto. Auê ïa faataaraa tano maitai no teie nei ao e! Aita te rahiraa o te mau taata e anaanatae ra i te Atua e i ta ˈna mau opuaraa. E faaherehere-pinepine-hia te tahi huru hamani maitai no te mau tupuraa i reira e hoonahia ˈi te tahi mea. Mea matau-roa-hia te mau parau haavare e te faufau. Te faaitehia ra te haamaniiraa toto eiaha noa i roto i te mau parau apî, i roto atoa râ i te faaanaanataeraa manaˈo. Eaha te tumu o teie huru tupuraa? Parau mau e huaai tatou paatoa no te taata hara ra o Adamu, ia faariro râ te mau taata i te mau ohipa faataahia e te aposetolo Paulo mai to ratou huru oraraa, te vai ra te tahi atu â tumu. Te faataa ra te irava 18 e eaha râ te reira, i te na ôraa e: “Aore roa e mǎtaˈu i te Atua i mua i to ratou mata.”—A hiˈo Salamo 36:1.
5. No te aha ua noaa ia vetahi te mǎtaˈu paieti, area i te tahi pae ra aita ïa?
5 No te aha râ ua noaa ia vetahi mau taata te mǎtaˈu paieti, area i te tahi pae ra aita ïa? Ma te faataa ohie noa, no te mea te faatupu nei vetahi mau taata i te reira, area te tahi pae ra aita ïa. Aita te hoê taata i rotopu ia tatou i fanauhia mai e te reira, te vai nei râ i roto ia tatou paatoa te aravihi ia faatupu i te reira. Ua riro te mǎtaˈu paieti ei mea o te tia ia haapiihia. I muri iho, ia riro mai te reira ei puai rahi o te turai ia tatou i roto i to tatou oraraa, e titauhia tatou ia atuatu i te reira.
Te hoê titau-manihini-raa au mau
6. Na vai e faatae ra ia tatou i te titau-manihini-raa faahitihia i roto i te Salamo 34:11, e nafea teie irava e faaite ai e e tia ia haapiihia te mǎtaˈu paieti?
6 Te faataehia ra te hoê titau-manihini-raa au mau ia haapii i te mǎtaˈu ia Iehova ia tatou i roto i te Salamo 34. E salamo ïa na Davida. E o vai ta Davida e faahohoˈa ra? Maori ra ïa o te Fatu ra o Iesu Mesia. Ua papaihia te hoê parau tohu ta te aposetolo Ioane i faaohipa i nia ia Iesu iho â râ i te irava 20 o teie salamo. (Ioane 19:36) I to tatou nei tau, na Iesu e faatae ra i te hoê titau-manihini-raa mai teie i roto i te irava 11: “A haere mai na, e te mau tamarii na, e faaroo mai ia ˈu; e haapii au ia outou ia mǎtaˈu ia Iehova.” Te faaite maitai ra te reira e ua riro te mǎtaˈu paieti ei mea o te nehenehe e haapiihia, e ua tia roa ia Iesu Mesia ia haapii mai ia tatou. No te aha ïa?
7. No te aha ua riro iho â râ o Iesu ei taata i nia ia ˈna e haapiihia ˈi te mǎtaˈu paieti?
7 Ua ite Iesu Mesia i te faufaaraa o te mǎtaˈu paieti. Te parau ra te Hebera 5:7 no nia ia ˈna e: “Ua pûpû hoi oia i te pure i tana oraraa ra, i te aniraa ˈtu ia ˈna ma te oto rahi e te roimata, i tei tia ia faaora ia ˈna mai te pohe maira, ei faaroohia oia i ta ˈna i mǎtaˈu ra.” Ua riro teie mǎtaˈu paieti ei huru maitai ta Iesu Mesia i faatupu na mua roa ˈˈe a faaruru ai i te pohe i nia i te hoê pou haamauiuiraa. A haamanaˈo e, i roto i te Maseli pene 8, te faataahia ra te Tamaiti a te Atua mai te huru iho o te paari. E i roto i te Maseli 9:10, te na ôhia ra e: “O te matamua o te paari ra, o te mǎtaˈu ïa ia Iehova.” Ua riro ïa teie mǎtaˈu paieti ei tuhaa faufaa roa o te ihotaata o te Tamaiti a te Atua na mua roa ˈˈe a haere mai ai i nia i te fenua.
8. I roto i te Isaia 11:2, 3, eaha ta tatou e haapii ra no nia i te mǎtaˈu ia Iehova?
8 Hau atu, no nia ia Iesu ei Arii Mesia, te faataa ra te Isaia 11:2, 3 e: “E vai â te varua o Iehova i nia ia ˈna; te varua o te paari e no te ite; te varua faaaˈo e no te puai; te varua no te ite, e no te mǎtaˈu ia Iehova; e rahi hoi to ˈna ite i te mǎtaˈu ia Iehova.” Auê ïa te nehenehe o teie parau e! E ere roa ˈtu te mǎtaˈu ia Iehova i te hoê mea au ore. E haamaitai e e faaitoito oia. E huru maitai ïa o te parare i te mau vahi atoa i reira te Mesia e faatere ai ei Arii. Te faatere maira oia, e no te feia atoa o tei haaputuputuhia ei mau taata na ˈna, te horoa ra oia i te haapiiraa na roto i te mǎtaˈu ia Iehova. Nafea ïa?
9. Nafea Iesu Mesia i te haapiiraa ia tatou no nia i te mǎtaˈu ia Iehova, e eaha ta ˈna e hinaaro ra ia huti mai tatou?
9 Na roto i te mau putuputuraa a ta tatou amuiraa, te mau rururaa, e te mau tairururaa, te tauturu ra Iesu, ei Upoo faatavaihia o te amuiraa e ei Arii Mesia, ia papu maitai ia tatou e eaha te mǎtaˈu paieti e no te aha e faufaa-rahi-hia ˈi i te reira. No reira te tutava ra oia i te faahohonu â i to tatou mauruuru no te reira inaha e haapii tatou i te oaoa i roto i te mǎtaˈuraa ia Iehova mai ta ˈna atoa e rave ra.
E rave anei outou i te mau tutavaraa?
10. Ia haere anaˈe tatou i te mau putuputuraa kerisetiano, eaha te tia ia tatou ia rave mai te peu e te hinaaro ra tatou e taa i te mǎtaˈu ia Iehova?
10 Papu maitai, eita te taio-noa-raa i te Bibilia aore ra te haereraa i te mau putuputuraa i roto i te hoê Piha no te Basileia e haapapu e e mǎtaˈu paieti to tatou. A tapao na e eaha te titauhia ra ia tatou ia rave mai te peu e te hinaaro mau ra tatou e taa i te mǎtaˈu ia Iehova. Te parau ra te Maseli 2:1-5 e: “E tau tamaiti, ia farii mai oe i ta ˈu nei parau, e ia vaiiho maite i ta ˈu parau i pihai iho ia oe; ia fariu mai i to tariˈa i te paari, e ia imi to aau i te ite ra; ia titau hua oe i te haapao maitai, e ia faateitei i to reo ia noaa te ite ra; ia imi hua oe ia ˈna ma te ario ra, e ia paheru hua oe ia ˈna, mai te taoˈa hunahia ra; e ite ïa oe i te mǎtaˈu ia Iehova, e noaa ïa ia oe te ite i te Atua.” No reira ia haere anaˈe tatou i te mau putuputuraa, e tia ia tatou ia ara maite i te mea e parauhia ra, ia rave i te tutavaraa mau no te haamau i te feruriraa i nia i te reira e no te haamanaˈo i te mau manaˈo faufaa, ia feruri maite i nia i te mau manaˈo hohonu ta tatou e faatupu nei no Iehova o te mana i nia i to tatou haerea i nia i te aˈoraa i horoahia—e, e haamahora anaˈe i to tatou mafatu. E taa ïa ia tatou i te mǎtaˈu ia Iehova.
11. No te atuatu i te mǎtaˈu paieti, eaha te tia ia tatou ia rave ma te aau rotahi e te tamau?
11 Te huti ra te Salamo 86:11 i te ara-maite-raa i nia i te tahi atu tupuraa faufaa roa, oia hoi te pure. “E haapii mai oe, e Iehova, i to oe ra eˈa, e haapao vau i ta oe ra parau mau,” ta te papai salamo i pure. “Ia rotahi maite hoi tau aau i te mǎtaˈuraa i to iˈoa na.” Ua farii Iehova i teie pure, i te mea e ua haapapai oia i te reira i roto i te Bibilia. No te atuatu i te mǎtaˈu paieti, e tia atoa ia tatou ia pure ia Iehova no ta ˈna tauturu, e e faufaahia tatou na roto i te pureraa ma te aau rotahi e te tamau.—Luka 18:1-8.
E faatupu to outou mafatu i te faahopearaa
12. No te aha e tia ia horoahia te hoê ara-maite-raa taa ê no te mafatu, e eaha ta te reira e titau ra?
12 Te vai ra te tahi atu mea o te tia ia tapao i roto i te Salamo 86:11. Aita te papai salamo i ani noa i te hoê ite i te pae feruriraa no nia i te mǎtaˈu i te Atua. Te faahiti ra oia i to ˈna mafatu. E faatupu te atuaturaa i te mǎtaˈu paieti i te mafatu taipe, o te titau ra i te ara-maite-raa taa ê no te mea o te huru taata ïa mai te itehia ra i roto i ta tatou mau ohipa atoa o te oraraa e o to tatou ïa mau manaˈo, to tatou mau haerea, to tatou mau hinaaro, to tatou mau tumu hohonu, to tatou mau tapao.
13. (a) Eaha te nehenehe e faaite e ua amahamaha te mafatu o te hoê taata? (b) A atuatu noa ˈi tatou i te mǎtaˈu paieti, no teihea tapao e tia ia tatou ia rohi?
13 Te faaara ra te Bibilia ia tatou e e nehenehe te mafatu o te hoê taata e faaamahahia. E nehenehe oia e haavarevare. (Salamo 12:2; Ieremia 17:9) E nehenehe oia e turai ia tatou ia apiti atu i roto i te tahi mau ohipa maitatai—te haereraa i te mau putuputuraa a te amuiraa e i roto i te pororaa—ia here atoa râ paha i te tahi mau tuhaa o te huru oraraa o te ao nei. E tapea paha te reira ia tatou ia pûpû mau ia tatou ma te nephe taatoa no te turu i te mau faufaa o te Basileia. I muri iho e tamata paha te mafatu haavarevare i te haapapu ia tatou e, inaha, te ohipa ra tatou mai e rave rahi mau taata. Aore ra peneiaˈe i te fare haapiiraa aore ra i ta tatou vahi raveraa ohipa, e mana te mǎtaˈu taata i nia i te mafatu. Ei faahopearaa, i roto i teie mau huru tupuraa e haamarirau paha tatou i te faaite ia tatou iho ei Ite no Iehova e e rave atoa paha tatou i te tahi mau ohipa o te ore e tano no te mau kerisetiano. I muri aˈe râ, e haapeapea to tatou haava manaˈo ia tatou. Eita ïa tatou e hinaaro e riro mai mai teie huru taata. No reira, ma te apiti i te papai salamo, e pure tatou ia Iehova e: “Ia rotahi maite hoi tau aau i te mǎtaˈuraa i to iˈoa na.” Te hinaaro nei tatou ia haapapu te huru taata taatoa no roto mai e, mai te itehia ra i roto i ta tatou mau ohipa atoa o te oraraa, ‘te mǎtaˈu nei tatou i te Atua mau e te haapao nei i ta ˈna parau.’—Koheleta 12:13.
14, 15. (a) I te tohuraahia i te faahoˈi-faahou-raa ia Iseraela mai te faatîtîraa mai i Babulonia, eaha ta Iehova i tǎpǔ no te horoa i to ˈna nunaa? (b) Eaha ta Iehova i rave no te haamau i te mǎtaˈu i te Atua i roto i te mafatu o to ˈna nunaa? (c) No te aha ua fariu ê Iseraela i te mau eˈa o Iehova?
14 Ua tǎpǔ mai Iehova e e horoa oia i teie huru mafatu mǎtaˈu i te Atua i to ˈna nunaa. Ua tohu oia i te faahoˈi-faahou-raa ia Iseraela e ua parau oia e, mai te taiohia ra i roto i te Ieremia 32:37-39 e: “E aratai faahou mai au ia ratou i teie nei vahi, e haaparahi au ia ratou i ǒ nei ma te ora. Ei taata hoi ratou no ˈu, e ei Atua vau no ratou. E horoa ˈtu vau i te aau hoê, e te parau hoê na ratou, ia mǎtaˈu tamau mai ratou ia ˈu, ia maitai ratou, e ta ratou mau tamarii a muri aˈe.” I te irava 40, te haapapuhia ra te parau tǎpǔ a te Atua: “E tuu hoi au i te mǎtaˈu ia ˈu i roto i to ratou aau, e ore hoi ratou e faarue mai ia ˈu ra.” I te matahiti 537 hou to tatou nei tau, ua faahoˈi Iehova ia ratou i Ierusalema mai ta ˈna i tǎpǔ. Eaha râ ïa no te toea o teie parau tǎpǔ—oia hoi e horoa oia na ratou ‘te hoê mafatu ia mǎtaˈu noa ratou ia ˈna’? No te aha te nunaa tahito o Iseraela i fariu ê ai ia Iehova i muri aˈe i to ˈna faahoˈiraa ia ratou mai Babulonia mai, e ua haamouhia ïa to ratou hiero i te matahiti 70 o to tatou nei tau, o tei ore roa i patu-faahou-hia?
15 E ere no te tahi paruparu no ǒ mai ia Iehova ra. Ua rave mau Iehova i te mau taahiraa avae no te tuu i te mǎtaˈu i te Atua i roto i te mafatu o to ˈna nunaa. Na roto i te aroha ta ˈna i faaite i to ˈna faaoraraa ia ratou mai Babulonia mai e to ˈna faahoˈiraa ia ratou i to ratou fenua, ua horoa oia ia ratou i te haapapuraa rahi e ia hiˈo ratou ia ˈna ma te faatura hohonu. Ua haapapu faahou te Atua i te reira ma te mau faahaamanaˈoraa, te aˈoraa, e te faahaparaa na roto i te arai o te mau peropheta Hagai, Zekaria, e Malaki; na roto ia Ezera, o tei tonohia i rotopu ia ratou ei orometua haapii; na roto i te Tavana ra o Nehemia; e na roto i te Tamaiti iho a te Atua. I te tahi mau taime ua faaroo te nunaa. Ua na reira ratou i to ratou patu-faahou-raa i te hiero o Iehova na roto i te faaueraa a Hagai e a Zekaria e i to ratou tiavaruraa i te mau vahine ěê i te anotau o Ezera. (Ezera 5:1, 2; 10:1-4) I te rahiraa râ o te taime aita ratou i auraro. Aita ratou i puai no nia i te haapao-maite-raa; aita ratou i tamau noa i te faaroo i te aˈoraa; aita ratou i tamau noa i te haamahora i to ratou mafatu. Aita te mau ati Iseraela i atuatu i te mǎtaˈu paieti, e ei faahopearaa, aita e puai rahi e turai ra ia ratou i roto i to ratou oraraa.—Malaki 1:6; Mataio 15:7, 8.
16. I roto i to vai mafatu to Iehova haamauraa i te mǎtaˈu paieti?
16 Teie râ, ua manuïa te parau tǎpǔ a Iehova e tuu i te mǎtaˈu paieti i roto i te mafatu o to ˈna nunaa. Ua fafau oia i te hoê faufaa apî e te Iseraela i te pae varua, te mau kerisetiano ta ˈna i pûpû atu i te hoê tiaturiraa no te raˈi. (Ieremia 31:33; Galatia 6:16) I te matahiti 1919, ua faaora te Atua ia ratou mai te faatîtîraa mai a Babulonia Rahi, te hau emepera o te haapaoraa hape na te ao nei. Ua haamau maitai oia i roto i to ratou mafatu i te mǎtaˈu ia ˈna. Ua hopoi mai te reira i te mau haamaitairaa faahiahia mau no ratou e no te “feia rahi roa,” e tiaturiraa to ratou no te ora i nia i te fenua ei feia aiˈa o te Basileia. (Ieremia 32:39; Apokalupo 7:9) Ua ô atoa te mǎtaˈu ia Iehova i roto i to ratou mafatu.
Nafea te mǎtaˈu paieti ia haamauhia i roto i to tatou mafatu
17. Nafea Iehova e tuu ai i te mǎtaˈu paieti i roto i to tatou mafatu?
17 Nafea to Iehova haamauraa i teie mǎtaˈu paieti i roto i to tatou mafatu? Na roto i te ohipa o to ˈna varua. E eaha te mea e vai ra ia tatou ra o te riro ei hotu no te varua moˈa? O te Bibilia ïa, te Parau faauruahia a te Atua. (Timoteo 2, 3:16, 17) Na roto i te ohipa ta ˈna i rave i tahito ra, na roto i ta ˈna mau auraa e ta ˈna mau tavini i teie nei i roto i te faatupuraa i ta ˈna Parau tohu, e na roto i te mau parau tohu o te mau mea e haere mai ra, te horoa ra Iehova i te hoê niu papu no tatou paatoa no te faatupu i te mǎtaˈu paieti.—Iosua 24:2-15; Hebera 10:30, 31.
18, 19. Nafea te mau tairururaa, te mau rururaa, e te mau putuputuraa a te amuiraa e tauturu ai ia tatou ia noaa te mǎtaˈu paieti?
18 E mea anaanatae ia tapao e, mai tei papaihia i roto i te Deuteronomi 4:10, ua parau Iehova ia Mose e: “A haaputuputu mai i te mau taata na, e faaite atu vau ia ratou i ta ˈu nei parau; ei haapiiraa ia ratou ia mǎtaˈu mai ratou ia ˈu, i to ratou mau mahana atoa i te ao nei, e ia haapii atoa hoi ratou i ta ratou mau tamarii.” Oia atoa i teie nei mahana, ua rave Iehova e rave rahi mau faanahoraa no te tauturu i to ˈna nunaa ia haapii i te mǎtaˈu ia ˈna. I te mau tairururaa, te mau rururaa, e te mau putuputuraa a te amuiraa, e faahaamanaˈo tatou i te haapapuraa o te aroha hamani maitai o Iehova e to ˈna hamani maitai. O ta tatou ïa e rave ra ia haapii tatou i te buka Te taata rahi roa ˈˈe i ora aˈenei. Nafea teie haapiiraa i te haaputapûraa ia outou e i to outou haerea i mua i te aro o Iehova? A ite ai outou i te mau tuhaa rave rau o te ihotaata rahi o to tatou Metua i nia i te raˈi faahohoˈahia na roto i ta ˈna Tamaiti, aita anei te reira e haapuai ra i to outou hinaaro ia ore roa e haapeapea i te Atua?—Kolosa 1:15.
19 I ta tatou mau putuputuraa, te haapii atoa ra tatou i te mau faatiaraa no nia i te faaoraraa a Iehova i to ˈna nunaa i te mau tau tahito. (Samuela 2, 7:23) A tuatapapa ˈi tatou i te buka bibilia o te Apokalupo ma te tauturu o te buka Te Apokalupo—Ua fatata roa to ˈna tatararaa rahi hopea nei!, te haapii ra tatou no nia i te mau orama tohu o tei faatupu-aˈena-hia i teie nei senekele 20 e no nia i te mau tupuraa mehameha o te haere maira. No nia i teie mau ohipa atoa a te Atua, te faataa ra te Salamo 66:5 e: “E haere mai e hiˈo i te mau ohipa a te Atua! E mea mataˈutaˈu ta ˈna i rave i te taata nei.” Oia mau, ia hiˈohia ma te tano, te haamau ra teie mau ohipa a te Atua i roto i to tatou mafatu i te mǎtaˈu ia Iehova, te hoê faatura hohonu. No reira e nehenehe tatou e ite e mea nafea to te Atua ra o Iehova i te faatupuraa i ta ˈna parau tǎpǔ: “E tuu hoi au i te mǎtaˈu ia ˈu i roto i to ratou aau, e ore hoi ratou e faarue mai ia ˈu ra.”—Ieremia 32:40.
20. Ia haamau-hohonu-hia te mǎtaˈu paieti i roto i to tatou mafatu, eaha te titauhia ra ia tatou ia rave i to tatou pae?
20 Teie râ, papu maitai e eita te mǎtaˈu paieti e ô noa mai i roto i to tatou mafatu mai te peu e eita tatou e tutava. Eita te mau faahopearaa e tupu noa mai. Te rave ra Iehova i ta ˈna tuhaa. E tia ia tatou ia rave i ta tatou na roto i te atuaturaa i te mǎtaˈu paieti. (Deuteronomi 5:29) Aita te mau Iseraela i te pae tino i manuïa i te raveraa i te reira. Ma te tiaturi râ ia Iehova, ua fanaˈo aˈena te mau Iseraela i te pae varua e to ratou mau hoa e rave rahi mau haamaitairaa o te faataehia i nia i te feia e mǎtaˈu ra i te Atua. E tuatapapa tatou i te tahi o teie mau haamaitairaa i roto i te tumu parau i muri iho.
Nafea outou ia pahono mai?
◻ Eaha te mǎtaˈu paieti?
◻ Nafea tatou i te haapiiraahia ia oaoa i roto i te mǎtaˈuraa ia Iehova?
◻ Ia noaa te mǎtaˈu paieti, eaha te tutavaraa e titauhia i to tatou pae?
◻ No te aha e tia te noaaraa mai te mǎtaˈu paieti ia faaohipahia te mau tuhaa atoa o to tatou mafatu taipe?
[Hohoˈa i te api 12, 13]
E titauhia te haapiiraa ma te haapao maitai no te taa i te mǎtaˈu ia Iehova